Read Gangte THUPHUON 20 Bible Online

THUPHUON 20 - Gangte bible

THUPHUON 20

¹Chun, vânsâwlchâk, thampikuo-âwng chabi leh, thikkhau lien tak chawia, van apat a hung suk ka mu a.

²Chun, dragon, gulpi têk, (zie chuh Diabol ahim, Setan ahim a hii) chuh a man a, a kân a.

³Tichun, kum sangkhat sunga dingin thampikuo-âwng achun a paih lut a, a khâk khum a; kum sangkhat chuh a hung kivel kit masang sieh, namtin a thep kit lohna dingin a châlmat khum ta a. Zie nung chuleh, chawmkhat sung a dingin thahdawk takdih ding a hii.

⁴Chun, lalchutphah haw chuh ka mu a, a chungah mi a chuu a, a kawmuh achun vaihawmna a pieu a. Chuleh, Isu thu hettuoksakna thu zieka leh, Pathien thu zieka ngâwng kitante thagau leh sahang leh a lim ho lo a, a chalpâng uh ahim, a khut uh a him a, tiemtehna nei lote thagau chule ka mu a. Ziete haw chuh a hung hing tau a, kum sangkhat a dingin Krista tawh vaihawm in a um tau hi.

⁵(Mithi dangte vang chuh, kum sangkhat a kivel masang sieh chun a hing kit tadih puou hi.) Zie chuh, thawhkitna masapen chuh ahi.

⁶Thawhkitna masapen a telte chuh a hamphau un, a thiengtho ui. Ziete chung achun thih nihna chun thu himhim a nei ta puoh a, Pathien leh Krista thiempute hiu in tin uh, amah tawh kum sangkhat vaihawm in um zaw’n au.

⁷Chun kum sangkhat chuh a kichaih tieng leh. Setan chuh a tânna apat chun thah dawkin um intin.

⁸tichun, kâwlmawng li a namte, zie chuh Gog leh Magog ahi, thêm ding leh kidona a puikhawm dingin chiehdawk ina: ziete tam zie chuh, tuisuohgiet a pîlnel banga tam ahiu hi.

⁹Khutichun, lei chung pumpi dâp suok hielin a chieh uh a, mi thiengthote giehbuk leh, a khuo deihum tak uh chuh a ûmkimvel uh a. Himahlele, van apat in mei a hung kie a, amau haw chuh a kâng tum vek ta a.

¹⁰Tichun, amau haw thempa Diabol chuh. sahang leh thiemgau lêm umna, mei leh kât dîl achun a paih tau a; tichun, kumkhuotuong in, a sun a zan a sukgimtheih in um ta’n au.

¹¹Chun, lalchutphah lien tak, vam tak leh a chunga chu pa chuh ka mu a. A maikawk apat chun lei leh van a taimang uh a, muh phâk himhim a hi ta puoi.

¹²Chuleh, mithi te, a lien a neu in, lalchutphah ma a ding le ka mu a. Tichun, Lehkhabu chuh a keu uh a; chun, lehkhabu dang, Hinna Lehkhabu chule a keu uh a; tichun, mithi te chuh, lehkhabu haw a zik lut, a thilhih dungzui zel uh a vaihawm sak in a um tau hi.

¹³Tuipi te chun a sung uh a mithi umte chuh a thah dawk uh a. Thihna leh mithi khuo chun le, a sung uh a mithi umte chuh a thah dawk uh a. Khutichun, mitin, a thilhih dungzui zel uh a vaihawm sak in a um tau hi.

¹⁴Chun, thihna leh mithi khuo haw chuh, meidil achun a paih tau hi. Zie meidil chuh thih nihna chuh ahi.

¹⁵Kuo min hitaleh, Hinna Lehkhabu a kizik a muh loh phawt u chuh, meidil achun a paih lut tau hi.