Read Gangte THUPHUON 21 Bible Online

THUPHUON 21 - Gangte bible

THUPHUON 21

¹Chun, van thak leh lei thak ka mu a. Van masa leh lei masa chuh a mangthai ta a, tuisuohgiet le a um ta puoi.

²Chun, khawpi Thiengtho Jerusalem thak chuh, mo, a pasal tuok dinga kichei tawbanga kisazo diem in. Pathien kawm apat, van a hung suk le ka mu a.

³Lalchutphah apat chun aw ngeih tak in, “Ngaitie! Pathien bâwkcha chuh mihiem lak ah a hung um tai, Amah chuh a kawm u ah um intin, Amau haw chuh a mite hiu intin uh; Pathien mawng chuh a kawm u ah um intin, A Pathien uh le hi’n a.

⁴A mit uh apat mittui chengcheng thiek hul intin; Thihna um kit ta puon tin, Kahlemau leh natna le um kit diek ta puo’n a; Thil masate chuh a mangthai ta ngâl a,” a tih le ka za a.

⁵Chun, lalchutphah chunga chu pa chun, “Ngaitie! thil bangakai ka siem thak kit tai,” a ti a. Chun, “Zik ah, zie thu haw hi taksan a um in, a dik ahi,” le a ti a.

⁶Chun, ka kawmah, “Hih zawh ahi tai! Kei Alpha leh Omega, a Bul leh a Tawp chuh ka hii. Dangchâk ta chengte kawm achun, Hinna tuikhuk a um, a thawn in pie’ng ka.

⁷A zo ta chengin zie chuh ka kawm apat muu un tin; Kei a Pathien u hi’ng ka ting, amau chuh ka chate hi’n au.

⁸Himahlele, mi dawilawkte, gingchalote, kihdakumte, tuolthat te, mideihchak nuomte dawithiem te, milim hote, leh lepchieh chengcheng te chan ding chuh, mei leh kât a kâng dîl achun um ina; zie chuh thih nihna chuh ahi,” a ti a.

⁹Chun, belhbu sagih chawi, gawtna nunung pên sagih puo, vânsâwlchâk sagihte laka khat chuh a hung a, ka kawmah, “Khaile, mo, Belamno zi chuh hun etsak ing ka,” ti’n ei hopih a.

¹⁰Ziephet chun, Thagau in ka hung dim ta a, vânsâwlchâk chun tâng lienpi, sang tak chung ahin ei pui ta a. Jerusalem, khawpi Thiengtho, Pathien kawm apat van a hung suk,

¹¹Pathien lopina a vak hi ei etsak a. A vak zie chuh, khisuong mantam pên Jasper suong tawbang, krustal suong banga val hi ahi.

¹²Kawtpi sawm le nih a nei a, a kawtkhakhaw achun vânsâwlchâk sawm le nih a um uh a. Zie kawtpihaw achun min kizik le a um a, ziehaw chuh Israel suonte nam sawm leh nam nih te min chuh ahi.

¹³A sik cheng achun kawt thum chiet a um a: saklam dawh ah kawtpi thum, mâllam dawh ah kawtpi thum, simlam dawh ah kawtpi thum, thanglam dawh ah kawtpi thum a um chiet hi.

¹⁴Chun, zie khawpi kulh bâng chuh, suongphum sawm le nih chunga kilem ahi a, ziehaw achun, Belamno sawlchak, sawm le nih te min chuh a kizik chiet a.

¹⁵Chun, vânsâwlchâk, ei hopihpa chun, khawpi leh, a kawtpite leh, a bang tehna ding chun, dangkaguo tehna mawlh hi a chawi a.

¹⁶Khawpi ning lite chuh, a dung a vai kibang chiet ahi. Tichun, vânsâwlchâk chun, khawpi chuh a tehna mawlh chun a teh a, chîng singkhat leh, chîng sang nih ahi. A dung lam leh a vailam leh, a san lam chuh kibang chiet ahi.

¹⁷Chun, a kulh bâng chuh a teh kit a, mihiem teh dân dungzui in, (zie chuh vânsâwlchâk teh dân dungzui chuh a hi) tawng za khat leh tawng sawmli leh tawng li ahi.

¹⁸A bang chuh Jasper suong a kisiem a hi a, a khawpi chuh hai thieng tak tawbanga, sana thieng a kisiem ahi.

¹⁹Khawpi suongphum haw chuh khisuong mantam chi tin chenga kizêm ahi. Suong kiphum masapen chuh Jasper suong ahi a, a nihna chuh sapphire suong ahi a, a thumna chuh, kalkidon suong ahi a, a lina chuh emerald suong ahi a,

²⁰a ngana chuh; onix suong ahi a, a gupna chuh sardion suong ahi a, a sagihna chuh, kruso suong ahi a, a gietna chuh, beril suong ahi a, a kuona chuh, topaz suong ahi a, a sawmna chuh, krusopra suong ahi a, a sawm le khatna chuh, jasinth suong ahi a, a sawmlenihna chuh, amethist suong ahi.

²¹Chun, kawtpi sawmlenih te chuh, tuikawk chang sawmlenih te chuh ahi a; kawtpi chengcheng chuh, tuikawk chang khat chieta kisiem ahi. Zie khawpi khawlai chuh, sana thieng tak, hai vak let thei tawbanga thieng ahi.

²²Chun, khawpi sung achun Ho-In himhim ka mu puoh a, LALPA Pathien, Bangakai hihtheipa leh Belamno chuh a Ho-In uh ahiu hi.

²³Zie khawpi chun, a salhvak dingin nisa a ngai puoh a, tha le a ngai diek puoi; Pathien lopina chun a salhvak a, a thaumei uh chuh Belamno ahi ngâl a.

²⁴Namtin, a vak achun leng un tin uh, leia lengte chun a lopinau la lut un au.

²⁵Khawpi kawthaw chuh sun in khâk hiel puo’n au; zie tak a chuh zan himhim um ding ahi puoh ngâla.

²⁶Namtin lopina leh, hauhsakna chuh khawpi sung achun la lut un au.

²⁷Himahlele, thil buok himhim khawpi achun lut puo’n tin, thil muhdahum hihte leh, lepchieh gente le lut diek puo’n au. Belamno Hinna Lehkhabu a min a zikteu maicha lut un au.