Read Gangte THUPHUON 4 Bible Online

THUPHUON 4 - Gangte bible

THUPHUON 4

¹Zie thil haw nung chun ka vak en a, chun, ngaitie! van ah kawtkhak kihawngsa ka vak mu a. Aw ka zak masak, pengkun gi banga ei hopihpa khan, “Taka hin hung to ah, tichun, tunung a thil hung um dingte chuh hun etsak ing ka,” a ti a.

²Tichun, phulo-halo in Thagau in ka hung um pai zieng a; chun, ngaitie! van ah lalchutphah a na kitung a. zie chutphah chung achun mi le khat a na chu a.

³Zie a chu pa chuh Jaspi leh Sardion suong tawbang hielin a kilang a, chun, lalchutphah kimvel achun sakhizozum, vak et a smaragdin suong zie tawbang hi a kai a.

⁴Chun, lalchutphah kimvel achun lalchutphah dang, sawmnih le li a um a, lalchutphah chung achun upa sawmnih le li, puon vam silh a, a tien a chu ka mu a; sana lallukhuk a kikhuk chiet uh a.

⁵Tichun, lalchutphah apat chun kawlphe le, aw le vangi le a hung pawt dul dul a. Chun, lalchutphah ma achun meisel sagih a kuong a, zie chuh Pathien Thagau sagihte khah ahiu hi.

⁶Chun, lalchutphah masang achun, lim-et tuisuohgiet tawbang, krustal suong banga a val le a um a. Lalchutphah kimvel cheng achun. ganhing li malam leh nung lam mita dim a um uh a.

⁷Ganhing khatna chuh keipi bakkai tawbang a hi a. Ganhing nihna chuh bâwngno tawbang a hi a, ganhing thumna chun mihiem mel tawbang a pua, ganhing lina chuh, mupi leng lai tawbang ahi.

⁸Chun, ganhing lite chuh, tha gup nei chiet, a kimvel cheng leh a sung uh mita dim ahiu hi. Chun, “LALPA Pathien, Bang cheng hihthei, umsa pa leh, um lai tak leh, hung um kit ding pa chuh, A thiengtho ie, A thiengtho ie, A thiengtho ie!” ti’n sun leh zan in a chawlnga kha puou hi.

⁹Chun, ganhing lite chun, lopina leh limbawlna la sa’n, kumlekhuo a hing zing, lalchutphah a chu pa chuh a pakchau hi. Khutibanga chuh a hih chenguh leh,

¹⁰Upa sawmnih le lite chun, lalchutphah a chu, kumkhawtuong a hingzingpa masanga chuh bawkkhup in, a ho sek uh a. A lallukhukteu chuh lalchutphah âng a chuh kawih in,

¹¹“Nang, ka Lalpau leh ka Pathien uh, Lopina te, limbawlna te, thilhih theihna te, mu tâk na hi ie; Nangin thil bangkim na siem a, Na deih zieka um leh siem A hi ngâl u a,” a tiu a.