Read Gangte THUPHUON 7 Bible Online

THUPHUON 7 - Gangte bible

THUPHUON 7

¹Zie nung chun, lei chung leh, tuisuohgiet chung leh, thing tin cheng chunga huih a nun lohna dinga tutâng dinga vânsâwlchâk li, lei ning li a ding ka vak mu a.

²Chun, vânsâwlchâk dang khat. Pathien hing tiemtehna chawia. suohlam apat hung dawk hile ka vak mu a. Amah chun vânsâwlchâk li, lei chung leh, tuisuohgiet suksiet theihna a piekteu kawm achun. aw ngeih takin,

³“I Pathien uh sawntawlawite chuh, a chalpâng uh a melchikna ka nam masang sieh uh, lei chung leh, tuisuohgiet leh, thing haw chuh susie tadih kiu un,” ti’n a kiko a.

⁴Chun, melchikna a namkhum zat uh chuh ka na za a, Israel suonte, nam tina mi nuoi khat leh singli leh sang li melchikna a namkhum uh a hi tai.

⁵Juda nam apat mi, singkhat leh sang nih, Reuben nam apat mi, singkhat leh sang nih, Gad nam apat mi, singkhat leh sang nih,

⁶Aser nam apat mi, singkhat leh sang nih, Naphtali nam apat mi, singkhat leh sang nih, Manasseh nam apat mi, singkhat leh sang nih,

⁷Simeon nam apat mi, singkhat leh sang nih, Levi nam apat mi, singkhat leh sang nih, Issakar nam apat mi, singkhat leh sang nih,

⁸Zebulun nam apat mi, singkhat leh sang nih, Joseph nam apat mi, singkhat leh sang nih, Benjamin nam apat mi, singkhat leh sang nih chuh, melchikna a namkhum tau hi.

⁹Ziehaw chengcheng nunga chuh ka vak et leh, ngaitie! mipi nasatak, kuomah simsenloh, namtin laka mite, chitin laka mite, mitin laka mite, pau tin laka mite chuh puon vam silh a tum bâk chawiin, Lalchutphah masang leh, Belamno masanga ding ka mu a.

¹⁰Ziete haw chun aw ngeih tak in, “I Pathien uh, Lalchutphah a chu pa kawm leh, Belamno kawm apat hukdamna a hung tung tai,” ti’n, a kiko uh a.

¹¹Chun, vânsâwlchâk chengcheng te chuh, Lalchutphah leh, upate leh, ganhing lite kimvel achun dinsa’n a um uh a; chun Lalchutphah mai tak achun khupbawk in,

¹²“Amen, vangpiekna le, lopina le, chitna le, Kipah thugenna le, limbawlna le, Thilhih theihna le, hatna le, Kumkhawtuong in I Pathien uh kawm achun um hen. Amen,” ti’n, Pathien a pakchau a.

¹³Ziephet chun, upate laka khat chun ka kawmah, “Zie puon vam silh te hi kuote ahiu a, khawi apat a hung ahiu hi?” ti’n ei hopih a.

¹⁴Kei chun a kawmah, “Hepu, ka he puoi, nangin na he’i” ka ti a. Amah chun ka kawmah, “Ziehaw hi, gimtheihna nasatak apat a pawtte khah ahiu a, Belamno thisana a puon uh sawp vamte ahiu hi.

¹⁵Zieziek a chuh, Pathien lalchutphah maa um ahiu a, chun, a sun a zan in a Ho-In achun a zenviel sek ui. Lalchutphah a chu pa chun a puon-In achun chenpih ina.

¹⁶Gilkiel kit ta puou un tin uh, a dang uh le châk kit diek ta puo’n a; nisa’n le kâng ta puo’n tin, lum himhim inle sugimthei diek ta puo’n a.

¹⁷Belamno, lalchutphah lailung a umpa chuh amau haw chingpa hi’n tin, hinna tuikhuk haw achun pui ina. Khutichun, Pathien in a mit uh apat mitthi chengcheng chuh thiek hul sak ta’n a,” a ti a.