Read Gangte RUTH 1 Bible Online

RUTH 1 - Gangte bible

RUTH 1

¹Vaihawmte chun vai a hawm lai un, hiti hi a hung hi a; Zie gam achun kiel a hung kie ta a. Chun, Bethlehem a Juda mi khat Moab gama va cheng dingin, amah leh a zi leh a chapate nih tawh a chieh tau a.

²Zie pa min chuh Elimelek ahi a, a zi min chuh Naomi ahi a; a chapate nih min chuh Mahlon leh Kilion ahi a, Bethlehem-Juda a Ephrath mi ahiu. Moab gam achun a chieh u a, zie chun a um zing tau a.

³Chun, Elimelek, Naomi pasal chuh a thi a, amah leh a chapate nih mai ahi tau hi.

⁴Chun, amau chun Moab numei zi’n a nei u a, khat min chuh Orpah ahi a; khat zaw min chuh Ruth ahi. Zie tak achun kum sawm vel a um u a.

⁵Chun, Mahlon leh Kilion chuh a thi gêl gêl tau a; tichun, zie numei chuh a chate nih leh a pasal chun a thihsan tau hi.

⁶Zie nung chun, Naomi chun LALPA’n a mite nek ding pie’n nasa takin a vangsak hi tih a na za a; khutichun, a mote nih chu tawh Moab gam chuh taihsan dingin a hung kisa tau hi.

⁷Tichun, a umnau apat chun a mote nih chu tawh a hung pawt u a; Judai gama chieh kit dingin a kipan dawk tau hi.

⁸Tichun, Naomi chun a mote nih kieng achun, “Na nuteu In lam gel ah vaikit mai tiem u; mithi chung leh kei chunga na hih bang u hin, LALPA chun na chung u ah nunnem takin hih thuk hen.

⁹LALPA chun na nih un pasal hun pie hen la, pasalte In a na khawsak theih na dingun hun lungsiet hen,” a ti a. Tichun, Naomi chun a châwp a; amau nih chuh aw ngeih tak in a kap tau hi.

¹⁰Zie phat chun a mote nih chun a kawmah, “Vaikit puo’ng kau, na chite laka na chieh na achun hun zui zaw’ng kau,” a tiu a.

¹¹Chun, Naomi chun, “Ka chanute, chieh kit zaw mai un; bang a ti a kei kawma hung guo hâmhâm na hiu em? Na pasal dinguh chapa ka vawp kit thei dinga ahim?

¹²Ka chanute, vaikit unla, chieh un; pasal nei kit dingin ka upa taluo ta ngâla, chun, nei kit ding hita mawng mawng in, tuzan ngêi a pasal nei in chapate hing leng le,

¹³A pitit tiengun na um dinguh a ahim? Pasal bei in na um zing ding u a-ahim? Himaizen lo e! ka chanute, nang u ziekin ka lungkhamna a khawk diek hi, LALPA khut chuh ka chunga kinga ahi ta hi,” a ti a.

¹⁴Chun, aw ngeih tak in a kap kit tau a; chun, Orpah chun a pi chuh a châwp a; himahleh, Ruth chun vang a tuchak kêi a.

¹⁵“Ngaitie, na mo chanpih nu chuh a chipihte kawm leh a pathien kawm lam achun a vaikit ta a; nang le amah chuh zui inla chieh kit mai ta’n,” a ti a.

¹⁶Himahleh, Ruth chun, “Nang hun nusieh ding leh hun zui lo a vaikit dingin ei thêm dah hâmhâm in; na chieh na tâkah chieh ing ka ting, na giehna taphawt ah giek ing ka ting, na chite chuh ka chite hiu in tin, na Pathien chuh ka Pathien hi’n a.

¹⁷Na thihna na ah thi’ng ka ting, zie tak achun ei vui mai ding ahiu; nang leh kei hi thihna tihloh in thil dang in ei khen ding chun LALPA’n a lawh lawh ei lawh mai hen la, zie sanga nasa zaw chun le,” a ti a.

¹⁸Khutichun, a kawma chieh a guo takzet hi tih a het phet in a thip san ta a.

¹⁹Tichun, Bethlehem tiengin a chieh tau a; chun, hiti hi ahi a, Bethlehem a tun phet u chun, amau ziek chun a khawzang un a phu mulmul zieng u a, numei haw chun, “Ziehi Naomi kha hilo ahim?” a tiu a.

²⁰Amah chun a kawm u ah, “Naomi ei ti kiu in, Marah ei ti zawu in; Bangkim hihtheipa chun kha takin ei gawt ta ngâl a.

²¹Buting takin ka pawtdawk a, LALPA’n khut ngawn a ei vaihkit sak ahi tai; LALPA chun ka chungah a lungnatna a sulang a; Bangkim hihtheipa chun ei sukgimtheih zie hezing ngâl in, bang zieka Naomi ei ti zing na hiu hi?” a ti a.

²²Khutichun, Naomi chuh a monu Moab mi Ruth chu tawh Moab gam apat chun a hung vaikit u a; buhmanpawl ât pat tûng lai in Bethlehem chuh a hung tung u a.