Read Gangte 1 SAMUEL 1 Bible Online

1 SAMUEL 1 - Gangte bible

1 SAMUEL 1

¹Ephraim tâng gam Ramathaim-zophim khawpi achun pasal khat a uma, a min chu Elkanah ahi; amah chu Jeroham chapa ahi, amah chu Elihu chapa ahi, amah chu Tohu chapa ahi, amah chu Ephraim mi Zuph chapa ahi.

²Elkanah chun zi nih a nei a; khatzaw min chu Hannah ahi a, adang min chuh Peninnah ahi; Peninnah chun chate a nei a, Hannah vang chun cha a nei puoi.

³Chun, amah chu a khuou apat in Jehovah Pathien ho ding leh kithawi dingin kum cheng leh Shiloh ah a va chieh seka. Zie chun Eli chapate nih, Hophni leh Phinehas, LALPA thiempu, a um ui.

⁴Chun, Elkanah kithawih ni ahung tun chun, a zi Peninnah leh a chapate leh a chanute chengcheng sachan a siem sak a;

⁵Hannah vang chuh chan lehnih a siem sak a: Hannah chuh a lungsiet mah mah ngâla: himahleh LALPA’n a sûl a sukbing saka.

⁶Chun LALPA’n a sûl a sukbing sak zieka a lungkhamna chawhthawh guon a melma Peninnah chun a phin sek a.

⁷Chun, ti a chu kum cheng a a hih sek ziekin, LALPA ina a va chieh cheng leh a phin seka; tichun a kap a kap a, an le a ne puoh a.

⁸Chun a pasal Elkanah chun a kawmah, “Hannah, bang zieka kap na hi? Bang zieka an nelo na hi? Bang zieka na lunggil lungkham a hi? Chapa sawm sangin nang dingin ka phazaw hilo maw?” a ti a.

⁹Khutichun, Shiloh a a nek u a, a dâwn zawh un Hannah chuh a dingdawk a. Chun, thiempu Eli chuh LALPA Ho-In kawtkhak khuom bula chutna achun a chu a.

¹⁰Chun Hannah chu a lungkham mah mah a, LALPA kawmah a paucham a, thasie takin a kap a.

¹¹Chun thu a tiem a, “Aw, sepaihte LALPA, na suoknu lunggim zie hih na het takzet a, nei hetzing, na suoknu hi nei hetngilh loh a na suoknu hih chapa nei piek chun, a damsung cheng LALPA pie’ng ka ting, a sam le met hi himhim puo’n a,” a ti a.

¹²Chun, hiti hi ahi a, LALPA ma a a paucham zing lai chun Eli’n a mûk phun chu a na tiemteh a.

¹³Hannah chun a lungthim in a gen a, a mûk mai a phun a, a aw chu zak ahi puoh a: zieziekchun Eli chun zukham hiding in a gingcha a.

¹⁴Khutichun, Eli chun a kawmah, “Bang chana kham zinga na um ding? Na uain chu kawihmang tie,” a ti a.

¹⁵Hannah chun, “Ka kham dang e, hepu, numei lungkham tawpkhawk ka hi a; uain le zupi le ka dâwn hiel puoi, LALPA ma ah ka lunggil ka sungtha zaw ahi.

¹⁶Na suoknu hi Belial chanu tawh teh hiel ki’n: ka lungthima dimlet ka ki-awihlohna leh ka lungkhamna gen ka hi zawi,” a ti a.

¹⁷Ziephet chun, Eli chun “Thamuong takin chieh in, Israel Pathien chun na thil nget chu hun pie hen,” ti’n a dâwng a.

¹⁸Chun amah chun, “Na suoknu hi na mit tung hen,” a ti a. Khutichun, numeinu chu a chieh ta a, an a ne a, lungkham mel le a pu ta puoh a.

¹⁹Chun, zingkal matak in a tho u a, LALPA chu a ho u a, a chieh kit tau a, Ramah khuo a a In u chu a tung kit tau hi: Elkanah chun a zi chu a pawl a: chun, LALPA chun amahnu chu a hezing a.

²⁰Khutichun hiti hi ahung hi a, Hannah chun nau a hun vawp a, chun, ahun ahung tun chun chapa ahun nei a; “Amah hi LALPA kawma ka nget ahi,” ti’n amin dingin Samuel a sa ta a.

²¹Khutichun, Elkanah leh a inkawte cheng chu LALPA kawma kum cheng kithawihna pie ding leh a kitepna supiting dingin a chieh to u a.

²²“Ahihziekin nawi a ngawlh masang cheng chiehto puo’ng ka; a ngawlh tieng leh LALPA ma a a kilat theihna dingin hun pui ka ting, zie tak achu um zing tading ahi,” a ti a.

²³Chun, a pasal Elkanah chun a kawmah, “Pha na sak dân dân in hih in; nawi na ngawlhsak macheng a na um tadih mai in; amah vang, LALPA’n a thu chu guitun sak tei hen,” a ti a. Khutichun, a chapa chun nawi a ngawlh macheng chu In achun a umpih zing ta a.

²⁴Chun, nawi a ngawlhsak phet chun changbuong ephah khat leh uain um khat leh bâwngchal tuoi kum thuma upa khat keng in a pui a, Shiloh a LALPA In achun a pui a, naupang chu a dâwng ten nalai a.

²⁵Chun, bâwngchal tuoi chu a that u a, naupang chu Eli kawmah a pui u a.

²⁶Chun amah chun, “Aw, hepu, na hinna sâlin ka gen hi, kei hi aw, hepu, zie taka na kienga dinga LALPA kawma paucham numei khah ka hi.

²⁷Zie naupang ngên hin ka na paucham a; chun, LALPA’n ka nget chu ei pie ta a:

²⁸Zieziekchun, ken le LALPA kawma ka piek ahi: a damsung cheng LALPA dinga piek ahi,” a ti a. Chun, zie tak achun LALPA chu a ho ta a.