Read Gangte 1 SAMUEL 10 Bible Online

1 SAMUEL 10 - Gangte bible

1 SAMUEL 10

¹Khutichun, Samuel in sathau um chu a ladawk a, a luchang ah a sung a; a chawpa, chun, “LALPA chun a gochan Israel te chunga lawiupa hi dingin sathau a hun nuh hilo ahim?

²Tuni hin nei nutsieh tieng leh Benjamin gamgi a Zelzah a Rachel thân kieng ah mi nih kituokpih in na tin: chun amau chun na kawmah, ‘Na sabiltung hawl kha a mu tau hi: chun ngaitie na pa’n sabiltung haw chu a ngaihtuoh ta puoh a, nang a hun lungkhampih zaw ta a. Ka chapa chu bang kilawh ding ahi ta, a ti a ti mai hi’, ti’n au

³Chun, zie apat chun chieh zelin na tin, Tabor a gangpi bul chu va tung in na tin, zie tak achun mi thum Bethel a Pathien kawma va chieh dingte’n hun kituokpih untin; khat chun kelno thum pawm intin, khat chun chângthâk tâng thum chawi intin, chun khat chun uain savunbawm khat keng ina.

⁴Chun, chibai hun bûk intin uh, chângthâk tang nih hun pieu intin; zie chuh a khut uh apat lân na tin.

⁵Zie zawh chuleh Philistia sepaihte panmun Pathien tâng chu va tungin na tin; chun hiti hi hi’n tin, zie a khuo chu na va tun tieng thiemgau haw pekgit, khuong leh kingkang tumte leh châmngai mûtte’n amau pui in mun sang apat hung kizawt suk kituokpih in na tin: chun, amau chun thu genlawk sausau in au:

⁶Zie tieng chuleh LALPA thagau nasa takin na chungah hung tung intin, amau haw chu tawh thu genlawk in na tin, mi chuom hung suok ta’n la.

⁷Chun, zie melchikna haw hi na chunga ahung tun tieng leh ahun ahun a thil umdan dungzuia na hih zieng sek ding ahi: Pathien in a hun umpih na hih tâk ziekin.

⁸Chun, ka chieh masang in Gilgal ah va chieh inla; chun, ngaitie, keile hâlmang thilpiekte leh chamna thilpiekte pie dingin na kawmah hungsuk ing ka ting: na kawma ka hunga, na hih ding ka hun hilh masang sieh ni sagih na um ding ahi,” a ti a.

⁹Chun, khutibang chu ahung hi ta a, Samuel nusieh dinga a vak kinunghei tak chun Pathien in lungthim dang a pie ta a; chun, zie melchikna chengcheng chu zie ni chun a tung suok kêi ta a.

¹⁰Khutichun Pathien tâng, Gibeah chu a tun phet un, ngaitie, thiemgau hawn in ana kituokpih uh a; chun a chungah Pathien Thagau nasatak in ahung tunga, a thu genlawknau achun amah le a tel ta a.

¹¹Chun, hiti hi ahi a, tuma lama amah ana hesate’n thiemgaute thu genlawkna ah a tel hi tih a het phet un mipite chu a kiho u a, “Kish chapa chunga hih bang tung ahi ta? Saul le thiemgaute laka tel a hita maw?” a tiu a.

¹²Chun, zie mun a um mi khat chun a dawng a, “A pau chu kuo ahi kha ta?” a ti a. Khutichun, “Saul chule thiemgau laka tel a hita maw le!” tih chu thuching guola gen in a um ta a.

¹³Chun, a thu genlawk a zawh phet chun munsang achun a hung ta a.

¹⁴Chun, Saul paneu chun amah leh a suokpa kawm achun, “Khawi a chieh na hiu hi?” a ti a. Chun, amah chun. “Sabiltung hawl ka hiu a; muh zawh ding ei puou tih ka het phet un, Samuel kawmah ka chieh tau ahi,” a ti a.

¹⁵Chun, Saul paneu chun, “Samuel chun na kawmah banga a gen ei hilh tie,” a ti a.

¹⁶Saul chun a paneu kawm achun, “Sabiltung haw chu a kimu kit tau tih chu chientakin ei hilh zieng a,” a ti a. Ahihziekin leng hihna chungchâng Samuel in a kawma a gen chuh a hilh puoi.

¹⁷Khutichun Samuel chun mipite chu Mizpah ah LALPA masang ah a samkhawm a;

¹⁸Israel mipite kawm achun, “LALPA Israel te Pathien chun hiti hin a tii, ‘Israel te chu Aigupta apat in ka puidawk a, Aigupta mite khut apat leh ahun nuoisieh gam chengcheng apat in ka hun hukdawk a:

¹⁹himahlele tuni hin na lungkhamna chengcheng u leh na gimtheihna chengcheng u apat hun hukdawk na Pathien uh ngêi chu na deih ta puou a, a kawmah, Ahi puoh ie, leng ei siem sak in, na tiu a,’ ti’n. Zieziekchun tuhin a nam-a nam leh achi achi’n LALPA ma ah hung kilak un,” a ti a.

²⁰Khutichun, Samuel chun Israel nam chengcheng chu a kipuihkhawm a, chun, Benjamin phung chu teldawk ahi ta a.

²¹Chun, Benjamin phung chu a inkuon kuon in a puihkhawm saka Matri inkuon chu teldawk ahi ta a; chun, Kish chapa Saul chu teldawk ahung hi ta a: himahlele amah chu a hawl u leh muh zawh ahi ta puoh a.

²²Khutichun LALPA chu a dâwng kit u a “Mipa chu zie hin a hung hi?” a tiu a. Chun, LALPA chun a dâwng a, “Ngaitiem u, thuomphuo laka amah leh amah kisel ahi,” a ti a.

²³Khutichun, a tai u a, zie apat chun a va pui dawk u a; chun, mipi laka a vak din leh mi laka chun a sangpen a, kuomah a liengko khel le a um puou hi.

²⁴Chun, Samuel chun mi chengcheng kawma chun, “LALPA mi guot hi na muu em? Mipi chengcheng lak ah amah tawbang himhim hi a um puoi” a ti a. Chun, mipite chu a kiko u a, “Leng chu Pathien in humbit hen!” a tiu a.

²⁵Khutichun, Samuel chun mipite chu lengpa thuneihna leh mawhpuokna haw chu a hilh a, lehkhabu ah a zika, LALPA ma achun a kawih a. Chun Samuel chun mipite chu a In lam chiet u ah a chieh sak ta a.

²⁶Chun, Saul chule Gibeah khuo a a In ah a chieh ta a: chun, mi hangsan haw Pathien in a lungthim uh a khawihte chun le a zui u a.

²⁷Himahlele Belial chapate khenkhat chun, “Zie pa hin bangti’n e ei hukdam theih maizen ding?” a tiu a. Tichun amah chu a musit u a, thilpiek bangmah a pie nuom puou a. Himahlele amah chu thipkêi in a um zinga.