Read Gangte 1 SAMUEL 17 Bible Online

1 SAMUEL 17 - Gangte bible

1 SAMUEL 17

¹Chun, Philistia te chun kido dingin a sepaihteu a sam khawm u a; Juda gama um Sokoh ah a kikhawm khawm u a, Sokoh leh Azekah kikala um Ephes-Dammim mun ah panmun a khawh u a.

²Chun, Saul leh Israel te chu a kikhawm u a, Elah guom ah panmun a khawh u a, Philistia te nang dingin a kitieng u a.

³Chun, Philistia te chu tâng chungah a um u a, chun, Israel te chu a gâl langkhat tâng chunga chun a um u a, a kikal u a chun guom a um a.

⁴Chun, Philistia te panmun apat chun a mihatpau, Gath khuo a cheng, tawng gup leh khâp-a sang amin Goliath kiti hi a hung pawt a.

⁵Sumeng lukhuk hi a khu a, awmphaw a âk a; a awmphaw chu sumeng sekel sang nga-a gik ahi a.

⁶A ngalpeng achun sumeng ngalphaw a buta, a nung lam ah sumeng tiengcha neu a kuoh a.

⁷A tiengchalung chu kawlka tawbang ahi a; chun a thik tiengchaphe chu sekel zagup a gik ahi a: chun a phaw puopa chu a masang ah a chieh a.

⁸Chun, a ding dawka, Israel sepaihte chu a kiko khuma, a kawm u ah, “Bang zieka kido dinga hung kitieng na hiu em? Kei Philistia mi, nanguh Saul suokte hilo na hiu hi? Pasal khat teldawk unla ka kawm ahin hung suk hen.

⁹Amah chun ei kisuolpih theih a ei thah chun na suok un um ing ka ting un; ken amah chu ka zawh a ka thah chun ka suok un um in na tin un, ka nau sem inlau,” a ti a.

¹⁰Chun, Philistia pa chun, “Tuni hin Israel sepaihte ka cho ahi; ka kisuolpih ding mi ei pieu in,” a ti a.

¹¹Chun, Saul leh Israel sepaihte chengcheng chun zie Philistia pa thugen chu a het phet un a taisieua, a lau mah mah mai tau a.

¹²Chun, David chu Juda gama Bethlehem a Ephrath mi, amin Jessai, chapa ahi a, chapa giet a nei a; amah chu Saul hunlai chun têk tak ahi ta a, kum tamtak ahi tai.

¹³Chun, Jessai chapa upa thum te chun Saul chu kidona ah a zui u a. A chapate kidonaa chieh thum te min chu a upapen Eliab, a bân a Abinadab leh a thumna Shammah ahiu hi.

¹⁴Chun, David chu a naupang pên ahi a; chun, a ute thum chun Saul a zui u a.

¹⁵David chu Saul kawma pat in Bethlehem a a pa belam chingin a va chieh sek a.

¹⁶Chun, ni sawmli sung hiel zing leh nitâk chengin Philistia pa chu a hung dawka, ni sawmli sung a va kitaklang sek a.

¹⁷Chun, Jessai chun a chapa kawm achun, “Chângpel ephah khat leh chângthâk tang sawm hi na ute dingin chawi inla, a giehmun u ah chieh meng in:

¹⁸Chun, bâwngnawi khal tang sawm hi a lawiupa-pau dingin chawihsak inla; chun na ute bangti’n a um um ti’n va en inla, a chanchin uh hetna dingin bang ahim khat hun chawi in.

¹⁹Amau chu Saul leh Israel mi pasal cheng tawh Philistia te do in Elah guom achun a um ui,” a ti a.

²⁰Chun David chu zingkal matak in. a tho a, belam haw chu a mi khat a chinsak a, Jessai’n thu a piek guol chun a kiguonga a chieh ta a; chun, amah chu sepaih haw kido dinga a na kiko vengvung lai tak un giehmun chu a va tunga.

²¹Chun, Israel te leh Philistia te chu kido dingin sepaih leh sepaih ki-âng ngat in a na kitieng u a.

²²Chun, David in a thuomphuo haw chu thuomphuo enkawlpa kawm achun a kawih a, sepaihte kawm achun ava tai a, a ute chu chibai ava bûk a.

²³Chun, amau tawh a kiho lai chun ngaitie, mihatpa Gath khuo a Philistia pa, amin Goliath chu Philistia sepaihte laka pat chun a hung pawt a, a thugen ngei mah kha a hun gen kita: zie chu David chun a na za a.

²⁴Chun, Israel mi cheng chengte chun zie pa chu a vak muh phet un a taisieua, a lau mah mah u a.

²⁵Chun, Israel te chun, “Zie mihing hung pawt pa kha na muu hi? Israel te cho dinga hung pawt ahi kha; kuole amah that taphawt chu lengpa’n nasa takin suhausa’n tin, a chanu pie’n tin, chun, a pa inkuon chu Israel gam ahin zalen takin umsak ina,” a tiu a.

²⁶Chun, David chun a kienga dingte kawm achun, “Zie Philistia pa that a Israel te minsietna lamang pa ding chun bang hihsak ahi dem? Zie zektan loh Philistia pa hi kuo ahim, hingzing Pathien sepaihte a vak cho viel a?” a ti a.

²⁷Chun, mipite chun hitihin a dawng u a, “A that taphawt chu ka gen guol u a kha hih hi’n a,” a tiu a.

²⁸Chun, a suohpih upapen Eliab in mite kawma a thugen chu ahun za a; tichun Eliab chu David chung achun a lungna phut ta a, “Bang zieka zie tak a hi hung suk na hi? Gamthip a belam tawmcha umte kha kuo na ven sak ahi? Na chapo zie leh na lungthim phatloh zie hi ka hêi; kido en dinga hung maimai na hi,” a ti a.

²⁹David chun, “Bang ka hih a ahi? Aziek a um hilo ahim?” a ti a.

³⁰Chun, amah chu a kiheimangsan a midang kawmah a gen ngei mah a gena; chun, mipite chun a masanga a dâwn guol u khan a dâwng kit u a.

³¹Chun, David thugen chu a het phet un Saul kawmah a gensawn u a; chun, amah chun a sama.

³²Chun, David chun Saul kawmah, “Amah ziek hin kuomah lungkie kiu hen; na suok hi chieh intin zie Philistia pa chu va do ina,” a ti a.

³³Chun, Saul chun David kawmah “Nang hi vang zie Philistia pa va do ding khun chieh thei deuh puo’n la, tanglak na hi hâm nalai ngâla, amah khu chuh a tanglak tûngcha apat a kido mi ahi ngâla,” a ti a.

³⁴Chun, David chun Saul kawmah, “Na suokpa hin a pa belam a ching seka; sakeibaknei ahim savawm ahim hung a belam hawn lak apat belamno a mat tieng leh,

³⁵ka delh a, ka suol a, a kam apat chun ka hukdawk sek hi: chun, ei na suol guo a a hung kipat tieng leh a baksam in ka mana, ka suol a, ka that sek hi.

³⁶Na suok hin sakeibaknei leh savawm a that kha gêl gêl ta a: chun, zie zektan loh Philistia pa hi le amau chu bang zieng lo ding ahim, Pathien hing sepaihte a cho ngâla,” a ti a.

³⁷Chun, David chun, “Sakeibaknei khut apat leh savawm khut apat ei hukdawkpa LALPA chun zie Philistia pa khut apat hin ei hukdawk ina,” a ti a. Chun, Saul chun David kawmah, “Chieh ta leh, LALPA’n hun umpih hen,” a ti a.

³⁸Chun, Saul chun David chu amah gâlvan in a van a, dangka guo lukhuk a khuksak a; phaw puonâk a âksak a.

³⁹Chun, David chun a gâlvan chung achun a chemzâm a kuoh a, a vak chieh viel patep a. Chun, David chun Saul kawmah “Zie haw hi tawh chieh thei puo’ng ka, ka mat khâk loh ziekin,” a ti a. Chun, David chun a suoh tha ta a.

⁴⁰Chun, a belam chinna mawlh chu a chawia, luicha achun suongchang zawl hiu hieu nga a luok a, a belam chinna sakhau achun a kuoh a; chun, a vaisuongseh chu chawiin Philistia pa chu a zuon ta a.

⁴¹Chun, Philistia pa chu a hung kuon a, David chu a hun naih a; chun, a phaw chawipa chu a masang ah a chieh a.

⁴²Chun, Philistia pa chu a vak dâk viel a David chu a mu ta a, tanglak tûngcha, hisel melpu tak, mit-hah hawih tak ahih hâm ziekin; a musit mah mah ta a.

⁴³Khutichun Philistia pa chun David kawm achun, “Uicha neisa ahim, mawlh poh tawh nei hun zawt chu?” a ti a. Chun, Philistia pa chun a pathiente min lo in David chu hansie a buok a.

⁴⁴Chun, Philistia pa chun David kawmah, “Hung ah, na taksa chu chung leng vachate leh gamsate pie’ng ka,” a ti a.

⁴⁵Ziephet chun David chun Philistia pa kawm achun, “Nang chu chemzâm tawh, tiengcha tawh, phaw tawh na hung kuon a; kei vang na cho, sepaihte LALPA, Israel sepaihte Pathien min a hung kuon ka hi zawi.

⁴⁶Tuni hin LALPA’n ka khuta nang hi ei pie ding ahi, hun that ka ting na lu la ding ka hi; chun Philistia sepaihte luong haw chu tuni hin chung leng vachate leh gamsate pie’ng ka ting; tichun mi cheng chengin Israel gam ahin Pathien a um hi tih hun hethei untin,

⁴⁷Chun, zie tak a hungkhawmte cheng hin LALPA chun chemzâm leh tiengcha’n a hukdam puoi tih hethei in au; kidona hi LALPA a ahi ngâla, chun, amah chun ka khut uh a nang ei pie ding ahi,” a ti a.

⁴⁸Chun, hiti hi ahi a, Philistia pa chu a hung kipana, a hung a, David a hun naih phet chun David chu a kidona ding uh mun zuon chun, Philistia pa chu a na tuok dingin, kintakin a tai a.

⁴⁹Chun, David chun a sakhau sung chu a vak sawk a, suongchang khat a hun ladawk a, vaisuongseh in a vak sep a, Philistia pa chalpâng lai tak chu a sep a, a chalpâng achun suong chu atum ta a; a khup in tuol ah a puk ta a.

⁵⁰Khutichun, Philistia pa chu David chun vaisuongseh leh suongchang khatin a zo ta a, Philistia pa chu a sep a, a that ta a; David chun chemzâm la a chawi puoh a.

⁵¹Ziephet chun David chu a tai a, Philistia mipa chung achun a va dinga, a chemzâm a mai viel a, a pai apat chun a satdawk a, zie chun a that a, a lu a tan ta a. Chun, Philistia te’n a mihatpau a thii tih a het phet u chun a taisie tau a.

⁵²Chun, Israel te leh Judate chu a kipan u a, a kiko u a, Philistia te chu Gath leh Ekron kulhkawt tieng hielin a delhzui tau a. Chun, Philistia te haw chu Shaaraim lampi tungtawn in Gath leh Ekron tiengin, a puk zeng zung mai tau a.

⁵³Chun Israel te’n Philistia te a delh u chu a haihsan u a, a hung vaikit u a, a giehmun u chu a buluh tau a.

⁵⁴Chun, David chun Philistia pa lu chu a la a, Jerusalem ah a hun chawia; a phaw vang chu a puon-In ah a kawih a.

⁵⁵Philistia pa kidopih dinga David kuon dawk a muh phet chun Saul in sepaih lawiupa Abner kawm achun, “Abner zie tanglakpa hi kuo chapa ahi?” a ti a. Chun, Abner chun, “A dam in dam mai in, aw lengpa, ka he hiel puoi,” a ti a.

⁵⁶Chun, lengpa chun, “Zie naupangpa hi kuo chapa ahim dawpdawk in,” a ti a.

⁵⁷Chun, Philistia pa va that zo a, David a hungkit phet chun Abner in a pui a, a khuta Philistia pa luchang chawi zing kawm chun Saul masang ah a pui ta a.

⁵⁸Chun, Saul chun a kawmah, “Kuo chapa na hi, tangval?” a ti a. Chun, David in a dâwng a, “Bethlehem mi, na suok Jessai chapa ka hi,” a ti a.