Read Gangte 1 SAMUEL 19 Bible Online

1 SAMUEL 19 - Gangte bible

1 SAMUEL 19

¹Khutichun, Saul chun a chapa Jonathan leh a suokte chengcheng chu David that dingin a hilh a.

²Himahlele Saul chapa Jonathan chun David chu a ngaina mah mah a. Chun Jonathan chun David chu, “Ka pa Saul in thah dingin a hun hawl hi; zieziekchun zing zingkal leh chingthei inla, ningthip ah um inla kisel in;

³chun, va chiehdawk ing ka ting, na umna mun zawl achun ka pa kawmah va ding ing ka ting, na chungthu ah ka pa hopih ing ka ting; chun, bang ahim het ka neih chun hun hilh ing ka,” a ti a.

⁴Chun, Jonathan chun a pa Saul masang achun David chu a pakcha a, a kawmah, “Lengpa chun a suokpa David chung ahin thil phalo hih hiel kihen: na chungah bangmah a hihkhiel puoh ngâla, a thilhih haw chu nang dingin apha ngâl a:

⁵A thih ding lam lam gel lo in Philistia pa kha a that a, LALPA’n Israel te chengcheng hukdamna lopitak a sep dawk sak ta a: zie chu nangin le na mu a na kipahpih mah mah kha la; zieziekchun zie tawbang mi pawikhawih lo chung achun bang pên ziek in em thil na hih khelh a, a ziek bangmah umlo a David chu na thah ding?” a ti a.

⁶Khutichun, Saul chun Jonathan thugen chu a pawm a; “LALPA min in amah chu thah hi hiel puo’n a,” ti’n Saul chu a kihâksiel ta a.

⁷Chun, Jonathan chun David chu a sama, chun Jonathan chun ziehaw chengcheng chu a hilh ta a. Chun, Jonathan chun David chu Saul kawm achun a pui a, tuma lam guol khan a kawmah a, um kit ta a.

⁸Chun, kidona a hung um kita: tichun, David chu a kipana, Philistia te chu a va do a, a va that diek ta a, tichun ama achun a taisie tau a.

⁹Chun, Saul chu a In a tiengcha chawia a chut lai in LALPA sawl thagau phalo a chung ah ahung tung ta a; chun, David chun kingkang a tum a.

¹⁰Chun, Saul chun David chu a tiengcha a bâng tawh khawhden chawt a guo a; a hih ziekin, amah chu Saul umna apat chun a kikhawh dawk zata, tiengcha chu bang achun a chang veu vo mai a: chun David chu a taidawk a, zie zan chun a suokcha tai.

¹¹Saul chun David In lama a na châng a; zingkal a a na that dingin mi a sawl a: chun, David zi, Mikal chun, “Tu zan a hih na hinna humbit dinga na taihmang loh chun zing leh thah hi ding na hi,” ti’n a hilh a.

¹²Khutichun, Mikal chun David chu tukvan achun a khaitha a; tichun a taimang a, a suokcha ta a.

¹³Chun, Mikal chun milim a la a, zâlkhun achun a kuol sak a, chun, a luchang lam achun kelmul khapchâk a kawih a, puon a khuh a.

¹⁴Chun, David pui ding a Saul in mi a hun sawl phet chun, “A dam puoi,” a na ti a.

¹⁵Chun, Saul chun David va en dingin mi a sawl kita, “A zâlkhun pum in hun zawn to unla a na that ing ka,” a ti a.

¹⁶Chun, a mi sawlte chu a va lut phet u chun, ngaitie, zâlkhun a chun milim chu a luchang a kelmul khapchâk khap in a na uma.

¹⁷Chun Saul chun Mikal kawmah, “Bang zieka nei hiti thep a ka melma a suohchak na ding a na sawlmang ahim?” a ti a. Chun, Mikal chun Saul chu a dâwng a, “Ei chieh sak in, ahihloh leh hun that ding ka hi, ei ti a ahi kha uo,” a ti a.

¹⁸Khutichun David chu a taimang a, a suokcha ta a, Ramah khuo ah Samuel kawm a va tunga, a chunga Saul thilhih chengcheng chu a hilh a. Chun, amah leh Samuel chu a chieh u a, Naioth ah a um tau a.

¹⁹Chun, Saul chu, “Ngaitie, David chu Ramah khuo ah Naioth ah a um hi,” ti’n a hilh u a.

²⁰Chun, David va pui dingin Saul chun mi a sawl a: chun, thiemgaute thugen lawk lai tak leh a chung u a Samuel lawiupa a um a va muh phet un Saul misawlte chung achun Pathien Thagau a hung tunga, amau chun le thu a genlawk tau a.

²¹Chun, zie chu Saul a hilh phet un midang a sawl kita, amau chun le khutiguol mah chun thu a genlawk zel tau a.

²²Ziephet chun, amah le Ramah achun a va chieh a, Seku muna tuilaihdawk lientak chu a va tunga, “Samuel leh David hi khawi ah a um u?” ti’n a dawng a. Chun, kuo ahim khat hin, “Ngaitie, Ramah khuo a Naioth ah a um ui,” a ti a.

²³Khutichun, Ramah khuo a Naioth ah a chieh a; chun Pathien Thagau a chung ah a hung tung ta a, a chieh zela, Ramah khuo a Naioth a tun chanin thu a genlawk pek a.

²⁴Chun, amah chun le a silhlechen haw a suoh a, Samuel ma achun thu a genlawk buol buol zieng ta a, zie ni chun nichang tumin zie zan chun zan khawvak in ngawnchang in a kuol a. Zieziekchun, “Saul le thiemgau laka tel ahi ta maw,” tih hi a ching den tau a.