Read Gangte 1 SAMUEL 25 Bible Online

1 SAMUEL 25 - Gangte bible

1 SAMUEL 25

¹Chun, Samuel chu a thi ta a; Israel mi chengcheng chu a kikhawm u a, a sun u a, chun, Ramah khuo a a In achun a vui tau a. Chun, David chu a kipana. Paran gamthip ah a chieh suk a.

²Chun, Maon khuo achun mi khat a um a, a khawsakna chu Karmel tângah ahi; mi hausa tak ahi a, belam sang thum leh kelcha sang khat a nei a Karmel tâng achun a belam mul a met sek a.

³Zie pa min chu Nabal ahi a, a zi min chu Abigail ahi: zie nu chu bilpil tak leh melhawih tak ahi a, a pasal vang chu genhak tak leh gilo tak ahi a; Kaleb suon ahi.

⁴Chun, David in gamthip apat chun Nabal in a belam mul a met hi tih a na he a.

⁵Khutichun, David in tangval sawm a sawl a, tangval haw kawm achun David in, Karmel tânga chun va chiehto unla, Nabal kawmah va chieh unla ka min in chibai va bûk un:

⁶Chun, mi neizo takpa kawm achun hiti hin va gen un, “Na chung leh na inkawte chung leh na neih chengcheng chungah thamuonna um hen.

⁷Na belam mulmette a um ui tih ka na he a: na belam chingte ka kawm u ah a um sek u a, bangmah ka lawh kha puou a, Karmel tânga a um sung un a bangmah uh a chan kha puou a.

⁸Na tangvalte dawng leh chin hun hilh zieng in au: Zieziekchun ka tangvalte hi a na lungsiet inla: a lemchân ni taka hung ka hiu hi; na neih dân dân chu na suokte leh na chapa David hi a na pien, a tii, va tiu in,” a ti a.

⁹Chun, David tangvalte chu a va tun un David min in zie thu haw chengcheng chu Nabal kawm achun a gen u a, thipkêi in a ngak tau a.

¹⁰Chun, Nabal chun David suokte chu a dawng a, “David chu kuo ahi Jessai chapa chu kuo ahi a ahi? Tulai hin suok tamtak a puteu taihmang san atam uh a puo!

¹¹Ka chângthâk haw, ka tui haw leh ka belam mul mette dinga ka thah sa haw hi khawilam a hung kipan ahih uh hetloh haw chuh pie ngut ding ka puo!” a ti a.

¹²Khutichun, David tangvalte chu a kihei u a, a chieh kit tau a; zie thu chengcheng chu David a hilh u a.

¹³Chun, David chun a mite kawm achun, “Na chemzâm uh zûk chiet u,” a ti a. Chun, a chemzâm uh a zûk chiet u a; David in le a chemzâm a zûk a, mi za li velin David chu a zui to u a; chun, mi za nih chu thuomphuo ngak in a um u a.

¹⁴Chun, a suokte laka khat chun Nabal zi Abigail kawm achun, “Ngaitie, gamthip apat in David in ka puu chibai bûk dingin mi ahun sawl a, ama’n a na gai a.

¹⁵Himahlele, ziete chu ka chungu ah a pha mah mah u a, ka sietna ding uh bangmah ahih puou a, gamzawl a ka umlai u a, ka umkhawm sung cheng u khan bangmah ka mansak puou a:

¹⁶belam chinga a kawm u a ka um sung cheng u khan sun leh zan in kei u dingin kulh ahi mai ui.

¹⁷Zieziekchun, tuhin zie hi he’n, banga na hih ding khawk tak in ngaihtuoh in; ka puu leh a insung a ding hin sietna tung thei zing ahi; amah hila a hah ngawl taluo a, kuomah hopih theih le hilo,” ti’n a gena.

¹⁸Ziephet chun, Abigail chun kintak in chângthâk tang za nih tawh, uain um nih tawh belam nga huon zieng theih a sem zawhsa tawh, chângpêl tehna dim nga tawh, grep gah kiphogaw bawk zakhat tawh, theigah chângthâk tang zanih a lakhawm a, sabiltung a puok saka.

¹⁹Chun, suokte kawm achun, “Ka ma ah chieh unla; ngaitiem u, hun zui ing ka,” a ti a. Himahlele, a pasal Nabal chu a hilh puoi.

²⁰Chun, ti chuh ahi ta a, a sabiltung chunga chun a chu a kawn sung a hawh lai chun, ngaitie, David leh a mite chun ahun zuon u a; tichun, a kituok tau a.

²¹David chun, “Bangmah a mansak lohna dingin gamthip ah zie pa neih chengcheng hi a thâwn keia ka na ven sak a na hi hi uo; thilpha chu thil phalo in ei dit ta ngâla.

²²Zing leh, zingkal khawvak chana a neih chengcheng laka pasal naupang khat le ka hinghawih himhim chun Pathien in a lawh lawh ei lawh hen, zie sanga nasa chun le hih hen,” a na tih zawh tak ahi a.

²³Chun, Abigail chun David a muh phetin a sabiltung chung apat chun kintak in a kum a, David masang achun a mai a lei si’n a chibai a.

²⁴Chun, a keng bula chun a bawkkhup a, “Ken, hepu, kei mai in manlohna mawh chu puo’ng ka, chun, na suoknu hin na bil a na zak ngêi in thu gen henla na suoknu thugen chu lungsiet takin ngaihthak sak in.

²⁵Hepu, pannabei Nabal hi bangmah cha’n ngai ki’n; a min tawbang phet ahi; Nabal tih mah takin a ngawl ahi hi; kei na suoknu hin chu vang ka lalpa tangval hun sawlte chu ka na mu puoi.

²⁶Zieziekchun, tuhin, ka lalpa, LALPA hinna leh nang hinna’n ka kihâksiel hi, LALPA’n thisan suoh lo ding leh na khuta phuba kilakloa a hun kawih tâk ziekin, tuhin na melmate leh ka lalpa dinga sietna hawlte chengcheng chu Nabal tawbang hiu hen.

²⁷Chun, zie, ka lalpa dinga na suoknu’n kipahman ka hun puok hi ka lalpa hun zui tangval haw hi piek hi hen.

²⁸Na suoknu gitlohna hi lungsiet takin ngaidam in: LALPA’n ka lalpa chu insung dettak tundin sak ngêi ngêi intin, ka lalpa chu LALPA kidona dopih ahi ngâl a; na damsung chengin nang ah gitlohna muh ding um puo’n a.

²⁹Nang hun delh ding leh na hinna sukmangthai guon mite hung kipan mahleu le, ka lalpa hinna chu LALPA na Pathien tawh hinna kikanlawm laka kanlawm khawm hi’n tin; na melmate hinna vang chu vaisuongseh a seh guolin sep mang kêi ina.

³⁰Chun, hiti hi hi’n tin, LALPA’n na chungchâng thu a a thilpha tiem chengcheng ka lalpa chunga ahih a, Israel te leng pa a ahun siem tieng leh,

³¹A ziek beia thisan na suoh loh a, ka lalpa’n phuba na kilak loh hi nang dingin lungkhamna himhim hi puo’n tin, ka lalpa dingin lungbih lohna hi diek hiel puo’n a; LALPA’n ka lalpa chunga thilpha ahih tieng leh na suoknu hi hun hezing in,” a ti a.

³²Chun, David chun Abigail kawm achun, “Tuni a ei na muok dinga hun sawl LALPA, Israel Pathien chu pahchak in um hen:

³³chun, na ngaihdan hawihtak chu vangsak in um henla, chun, thisan suoh gitlohna apat a ei humbit leh keimah khuta phuba kilak lo a ei siem nang ngêi le vangsak in um in.

³⁴Nangin ei na muok zieng kileh chin. LALPA, Israel Pathien min a kihâksiel in ka gen hi, zing khawvak tiengin chuh Nabal chu naupang khatchale sit sak hiel puo’ng ka.” a ti a.

³⁵Khutichun David chun a thil hun puoksak haw chu a la a: chun, a kawm achun, “Thamuong takin na In lam ah chiehto ta’n la; chun, na thu chu ka pawm a, na thil nget chule hih gei ing ka,” a ti a.

³⁶Chun, Abigail chu Nabal kawmah a va chieh a, ngaitie, a In a chun lengte ankuong luih tuk hiel in ankuong a na lui a, a hah kham bêk ziekin Nabal chu a puok vengvung zieng a: zieziekchun, a zing khawvak ma cheng chun bangmah a hilh puoh a.

³⁷Chun, hiti hi ahi a, Nabal chu zingkal a uain hu a theu a, a hung halh phet chun a zi chun zie thu haw chu a vak hilh leh, a lung a phawng phut a, a thingilh hiela, suong guolin a um ta a.

³⁸Chun, hiti hi ahi a, ni sawm nung chun LALPA’n Nabal chung ah khut a tha a, a thi ta a.

³⁹Chun, David in Nabal chu a thii tih a het phet chun, “Nabal ei muhsitna phuba ei lak saka, a suok thil phalo lak apat ei vengbit LALPA chu pahchak in um hen; Nabal thil phalo bawl chu LALPA’n amah chung mah ah a chuk sak ta ahi,” a ti a. Chun, David chun Abigail chu a zi dinga va hopih dingin mi a sawl a.

⁴⁰Chun, David suokte chu Karmel tânga Abigail kawm a va tun phet un, “David in a zi dinga hun pui dinga ei sawl ka hiu hi,” ti’n amah chu a hopih u a.

⁴¹Chun, a kipana, a maia lei si’n chibai a bûka, “Ngaitiem u, ka lalpa suokte keng sil dingin na suoknu hi suok in pang hen,” a ti a.

⁴²Tichun, Abigail chu kintak in a kisa a, a kipana, sabiltung chungah a chuong a, a nungak ngate chu tawh David mi hun sawlte chu a zui ta a, tichun a zi dingin a um ta a.

⁴³David chun Jezreel a um, Ahinoam le a na kichênpih ta a; khutichun a zi’n a um gêl gêl tau a.

⁴⁴Saul chun a chanu Mikal, David zi, kha Gallim khuo a cheng, Laish chapa, Palti chu a na neihsak ta a.