Read Gangte 1 SAMUEL 6 Bible Online

1 SAMUEL 6 - Gangte bible

1 SAMUEL 6

¹Chun, Pathien bawm chu Philistia gam achun tha sagih a uma.

²Chun, Philistia te chun, “LALPA bawm hi bang lawh ding I hi tau em? A umna ngei mah a bang kiti thak dawk ding ahim?” ti’n thiempute leh phunsân thiemte kawm achun a gen uh a.

³Chun, amau chun, “Israel te Pathien bawm hi thak mang ding na hih hiel u lele a ngawnin vang chiehsak hiel kiu in; a kawmah sukkhelh kithawihna thilpiek pie tei tei un, tichun sukdam in um in na tin un, bang zieka a khut chu nanguh apat a lâkdawk loh ahim tih he’n lau” a tiu a.

⁴Ziephet chun, amau chun, “Sukkhelh kithawihna thilpiek a kawm a bang pie ding ka hiu em?” a tiu a. Chun, amau chun, “Philistia lengte zah phet sana âkngawn lim nga leh sana santhim lim nga; nang u leh na lengteu chunga hi leng chu akibang ahi ngâl a.

⁵Zieziekchun, na âkngawn lim hawu leh na gam uh susie sek santhim lim haw chu siem unla; chun Israel te Pathien chu limbawl un, khutichun a khut chu nang u leh na pathienteu leh na gam uh apat ahih zângkhai nuom mawh die.

⁶Aigupta mite leh Pharaoh’n a lunggil uh a suktak guol uh a khah, bang zieka na lunggil uh sutak na hiu em? A lak uh a thilmak tak a hih phet khan mite chuh a chieh sak uh a, a pawt tau hilo ahim?

⁷Zieziekchun, tuhin kangtalai thak guonggalh unla, bâwngpi nih a nawi thâwklai gel, puokgik puo khalo hiel tawh; zie bâwngpite chu kangtalai achun bulh unla, chun a noteu chu In lam ah hun pui un.

⁸Chun, LALPA bawm chu lau inla, kangtalai chunga chun kawih unla; chun, sukkhelh kithawihna dinga na piek uh sana thillul chu thingkuong a khum in, a sik ah kawih unla, chiehsak unla, tha dawk mai un.

⁹Khutichun, amah gam lam zawtna lampi hawh in Bethsemesh-ah a chieh em en un, a chieh chun, I chung uh a thil phalo tak hi amah hih hi’n tin, a chieh loh chun ei uh ei gawt hih amah khut ahi puoi tih hêi tingun, I chung uh a hung tung mawngmawng hi’n a,” a tiu a.

¹⁰Chun, mihaw chun khutichun ahih uh a: bâwngpi a nawi thâwklai nih a kai u a, kangtalai achun a bulh uh a, a noteu chu In ah a khumtup uh a:

¹¹Chun, LALPA bawm chu kangtalai achun a kawih uh a, sana santhim lim leh âkngawn lim kikawihna thingkuong chu tawh.

¹²Chun, bâwngpite chun Bethsemesh lam zuonin lampi chu a hawh zel zel tau a; chun hâm kawm zingin lampi achun a chieh uh a, changlam ahim veilam ahim ah a pet hiel puou a; chun, Philistia lengte chun Bethsemesh gamgi tiengin a zui uh a.

¹³Chun, Bethsemesh khuo a mite chun guom ah buh ana ât uh a, a vak dâk dawk u leh Pathien bawm chu a vak muu a, a kipâk ta mah mah uh a.

¹⁴Chun, kangtalai chu Bethsemesh khuo a cheng Joshua lo ah ahung luta, suong lientak umna achun a ding zieng ta a; chun, kangtalai thing chu a ek uh a, LALPA hona dingin bâwngpite chu hâlmang kithawihna dingin a mang tau hi.

¹⁵Chun, Levi te chun LALPA bawm chu sana thillul umna thingkuong chu tawh a lathau a, suong lien chung achun a kawih u a; chun, Bethsemesh khuo a mite chun zie ni mah chun hâlmang thilpiek haw leh kithawihna haw LALPA kawmah a pieu a.

¹⁶Chun, ziehaw cheng chu Philistia leng ngate chun muchien kêi in zie ni mah chun Ekron khuo ah a vaikit tau hi.

¹⁷Philistia te’n LALPA kawma gitloh thawihna thilpiek dinga a piek uh sana âkngawn lim chu zie zah hih ahi: Ashdod khuo a dingin khat, Gaza khuo a dingin khat, Ashkelon khuo a dingin khat, Gath khuo a dingin khat, Ekron khuo a dingin khat:

¹⁸Chun, sana santhim lim chule Philistia te khawpi haw, leng ngate khawpi kulh nei haw leh khawneu kulh bei haw, Abel muna suong lientak LALPA bawm a ngakna tieng uh a, zah ahiu a: LALPA bawm a ngaknau suong lientak chu Bethsemesh khuo a Joshua lo ah tuni tieng hin a um zing hi.

¹⁹Chun, Pathien bawm sung a et ziekun Bethsemesh khuo a mite chu a gawt lum a, alak uh a mi singnga leh sawmsagih hiel a gawt lum hi: LALPA’n mipite chu a hah gawt bêk ziekin mite chu a kap u a.

²⁰Bethsemesh khuo a mite chun, “Zie Pathien thiengtho LALPA ma ahih kuo a ding thei ding? I kawm uh apat hin khawi ah a chiehdawk ta dem?” a tiu a.

²¹Khutichun, Kiriath-jearim khuo a mite kawm achun, “Philistia te chun LALPA bawm chu ahun kawih kit tau a, hung suk unla na kawm u ah la to un,” ti a va gen dingin mi a sawl tau a.