Read Gangte 1 SAMUEL 8 Bible Online

1 SAMUEL 8 - Gangte bible

1 SAMUEL 8

¹Chun, hiti hi ahi a, Samuel chu ahung upa ta a, a chapate chu Israel te chunga vaihawm in a siem a.

²A chapa upa pên min chu Joel ahi a; aban a pa min chu Abijah ahi a; Beerseba-a vaihawmte ahiu a.

³Himahlele a chapate’n vang a umdan a la puou a, sumlepai lam a delh u a, gawlhgukna haw a lau a, diklo takin vai a hâwm u a.

⁴Khutichun, Israel upate chengcheng a kikhawm u a, Ramah khuo ah Samuel kawmah a chieh u a,

⁵a kawmah, “Ngaitie, na upa ten mai ta a, na chapate hin lah na umdan a la hiel puou a; nam dangte mah banga ka chung u a vaihawm dingin leng ei siem sak in,” a tiu a.

⁶Himahlele a kawma, “Vai ei hawmsak ding leng ei pie’n,” a tih thuu chun Samuel chu a sukipak lo mah mah a.

⁷Tichun Samuel chu LALPA kawmah a paucham a. Chun, LALPA chun Samuel kawmah, “Mipite’n na kawma a gen chengcheng u chu ngaitha’n; nang hun deihlo ahi puou a, a chung u a leng dinga kei ei deihlo ahi zawu hi.

⁸Aigupta gam apat ka puihdawk ni apat tutienga a thilhih danteu chengcheng, ei nutsieh uh a pathien dang haw na ei sep san sek guol uh a hi na chunga a hih uh ahi hi.

⁹Zieziekchun a thuu chu ngaitha’n: amahvang chuh guntak in vau inla a chunguh a vai hun hawm ding lengpa hung tawih dân ding chu hilh in,” a ti a.

¹⁰Chun, LALPA thu chengcheng chu Samuel chun leng deih mipi haw chu a hilh vek a.

¹¹“Na chung u a vai hun hawm ding leng tawihdan ding haw chu zie tawbang hi hi’n a: na chapateu lân tin, a kangtalai haw enkawla, a sakawl haw chinga, a kangtalai haw masanga tai dingin guot intin:

¹²chun, a sepaih sang lawiupa dingte, sawmnga lawiupa dingte’n guot intin; chun, khenkhat chu a lokai dingin, a buh ât ding in, a kidona thuomphuo siem ding in, a kangtalai matchâk siem ding in mang in a.

¹³Chun, na chanuteu chu gimlim siem ding leh anhuon ding leh, chângthâk siem ding bangin mang in a.

¹⁴Chun, na loteu, na grep huonteu, na olive huonteu, apha pha hun lâksak intin, a suokte pie’n a.

¹⁵Chun, na thaichiu leh na grep huon uh a sawma-khat cheng hun lâksak intin, a miliente leh a suokte pie’n a.

¹⁶Chun, na suokpateu, na suoknuteu, na tangval pha lai laiteu, na sabiltung teu hun chuh intin, a nasem dingin guoi ina.

¹⁷Na belam hawnteu lak apat sawma-khat hun lâksak intin, chun, a suokte hung hi’n lau.

¹⁸Zie tieng chuleh na leng ding u a na tel pau ziek chun mau in na tin un; himahlele, zie tieng chuleh LALPA’n hun dâwng puo’n a,” a ti a.

¹⁹Himahlele mipite chun Samuel thu chu a pawm nuom puou a, “Ahi puoh ie, leng ka neih tei ding uh ahi;

²⁰Tichun nam dang chengcheng te tawbang hung hii tingun, chun, I lengpau chun vai ei hawmsak intin, I mau a chieh in gâl ei do pih ina,” a tiu a.

²¹Chun, Samuel chun mipite thugen chengcheng chu a he a, LALPA bil achun a gensawn a.

²²Chun, LALPA chun Samuel kawmah, “A thuu chu zui inla, leng siem sak in,” a ti a. Chun, Samuel chun Israel te kawm achun, “Mitin chu nangmau khuo ah chieh chiet u,” a ti a.