Read Garhwali मत्ती 10 Bible Online

मत्ती 10 - Garhwali bible

मत्ती 10

¹फिर यीशु ल बारह चेलों तैं अफ मा बुलै के अर ऊं तैं दुष्टात्मा तैं निकलण को अधिकार दींनि की उ सब प्रकार की बिमारियों अर सब प्रकार की कमजोरियों तैं दूर कैरो।

²यूं बारह प्रेरितों का नौं यु छिन पैलो शमौन पतरस अर वेको भैय अन्द्रियास जब्दी को नौंनो याकूब अर वेको भैय यूहन्ना।

³फिलिप्पुस अर बरतुल्मै, थोमा अर चुंगि लींण वलो मत्ती, हलफई को नौंनो याकूब अर तद्दी।

⁴शमौन कनानी अर यहूदा इस्करियोती जैल यीशु तैं वेका दुश्मनों का हथों मा पकड़वै दींनि।

⁵यीशु ल बारह चेलों तैं पैली ही इन आज्ञा दे के भेजि, “अन्यजातियों कि तरपां नि ज्यां अर सामरी जाति मा नि ज्यां।[23]”

⁶इस्राएल का लुखुं मा जावा, जु पिता परमेश्वर बट्टी दूर हवे गैनी, जन हरचि ढिबरो अपड़ा रखवला बट्टी दूर हवे जांद।

⁷अर चलद-चलद यु प्रचार कैरा कि स्वर्ग कु राज्य नजदीक ऐ गै।

⁸बिमारों तैं खूब कैरा मुर्दों तैं ज्यूँदो कैरा कोढ़ियों तैं शुद्ध कैरा अर दुष्टात्मा तैं निकलै तुम ल मुफ्त मा पै तुम भि मुफ्त मा द्या।

⁹अपड़ा पटुकूं मा सोना, चांदी अर तांमु का सिक्का जमा नि करयां।

¹⁰बट्टा कु न त झोला रखा, न द्वी-द्वी कुर्ता, न जुत्ता अर न लाठो रखा किलैकि मजदूर तैं वेको खांणु मिलण चयणु च।

¹¹जै कै शहर य गौं जैला त पता लगा कि उख कु काबिल च? अर तब तक उख बट्टी विदा नि हुयां वेका इख रावा।

¹²घौर मा भितर जांण दफा वे तैं आशीष दियां।

¹³जु वे घौर का लोग काबिल होला त तुमारो कल्याण ऊं पर होलो पर जु उ काबिल नि होला त तुमारो कल्याण तुम मा वापिस ऐ जालो।

¹⁴जु कुई तुम तैं स्वीकार नि कैरो अर तुम्हरी बातों तैं नि सुंणौ त वे घौर य वे शहर बट्टी निकली के अपड़ा खुट्टों की धूल उखि झाड़ी दियां।

¹⁵मि तुम मा सच बुल्णु छौं कि न्याय का जांच का दिन वे शहर की दशा से सदोम अर अमोरा शहर कि दशा जादा सैंण जुगुत हवेलि।

¹⁶“देखा मि तुम तैं ढिबरों का जन भेड़ियों का बीच मा भिजद इलै गुरो जन बुद्धिमान अर कबूतर जन भोला बंणा।”

¹⁷पर लुखुं बट्टी सचेत रावा किलैकि उ तुम तैं यहूदियों का मिलणा का भवन मा सौंपला अर अपड़ी महासभा मा तुम पर कोड़ा मरला।

¹⁸तुम मि कु राज्यपालों का अर राजाओं का संमणी अर अन्य-जाति पर गव्है हूंणु कु पेश किये जैला।

¹⁹जब उ तुम तैं पकड़वाला त तुम फिकर नि करयां कि हम ल कन कै बुल्ण किलैकि जु कुछ तुम ल बुल्ण होलो उ वे बगत तुम तैं बतये जालो।

²⁰किलैकि बुल्ण वला तुम नि होल्या पर तुमारी परमेश्वर की आत्मा तुमारा द्वारा बुलली।

²¹भैय, अपड़ा भैय तैं, अर बुबा नौंना तैं, मरणु कु द्याला, अर नौंना बाला ब्वे-बुबा का विरोध मा उठि के ऊं तैं मरवै डलला।[24]

²²मेरा नौं का वजह से सब लोग तुम बट्टी बैर रखला पर जु आखिर तक धीरज रखलो वेको ही उद्धार होलो।

²³जब उ तुम तैं एक शहर मा सताला त तब तुम हैंका शहर मा चलि ज्यां। मि तुम मा बुल्णु छौं कि तुम इस्राएल देश का सभि शहर मा नि जै सकिल्या कि तब तक मि मनिख कु नौंनो ऐ जौलु।

²⁴“चेला अपड़ा गुरु से बड़ो नि हूंद अर न सेवक अपड़ा स्वामि से।”

²⁵चेला का गुरु से अर दासों कु गुरु का समान हूंण बराबर च अर जब उ मि तैं घौर का मालिक कु शैतान बुल्दा छिन, त मेरा घौर का लुखुं तैं अर भि बुरा नौं बट्टी बुलाला।

²⁶इलै ऊं लुखुं बट्टी नि डरयां जु तुम तैं धमकी दींद उ बगत आंणु च जब सब कुछ जु ढँकुयों च उ संमणी ऐ जालो, अर जु कुछ गुप्त च उ सब तैं पता चलि जालो।

²⁷जु कुछ भि मि अंधेरा मा बुल्दो छौं, वे तैं उज्यला मा बोला; जु कुछ तुम बट्टी कन्दूड़ो मा बुलै गै, वेकु प्रचार हर जगह कैरा।

²⁸जु देह तैं मारि सकदींनि, पर आत्मा तैं नि मारि सकदींनि ऊं बट्टी नि डरयां पर परमेश्वर बट्टी डैरा जु प्राण अर देह द्वीयूं तैं नरक मा नाश कैरी सकदु

²⁹क्य एक पैसा मा द्वी गौरैयों नि बिकदिंन? तब भि तुमारा बुबा कि इच्छा बगैर ऊंमा बट्टी एक भि धरती पर नि गिरि सकिदि।

³⁰परमेश्वर तुम्हरी जीवन का बारा मा चिंता करदो च उ यु भि जंणदु च की तुमारा मुंड मा कथग बाल छिनी। [25]

³¹इलै डैरा न तुम्हरी कीमत भौत गौरेयों से भि बढ़ि के छा।

³²जु कुई भि लुखुं का संमणी इन बोलु की मि यीशु को चेला छों त मि भि वे तैं अपड़ा स्वर्गीय बुबा का संमणी स्वीकार करलो।

³³जु उ दूसरों का संमणी यु बुल्ण से डरदु च की उ मेरा चेला छिन, त मि अपड़ा बुबा जु स्वर्ग मा च बोलि दयुलु की यु मेरा चेला नि छिन।

³⁴“इन नि सोचा कि मि धरती पर लुखुं का बीच मा शान्ति लांणु कु अयुं छौं, मि लुखुं का बीच मा शान्ति नि बल्कि लड़ै करवांणु कु अयुं छौं।”

³⁵मि त इलै अयुं छौं कि मनिख तैं वेका बुबा बट्टी अर नौंनि तैं वीं कि ब्वे बट्टी अर ब्वारि तैं वीं कि सासु का विरुद्ध कैर द्यो

³⁶मनिख्युं का बैरी ऊंका वे अपड़ा परिवार का ही लोग होला।

³⁷“जु ब्वे-बुबा तैं मि से जादा प्रेम करद उ मेरा लैख नि च अर जु नौंना य नौंनि तैं मि से जादा प्रेम करद उ भि मेरा चेला बनण का लैख नि च।[26]”

³⁸अर जु मेरा चेला हूंण का कारण अपड़ी सूली उठांण अर मुरण कु भि तैयार हो अर मेरा पिछनैं नि चलो उ मेरू चेला हूंणा का लैख नि च।

³⁹जु कुई अपड़ो जीवन बचौण चौ उ वे तैं गवांलू पर जु कुई मेरा बाना अर शुभ सन्देश का बाना अपड़ा आत्मा तैं गवांलू उ अनन्त जीवन तैं पालो।

⁴⁰“जु तुम तैं स्वीकार करदो उ मि तैं स्वीकार करदो अर जु मि तैं स्वीकार करदो उ मेरा भिजण वला तैं स्वीकार करदो।”

⁴¹जु परमेश्वर का तरपां बट्टी बुल्दो तैं परमेश्वर का तरपां बट्टी बुल्दो जांणि के स्वीकार कैर उ परमेश्वर का तरपां बट्टी बुल्ण वलो का समान ईनाम पालो अर जु धर्मी आदिम तैं धर्मी जांणि के स्वीकार कैर उ धर्मी को ईनाम पालो।

⁴²जु कुई यूं छुटो मा बट्टी एक तैं भि मेरू चेला जांणि कै भस एक गिलास ठंड़ो पांणी पिलालो की तुम मसीह का चेला कहलांदा छा त मि तुम मा सच बुल्ण छौं उ निश्चित रूप से ईनाम पालो।