Read Garhwali मत्ती 16 Bible Online

मत्ती 16 - Garhwali bible

मत्ती 16

¹फरीसियों ल अर सदूकियों ल संमणी ऐ के यीशु कि अजमैश कनु कु वेकु बोलि “हम तैं स्वर्गीय चमत्कार का चिन्ह दिखौ।”

²वेल ऊं तैं जवाब दींनि “रुमुक जुग तुम बुल्दा कि मौसम ठिक रालो किलैकि आसमान लाल च।”

³अर सूबेर बुल्दा कि आज तुफान आलो किलैकि आसमान लाल अर बदल्युं च तुम स्वर्ग का लक्षण देखि के वेको भेद बतै सकदा छा पर बगत का चिन्ह का भेदों तैं किलै नि बतै सकदां?

⁴यु युग का बुरा अर व्यभिचारी लोग चमत्कार का चिन्ह ढुंडणा छिन पर योना परमेश्वर का तरपां बट्टी बुल्ण वला का चिन्ह तैं छोड़ी के कुई और चिन्ह ऊं तैं नि दिये जालो अर उ, ऊं तैं छोड़ी के चलि गै।

⁵चेला झील का पल्या छाला मा पौंछिनी पर उ रुट्टि लिजांण बिसरी गै छा।

⁶यीशु ल ऊंमा बोलि, “देखा तुम फरीसियों का अर सदूकियों का खमीर बट्टी सचेत रयां।”

⁷उ आपस मा विचार कन लगि गैनी “हम मा रुट्टि नि च इलै उ बुल्णु च।”

⁸यु जांणि के यीशु ल ऊंमा बोलि, “हे अधुरा विश्वासियों, तुम आपस मा किलै यु विचार कना छा कि हम मा रुट्टि नि च?”

⁹क्य तुम अभि तक नि समझयां? क्य तुम तैं ऊं पाँच हजार मनिख्युं कि पाँच रुट्टि याद नि च अर क्य यु भि याद नि च कि तुम ल टुकड़ों का कथग ठुपरा कठ्ठा करिनी?

¹⁰अर न तुम तैं ऊं चार हजार मनिख्युं कि सात रुट्टि याद छिन अर न यु भि कि तुम ल कथग ठुपरा भोरिके उठै छा?

¹¹कि तुम अभि तक भि नि समझयां कि मिल तुम मा रुट्टि का बारा मा नि बोलि, पर यु कि तुम फरीसियों ल अर सदूकियों का खमीर बट्टी सचेत रैयां।

¹²तब ऊंकी समझ ऐ गै कि यीशु ल रुट्टि का खमीर से न बल्कि फरीसियों कि अर सदूकियों कि झूठी शिक्षा से सचेत रौंणु कु बोलि छो।

¹³यीशु कैसरिया अर फिलिप्पी नगर मा ऐ अर अपड़ा चेलों बट्टी पुछण लगि गै “कि लोग मि मनिख कु नौंनो कु क्य बुल्दींनि”

¹⁴ऊंल बोलि “कुछ त यूहन्ना बपतिस्मा दींण वलो बुल्दींनि अर कुछ एलिय्याह अर कुछ यिर्मयाह जु परमेश्वर का तरपां बट्टी बुल्ण वला मा बट्टी कुई एक भि बुल्दींनि।”

¹⁵यीशु ल ऊंमा बोलि पर तुम मेरा बारा मा कि सुचदियां की मि कु छो?

¹⁶शमौन पतरस ल जवाब दींनि “तु ज्यूँदो परमेश्वर कु नौंनो मसीह छै।”

¹⁷यीशु ल वे तैं जवाब दींनि, “हे शमौन पतरस योना का नौंना तु धन्य छै किलैकि न मांस अर न ल्वे ल पर मेरा बुबा ल जु स्वर्ग मा च वेल य बात त्वे पर प्रगट कैरी।”

¹⁸अर मि भि त्वे मा बुल्णु छौं कि तु पतरस छै अर तु यु ढुंगा पर अपड़ी मण्डलि बंणौलु अर अधोलोक का फाटक वेको मुकाबला नि कैरी सकला।

¹⁹मि त्वे तैं स्वर्ग राज्य कि चाबी दयुलु : अर जु कुछ तु धरती पर बंधिलि उ स्वर्ग मा बंधे जालो अर जु कुछ तु धरती पर खोलिलि उ स्वर्ग मा खुलै जालो।

²⁰तब यीशु ल चेलों तैं चितै के बोलि, कि मेरा बारा मा यु कै मा नि बुल्यां की मि मसीह छो।

²¹वे बगत बट्टी यीशु अपड़ा चेलों तैं सिखौंण लगि गै, “कि जरूरी च कि मि यरूशलेम शहर कु जौं अर दाना-सयाणों का अर प्रधान याजक अर मूसा की व्यवस्था तैं सिखांण वलो का हथ से भौत दुःख उठै के मरै जौं अर तिसरा दिन ज्यूँदो हवे जौं।”

²²ईं बात पर पतरस वे तैं अलग मा लिजै के झिड़कंण लगि गै अर बुल्ण लगि गै कि “हे प्रभु परमेश्वर नि कैर कि कभि त्वे दगड़ी इन हो।”

²³वेल पिछनैं फरकि के पतरस तैं झिड़की के बोलि, “हे शैतान मेरा संमणी बट्टी दूर हवे जा त्वे बट्टी मि तैं ठोकर मिलणी च किलैकि तु परमेश्वर का तरपां बट्टी नि सुचणी बल्कि मनिख्युं कि तरपां बट्टी सुचणी छै।”

²⁴तब यीशु ल अपड़ा चेलों मा बोलि, “जु कुई मि दगड़ी आंण चौ उ अपड़ी इच्छाओं तैं छोड़ी के अर अपड़ी सूली उठै के मेरा पिछनैं औ।”

²⁵किलैकि जु कुई अपड़ो जीवन बचौण चौ उ वे तैं गवांलू पर जु कुई मेरा बाना अर शुभ सन्देश का बाना अपड़ी आत्मा तैं गवांलू उ अनन्त जीवन तैं पालो।

²⁶जु मनिख सैरा दुनिया तैं पै ल्यो अर अपड़ा आत्मा तैं ख्वे द्यो य मनिख अपड़ा प्राण का बदला क्य दे सकद?

²⁷जब मि मनिख कु नौंनो अपड़ा स्वर्गदूतों का दगड़ी अपड़ा बुबा कि महिमा मा आलो वे बगत उ हर एक तैं वेका कामों का अनुसार प्रतिफल दयालो।

²⁸मि तुम मा सच बुल्णु छौं कि, “जु इख म खड़ा छिन ऊंमा बट्टी कुई-कुई इन छिन कि जब तक मि मनिख कु नौंनो परमेश्वर का राज्य का सामर्थ का दगड़ा आंण नि दिखला तब तक ऊंल मुरण भि नि च।”