Read Garhwali मत्ती 19 Bible Online

मत्ती 19 - Garhwali bible

मत्ती 19

¹जब यीशु ल यु सैरी बात बोलि येलि छै त तब उ गलील जिला बट्टी चलि गै; अर यहूदिया प्रान्त मा यरदन गाड का पल्या छाला पर ऐनी जख फिर एक बार एक भीड़ वेका नजदीक फिर कठा हवे गै अर वेल उख बिमारों तैं खूब कैरी।

³तब फरीसियों ल वेकी अजमैश कनु कु वेमा पूछि, क्य मूसा की व्यवस्था मा एक आदिम तैं अपड़ी घरवलि तैं छुड़णै की अनुमति छैं?

⁴यीशु ल जवाब दींनि “क्य परमेश्वर का वचन मा नि पैढ़ी कि जैल ऊं तैं बंणै वेल शुरू बट्टी नर अर नारी कैरी के बणै।”

⁵इलै आदिम अपड़ा ब्वे-बुबा से अलग रै के अपड़ी घरवलि दगड़ी रालो अर उ द्वी एक तन होला

⁶अर उ द्वी एक तन होला इलै उ अब द्वी न पर एक तन च इलै “जै तैं परमेश्वर ल जोड़ेलि वे तैं मनिख अलग नि करयुं।”

⁷लुखुं ल यीशु मा बोलि, “त फिर मूसा ल किलै ठैरे कि चाम्रपत्र दे के वीं तैं छोड़ दे।”

⁸यीशु ल ऊंकु बोलि, “तुमारा जिद्दी हूंण का कारण मूसा तुम तैं यु आज्ञा दींनि।”

⁹वेल ऊंमा बोलि, “जु कुई आदिम अपड़ी घरवलि तैं तलाक दे के हैंकी जनन का दगड़ा मा ब्यो करलो त तब उ वीं पैली का खिलाफ व्यभिचार करदो अर जु घरवलि अपड़ा आदिम तैं छोड़ी के हैंका आदिम का दगड़ा मा ब्यो कैर त व भि व्यभिचार करदी।”

¹⁰चेलों ल ऊंमा बोलि, “कै आदिम कै जनन का दगड़ी इन सम्बन्ध हो, तब त यु ही ठिक च की ब्यो कि यु ही नि जौं।”

¹¹वेल चेलों मा बोलि, “सब यु वचन तैं स्वीकार नि कैरी सकदींनि भस उ ही इन कैर सकदा जौं तैं परमेश्वर ल वे ढंग से जीणै क्षमता दीं च।”

¹²किलैकि कुछ नपुंसक इन छिनी जु ब्वे का ही गर्भ बट्टी इन पैदा हवीनि अर कुछ नपुंसक इन छिनी “जौं तैं मनिख्युं ल नपुंसक बंणै अर कुछ नपुंसक इन छिनी जौं ल स्वर्ग का राज्य कु अफ तैं नपुंसक बंणै जु वे जु समझण म सक्षम छिन, उ समझ ल्या।”

¹³तब लोग नौन्याळु तैं वेमा लाणा रैनी कि यीशु ऊंका मुंड मा हथ रखि के अर पिता परमेश्वर बट्टी प्रार्थना करे पर चेलों ल लोग घुड़कि दींनि।

¹⁴यीशु ल यु देखि त गुस्सा हवे कै ऊंकु बोलि, “बच्चों तैं मि मा आंण द्या ऊंकु मना नि कैरा किलैकि यु ही लोग जु बच्चों जन विश्वासयोग्य अर विनम्र छिनी परमेश्वर कु राज्य यूंको ही च।”

¹⁵अर ऊं पर हथ रखि के, उख बट्टी चलि गै

¹⁶एक मनिख वेमा दौड़ि के ऐ अर वेका संमणी घुंडा टेकी के वेमा पूछि, “हे उत्तम गुरु जी अनन्त जीवन पर मेरू हक हो यांको मि तैं क्य कन चयणु?”

¹⁷पर यीशु ल वे मा बोलि, “तु मि मा भलै का बारा म किलै पुछंणि छै? भलो त एक ही च पर तु जु सदनी का जीवन मा जांण चांणि छै त आज्ञाओं तैं मांणा कैर।”

¹⁸वेल वेमा पूछि, “कु आज्ञा?” यीशु ल बोलि, “यु कि हत्या नि कैरी व्यभिचार नि कैरी चोरी नि कैरी झूठी गव्है नि दियां”

¹⁹अपड़ा ब्वे-बुबा कु आदर करयां अर अपड़ा पड़ोसी बट्टी अफ जन प्रेम रखयां।

²⁰पर वे जवान आदिम ल यीशु मा बोलि “यूं सभि बातों तैं मि मंणदु छौं” अब मि मा कैं बात की कमी च?

²¹यीशु ल वेमा बोलि “तु जु सिद्ध हूंण चांणि छै त जा अर अपड़ी चीज बस्ति तैं बेचि के गरीब गरबों तैं देदि अर त्वे तैं स्वर्ग का राज्य मा धन मिललो अर मेरू चेला बंणि के मेरा पिछनैं हवे जा।

²²पर वे जवान आदिम ल जब या बात सूंणि त दुखी हवे के चलि गै किलैकि उ भौत सेठ छो।

²³तब यीशु ल अपड़ा चेलों मा बोलि मि तुम मा सच-सच बुल्णु छौं कि सेठ धनवान लुखुं को परमेश्वर का राज्य मा जांण भौत मुश्किल च।”

²⁴मि तुम मा फिर बुल्णु छौं कि परमेश्वर का राज्य मा सेठ शौकारुं कु जांण से ऊंट को स्यूंण का छेद बट्टी निकलण जादा सरल च।

²⁵जब चेलों ल यु सूंणि त उ भैचक हवे के आपस मा बुल्ण लगि गै की यांको मतलब च की कै तैं भि पापों का दंड बट्टी उद्धार नि मिल सकद।

²⁶यीशु ल ऊंकी तरपां देखि के बोलि, “यु मनिख्युं बट्टी त नि हवे सकदु पर परमेश्वर कु सब कुछ संभव च।”

²⁷ईं बात पर पतरस ल यीशु म बोलि, “हमारो क्य होलो हम त तेरा चेला बंणि के सभि कुछ छोड़ी के तेरा पिछनै औणा छा।”

²⁸यीशु ल ऊंमा बोलि मि तुम मा सच बुल्णु छौं कि नई सृष्टि मा जब मि मनिख कु नौंनो अपड़ी महिमा का सिहासन पर बैठुलो त तुम भि जु मेरा पिछनैं हवे ग्यां बारह सिंहासन मा बैठी के इस्राएल का लुखुं का बारह गोत्र कु न्याय करिल्या।

²⁹अर जैल घौरबार भैय बैणा, ब्वे-बुबा, बाल बच्चा, पुंगड़ा तक छोड़ेनी सताव का दगड़ा स्वर्गलोक मा सौ गुणा अनन्त जीवन भि पाला।

³⁰पर भौत सैरा लोग छिनी जु अभि महान अर अगनैं छिनी, वे बगत पिछनै होला अर जु पिछनै होला उ वे बगत अगनैं होला।