Read Garhwali मत्ती 2 Bible Online

मत्ती 2 - Garhwali bible

मत्ती 2

¹जब राजा हेरोदेस यहूदिया प्रान्त पर शासन कनु छो, त यीशु को जन्म वे प्रान्त का बैतलहम शहर मा हवे, त पूरब का देश बट्टी कथग ही ज्योतिषि यरूशलेम शहर मा ऐ के पुछण लगि गैनी

²कि, “यहूदियों कु राजा जै को जन्म हवे उ कख च? किलैकि हम ल पूरब दिशा मा वेका जन्म का बारा मा आराधना कन वलो गैंणो देखि अर वे तैं प्रणाम कनु कु अयां छा।”

³यहूदियों का राजा का जन्म का बारा मा यु सूंणि के राजा हेरोदेस अर वेका दगड़ा मा यरूशलेम शहर का भौत सा लोग घबरै गैनी।

⁴तब वेल सभि प्रधान याजकों अर मूसा की व्यवस्था तैं सिखांण वलो तैं कठ्ठा कैरी कै ऊं बट्टी पूछि कि, मसीह कख पैदा होलो?

⁵“ऊंल वेमा बोलि” मसीह कु जन्म यहूदिया प्रान्त का बैतलहम शहर मा होलो, किलैकि मीका जु परमेश्वर का तरपां बट्टी बुल्ण वलो छो वेका द्वारा इन लिखै गै।

⁶“कि हे यहूदिया प्रान्त का, बैतलहम शहर का लुखुं तु जु यहूदिया प्रान्त का प्रदेश मा छै तु कनके भि यहूदा का अधिकारियों मा सबसे छुटो नि छै किलैकि त्वे मा बट्टी एक आदिम आलो जु अधिपति बणालो जु मेरी प्रजा इस्राएल का लुखुं कि रखवली करलो।”

⁷राजा हेरोदेस ल वे बच्चा की उम्र जनणु कु ज्योतिषियों तैं चुपके से बुलै के पूछि, कि गैंणो ठिक कै बगत मा दिखै गै छो।

⁸अर वेल यु बोलि के ऊं तैं बैतलहम भेजि, “जावा अर वे बच्चा का बारा मा ठिक-ठिक पता कैरा अर जब उ मिली जौ त मि मा वापिस ऐ के जु कुछ तुम ल देखि वे तैं मि तैं बतावा कि मि भि ऐ के वे तैं प्रणाम कर वेकी आराधना कैरू।”

⁹उ राजा कि बात सूंणि के चलि गैनी अर जु गैंणो ऊंल पूर्व मा देखि छो उ ऊंका अगनैं-अगनैं चलि अर जख उ बच्चा छो वीं जगह का मथि पौंछि के ठैरिगे।

¹⁰वे गैंणो तैं देखि के उ भौत खुश हवेनि।

¹¹ऊंल वेका घौर मा वेकी ब्वे मरियम अर यीशु देखि, त अपड़ा मुंड़ो तैं झुखै के वेकी आराधना अर प्रणाम कैरी अर अपड़ा-अपड़ा थैलों तैं खोलि के वे तैं सोना अर लोबान अर गन्धरस भेंट चड़ै।

¹²तब ऊंल सुपन्या मा या चेतावनी पै कि राजा हेरोदेस का संमणी फिर नि जयां अर उ बगैर बतयां दुसरा बट्टा बट्टी अपड़ा देशों कु चलि गैनी।

¹³ऊंका जांणा का बाद प्रभु का एक स्वर्गदूत ल यूसुफ का सुपन्या मा ऐ के बोलि, “उठ वे बच्चा तैं अर वेकी ब्वे तैं ले के मिस्र देश कु भागि जा, अर जब तक मि त्वे मा नि बोलु तब तक उखि रै किलैकि राजा हेरोदेस यु बच्चा तैं ढुंडणु च कि वे तैं मरवै द्यो।”

¹⁴तब उ राती उठि के बच्चा तैं अर वेकी ब्वे तैं ले के मिस्र देश कु चलि गै।

¹⁵अर राजा हेरोदेस का मुरण तक मिस्र देश मा ही रै, इलै की उ वचन जु होशे जु परमेश्वर का तरपां बट्टी बुल्ण वलो का द्वारा भौत पैली बोलि छो उ पूरो हो कि, “मिल अपड़ा नौंना तैं मिस्र बट्टी बुलै।”

¹⁶तब राजा हेरोदेस गुस्सा हवे, कि ज्योतिषियों ल वे दगड़ी धोखा कैरी अर लुखुं तैं भेजि के ज्योतिषियों का द्वारा ठिक-ठिक बतयां बगत का अनुसार बैतलहम शहर अर वेका अमणी-संमणी का सभि जगह का सब नौंनो तैं जु द्वी बरस से कम उम्र का छुटा नौंना छा मरवै दींनि।

¹⁷तब जु वचन यिर्मयाह जु परमेश्वर का तरपां बट्टी बुल्ण वलो छो, उ पूरो हवे।

¹⁸“[6]रामाह नगर मा एक दुःख-नाद सुंणै गै रूण अर बिजां चिल्लाहट[7] राहेल अपड़ा नौंनो कु रूंणी छै अर शांत हूंण चाँदि छै किलैकि उ अब नि रैनी।”

¹⁹जब युसूफ, मरियम अर बालक यीशु मिस्र मा ही छा तब राजा हेरोदेस का मुरणा का बाद प्रभु का स्वर्गदूतों ल मिस्र देश मा यूसुफ का सुपन्या मा ऐ के बोलि,

²⁰“उठ नौंना तैं अर वेकी ब्वे तैं ले के इस्राएल देश मा चलि जा किलैकि राजा हेरोदेस जु नौंना तैं मरण चांणु छो उ अब मोरि गै।”

²¹तब यूसुफ उठि अर बालक अर वेकी ब्वे मरियम तैं दगड़ा मा मिस्र देश तैं छोड़ी के इस्राएल देश मा ऐ।

²²इलै जब युसूफ ल यु सूंणि के कि अरखिलाउस अपड़ा बुबा राजा हेरोदेस जगह मा यहूदिया प्रान्त पर राज्य कनु च उख जांण से डौर गै अर सुपन्या मा परमेश्वर बट्टी चेतावनी पै के गलील जिला मा चलि गै

²³अर नासरत नौं का गौं मा बसी गै इलै की उ वचन पूरो हो जु परमेश्वर का तरपां बट्टी बुल्ण वलो का द्वारा यीशु का बारा मा बुलै गै छो “कि वे तैं नासरत नगर बट्टी औंण वलो बुलै जालो।”