Read Garhwali मत्ती 22 Bible Online

मत्ती 22 - Garhwali bible

मत्ती 22

¹यीशु ऊं लुखुं दगड़ी फिर से मिसाल दे के बात कन लगि गै।

²स्वर्ग का राज्य वीं मिसाल का समान च, एक राजा जैल अपड़ा नौंना को ब्यो कैरी।

³अर वेल अपड़ा सेवकों तैं भेजि कि ब्यो मा आमंत्रित लुखुं तैं ब्यो का भोज मा बुलौनु पर ऊंल औंण नि चै।

⁴फिर वेल और सेवकों तैं यु बोलि के भेजि आमंत्रित लुखुं मा बोला देखा मिल खांणु तैयार कैरेली इलै तुम ब्यो का खांणु मा आवा।

⁵अनदेखो कैरी के चलि गै कुई अपड़ा पुंगड़ों तैं, त कुई अपड़ा व्यापार तैं।

⁶बकि लुखुं ल जु बचि गै छा ऊंल वेका सेवकों तैं पकड़ी अर ऊंको अनादर कैरी अर ऊं तैं मारि डाली।

⁷जब राजा ल यु सूंणि त गुस्सा ऐ गै अर वेल अपड़ी सेना तैं भेजि के ऊं हत्यारुं को नाश कैरी दींनि अर ऊंका शहरों तैं फूंकी दींनि।

⁸तब वेल अपड़ा सेवकों मा बोलि ब्यो कु खांणु त तैयार च पर जु लोग बुलै छा उ वे खांणु का लैख नि ठैरिनि।

⁹इलै तुम चौराहों मा जाओ अर जथग लोग तुम तैं मिलुनु ऊं सभियूं तैं ब्यो का बड़ा खांणु पर बुलावा।

¹⁰तब ऊं सेवकों ल अर दासों ल सड़कों पर जै के क्य भला क्य बुरा जथग भि लोग मिलिनि ऊं सभियूं तैं कठ्ठा कैरी अर जै घौर मा ब्यो हूंणु छो उ घौर मेहमनों से भुरीं गै।

¹¹अर जब राजा ल मेहमान लुखुं तैं दिखणु कु भितर ऐ त वेल उख एक आदिम तैं देखि जैका ब्यो कु सै ठिक कपड़ा नि पैरय्यां छा।

¹²राजा ल वे तैं पूछि हे दगड़िया तु बगैर ब्यो कु ठिक कपड़ा पैरय्यां इख किलै ऐ? अर वे तैं मनिख्युं न कुछ भि जवाब नि दींनि।

¹³तब राजा ल सेवकों मा बोलि येका हथ खुट्टा बंधि के यु तैं भैर अंधेरा मा डाली द्या उख रूंण अर दांतों को पिसंण होलो।

¹⁴किलैकि बुलयां त भौत छिनी पर चुणयां थोड़ा ही छिन।

¹⁵तब फरीसियों ल आपस मा विचार कैरी कि यीशु तैं कैं बात मा फसां।

¹⁶अर ऊंल अपड़ा चेलों तैं हेरोदियों मा यु बुल्णु कु भेजि कि, “हे गुरु हम जंणदा छा कि तुम हमेशा सच बुल्दियां अर परमेश्वर का बारा मा सचै से सिखांदि अर त्वे तैं कैकी कुई परवाह नि च किलैकि तु मनिख्युं का मुक देखि के बात नि करदी।

¹⁷इलै हम तैं बतौ तु क्य समझदी? क्य कैसर तैं कर दींण ठिक च या ठिक नि च।”

¹⁸यीशु ल ऊंका मन की दुष्टता तैं जांणि के बोलि “हे कपटियों तुम मि तैं किलै परखंणा छा?”

¹⁹अर जै पैसा तुम कर मा दिन्दीयां वे पैसा तैं मि मा ल्यावा तब उ वेमा दिन की मजदूरी लैनि।

²⁰यीशु ल ऊंमा पूछि या आकृति अर यु नौं कैकु च?

²¹ऊंल यीशु मा बोलि, “कैसर को तब यीशु ल ऊंमा बोलि जु कैसर कु च वे तैं कैसर तैं द्यावा अर जु परमेश्वर कु च उ परमेश्वर तैं द्यावा।”

²²यु सूंणि के उ भैंचक्क मा पड़ी गैनी अर यीशु तैं छोड़ी के चलि गैनी।

²³वे ही दिन सदूकी जु बुल्दिन, कि मोरि के ज्यून्दो हूंण नि हवे सकद यीशु मा ऐ के पुछण लगि गैनी

²⁴“हे गुरु मूसा ल बोलि छो कि कुई मनिख जु बगैर सन्तान का मोरि जौं त वेको भैय वेकी घरवलि दगड़ी ब्यो कैरी कै अपड़ा भैय कु वंश पैदा कैर।”

²⁵अब हमारा इख सात भैय छा अर सबसे बड़ो भैय ब्यो कैरी निसंतान मोरि गै अर सन्तान नि हूंण का कारण से अपड़ी घरवलि तैं अपड़ा भैय कु छोड़िगे।

²⁶इन ही दुसरा ल अर तिसरा ल भि कैरी अर सातों भैय बट्टी कैकी भि संतान नि हवे।

²⁷अर सभियूं का बाद व जनन भि मोरि गै।

²⁸तब मुरयां का ज्यून्दो हूंण पर व ऊं सात का सात मा बट्टी कैकी जनन हवेलि? किलैकि व सातों भैय कि जनन हवे गै छै।

²⁹यीशु ल ऊंकु बोलि, “तुम परमेश्वर का वचन की सामर्थ तैं नि जंणदा क्य तुम इलै भूल मा नि पुड़यां छा।

³⁰किलैकि जब उ मुरयां मा बट्टी ज्यून्दो हूंण होलो त ऊंल न त ब्यो कन न ब्यो मा दिये जांण पर स्वर्ग मा स्वर्गदूत कि तरौं होला।

³¹मुरयां कु ज्यून्दो हूंण का बारा मा क्य तुम ल यु परमेश्वर का वचन मा नि पैढ़ी जु परमेश्वर ल तुम मा बोलि छो

³²कि मि अब्राहम कु परमेश्वर, इसहाक कु परमेश्वर, याकूब कु परमेश्वर छौं? परमेश्वर मुरयां मनिख्युं कु न बल्कि ज्यूंदों कु परमेश्वर च।”

³³लोग यीशु का उपदेश सूंणि के हकदक रै गैनी।

³⁴जब फरीसियों ल सूंणि कि यीशु ल सदूकियों को गिच्चो बंद कैरेली त तब उ कठ्ठा हवे गैनी।

³⁵ऊंमा बट्टी मूसा की व्यवस्था तैं सिखांण वलो ल जु वेकी अजमैश कनु कु वेमा पूछि

³⁶हे गुरु मूसा द्वारा लिखीं परमेश्वर की व्यवस्था मा बड़ी आज्ञा क्य च?

³⁷यीशु ल वेमा बोलि या च कि “तु प्रभु अपड़ा परमेश्वर तैं अपड़ा सैरा मन, अर अपड़ा सैरा प्राण, अर अपड़ी सैरी बुद्धि से प्रेम कैरा।

³⁸या सबसे बड़ी अर पैली आज्ञा च।

³⁹अर वीं आज्ञा जन एक हैंकी आज्ञा भि च कि तु अपड़ा पड़ोसी से अफ जन प्रेम कैर।

⁴⁰यु उ ही द्वी आज्ञा मूसा द्वारा लिखीं परमेश्वर की व्यवस्था मा अर परमेश्वर का तरपां बट्टी बुल्ण वलो को आधार च।”

⁴¹जब फरीसी कठ्ठा छा त यीशु ल ऊंमा पूछि

⁴²मसीह का बारा मा तुम क्य सुचदियां उ कै को नौंनो च ऊंल वेमा बोलि, “दाऊद कु वंशज च।”

⁴³यीशु ल ऊंमा पूछि “त दाऊद आत्मा मा हवे के वे तैं प्रभु किलै बुल्द?

⁴⁴कि प्रभु ल मेरा प्रभु कु बोलि मेरी दैंणि तरपां बैठ जब तक कि मि तेरा बैरय्युं तैं तेरा खुट्टों तौला नि कैरी द्यो।

⁴⁵जब राजा दाऊद ही मसीह कु प्रभु बुल्दो त फिर उ वेको वंशज कनके ठैरी?

⁴⁶अर तब वे दिन कै तैं की फिर वे बट्टी कुछ भि पुछणो कु सासो नि हवे।”