Read Garhwali मत्ती 24 Bible Online

मत्ती 24 - Garhwali bible

मत्ती 24

¹जब यीशु यरूशलेम शहर का मन्दिर बट्टी भैर जांणु छो त वेका चेला वे तैं मन्दिर की रचना दिखांणु कु वेका संमणी ऐनी।

²यीशु ल वेकु बोलि, “तुम मा सच बुल्णु छौं दिखणा छा इख ढुंगा मा ढुंगा भि नि रांण जु ढोळे नि जालो।”

³जब उ जैतून डाला का डांडा पर बैठयां छा त चेलों ल एकुंत मा वेका संमणी ऐ के बोलि, “हम तैं बतौ कि यूं बातों ल कब हूंण? तेरु औणो को अर दुनिया कु अंत को क्य चिन्ह होलो?”

⁴यीशु ल ऊं तैं जवाब दींनि, “सचेत रावा कुई तुम तैं भरमै नि सैकु।”

⁵भौत लोग मेरा नौं का अधिकार कैरी के आला अर ऐ के बुलला मि मसीह छो अर भौत लुखुं तैं ऊं का विश्वास बट्टी भरमै दयाला।

⁶जब तुम लड़ै अर लड़ैयूं कि चर्चा सुणल्या त घबरैयां न किलैकि यूं बातों कु हूंण जरूरी च पर वे बगत अंत नि होलो।

⁷किलैकि एक जाति दुसरी जाति पर अर एक राज्य हैंका राज्य पर राज्य कनु कु चड़ै करलो अर जगह-जगह अकाल पड़ुलो अर भ्यूंचोळ होला।

⁸यु सब शुरुवाती पिड़ा की होलि जन बच्चा पैदा हूंण से पैली हूंदी।

⁹तब उ लोग जु तुमारा विरोध करदा छिन क्लेश दिलांण कु तुम तैं पकड़वाला अर किलैकि तुम मि पर विश्वास करदा छा सभि जातियों का लोग तुम से बैर रखला।

¹⁰तब भौत सैरा मि पर विश्वास कन बंद कैर दयाला अर एक दुसरा तैं पकड़वाला अर एक दुसरा से बैर रखला।

¹¹भौत सा परमेश्वर कु संदेश दींणवला आला अर भौत सा लुखुं तैं धोखा दयाला।

¹²अर अधर्म का बढंण से बहुत लोग दुसरा से प्रेम नि करला।

¹³पर जु अपड़ा जीवन का अंत तक मि पर विश्वास रखला, वेको उद्धार हवे जालो।

¹⁴अर पिता परमेश्वर का राज्य का बारा मा शुभ सन्देश सैरा दुनिया मा प्रचार किये जालो की सभि जातियों पर गव्है हो तब दुनिया कु अंत हवे जालो।

¹⁵“इलै जब तुम वीं उजड़ण वलि तुच्छ मूर्ति तैं ज्यां कि चर्चा दनिय्येल परमेश्वर का तरपां बट्टी बुल्ण वला ल कैरी छै वीं तैं पवित्र जगह मा खड़ी देखि ल्या जु पढ़ो उ समझी ल्यो।”

¹⁶तब जु यहूदिया प्रान्त मा हूंनु उ डांडों मा भाजि जालो।

¹⁷जु छत पर हूंनु उ अपड़ा घौर बट्टी कुछ समान लींणु कु मूड़ी घौर का भितर नि उतरुनु अर उख बट्टी भागि जा।

¹⁸अर जु पुंगड़ा मा हो उ अपड़ा कपड़ा लींणु कु घौर कु पिछनै नि लौटु।

¹⁹यु ऊं महिलाओं कु भौत भयानक बगत होलो जु दुबस्ता हवेलि अर जु दूध पिलांदि हवेलि ऊंकु भगण भौत मुश्किल होलो।

²⁰इलै पिता परमेश्वर बट्टी प्रार्थना करयां कि यु जाड़ों मा यहूदियों का विश्राम का दिन नि हो जब कखि भि जांण कठिन हो।

²¹किलैकि उ दिन इन कलेश का होला कि यु दुनिया का बनांण बट्टी जु कुछ परमेश्वर ल रचि न त अभि तक न हवे नि अगनैं हूंण।

²²जु यु आंण वला दिन घटैये नि जांदा त कै भि प्राणि कु उद्धार नि हूंण छो पर ऊं चुणयां मनिख्युं का खातिर जौं तैं वेल चुणि ऊं दिनों तैं घटैये गै।

²³वे बगत मा जु कुई तुम कु बुललो “देखा मसीह इख च” या देखा उख च त यकीन नि करयां।

²⁴किलैकि झूठा मसीह अर परमेश्वर कु संदेश दींणवला झूठा लोग आला अर चिन्ह अर शैतान का झूठा चमत्कार दिखाला कि हवे साको त परमेश्वर का चुणयां लुखुं तैं भि भरमै द्याला।

²⁵पर तुम चकडैति से रयां मिल सभि घटनाओं तैं तुम तैं पैली बट्टी बतयले।

²⁶इलै जु उ तुम मा बुलुनु देखा उ एकांत जंगल मा च त भैर नि निकलयां या इन बुलुनु देखा उ कोठरियों मा च त विश्वास नि करयां।

²⁷किलैकि जन बिजली पूरब बट्टी पश्चिम तक चमकदी उन ही मि मनिख कु नौंनो को औंण भि होलो।

²⁸जख लांश हो, उखि गरुड़ कठ्ठा हवाला।

²⁹ऊं दिनों मा वे कलेश खत्म हूंणा का बाद सूरज अर जून अपड़ो उज्यला दींण बंद कैरी द्याला अर आसमान बट्टी गैणा मूड़ि पोड़न लगि जाला अर आकाश कि सैरी शक्ति अर चिन्ह हिलैये जाला।

³⁰मि मनिख कु नौंनो कु चिन्ह आसमान मा दिखै जालो अर तब धरती का सब जाति का लोग अपड़ी छाति पिटला अर मि मनिख कु नौंनो तैं सैरी सामर्थ, सैरी शक्ति अर महिमा का दगड़ा मा आसमान का बादलों पर औंण दिखला।

³¹उ तुरै कि बड़ी आवाज का दगड़ा अपड़ा स्वर्गदूतों तैं भिजलु अर उ धरती का यु छोर बट्टी आसमान का वे छोर तक चौदिशों बट्टी अपड़ा चुणयां लुखुं तैं कठ्ठा करलो।

³²बेडु का डाला बट्टी इन सीखा जब वेकी फौंकि कुंगळी हवे जंदींनि अर वे पर मौलयार आंण लगि जांदु त तुम जांणि जणदां कि गर्मी कु मौसम आंण वलो च।

³³अर इन ही कै जब तुम यूं बातों हूंण दिखल्या त जांणि लियां कि मि मनिख कु नौंनो को आंण नजीक च बल्कि ऐ ही गै।

³⁴मि तुम मा सच बुल्णु छौं जब तक यु सभि बात नि हवेलि तब तक यूं लुखुं मा बट्टी भौत स इन छिनी जु ईं घटना का हूंण तक नि मुरला।

³⁵आसमान अर धरती टळि जालि पर मेरी बोलि बात कभि भि नि टळदि।

³⁶अर कै तैं भि वीं दिन अर सै बगत कु पता नि जब मि दुबारा औलु न स्वर्गदूत अर न मि जु नौंनो छो भस परमेश्वर पिता वे बगत तैं जंणदु।

³⁷जन नूह का दिन छा उन ही मि मनिख कु नौंनो को औंण भि होलो।

³⁸किलैकि जन जलप्रलय से पैली का दिनों मा जै दिन तक कि नूह जहाज पर नि चैड़ि छो वे दिन तक लोग खांदा पींदा छा अर ऊंमा ब्यो हूंदों छा।

³⁹अर जब तक जलप्रलय ऊं सभियूं तैं बुगै के नि लीगे तब तक ऊं तैं कुछ भि पता नि चैलि उन ही मि मनिख कु नौंनो को औंण भि होलो।

⁴⁰वे बगत मा द्वी माबुत पुंगड़ा मा होला ऊंमा बट्टी एक लिये जालो अर हैंको छुड़े जालो।

⁴¹द्वी जनन जंदरु पिसंणि राली ऊंमा बट्टी एक लिये जालि अर हैंकी छुड़े जालि।

⁴²इलै चैतल रावा तुम नि जंणदयां कि तुमारा प्रभु कै दिन आलो।

⁴³पर यु जणिल्यो कि जु घौर कु स्वामि जांणि जांदु कि चोर कैं बगत आलो त बिज्यूं रौंदो अर अपड़ा घौर मा चोरी नि हूंण दींदो।

⁴⁴इलै तुम भि तैयार रावा किलैकि जैं बगत का बारा मा तुम सुचदा भि नि छा वीं बगत मा मि मनिख कु नौंनो ऐ जालो।

⁴⁵“अर उ भरोसो का लैख अर बुद्धिमान सेवक कु च जै तैं स्वामि ल अपड़ा नौकर-चाकरों पर मुखिया ठैरे, कि बगत पर ऊं तैं खांणु द्यो?”

⁴⁶धन्य च उ सेवक जै तैं वेको स्वामी ऐ के इन ही करदु दिखलु।

⁴⁷मि तुम मा सच बुल्णु छौं उ वे तैं अपड़ी सैरी सम्पति पर अधिकारी बंणालु।

⁴⁸पर जु दुष्ट सेवक सुचण लगि कि मेरा स्वामि का औंण मा देर च

⁴⁹अर अफ दगड़िया सेवकों तैं पिटण लगि जौं अर पियक्कड़ु का दगड़ा मा खान्दो-पीन्दु।

⁵⁰त वे सेवक को स्वामी इन दिन मा वापिस आलो जब उ वे तैं नि जुगल्णु रालो अर इन बगत मा जै तैं उन ही जंणदु हो

⁵¹तब उ वे तैं भौत कड़ी सजा दयालो अर वेको भाग बांटो कपटि लुखुं का दगड़ा मा ठैरालो उख रूंण अर दांतों कु पिसंण होलो।