Read Garhwali मत्ती 26 Bible Online

मत्ती 26 - Garhwali bible

मत्ती 26

¹जब यीशु ल यु सभि बात बोलेलि छै त तब अपड़ा चेलों मा बुल्ण लगि गै

²“तुम जंणदा छा कि द्वी दिन का बाद फसह कु त्यौहार च अर मि मनिख कु नौंनो सूली पर चड़ौंणु कु पकड़वाये जौलु।”

³तब सब प्रधान याजक अर प्रजा का दाना-सयाणा कैफा नौं का महायाजक का चौका मा कठ्ठा हवेनि

⁴अर आपस मा विचार कन लगि गैनी कि यीशु तैं धोखा से पकड़ी के मारि दींदां।

⁵पर उ बुल्णा छा “त्योहार का बगत मा न कखि इन नि हो कि लुखुं मा हल्ला मचि जौं।”

⁶जब यीशु बैतनिय्याह मा शमौन कोढ़ी का घौर मा छो जै तैं यीशु ल खूब कैरी छो।

⁷तब एक जनन संगमरमर का भांडा मा कीमती इत्र लै के यीशु का संमणी ऐ अर जब यीशु खांणु कु बैठयूं छो त वीं ल उ इत्र यीशु का मुंड मा खणै दींनि।

⁸यु देखि के वेका चेला खिंसे के बुल्ण लगि गैनी “यांको किलै सत्यानाश करे गै?

⁹यु त अच्छा दाम मा बेचि के कंगालों मा बंटे सक्योंदु छो।”

¹⁰यु जांणि के यीशु ल ऊंमा बोलि “ईं जनन तैं किलै सतांणा छा? वीं ल मि दगड़ी भलै कैरी।

¹¹गरीब त तुम दगड़ी सदनी रौदींनि पर मिल तुम दगड़ी सदनी नि रौंण।

¹²वीं ल जु मेरा देह पर यु इत्र खणै यु वीं ल मेरा दफनौंणु कु कैरी।

¹³मि तुम मा सच बुल्णु छौं कि जख कखि भि शुभ सन्देश प्रचार करे जालो उख ये कामों को भि जिक्र होलो जु ईंल मि दगड़ी कैरी अर लोग ईं बात तैं याद रखला।”

¹⁴तब यहूदा इस्करियोती ल जु बारह चेलों मा बट्टी एक छो प्रधान याजक मा जै के बोलि,

¹⁵“जु मि वे तैं तुमारा हथ मा पकड़वै द्यो त मि तैं क्य दीला” ऊंल वे तैं तीस चाँदि का सिक्का तोली के दे दींनि।

¹⁶अर उ वे ही बगत बट्टी वे तैं पकड़ाण को ठिक मौका खुज्योंण लगि गै।

¹⁷अखमीरी रुठी का त्यौहार का पैला दिन चेला यीशु का संमणी ऐ के पुछण लगि गैनी “कि तु क्य चांदी की हम कख फसह कु भोज तैयार करयां की हम वे तैं खा सका।”

¹⁸वेल बोलि, “शहर मा फलणा मनिख मा जै के बोला कि गुरु बुल्णु च मेरू बगत नजदीक च मि अपड़ा चेलों का दगड़ा फसह कु त्यौहार मणै साको।”

¹⁹अर चेलों ल यीशु कि बात मांणि अर फसह कु भोज कि तैयारी कैरी।

²⁰जब रुमुक हवे त तब उ बारह चेलों का दगड़ा मा खांणु कु बैठी।

²¹जब उ बैठी कै खांणु खांणा छा त यीशु ल ऊंमा बोलि, “मि तुम मा सच बुल्णु छौं कि तुम मा बट्टी एक मि तैं पकड़वालो।”

²²ईं बात पर उ भौत दुखी हवेनि अर हरेक चेला वे मा पुछण लगि गैनी “क्य मि नि छौं कखि तु त नि?”

²³वेल जवाब दींनि “जैकु मि दगड़ा मेरा रुट्टि का कटोरा मा हथ डलयूं च उ ही मि तैं पकड़वालो।

²⁴मि मनिख कु नौंनो त जन वेका बारा मा जन परमेश्वर का वचन मा लिख्युं च उ उन ही चलदो पर वे आदिम कु रूंण अर शोक कन च जैका द्वारा मि मनिख कु नौंनो जेंते मरणु कु पकड़वये जालो, वेको जन्म ये दुनिया मा नि हूंद त वे मनिख की स्थिति कु भलो हूंदू।”

²⁵तब वेका पकड़ौण वला यहूदा ल पूछि गुरु, “क्य मि नि छौं?” वेल बोलि तिल त अफी बोलेलि।

²⁶जब उ सभि खांणु खांणा छा त तब यीशु ल रुट्टि हथ मा लींनि अर आशीष मागि के तोड़ी अर चेलों तैं दे के बोलि, “ल्या खावा यु मेरी देह च।”

²⁷फिर वेल कटोरा हथ मा लींनि अर धन्यवाद कैरी अर ऊं तैं दे के बोलि, “तुम सब यु मा बट्टी प्यावा।”

²⁸किलैकि या प्राण कु मेरू ल्वे च जु भौतों का पापों का माफी की नई प्रतिज्ञा कु बुगाये जांदी।

²⁹मि तुम मा सच बुल्णु छौं कि यांका बाद अंगूरों कु रस कभि नि प्यूलु जब तक कि परमेश्वर का राज्य मा नयो नि प्यों।

³⁰तब यीशु अर वेका चेला परमेश्वर की स्तुति करदींनि अर यरूशलेम शहर बट्टी निकिली के जैतून डाला का डांडा पर चलि गैनी।

³¹तब यीशु ल ऊंमा बोलि, “तुम सभि आज की राती मेरा बारा मा अपड़ा विश्वास बट्टी भटकी जैला किलैकि परमेश्वर का वचन मा लिख्युं च मि बखरोला तैं मरुलु अर झुण्ड की ढिबरा तितर-बितर हवे जालि।”

³²जब मि मुर्दों बट्टी ज्यूँदो हवे जौलु त मिल तुम से पैली गलील जिला मा पौंछि जांण।

³³ईं बात पर पतरस ल यीशु कु बोलि, “जु सभि तेरु बानु ठोकर खौनु त खौनु पर मि कभि भि ठोकर नि खौलु।”

³⁴यीशु ल वेको बोलि, “मि त्वे मा सच बुल्णु छौं कि आज ही राती द्वी बार मैर का बंसण से पैली तिल तीन बार मि तैं पछ्यण बट्टी मुकरी जांण।”

³⁵पर पतरस ल अर भि जोर दे के बोलि, जु तेरा दगड़ा मि तैं मुरण भि पुड़लो तब भि मि त्वे तैं पछ्यण बट्टी इन्कार नि करुलु इन ही और सभि चेलों भि बोलि।

³⁶तब यीशु अपड़ा चेलों का दगड़ी गतसमनी नौं का बाग मा ऐ अर वेल अपड़ा चेलों कु बोलि, “इख बैठयां रावा जब तक मि उख जै के पिता परमेश्वर बट्टी प्रार्थना कैरो।”

³⁷अर यीशु पतरस अर जब्दी का नौंना याकूब अर यूहन्ना तैं अफ दगड़ी लीगि अर भौत दुखी अर व्याकुल हूंण लगि गै।

³⁸तब यीशु ल चेलों कु बोलि, “मेरू मन भौत उदास च इख तक कि मि लगदु मि मुरण वलो छौं तुम इख ठैरा अर बिज्यां रावा।”

³⁹फिर उ जरासी अगनैं बढ़ि अर भुयां भूमि मा पोड़ी कै पिता परमेश्वर बट्टी प्रार्थना कन लगि गै कि, हे मेरा बुबा जु हवे सैकु त यु दुःख बट्टी बचो जु मि पर आंण वली च आप कु सब कुछ हवे सकदु च फिर भि बुबा तेरी ही इच्छा पूरी हो मेरी न।

⁴⁰फिर यीशु ल चेलों का संमणी ऐ के ऊं तैं सियूं देखि त पतरस कु बोलि, “क्य तुम मि दगड़ी एक पल भि बिज्यूं नि रै सैकी?”

⁴¹बिज्यां रावा अर पिता परमेश्वर बट्टी प्रार्थना करदी रावा कि तुम अजमैश मा नि पोड़ा आत्मा त तैयार च पर देह कमजोर च।

⁴²यीशु एक बार फिर से वापिस चलि गै अर उन ही पिता परमेश्वर बट्टी प्रार्थना कैरी, “हे मेरा बुबा जु यु मेरा पियां बगैर नि हटि सकदु त तेरी मनसा पूरी हो।”

⁴³फिर ऐ के चेलों तैं सियूं देखि किलैकि उ भौत थक गै छा अर वेका जगांण पर नि जांणि सकिनि।

⁴⁴ऊं तैं छोड़ी के उ फिर चलि गै अर उन ही फिर तिसरी बार पिता परमेश्वर बट्टी प्रार्थना कैरी।

⁴⁵फिर तिसरी बार ऐ के चेलों मा बोलि “अब सिय्यां रावा अर आराम कैरा देखा उ बगत ऐ गै अर मि मनिख कु नौंनो पापी लुखुं का हथ मा पौंछण वलो च।

⁴⁶उठा चला देखा मेरू पकड़वाण वलो नजीक ऐ गै।

⁴⁷उ इन बुल्णु ही छो कि यहूदा जु बारहों चेलों मा बट्टी एक छो ऐ अर वे दगड़ी प्रधान याजक, मूसा की व्यवस्था तैं सिखांण वला अर दाना-सयाणों कि तरपां बट्टी भि जै गैनी अर उ भौत बड़ी भीड़ अर तलवार अर लाठा लै के ऐनी।

⁴⁸यहूदा यीशु का पकड़वाण मा मदद कनवळा कु ऊं तैं इन बतायूं छो कि जै तैं मि प्यार से भुकि पीलू उ ही च वे तैं पकड़ी दियां।”

⁴⁹यहूदा ऐ अर वेल यीशु का संमणी ऐ के बोलि, “गुरु प्रणाम” अर वेकी भौत भुकि पीनि।

⁵⁰यीशु ल वेमा बोलि, “हे दगड़िया जै काम कु तु ऐ छै वे तैं कैर” तब ऊंल नजदीक ऐ के यीशु पर हथ डलिनि अर वे तैं पकड़ी दींनि।

⁵¹यीशु का दगड़ियों म बट्टी एक चेला ल हथ बड़ै के अपड़ी तलवार खींचि के महायाजक का सेवक कु कंदूड़ काटि दींनि।

⁵²तब यीशु ल वेमा बोलि, “अपड़ी तलवार तैं मियान मा रखि दे किलैकि जु तलवार चलौंदींनि उ सभि तलवार ल नष्ट करे जाला।”

⁵³क्य तु नि जंणदी कि मि अपड़ा बुबा बट्टी कैरी सकदु छौं अर उ बारह सिपै का झुंडों बट्टी भि जादा स्वर्गदूतों की पलटन तैं मि मा अभि भेजि दयालो।

⁵⁴पर परमेश्वर का वचन की उ बात पूरी कनके हवेलि जै मा इन लिख्युं च कि इन ही हूंण जरूरी च?

⁵⁵तुरंत यीशु ल भीड़ कु बोलि, “क्य तुम मि तैं डाकु समझी कै पकड़णु अयां छा जु लाठा अर तलवार लीकै अयां छा? मि हर दिन परमेश्वर बट्टी यरूशलेम शहर का मन्दिर मा बैठी के उपदेश दींणु रौंदु छो अर तब तुम ल मि तैं नि पकड़ी।”

⁵⁶पर यु इलै हवे कि परमेश्वर का तरपां बट्टी बुल्ण वलो का वचन कि बात पूरी हूंनु “तब सभि चेला वे तैं छोड़ी के भागि गैनी।”

⁵⁷तब जौ ल यीशु तैं पकड़ी छो उ यीशु तैं कैफा नौं का महायाजक का घौर मा ली गैनी सभि याजकों अर दाना-सयाणों अर उख मूसा की व्यवस्था तैं सिखांण वला कठ्ठा हवे गैनी।

⁵⁸पतरस दूर-दूर हवे कै यीशु का पिछनै महायाजक का चौक का भितर तक सैनिको का दगड़ा मा बैठी गै।

⁵⁹प्रधान याजक अर सैरी महासभा का अन्य सदस्य यीशु तैं खत्म कनु कु वेका खिलाफ गवाह खुज्याणा छा पर ऊं तैं गवाह नि मिलिनि किलैकि उख भौत सैरा वेका खिलाफ झूठी गव्है दींणा छा पर जु कुछ ऊंल बोलि उ अन्य गव्है एक जन नि छै तब कुछ लुखुं ल उठि के यीशु का खिलाफ या गव्है दींनि।

⁶⁰

⁶¹“हम ल यु तैं इन बुल्द सूंणि, मि यु परमेश्वर का मन्दिर तैं डोल दयुलु अर तीन दिनों मा हैंको बणै दयुलु, जु लुखुं का हथ ल नि बण्यूं होलो।”

⁶²तब महायाजक ल सभा का बीच मा खड़ो हवे कै यीशु तैं पूछि, “तु कुई जवाब नि दींणि छै यु लोग तेरा खिलाफ क्य बुल्णा छिन”

⁶³पर यीशु चुप रै तब महायाजक ल वेमा बोलि, “मि त्वे तैं ज्यून्दा परमेश्वर की सौं दींणु कि तु जु परमेश्वर कु नौंनो मसीह छै त हम तैं बतै दे।”

⁶⁴यीशु ल वेमा बोलि, “तिल अफी बोलेलि बल्कि मा मि तुम मा इन भि बुल्णु छौं कि अब बट्टी तुम मि मनिख कु नौंनो तैं सर्वशक्तिमान परमेश्वर कि दैंणि तरपां बैठयूं अर आसमान बट्टी बादलों मा सामर्थ का दगड़ी औंण देखि ल्या।”

⁶⁵ईं बात पर महायाजक ल अपड़ा कपड़ा फड़िनि अर बोलि, अब हम तैं और गवाहों कि जरुरत नि च तुम ल परमेश्वर की या बुरै सूंणि च

⁶⁶तुम क्य समझदियां छा “लुखुं ल जवाब दींनि कि यु मृत्यु दण्ड का लैक च।”

⁶⁷तब ऊंल यीशु का मुक पर थूकि अर वे पर मुक्का मना अर कुछों ल थप्पड़ मारि के बोलि

⁶⁸भविष्यवाणि कैर “हे मसीह बतौ” कि कैल त्वे तैं मारि?

⁶⁹पतरस भैर चौका मा बैठय्युं छो कि इथग मा एक दासी वेका संमणी ऐ अर वीं ल बोलि, “तू भि यीशु गलीली का दगड़ा मा छै।”

⁷⁰वेल सभियूं का संमणी यु बोलि के मना कैरी “मि नि जंणदु कि तु क्य बुंनि छै।”

⁷¹जब उ भैर दयाली मा गै त हैंकी दासी ल वे तैं देखि के ऊंमा जु उख छा बोलि, “यु भि त यीशु नासरत वला का दगड़ा मा छो।”

⁷²वेल सौं खै के फिर मना कैरी “कि मि वे मनिख तैं नि जंणदु।”

⁷³जरा देर बाद लुखुं ल जु उख खड़ा छा पतरस मा ऐ के बोलि, “सच मा तू भि ऊंमा बट्टी एक छै किलैकि तेरी बोलि-भाषा तेरु भेद प्रकट कनि च।”

⁷⁴तब उ मना कन लगि गै अर सौं सिरगत खांण लगि गै मि वे आदिम तैं नि जंणदु अर तुरंत मैर ल बांग दे दींनि।

⁷⁵तब पतरस तैं व बात ज्वा यीशु ल वेमा बोलि छै याद ऐ गै, “कि मैर का बसण से पैली तीन बार मेरा बारा मा तिल मुकरी जांण।” अर तब उ भैर जै के भकोर-भकोर के रूंण लगि गै।