Read Garhwali मरकुस 10 Bible Online

मरकुस 10 - Garhwali bible

मरकुस 10

¹फिर यीशु ल अपड़ा शिष्यों दगड़ी कपरनाहुम शहर छोड़ी दींनि, उख बट्टी उठि के उ यहूदिया प्रान्त बट्टी हवे के यरदन गाड का पल्या छाला पर ऐनी जख फिर एक बार एक भीड़ वेका नजदीक फिर कठा हवे गै अर उ फिर ऊं तैं अपड़ी रीत का अनुसार उपदेश दींण लगि गै।

²तब फरीसियों ल वेकी अजमैश कनु कु वेमा पूछि क्य मूसा की व्यवस्था मा एक आदिम तैं अपड़ी घरवलि तैं छुड़णै की अनुमति छैं?

³यीशु ल ऊं तैं जवाब दे, मूसा ल तुम तैं तलाक कु क्य व्यवस्था दियुं च?

⁴ऊंल बोलि, “मूसा कु त त्यागपत्र कु चाम्रपत्र दे के जनन छोडणै की अनुमति दियुं च।”

⁵यीशु ल ऊंकु बोलि, “तुमारा जिद्दी हूंण का कारण वेल तुम तैं या आज्ञा दींनि।

⁶पर परमेश्वर का वचन मा लिख्युं च कि धरती कि शुरुवात बट्टी परमेश्वर ल मर्द अर औरत बोलि के ऊं तैं बणै।

⁷इलै मनिख अपड़ा ब्वे-बुबा बट्टी अलग हवे के ब्यो कैरी कै अपड़ी घरवलि का दगड़ा मा रालो

⁸अर उ द्वी एक तन होला इलै उ अब द्वी न पर एक तन च।

⁹इलै जै तैं परमेश्वर ल जोड़ेलि वे तैं मनिख अलग नि कैरो जूं तैं परमेश्वर कु एक करयूं च।”

¹⁰बाद मा जब यीशु चेलों दगड़ी घौर मा यखुली छो, त चेलों ल वे तैं यांका बारा मा और जादा पूछि।

¹¹तब यीशु ल ऊंमा बोलि, “जु कुई आदिम अपड़ी घरवलि तैं तलाक दे के हैंकी जनन का दगड़ा मा ब्यो करलो त तब उ वीं पैली का खिलाफ व्यभिचार करदो

¹²अर जु घरवलि अपड़ा आदिम तैं छोड़ी के हैंका आदिम का दगड़ा मा ब्यो कैर त व भि व्यभिचार करदी।”

¹³फिर लोग नौन्याळु तैं वेमा लाणा रैनी कि यीशु ऊंका मुंड मा हथ रखि के आशीष द्यो पर चेलों ल लोग घुड़कि दींनि।

¹⁴यीशु ल यु देखि त गुस्सा हवे कै ऊंकु बोलि, “बच्चों तैं मि मा आंण द्या ऊंकु मना नि कैरा किलैकि यु ही लोग जु बच्चों जन विश्वासयोग्य अर विनम्र छिनी परमेश्वर कु राज्य यूंको ही च।

¹⁵मि तुम मा सच बुल्ण छौं कि जु कुई परमेश्वर का राज्य तैं बच्चों जन अपणालो वेल ही परमेश्वर का राज्य मा जै सकण।”

¹⁶अर वेल बच्चों तैं खुचल्या मा उठै अर ऊंका मुंड मा हथ रखि कै आशीष दींनि।

¹⁷जब यीशु अर वेका चेला उख बट्टी निकली के बट्टा लगयां छा त एक मनिख वेमा दौड़ि के ऐ अर वेका संमणी घुंडा टेकी के ऊंमा पूछि, “हे उत्तम गुरु जी अनन्त जीवन पर मेरू हक हो यांको मि तैं क्य कन चयणु च।”

¹⁸यीशु ल वे तैं उत्तर दे के बोलि, “तु की बात कु मि कु अच्छो अर उत्तम बुल्णी छै? कुई उत्तम नि च भस परमेश्वर तैं छोड़ी के कुई भलो अर अच्छो नि च।”

¹⁹तु परमेश्वर की आज्ञाओं तैं त जंणदी ही छै हत्या नि कन, व्यभिचार नि कन, चोरी नि कन, झूठी गव्है नि दींण, कै तैं अपड़ा फैदा कु धोखा नि दींण, अपड़ा बुबा अर ब्वे को आदरमान नि कन।

²⁰वेल बोलि, “गुरु जी यूं सभियूं आज्ञाओं तैं मि बचपन बट्टी मंणदी औंणु छौं।”

²¹यीशु ल वे तैं प्यार से देखि अर वेकु बोलि, “एक काम च जु त्वे तैं अभि भि कन जरूरी च जु कुछ धन सम्पति तेरी च वे तैं बेचि के गरीबों तैं दे-दे अर त्वे तैं स्वर्ग का राज्य मा धन मिललो अर मेरू चेला बण के मेरा पिछनैं हवे जा।”

²²जब वेला यीशु की ई बात तैं सूंणि त वेका मुक पर उदासी छै गै अर उ दुखी हवे के चलि गै किलैकि उ भौत सेठ छो।

²³यीशु ल चौतरफी अपड़ा चेलों तैं देखि के बोलि “सेठ धनवान लुखुं कु परमेश्वर का राज्य मा जांण भौत मुश्किल च।”

²⁴चेला ऊंकी बात पर घंगतोळ मा पोड़ि गैनी यां पर यीशु ल फिर ऊंकु बोलि “हे भयों जु धन पर भरोसो रखदींनि ऊंको परमेश्वर का राज्य मा जांण भौत मुश्किल च।

²⁵परमेश्वर का राज्य मा सेठ शौकारुं कु जांण मुश्किल च, पर ऊंटो कु स्यूण का छेद बट्टी निकलण सौंगु च।”

²⁶जब चेलों ल यु सूंणि त उ भैचक हवे के आपस मा बुल्ण लगि गै की यांको मतलब च की कै तैं भि पापों का दंड बट्टी उद्धार नि मिल सकद।

²⁷यीशु ल ऊंकी तरपां देखि के बोलि, “यु मनिख्युं बट्टी त नि हवे सकदु पर परमेश्वर कु सब कुछ संभव च।”

²⁸पतरस ल यीशु म बोलि, “हमारो क्य होलो हम त तेरु चेला बंणि के सभि कुछ छोड़ी के तेरा पिछनै औंणा छा।”

²⁹यीशु ल चेलों म बोलि, “मि तुम मा सच बुल्णु छौं कि तुम बट्टी कुछ लुखुं ल मेरा अर शुभ सन्देश का खातिर घौरबार भैय बैणा, ब्वे-बुबा, बाल बच्चा, पुंगड़ा तक छोड़ेनी।”

³⁰अर अब मि पर विश्वास रखण का कारण अर लुखुं द्वारा सताव का दगड़ा स्वर्गलोक मा सौ गुणा अनन्त जीवन पाला।

³¹पर भौत सैरा लोग छिनी जु अभि महान छिन ऊं तैं तब नम्र बणये जालो अर जु नम्र छिन ऊं तैं महान बणये जाला।

³²उ यरूशलेम शहर जांदी बगत बट्टा मा छो अर यीशु ऊंका अगनैं-अगनैं जांणु छो चेला भौचक मा पुड़यां छा जु वेका पिछनै चलणां छा अर दुश्मनो का कारण डरयां छा एक बार फिर ऊं बारहों चेलों तैं एक तरपां लै के ऊं चीजों की बात तैं कन लगि गै जु ऊं पर बितण वली छै।

³³ध्यान से सूंणा हम यरूशलेम शहर का जनै जांणा छा अर मि मनिख कु नौंनो प्रधान याजक अर मूसा की व्यवस्था तैं सिखांण वलो का हथ पकड़वये जौलु अर उ मि तैं मौत का लैख ठैराला अर अन्यजातियों का हथ मा सौंपी द्याला।

³⁴उ मेरू मजाक करला मि पर थुकला मि पर कोड़ा मरला मि तैं खत्म कैरी द्याला अर तिसरा दिन का बाद मि ज्यूँदो हवे जौलु।

³⁵तब जब्दी का नौंना, जै को नौं याकूब अर यूहन्ना छो दुई भैय छ वेमा ऐ के बोलि, “गुरु जी हम चदयां कि जु कुछ हम तुम बट्टी मांगा उ तुम हम कु कैरा।”

³⁶यीशु ल ऊंकु बोलि, तुम “क्य चदयां कि मि तुम कु कैरु?”

³⁷ऊंल यीशु मा बोलि, “हम कु इन कैर कि तेरी बढ़ै का राज्य मा हम मा बट्टी एक तेरी दैंणि अर हैंको बैं तरपां शानदार सिंहासन पर बैठो।”

³⁸यीशु ल ऊंकु बोलि, तुम नि जंणदयां कि क्य मंगणा छा; जन मि मुरुलु लोग तुम तैं भि मरला किलैकि उ मि तैं मारि दयाला क्य तुम दुःख उठांण चांणा छा जन कि मिल दुःख उठांण?

³⁹ऊंल यीशु मा बोलि, हम बट्टी हवे सकदु च; यीशु ल ऊंकु बोलि, तुम हकीकत मा पीड़ित हवेला जन कि मिल भुगतण; जन ही मि मोरि जौलु तुम भि मोरि जैला।

⁴⁰पर जौं कु तैयार करयूं च ऊं छोड़ी के और कै तैं अपड़ा दैंणा अर अपड़ा बैं तरपां बिठांण मेरू काम नि च।

⁴¹इन सूंणि के और दस का दस चेला याकूब अर यूहन्ना पर गुस्सा कन लगि गैनी।

⁴²तब यीशु ल ऊं तैं नजीक बुलै के ऊंकु बोलि, “तुम जंणदा छा कि जु कि गैर जातियों का राज्यपाल उ, ऊं पर अपड़ो अधिकार चलौंदींनि अर अपड़ी बात मनवाणु कु ऊं पर अपड़ो अधिकार कु इस्तेमाल करदींनि।”

⁴³पर तुम मा इन नि च जु कुई तुम्हरा बीच मा बढि के महान हूंण चौ त सबसे नम्र अर कम से कम अर सभियूं कि सेवा टहल कन वलो बणो।

⁴⁴अर जु कुई तुम मा प्रधान हूंण चौ उ सेवक बणु।

⁴⁵मि इन इलै बुल्द किलैकि मि मनिख कु नौंनो इलै नि अयुं कि दुसरा मेरी सेवा-टहल कैरा पर इलै अयुं की दूसरों की सेवा टहल कैरू, मि अपड़ी मौत की कीमत द्ये के भौत लुखुं तैं ऊंका पापों बट्टी ऊं तैं छुटकारा दींणु कु अयुं छौं।

⁴⁶यरूशलेम शहर जांण बगत यीशु अर वेका चेला यरीहो शहर मा ऐ अर जब यीशु अर वेका चेला अर लुखुं की बड़ी भीड़ यरीहो बट्टी जांणि छै तब तिमाई कु नौंनो बरतिमाई एक अंधा भीख मंगण वलो सड़क का किनारा बैठयूं छो।

⁴⁷जब वेल सूंणि कि यीशु नासरी जु नासरत गौं का रस्ता जांणु च त वेल धै लगै-लगै के बोलि, “हे यीशु दाऊद कि संतान मि पर दया कैर।”

⁴⁸भौत लुखुं ल उ घुड़कि कि चुप रौ पर उ और भि जादा चिल्लांण लगि गै “हे दाऊद कि संतान मि पर दया कैर”

⁴⁹जब यीशु ल वे कि आवाज तैं सूंणि त रुकि के अमणी-संमणी का लुखुं तैं बोलि, “वे तैं मि मा ल” अर लोग वे अंधा तैं वे मा लैनि अर वेकु बोलि, “ढाडस बांध उठ उ त्वे तैं बुलांणु च।”

⁵⁰वे अंधा ल अपड़ो चौला एक तरपां डोल अर उछलि कै यीशु मा ऐ।

⁵¹यीशु ल वे तैं पूछि, “तु क्य चाँदि कि मि त्वे कु कैरु” अंधा ल वेकु बोलि, “गुरु जी यु कि मि दिखण लगि जौं।”

⁵²यीशु ल वेकु बोलि, “जा अपड़ा घौर चलि जा तेरु विश्वास ल जु तेरु मि पर च त्वे तैं बचैयेले अर उ तुरंत दिखण लगि गै अर उ तुरंत वेका पीछेने हवे गै।”