Read Garhwali मरकुस 11 Bible Online

मरकुस 11 - Garhwali bible

मरकुस 11

¹जब यीशु अर वेका चेला यरूशलेम शहर का नजीक पौंछिनी त उ जैतून डाला का डांडा का किनारा पर बैतफगै अर बैतनिय्याह का गौं मा ऐ, त वेल अपड़ा चेलों मा बट्टी द्वी चेलों तैं इन बोलि के भेजि,

²“संमणी का गौं मा जावा अर उख पौंछि के तुम तैं एक गधा कु बच्चा जै पर अभि तक कैल भि सवारी नि कैरी तुम तैं बंधयूं मिललो वे तैं खोलि के इनै ल्यावा।”

³जु तुम मा कुई पूछो कि इन किलै कना छा? त बुल्यां यीशु हमारा प्रभु तैं यु कि जरुरत च अर उ जल्दी ही वे तैं इख वापिस भेजि द्याला।

⁴चेला उख गौं मा गैनी ऊं तैं एक घौर का द्वार का संमणी गधा कु बच्चा बंधयूं मिली अर उ वे तैं खुलण लगि गैनी।

⁵उख जु लोग खड़ा छा ऊंमा बट्टी कै-कैन पूछि, “तुम यु क्य कना छा गधा का बच्चा तैं किलै खुलणां छा?”

⁶जन यीशु ल ऊं कु बुल्युं छो चेलों ल उन ही ऊं लुखुं मा बोलि, तब ऊं लुखुं ल गधा तैं लिजांण दींनि।

⁷ऊं द्वी चेला वे गधा का बच्चा तैं यीशु मा लै के ऐनी अर वे पर अपड़ा भैरा का कपड़ा डलिनि अर यीशु वेमा बैठी के जांण लगि गै।

⁸जन ही यीशु गधा पर सवार हवे के यरूशलेम की तरपां ऐनी त भौत सारा लुखुं ल अपड़ा कपड़ा बट्टा मा बिछै कै वेको सम्मान कैरी अर भौतों ल खजूर की डाली काटि-काटि के बिछै वेको सम्मान कैरी।

⁹जु वेका अगनैं-अगनैं अर पिछनै-पिछनै जांणा छा पुकारी-पुकारी के बुल्दी जांणा छा “होशाना”[4] हो धन्य च उ जु परमेश्वर की सामर्थ से आंद।

¹⁰हमारा पुरणों मा राजा दाऊद कु राज्य जु परमेश्वर की सामर्थ मा आंणु च परमेश्वर जु स्वर्ग मा रांदो वेकी होशाना हो।

¹¹जब यीशु यरूशलेम शहर मा पौंछि के यरूशलेम शहर का मन्दिर मा ऐ अर चौतरफी देखि की उख क्य चलणु च किलैकि रुमुक हवे गै छै इलै उ रात बितांणु कु अपड़ा बारह चेलों का दगड़ा मा बैतनिय्याह चलि गै।

¹²हैंका दिन जब यीशु अर वेका चेला बैतनिय्याह गौं बट्टी यरूशलेम शहर गैनी त यीशु तैं भूख लगि।

¹³वेल दूर एक पत्तों से भुर्युं बेडु को डालो देखि त तब उ वेका नजीक गै कि हवे सकदु वे पर कुछ फल हो पर पत्तों का सिवै वे पर वेल कुछ नि पै किलैकि फल लगणों को बगत नि छो।

¹⁴यां पर यीशु ल वे डाला कु दंड दे के बोलि, “अब बट्टी त्वे पर कभि फल नि लगुनु” अर वेका चेला सुनणा छा।

¹⁵फिर यांका बाद यीशु अर वेका चेला यरूशलेम शहर पौंछिंनी अर उ यरूशलेम शहर का मन्दिर म गै अर उख जु पैसों कु लींण दींण कना छा ऊं तैं भैर निकलण लगि गै अर सुनारु का ठिया अर कबूतर बिचण वलो कि चौकि तैं भि फरकै दींनि।

¹⁶अर यीशु ल लुखुं तैं आज्ञा दींनि की उ यरूशलेम शहर का मन्दिर का अमणी-संमणी का क्षेत्र बट्टी चीजों तैं लिजांण बंद कैरी द्या।

¹⁷अर ऊंकु बोलि “पिता परमेश्वर का वचन मा यु लिख्युं च कि मेरू घौर सभि जातियों का लुखुं कु पिता परमेश्वर बट्टी प्रार्थना कु मन्दिर बुलयालो? पर तुम ल यु तैं डकैतों को उडयार बणैयेलि।”

¹⁸यु सूंणि के प्रधान याजक अर मूसा की व्यवस्था तैं सिखांण वला, कि यीशु क्य बुल्णु च अर क्य कनु च, त उ यीशु तैं नाश कनु को मौका खुज्योंण लगि गैनी किलैकि उ वेकी लोकप्रियता से डरदा छा, अर जु उ सिखांदु छो भीड़ का लोग वे तैं पसंद करदां छा इलै अर हकदक रै जांदा छा।

¹⁹जब रुमुक हवे त यीशु अर वेका चेला उ शहर छोड़ी के बैतनिय्याह गौं मा सींणु कु चलि गैनी।

²⁰फिर दुसरा दिन सबेर मा जब यीशु अर वेका चेला वापिस यरूशलेम शहर की तरपां जांण छा त ऊंल वे बेडु का डाला तैं जौड़ा तक सुख्युं देखि।

²¹पतरस तैं व बात याद ऐ अर वेल यीशु मा बोलि, “गुरु जी देख यु बेडु कु डालो जै तैं तिल श्राप दे छो उ जौड़ा बट्टी सूखि गै।”

²²यीशु ल वे तैं जवाब दे “परमेश्वर पर विश्वास रखा की जु तुम ल मांगि वे तैं परमेश्वर ल पूरो कन।”

²³मि तुम मा सच-सच बुल्णु छौं जु कुई यु डांडा कु बुललो तु उखड़ि जा अर समुद्र मा पोड़ि जा अर अपड़ा मन मा शंका नि कैर बल्कि विश्वास कैर कि जु बुल्णु च उ हवे जालो त वेको उन ही हवे जालो।

²⁴इलै मि तुम मा बुल्णु छौं कि जु कुछ तुम पिता परमेश्वर बट्टी प्रार्थना कैरी के मांगिल्या त विश्वास कैरा कि उ तुम तैं मिली गै अर पिता परमेश्वर तुम तैं दयालो।

²⁵अर इन ही जब कभि तुम पिता परमेश्वर बट्टी प्रार्थना करदा अर जु तुमारा दिल मा कैका खिलाफ कुई बैर हो त माफ कैरा इलै कि पिता परमेश्वर जु स्वर्ग मा रौंद तुमारा पापों तैं भि माफ करलो।

²⁶अर जु तुम दुसरो की गलतियों तैं माफ नि करिल्या त तुमारो बुबा भि जु स्वर्ग मा च तुमारी गलतियों तैं माफ नि करलो।

²⁷यीशु फिर एक बार यरूशलेम शहर मा ऐ अर जब उ यरूशलेम शहर का मन्दिर मा टैलणु छो त प्रधान याजक, दाना-सयाणों अर मूसा की व्यवस्था तैं सिखांण वलो अर यहूदी अगुवा वेमा ऐ के पुछण लगि गैनी।

²⁸ऊंल यीशु कु बोलि, “यूं कामों तैं कनु कु त्वे तैं क्य अधिकार च? अर यु अधिकार त्वे तैं कैल दींनि कि तु यु काम कैरी।”

²⁹यीशु ल ऊंमा बोलि, “जु तुम मि तैं जवाब द्या त मि भि तुम मा एक बात पुछणु छौं, त मि तुम तैं बतौलु कि यु काम मि कै अधिकार से करदु।”

³⁰यूहन्ना तैं बपतिस्मा दींण कु कैल भेजि? क्य स्वर्ग बट्टी परमेश्वर ल या मनिख्युं ल मि तैं जवाब द्या?

³¹तब उ आपस मा बातचित कन लगि गैनी पर जु हम लुखुं मा बोलुला त क्य होलो कि, यूहन्ना परमेश्वर का अधिकार ल बपतिस्मा दींद त वेल पुछण कि फिर तुम ल वेको विश्वास किलै नि कैरी?

³²उ डरदा छा कि जु इन बोला कि, यूहन्ना कु अधिकार मनिख्युं की तरपां बट्टी च त लोग ऊं कु परेशानी खड़ी कैरी दयाला किलैकि सभि जंणदा छा कि यूहन्ना सचमुच मा परमेश्वर का तरपां बट्टी बुल्ण वलो छो।

³³त तब ऊंल यीशु तैं जवाब दे “हम नि जंणदा की कैल भेजि” यीशु ल ऊंमा बोलि, मि भि तुम तैं नि बतौंदु कि यु काम कनु कु अधिकार वे तैं कख बट्टी मिली।