Read Garhwali मरकुस 13 Bible Online

मरकुस 13 - Garhwali bible

मरकुस 13

¹जब यीशु यरूशलेम शहर का मन्दिर बट्टी भैर निकलणु छो त वेका चेलों मा बट्टी एक चेला ल वेमा बोलि, “गुरु जी देखा कन बड़ा ढुंगा से बंणि सुन्दर अर कथग बड़ी इमारत छिनी”

²यीशु ल वेकु बोलि, “तुम जु यूं बड़ा-बड़ा ढुंगो की बड़ी-बड़ी इमारत तैं दिखणा छा इख ढुंगा मा ढुंगा भि नि रांण जु ढुलै नि जालो।”

³जब यीशु वे जैतून डाला का डांडा बट्टी परमेश्वर बट्टी प्रार्थना कैरी के यरूशलेम शहर का मन्दिर का संमणी बैठयूं छो, अर जब यीशु, पतरस अर याकूब का दगड़ी मा कुई नि छो, तब यूहन्ना अर अन्द्रियास ऐनी अर ऊंल अलग मा जै कै वेमा पूछि,

⁴“हम तैं बतौ कि यूं बातों ल कब हूंण? अर जब यु बात पूरी हूंण वली हवेलि वेको क्य चिन्ह होलो”

⁵यीशु ल ऊंमा बोलि, “चौकस रावा कि कुई तुम तैं नि भरमै द्यो।”

⁶भौत लोग मेरा नौं का अधिकार कैरी के आला अर ऐ के बुलला, मि मसीह छो अर भौत लुखुं तैं विश्वास बट्टी धोखा दींदिनि।

⁷जब तुम लड़ै अर लड़ैयूं कि चर्चा सुणल्या त नि घबरैयां किलैकि यूंकु हूंण जरूरी च पर वे बगत तुरंत दुनिया कु अंत नि होलो।

⁸किलैकि एक जाति दुसरी जाति अर राज्य पर राज्य एक दुसरा पर हमला करला हर कखि भ्यूंचोळ होला अर अकाल पुड़ला यु त शुरुवात पिड़ा होलि जन बच्चा पैदा हूंण से पैली हूंदी।

⁹पर तुम अपड़ा बारा मा चौकस रयां किलैकि लोग तुम तैं पकड़ी के यहूदियों का मिलणा का भवन मा सौंपला अर तुम महासभा मा पिटे जैला किलैकि तुम मेरा चेला छा मेरा खातिर राज्यपालों का अर राजाओं का संमणी तुम्हरी अजमैश करे जाली कि ऊंकु गव्है हो।

¹⁰मेरा बारा मा शुभ सन्देश दुनिया का खत्म हूंण से पैली जरूरी च कि सभि देशों का जातियों तैं पैली प्रचार करे जौं।

¹¹जब उ तुम तैं पकड़ी के ली जाला अर तुम तैं आधिकारियों मा सौंपला त तुम फिकर नि करयां कि हम ल क्य बुल्ण पर सै बगत पर तुम तैं जु कुछ तुम तैं वीं बगत पर बुल्ण तुम तैं बतै द्ये जालो उन ही बुल्यां किलैकि बुल्ण वला तुम नि हवीला बल्कि पवित्र आत्मा होलो।

¹²भैय तैं भैय अर बुबा तैं नौंना मराणु कु सौंपला अर बच्चा अपड़ा ब्वे-बुबा की आज्ञाओं का खिलाफ हवे कै ऊं तैं मरवे द्याला।

¹³अर मेरा चेला हूंणा का खातिर सभि लुखुं ल तुम बट्टी दुश्मनी कन पर जु आखिर तक जु धीरज रखि के मि पर विश्वास रखलो वे तैं ही परमेश्वर उद्धार दयालो।

¹⁴एक दिन जब तुम वे तुच्छ मनिख तैं दिखल्या, जैका कारण प्रर्थान भवन तैं छोड़े जालो, उ उख खड़ो होलो जख वे तैं खड़ो हूंणो कु कुई अधिकार नि च, पढन वलो समझी ल्यो तब जु यहूदिया प्रान्त मा हूंनु उ डांडों मा भाजि जा।

¹⁵जु छत पर हूंनु उ अपड़ा घौर बट्टी कुछ समान लींणु कु मूड़ी घौर का भितर नि उतरुनु अर उख बट्टी भागि जा।

¹⁶अर जु पुंगड़ा मा हो उ अपड़ा कपड़ा लींणु कु घौर कु पिछनै नि लौटु।

¹⁷यु ऊं महिलाओं कु भौत भयानक बगत होलो जु दुबस्ता हवेलि अर जु दूध पिलांदि हवेलि ऊंकु भगण भौत मुश्किल होलो।

¹⁸ऊं दिनों मा लोग भौत बुरा ढंग से पीड़ित होला, लुखुं ल कभि इन दुःख नि देखि होलो पिता परमेश्वर का दुनिया बनांण से अब तक लुखुं पर इन पिड़ा कभि नि हवे होलि इलै पिता परमेश्वर बट्टी प्रार्थना करयां कि यु जाड़ों मा नि हो जब कखि भि जांण कठिन हो।

¹⁹किलैकि उ दिन इन कलेश का होला कि ई धरती का बनांण बट्टी जु कुछ परमेश्वर ल रचि ल त अभि तक न हवे नि अगनैं हूंण।

²⁰जु परमेश्वर ल ऊं मुसिबतों का बगत तैं भौत जल्दी से खत्म कनु को फैसला नि ल्या हूंद त नथरी सब मुरण वला छा, प्रभु ऊं दिनों तैं घटालो त कै भि प्राणि को उद्धार नि हूंण छो पर ऊं चुणयां मनिख्युं का खातिर जौं तैं वेल चुणि ऊं दिनों तैं घटैये गै।

²¹वे बगत मा जु कुई तुम कु बुललो “देखा मसीह इख च” या देखा उख च त यकीन नि करयां।

²²किलैकि झूठा मसीही अर झूठा भविष्य बतांण वला आला अर सामर्थ का चिन्ह अर शैतान का झूठा चमत्कार दिखाला कि हवे साको त परमेश्वर का चुणयां लुखुं तैं भि भरमै द्याला।

²³पर तुम चौकस रयां मिल सभि घटनाओं तैं तुम तैं पैली बट्टी बतयले।

²⁴ऊं दिनों मा वे कलेश खत्म हूंणा का बाद सूरज अर जून अपड़ो उज्यला दींण बंद कैरी दयाला।

²⁵अर आसमान बट्टी गैणा मूड़ि पोड़न लगि जाला अर आसमान कि सैरी शक्ति अर चिन्ह हिलैये जाला।

²⁶तब मि मनिख कु नौंनो बदलो मा दिख्योलू अर बड़ी सामर्थ अर महिमा का दगड़ा आंण दिखयोलू।

²⁷वे बगत उ अपड़ा स्वर्गदूत तैं भेजि के धरती का यु छोर बट्टी आसमान का वे छोर तक चौदिशों बट्टी अपड़ा चुणयां लुखुं तैं कठ्ठा करलो।

²⁸बेडु का डाला बट्टी सीखा जब वेकी फौंकि कुंगळी हवे जंदींनि अर पता निकलण लगि जंदींनि त तुम जांणि जणदां कि गर्मी कु मौसम आंण वलो च।

²⁹इन ही कै जब तुम यूं बातों तैं हूंण दिखल्या त जांणि लियां कि मि मनिख कु नौंनों कु आंण नजीक च ऐ ही गै।

³⁰मि तुम मा सच बुल्णु छौं जब तक यु सभि बात नि हवेलि तब तक यूं लुखुं मा बट्टी तब तक भौत स इन छिनी जु ईं घटना का हूंण तक नि मुरला।

³¹आसमान अर धरती टळि जालि पर मेरी बुलीं बातों ल कभि भि नि टळण।

³²अर कै तैं भि वे दिन अर सै बगत कु नि पता जब मि दुबारा औलु न स्वर्गदूत अर न मि जु नौंनो छो भस परमेश्वर पिता वे बगत तैं जंणदु।

³³देखा बिज्यां रावा अर पिता परमेश्वर बट्टी प्रार्थना करदी रावा किलैकि तुम नि जंणदयां कि उ बगत कब आलो जब मि वापिस औलु।

³⁴मि तुम तैं एक मिसाल सुणांदु जु अब मेरा जांणा का बाद मेरा वापिस आंणु कु एक उदाहरण च या वे मनिख कि तरौं दशा च जु परदेश जांदी बगत अपड़ो घौर छोड़ी कै जौं अर अपड़ा नौकरों तैं हक दे द्यो अर हरेक तैं वेका काम बतै द्यो अर फटक का चौकिदार तैं सजग राणो कु आज्ञा द्यो।

³⁵यीशु अपड़ा चेलों मा बोलि, इलै सजग रावा तुम नि जंणदयां कि घौर का स्वामि ल कब वापिस आंण रुमुक बगत या अधा राती मा या सूरज निकलण से भौत पैली।

³⁶देखा इन नि हो कि उ अचानक ऐ जौं अर तुम तैं सियूं देखु।

³⁷अर जु मि तुम कु बुल्णु छौं उ ही सभियूं कु बुल्णु छौं चौकस रा।