Read Garhwali मरकुस 14 Bible Online

मरकुस 14 - Garhwali bible

मरकुस 14

¹द्वी दिनों का बाद फसह कु त्यौहार अर बगैर खमीर कि रुटि कु त्योहार हूंण वलो छो, प्रधान याजक अर मूसा की व्यवस्था तैं सिखांण वला ई बात कि फिराक मा छा कि कनके यीशु तैं प्रपंच कैरी के पकड़ी के खत्म कैरी द्यां।

²पर उ बुल्णा छा कि हम तैं त्योहार का बगत मा इन नि कन कखि इन नि हो कि लुखुं का बीच मा झगड़ा हवे जौ।

³अर वे बगत जब यीशु बैतनिय्याह नगर मा शमौन कोढ़ी का घौर मा खांणु कु बैठयूं छा तब एक जनन संगमरमर का भांडा पर जटामांशि कु शुद्ध कीमती इत्र लै अर वीं ल भांडा कु मुक हथ ल तोड़ी के कि व यीशु तैं सम्मान दींणु कु सैरा इत्र वेका मुंड मा डाली दींनि।

⁴पर कुई-कुई जु उख छा अपड़ा मन मा रिसमिसै कै बुल्ण लगि गैनी कि वीं तैं यु मंहगा इत्र तैं इन कै नि बर्बाद कन चयणु छो?

⁵किलैकि यु इत्र त एक साल से भि जादा की दिन की मजदूरी मा बेचि के गरीबो मा बांटे जै सकदो छो अर ऊंल वीं तैं झिड़कण के अपड़ो गुस्सा दिखण लगि गैनी।

⁶यीशु ल बोलि, वीं तैं यखुली छोड़ी द्या वीं तैं परेशान कन छोड़ी द्या वीं ल त मेरा दगड़ा भलै कैरी।

⁷गरीब त तुमारा दगड़ा सदनी रौदींनि अर ऊं दगड़ी तुम जब चैल्या भलै कैरी सकद्यां पर मिल तुमारा दगड़ा सदनी नि रांण।

⁸ईं महिला ल ज्वा व कैरी सकदी छै उ कैरी, मेरा मुरण से पैली मेरा मुंड मा इत्र डाली के मेरा देह तैं दफनांण कु तैयारी हवे साक इलै जु वीं ल कैरी अच्छो ही कैरी।

⁹मि तुम मा सच बुल्णु छौं कि जख कखि भि शुभ सन्देश प्रचार करे जालो उख यु कामों कु भि जिक्र होलो जु ईंल मि दगड़ी कैरी अर लोग ईं तैं बात याद रखला।

¹⁰यहूदा इस्करियोती जैल वे तैं पकड़वै भि दींनि जु बारहों चेलों मा बट्टी एक छो, उ प्रधान याजक मा गै कि यीशु तैं वेमा सौंपी द्यो।

¹¹उ इन सूंणि कै खुश हवेनि अर यीशु तैं धोखा से पकड़ण कु मौका खुज्योंण लगि गैनी कि वे तैं कन के भि पकड़वै द्या।

¹²फसह कु भोज का पैला दिन जब फसह का ढिबरो कु बलिदान करे जांदु छो त यीशु का चेलों ल वेमा पूछि, “कि तु क्य चांदी की हम कख फसह कु खांणु तैयार करयां की हम वे तैं खा सका।”

¹³यीशु ल अपड़ा चेलों मा बट्टी द्वी चेलों कु इन बोलि के भेजि, “यरूशलेम शहर मा जावा अर एक आदिम पांणी कु घौडो उठै कै लांण तुम तैं मिललो वेका पिछनै चलि जयां”

¹⁴अर जख उ जालो वे घौर का स्वामि मा बुल्यां गुरु जी कु पूछयूँ च, “मेरू उ मेहमनों कु भितर कख च जै मा मि अपड़ा चेलों का दगड़ा फसह को भोज खै साको”

¹⁵उ अफी तुम तैं एक बड़ो सी सज्यूं-धज्यूं ऐंच कु कमरा दिखै दयालो उख हम कु तैयारी करयां।

¹⁶तब बारह चेला शहर मा गैनी अर ऊंल उन ही उख पै तब ऊं ल फसह का भोज कि तैयारी कैरी।

¹⁷जब रुमुक हवे त तब यीशु अपड़ा बारह चेलों का दगड़ा मा उख शहर मा ऐ।

¹⁸अर जब उ बैठी कै खांणु खांणा छा तब यीशु ल बोलि, मि तुम मा सच बुल्णु छौं तुम मा बट्टी एक जु मेरा दगड़ा खांणु-खांणु च उ मि तैं पकड़ण मा मेरा दुश्मनों की मदद करलो।

¹⁹जब ऊंल य बात सूंणि त उ दुखी हवे गैनी अर एक-एक कैरी के एक हैंका तैं पुछण लगि गैनी, “क्य मि नि छौं कखि तु त नि?”

²⁰अर यीशु ल ऊंकु बोलि “उ बारहों चेलों मा बट्टी एक च जैको मि दगड़ा मेरा रुट्टि का कटोरा मा हथ डलयूं च।”

²¹किलैकि मि मनिख कु नौंना का बारा मा जन परमेश्वर का वचन मा लिख्युं च उ त दुःख उठालो पर वे मनिख कु हाय च जैका द्वारा मनिख कु नौंनो पकड़वै जालो जु वेको जन्म यु दुनिया मा नि हूंद त वे मनिख की स्थिति कु भलो हूंदू।

²²जब उ खांणु खांणा छा त यीशु ल रुट्टि लींनि अर परमेश्वर तैं धन्यवाद दे के तोड़ी अर अपड़ा चेलों तैं दींनि अर बोलि, “ल्यावा अर खावा या मेरी देह च।”

²³फिर यीशु ल अंगूरों कु रस को कटोरा ली कै परमेश्वर कु धन्यवाद कैरी के अपड़ा चेलों तैं दींनि अर ऊं सभियूं ल वां मा बट्टी पीनि।

²⁴अर यीशु ल चेलों कु बोलि, “यु अंगूरों कु रस मेरू ल्वे च जु भौत सी लुखुं कु बलिदान का रूप मा बुगै जांद यु नई प्रतिज्ञा कु एक चिन्ह च जु परमेश्वर अपड़ा लुखुं कु कनु च।”

²⁵मि तुम मा सच बुल्णु छौं, कि यांका बाद अंगूरों कु रस कभि नि प्यूलु जब तक कि परमेश्वर का राज्य मा नयो नि प्यों।

²⁶तब यीशु अर वेका चेला परमेश्वर की स्तुति करदींनि अर यरूशलेम शहर बट्टी निकिली की जैतून डाला का डांडा पर चलि गैनी।

²⁷जब उ जैतून डांडा मा जांणा छा त यीशु ल ऊंकु बोलि, “तुम सभियूं ल ठोकर खांण अर मि तैं छोड़ी के भागि जांण किलैकि पिता परमेश्वर का वचन मा मि कु लिख्युं च मि अपड़ा लुखुं की देखभाल कन वला तैं मारि दयुलु अर ऊंकी ढिबरों तैं छिदरु-बिदरु लगि जालि।”

²⁸जब मि मुर्दों बट्टी ज्यूँदो हवे जौंलु त मिल तुम से पैली गलील जिला मा पौंछि जांण अर तुम तैं मिलण।

²⁹पतरस ल यीशु कु बोलि, “जु सभि त्वे तैं छोड़ी भागि जाला पर मिल त्वे तैं छोड़ी के नि जांण।”

³⁰यीशु ल वेकु बोलि, “मि त्वे मा सच बुल्णु छौं कि आज ही राती द्वी बार मैर का बंसण से पैली तिल तीन बार मि तैं पछ्यण बट्टी मुकरी जांण।”

³¹पर पतरस ल और भि जोर दे के बोलि, जु तेरु दगड़ा मि तैं मुरण भि पुड़लो तब भि मि त्वे तैं पछ्यण बट्टी इन्कार नि करुलु इन ही और सभि चेलों ल भि बोलि।

³²फिर यीशु अर वेला चेला गतसमनी नौं का बाग मा ऐ अर वेल अपड़ा चेलों कु बोलि, “इख बैठयां रावा जब तक मि पिता परमेश्वर बट्टी प्रार्थना कैरी के औ।”

³³अर यीशु पतरस, याकूब अर यूहन्ना तैं अफ दगड़ी लीगि अर भौत दुखी अर व्याकुल हूंण लगि गै।

³⁴अर यीशु ल चेलों कु बोलि, “मेरू मन भौत उदास च इख तक कि मि लगदु मि मुरण वलो छौं तुम इख ठैरा अर बिज्यां रावा।”

³⁵फिर उ थोड़ा अगनैं बढ़ि अर भुय्यां धरती मा पोड़ी कै पिता परमेश्वर बट्टी प्रार्थना कन लगि गै कि, हे मेरा बुबा जु तेरी योजना मा यु सम्भव हो त मि तैं यु दुःख बट्टी बचो जु मि पर आंण वलो च आप कु सब कुछ सम्भव च फिर भि बुबा तेरी ही इच्छा पूरी हो मेरी न।

³⁶

³⁷फिर जब यीशु उख बट्टी वापिस ऐ अर चेलों तैं सियूं देखि त पतरस तैं पूछि, “हे शमौन पतरस तु सियूं छै? क्य तु मि दगड़ी एक पल भि बिज्यूं नि रै सैकी?”

³⁸बिज्यां रावा अर पिता परमेश्वर बट्टी प्रार्थना करदी रावा ज्यां बट्टी तुम अजमैश मा नि पुड़यां आत्मा त तैयार च पर देह कमजोर च।

³⁹यीशु एक बार फिर से वापिस चलि गै अर उन ही पिता परमेश्वर बट्टी प्रार्थना कैरी।

⁴⁰फिर ऐ के चेलों तैं सियूं देखि किलैकि उ भौत थक गै छा अर वेका जगांण पर नि जांणि सकिनि कि वे तैं क्य बोला।

⁴¹फिर तिसरी बार ऐ के ऊंमा बोलि, “अब से जा अर आराम कैरा तुम बिज्यां सै ग्यां सूंणा अब बगत ऐ गै जब कुई मि मनिख का नौंनो तैं पापी लुखुं का हथ मा पकड़वाणू च।”

⁴²उठा चला देखा मेरू पकड़वाण वलो नजीक ऐ गै।

⁴³जब यीशु इन बुल्णु ही छो कि यहूदा जु बारहों चेलों मा बट्टी एक छो अफ दगड़ी प्रधान याजक, मूसा की व्यवस्था तैं सिखांण वला अर दाना-सयाणों कि तरपां बट्टी सिपैयूं की एक बड़ी भीड़ ले कै तुरंत तलवार अर लाठों ली कै उख वे तैं पकड़णु कु पौंछि गै।

⁴⁴यहूदा यीशु का पकड़वाण मा मदद कनवलों कु ऊं तैं इन बतायूं छो कि जै तैं मि प्यार से भुकि पीलू उ ही च अर वे तैं तुम जतन से लिजायां।

⁴⁵यहूदा ऐ अर वेल यीशु का संमणी ऐ के बोलि, “गुरु अर वेकी भौत भुकि पीनि।”

⁴⁶तब ऊंल यीशु तैं तंग कैरी अर वे तैं पकड़ी दींनि।

⁴⁷यीशु का दगड़ा उख जु भि छा ऊंमा बट्टी एक ल तलवार निकाली अर महायाजक का सेवक कु कंदूड़ काटि दींनि।

⁴⁸यीशु ल वीं भीड़ कु बोलि, “क्य तुम मि तैं डाकु समझी कै पकड़णु अयां छा जु लाठा अर तलवार ले कै अयां छा?”

⁴⁹मि त हरेक दिन यरूशलेम शहर का मन्दिर मा तुम दगड़ी रै के उपदेश दींदु छो तब तुम ल मि तैं नि पकड़ी पर यु इलै हवे कि परमेश्वर का वचन कि बात पूरी हूंनु।

⁵⁰ई बात हूंण से वेका सभि चेला वे छोड़ी के भाजि गैनी।

⁵¹एक जवान अपड़ी नंगी देह पर चादरो ओढ़ी कै वेका पिछनै गै जब लुखुं ल वे तैं पकड़णै की कोशिश कैरी।

⁵²पर वेल चादरो छोड़ी अर नंगी भाजि गै।

⁵³फिर उ लोग यीशु तैं महायाजक का घौर मा ली गैनी अर प्रधान याजक अर दाना-सयाणों अर उख मूसा की व्यवस्था तैं सिखांण वला कठ्ठा हवे गैनी।

⁵⁴पतरस दूर-दूर हवे कै यीशु का पिछनै महायाजक का चौक का भितर तक चलि गै अर मंदिर का सिपैयूं का दगड़ा आग तपण बैठी गै।

⁵⁵प्रधान याजक अर महासभा का अन्य सदस्य यीशु तैं खत्म कनु कु वेका खिलाफ गवाह खुज्याणा छा पर ऊं तैं गवाह नि मिलिनि।

⁵⁶किलैकि उख भौत सैरा वेका खिलाफ झूठी गव्है दींणा छा पर जु कुछ ऊंल बोलि उ अन्य गव्है एक जन नि छै

⁵⁷तब कुछ लुखुं ल उठि के यीशु का खिलाफ या गव्है दींनि।

⁵⁸“हम ल यु तैं इन बुल्द सूंणि, मि लुखुं का हथ का बणायां यु मन्दिर तैं डोल दयुलु अर तीन दिनों मा हैंको बणै दयुलु, जु लुखुं का हथ ल नि बण्यूं होलो।”

⁵⁹पर यां पर भि जु कुछ ऊंल बोलि, उ हौर गव्है एक जन नि छै।

⁶⁰तब महायाजक ल सभा का बीच मा खड़ो हवे कै यीशु तैं पूछि, “तु कुई जवाब नि दींणि छै यु लोग तेरु खिलाफ क्य बुल्णा छिन”

⁶¹पर यीशु चुप रै अर कुई जवाब नि दींनि महायाजक ल वेमा फिर पूछि, “क्य तु वे परमधन्य परमेश्वर कु नौंनो मसीह छै?”

⁶²यीशु ल बोलि, “हां मि छौं” अर तुम मि मनिख कु नौंनो तैं सर्वशक्तिमान परमेश्वर कि दैंणि तरपां बैठयूं अर आसमान बट्टी बादलों मा सामर्थ का दगड़ी औंण देखि ल्या।

⁶³जब महायाजक ल यु सूंणि त अपड़ा कपड़ा फड़िनि अर बोलि, अब हम तैं और गवाहों कि जरुरत नि च?

⁶⁴तुम ल परमेश्वर की या बुरै त सूणेलि हवेलि तुमारी क्य सलाह च, “उख का सभि सभा सदस्य सहमत छा की यीशु भंगारी च अर बोलि, यु त खत्म कन लैख च”

⁶⁵तब कुई त वे पर थुकण कुई वेको मुक ढकाण अर वे पर मुक्का मरण लगि गैनी अर बुल्ण लगि गैनी कि “भविष्यवाणि कैर”अर यु बोलि के वेको ठट्टा कन बैठी गैनी अर मंदिर का सिपैयूं ल वे तैं पकड़ी के थपड़ मरिनि।

⁶⁶जब पतरस मूड़ि चौक मा आग तपणु छो त महायाजक कि नौकराण्यूं मा बट्टी एक उख ऐ।

⁶⁷अर पतरस तैं आग तपद देखि त वे तैं देखि के बुल्ण लगि गै “तू भि त वे यीशु नासरी का दगड़ा मा छै।”

⁶⁸पतरस ल मना कैरी अर बोलि, “मि नि जंणदूं अर नि समझणु कि तु क्य बुल्णी छै”फिर उ भैर चौका का दयाली मा गै अर मैर बांसि गै।

⁶⁹व नौकराणि पतरस तैं खड़ो देखि कै लुखुं मा फिर बुल्ण लगि गै “यु भि त यीशु का चेलों मा बट्टी एक च।”

⁷⁰पर वेल फिर मना कैरी दींनि जरा देर बाद पतरस का नजीक वला लुखुं ल वेकु बोलि, तु पक्का वेका चेलों मा बट्टी एक छै किलैकि तेरु बुल्ण से पता चलणु च की तु गलीली छै।

⁷¹तब पतरस अफ पर धिकार कन बैठी गै अर सौं सिरगत खांण लगि गै “मि वे आदिम तैं जैकी तुम चर्चा कना छा नि जंणदु।”

⁷²तब तुरंत दुसरी बार मैर बांसि गै पतरस तैं व बात ज्वा यीशु ल वेमा बोलि छै याद ऐ गै, कि मैर का द्वी बार बांसण से पैली तीन बार मेरा बारा मा तिल मुकरी जांण अर उ ई बात तैं सोचि के उ भकोर-भकोर के रूंण लगि गै।