Read Garhwali मरकुस 16 Bible Online

मरकुस 16 - Garhwali bible

मरकुस 16

¹हैंका दिन शाम बगत जब यहूदियों का विश्राम का दिन जु परमेश्वर कु पवित्र दिन च अर जु त्योहार कु दिन छो बीति गै त मरियम जु मगदल गौं की छै अर याकूब कि ब्वे मरियम अर सलोमी यूं सभियूं ल खुशबूदार तेल मोल लींनि अर यहूदियों की रीति का अनुसार कि ऐ के यीशु कि लांश पर लगौन।

²इतवार का दिन सुबेर हूंण से पैली यु जनन कब्र पर ऐनी।

³अर आपस मा बुल्णी छै कि “हम कु कब्र का द्वार पर कु ढुंगो कु जि लमडालो”

⁴पर जब ऊंल देखि कि कब्र पर बड़ो ढुंगो पैली ही एक तरपां हटियूं च अर यु ढुंगो भौत बड़ो छो।

⁵पर जब उ कब्र पर पौछिनी अर भितर जै कै ऊं तैं एक जवान आदिम चमकदार सफेद कपड़ोंं मा दैंणि तरपां बैठयूं देखि त तब उ भैचक मा पोड़ि गैनी।

⁶वे जवान आदिम ल ऊंकु बोलि, “भैचक मा नि पोड़ा तुम यीशु नासरी जै तैं सूली पर चढ़ै गै छो ढुंडणा छा उ ज्यूँदो हवे गै उ इख नि च या व जगा च जख वे तैं रखे गै छो।”

⁷पर अब तुम जावा अर पतरस मा अर अन्य चेलों मा बोला, कि यीशु ज्यून्दो हवे गै अर उ तुम से पैली गलील जिला म चलि जांण जन वेल तुम मा अपड़ा मुरण से पैली बोलि छो तुम ल उ उखि दिखण।

⁸अर उ जनन यीशु की कब्र बट्टी भाजि गैनी किलैकि डौर के उ कौंपणी छै अर ऊं पर घबराट छै गै ऊंल रस्ता मा पतरस तैं और कै तैं भि कुछ नि बतै किलैकि उ डरणी छै।

⁹इतवार का दिन सुबेर ले के यीशु ज्यूँदो हवे सबसे पैली मरियम जु मगदल गौं की छै ल वे तैं देखि जैं बट्टी यीशु ल पैली सात दुष्टात्मा निकाली छै।

¹⁰मरियम ल उख बट्टी जै के यीशु का चेलों तैं जु शोक मा डुबयां छा अर रूंणा बिब्याणा छा या खुशखबरी दींनि।

¹¹पर जब चेलों ल यु सूंणि कि यीशु ज्यूँदो हवे गै अर मरियम मगदलनी ल वे तैं देखि त ऊंल वीं को विश्वास नि कैरी।

¹²यांका बाद यीशु अपड़ा द्वी चेलों तैं जु की यरूशलेम का इनै-उनै की जगह अपड़ा घौर जांणा छा दिखै पर उ वे तैं पैछाणी नि सकिनि।

¹³जब ऊंल यीशु तैं पैछाणी तब उ द्वी चेला यरूशलेम मा वापिस गैनी अर हौरु तैं यु रैबार दींनि की क्य-क्य हवे पर ऊंकी बातों कु यकीन भि कैल नि कैरी।

¹⁴बाद मा यीशु अपड़ा ग्यारा चेलों तैं भि दिखै जब उ खांणु खांणा छा यीशु ल ऊंका मन कि निठुरता पर ऊं तैं खिजे कि किलैकि ऊंल वेका ज्यूंदा हूंण पर वे तैं देखि छो पर भरोंसू नि कैरी।

¹⁵तब यीशु ल ऊंकु बोलि, “तुम सैरा दुनिया मा हर जगह जै कै सभि रांण वलो तैं शुभ सन्देश कु प्रचार कैरा।”

¹⁶जु कुई मि पर विश्वास कैरो वेको चिन्ह च की उ बपतिस्मा ल्यो अर परमेश्वर का द्वारा मि वे तैं पापों का मिलण वला दंड से उद्धार अर वेको जु विश्वास नि करुलु वे तैं परमेश्वर दंड दयालो।

¹⁷अर मि पर विश्वास कन वलो मा यु चमत्कार का काम का चिन्ह होला उ मेरा नौं से दुष्टात्मा तैं निकलला अर मि ऊं तैं नई-नई बोलि भाषा बुलौलु।

¹⁸जु उ जहरीला गुरो तैं उठै द्याला त गुरो भि ऊं तैं नुकसान नि पौछांला अर उ जु कुई जहरीली चीज भि प्ये द्याला तब भि ऊंकु कुई भि नुकसान नि होलो उ बिमारों पर हथ रखि के परमेश्वर बट्टी प्रार्थना करला अर उ खूब हवे जाला।

¹⁹जब प्रभु यीशु ल चेलों कु यु बात बुलिनि तब वेका बाद स्वर्ग मा उठै गै अर परमेश्वर कि दैंणि तरपां बैठी गये।

²⁰तब यीशु ल चेलों तैं हरेक जगह प्रचार कनै की खुशखबरी द्ये अर प्रभु ऊंका दगड़ा काम कनु रै उ सामर्थ का काम द्वारा जु दगड़ा-दगड़ा हूंद छा अर प्रभु की सामर्थ चमत्कार दिखांणु रै अर वचन की सचै तैं मजबूत कनु रै, आमीन।