Read Garhwali मरकुस 3 Bible Online

मरकुस 3 - Garhwali bible

मरकुस 3

¹फिर यीशु एक और यहूदियों का विश्राम का दिन जु परमेश्वर कु पवित्र दिन छो यहूदियों का मिलणा का भवन मा गै जख एक आदिम छो जै को हथ सुखी गै छो।

²अर ऊंमा बट्टी कुछ फरीसी यीशु पर भंगार लगांणु कु ईं ताक मा लगयां छा कि वे तैं ध्यान से देखदां कि उ यहूदियों का विश्राम का दिन जु परमेश्वर कु पवित्र दिन च वे तैं खूब करदु च कि नि करदो।

³ऊंल वे सुख्यां हथ वला आदिम कु बोलि, सभियूं का बीच मा खड़ो हवे जा।

⁴अर यीशु ल ऊंमा बोलि, क्य परमेश्वर हम तैं यहूदियों का विश्राम का दिन जु परमेश्वर कु पवित्र दिन च भलो कन य ठिक कनै की आज्ञा दींद च कि बुरो कनै की आज्ञा दींद य कैका प्राण तैं बचांद य मरण की आज्ञा दींद फिर उ चुप रैनी।

⁵यीशु ऊंका मन कि कठोरता से उदास हवे के ऊं तैं गुस्सा मा चौतरफी देखि अर वे मनिख कु बोलि, अपड़ो हथ बढो अर वेल बड़ै अर वेको हथ ठिक हवे गै।

⁶तब फरीसियों ल भैर जै के तुरंत हेरोदियों राजा का समर्थक दगड़ी वेका खिलाफ मा सलाह कन लगि गैनी कि यीशु तैं कै ढंग से नाश कैरा।

⁷येका बाद यीशु अपड़ा चेलों का दगड़ी झील का छाला पर चलि गै अर गलील जिला अर यहूदिया प्रान्त बट्टी एक भौत बड़ी भीड़ वेका पिछनैं हवे गै।

⁸अर यहूदिया जिला अर यरूशलेम शहर अर इदुमिया जिला बट्टी अर यरदन गाड का पूर्वी क्षेत्र पार बट्टी अर सूर अर सीदोन शहरों का अमणी-संमणी बट्टी एक बड़ी भीड़ यीशु तैं सुनणु कु वेका पिछनैं हवे गै कि उ कन चमत्कार का काम करदु।

⁹यीशु ल अपड़ा चेलों मा बोलि, “भीड़ का वजह से मि कु बैठण कु एक छुटी नाव तैयार कैरा किलैकि लोग भौत छिनी उ मि तैं दबै नि सकुनु।”

¹⁰किलैकि यीशु ल वे दिन भौतों तैं खूब कैरी इलै जथग लोग रोगों मा पुड़यां छा उ वे तैं छूणु कु वे पर गिरदा पड़दा छा।

¹¹जब भि दुष्टात्मा बट्टी पीड़ित लोग वे तैं दिखदा छा त वेका अगनैं गिरदा पड़दा छा अर चिल्लै कै बुल्दी छै कि तु परमेश्वर कु नौंनो छै।

¹²यीशु ल ऊं तैं भौत चितै कि मेरा बारा मा कै मा कुछ नि बुल्यां की मि परमेश्वर कु नौंनो छौं।

¹³तब यीशु डांडा पर चढ़ी गै अर जौं तैं उ चांदु छो ऊं तैं अपड़ा संमणी बुलै अर उ वेका संमणी ऐ गैनी।

¹⁴तब यीशु ल ऊं बट्टी बारह लुखुं तैं छांटी अर ऊं तैं प्रेरितों बोलि कि उ वेका दगड़ी रौनु अर उ, ऊं तैं भेजु कि उ प्रचार कैरा।

¹⁵अर उ अफ मा दुष्टात्मा तैं निकलणों को अधिकार रखा।

¹⁶अर यु उ बारह चेला छिन जौं तैं यीशु ल चुणि छो शमौन पतरस जैको नौं वेल पतरस रखि।

¹⁷अर जब्दी को नौंनो याकूब अर वेको भैय यूहन्ना जौं को नौं वेल बुअनरगिस मतलब गर्जन समान आदिम छो।

¹⁸अर अन्द्रियास अर फिलिप्पुस अर बरतुल्मै अर मत्ती अर थोमा अर हलफई को नौंनो याकूब अर तद्दी अर शमौन कनानी जै कु मतलब च जोशिला।

¹⁹यहूदा इस्करियोती जैल यीशु तैं वेका दुश्मनों का हथों मा पकड़वै दींनि।

²⁰यीशु जब कैका घौर मा छो अर इन भीड़ कठ्ठा हवे गै छै कि वे तैं रुट्टि खांणो कु भि बगत नि मिली।

²¹जब वेका कुटुम्बियों ल यु सूंणि त वे तैं पकड़नु कु निकलनी किलैकि उ बुल्दा छा कि वेको चित ठिकाणा मा नि अर उ पागल च इलै उ वे तैं घौर लिजांण चांणा छा।

²²यु लोग मूसा की व्यवस्था तैं सिखांण वला छा जु यरूशलेम शहर बट्टी ऐ छा यु बुल्णा छा कि वे पर शैतान लग्युं च अर यु भि कि उ दुष्टात्मा का सरदार शैतान की मदद ल दुष्टात्मा तैं निकलदु च।

²³अर यीशु उ सभि लुखुं तैं अपड़ा संमणी बुलै के ऊंमा मिसाल दे के बुल्ण लगि गै कि क्य शैतान अपड़ा ही दुष्टात्मा तैं लुखुं मा बट्टी भैर निकलणु कु मजबूर कैर सकद?

²⁴अर जै राज्य का लोग छुट्टा टुकड़ा मा बटयां हो अर आपस मा लड़ै कन रौनु तब उ राज्य कनके ठिक रै सकदु?

²⁵जै घौर का लोग आपस मा बंणयां हो त उ परिवार का लोग दगड़ा मा नि रै सकद?

²⁶अर जु शैतान अपड़ो ही विरोधी हवे के अफ मा फूट डालो त तब उ कनके बणयुं रै सकदु? वेको त अंत ही हवे जांदु।

²⁷यीशु ल तुलना कैरी के बोलि, “कि क्य कुई आदिम कै बलिष्ठ का घौर मा घुसि के वेकी सम्पति लूछि नि सकदु, जब तक कि उ पैली वे बलिष्ठ तैं बंधि नि ल्यो अर तब वेका घौर तैं लूछि सकद।”

²⁸मि तुम मा सच बुल्णु छौं कि मनिख्युं की सन्तान का सभि पाप अर बुरै जु उ परमेश्वर का विरुद्ध करदींनि परमेश्वर ऊं पापों तैं माफ कैरी सकद।

²⁹पर जु पवित्र आत्मा का खिलाफ बुरै करलो उ सदनी पाप को अपराधी ठैरुदो परमेश्वर ऊं तैं कभि भि माफ नि करलो।

³⁰यीशु ल यु इलै बोलि, किलैकि उ यु बुल्दा छा कि वे पर दुष्टात्मा च।

³¹“फिर यीशु की ब्वे अर भैय ऐनी अर भैर खड़ा हवे के वे तैं बुलावा भेजि।”

³²अर भीड़ वेका अमणी-संमणी बैठी छै, अर ऊंल वेकु बोलि, “देख तेरी ब्वे अर तेरु भैय त्वे तैं भैर खुज्योंणा छिन।”

³³यीशु ल ऊं तैं जवाब दींनि, “कि मेरी ब्वे अर मेरा भैय कु छिन?”

³⁴अर जु वेका अमणी-संमणी बैठयां छा ऊं तैं देखि के बोलि, “देखा मेरी ब्वे अर मेरा भैय यु छिन।”

³⁵जु कुई परमेश्वर की मनसा पर चलो जु परमेश्वर चौ त उ करदां, “उ ही मेरा भैय अर बैंण अर ब्वे छिन।”