Read Garhwali मरकुस 4 Bible Online

मरकुस 4 - Garhwali bible

मरकुस 4

¹यीशु फिर गलील की झील का छाला पर उपदेश दींण लगि गै; अर इन बड़ी भीड़ वेका संमणी कठ्ठा हवे गै अर एक नाव पर चढ़ी के बैठी गै अर सैरी भीड़ झील का छाला पर सुखीं भूमि मा खड़ी छै।

²अर उ, ऊं तैं मिसाल दे के भौत सैरी बात सिखौण लगि गै, अर अपड़ा उपदेश का द्वारा ऊंमा बोलि।

³सूंणा एक बुतै कन वलो बीज बुतुणु कु अपड़ा पुंगडा मा गै।

⁴अर बुतुण बगत कुछ बीज त बट्टा का किनारा पर छिलरेनी अर चलखुडों ल ऐ के ऊं बीजों तैं खै दींनि।

⁵अर कुछ बीज पथरीली जगह पर छिलरेनी जख ऊं तैं जादा माटो नि मिली अर गैहरु माटो नि मिलण का वजह से जल्दी जमि गैनी।

⁶अर जब सूरज की गर्मी निकली त फुके गैनी अर जौड़ा कमजोर हूंण का कारण जल्दी सूखि-सूखि गैनी।

⁷अर कुछ झिबलांण मा छिलारेनी अर जख झिबलाड़न ल बढ़ि के ऊं तैं दबै दींनि अर उ बीज फलि नि सकिनि।

⁸पर कुछ बीज अच्छी भूमि मा पोड़िन अर उ जमि के अर बड़ी के फलवन्त हवेनि कुई तीस गुणा कुई साठ गुणा अर कुई सौ गुणा फल लै।

⁹अर वेल बोलि, जु कुई ईं बात तैं सूंणि सकदु जु मि बुल्ण छौं उ यु तैं समझ भि ल्यो।

¹⁰जब यीशु यखुली रै गै त वेका दगड़ियों ल उ जु वेका नजीक छा अर ऊं बारहों चेलों समेत वे बट्टी ईं मिसाल का बारा मा पूछि की यांको क्य मतलब च।

¹¹यीशु ल ऊंमा बोलि तुम तैं त परमेश्वर का राज्य कि सचै की समझ दियीं च पर मि पर भरोसो नि रखण वलो कु सब बात मिसाल मा हूंदी।

¹²इलै जु परमेश्वर का वचन मा लिख्युं च, उ देखि के दिखुनु पर ऊं तैं समझी नि सकुनु अर सूंणि के भि सुणुनु पर बींगी नि सकुनु इन नि हो कि उ अपड़ा पापों से फिरुनु अर माफ करे जलो।

¹³फिर यीशु ल ऊंमा बोलि, जु तुम ईं मिसाल तैं नि समझयां? त फिर और मिसालों तैं कनि कै समझिला?

¹⁴एक बीज बुतण वलो इन च जन लुखुं तैं परमेश्वर को वचन तैं बतौंण।

¹⁵कुछ लोग वे बट्टा जन छिन जख कि वचन को बीज बुतै जांद उ यु छिनी कि जब ऊंल सूंणि त शैतान तुरंत ऐ के वे वचन तैं जु ऊंमा बुतै छो उठै के ले के चलि जांदु।

¹⁶कुछ लोग उ ही पथरीली भूमि जन छिन ज्यां पर बीज गिरदो पर यु उ छिनी कि जु वचन तैं सूंणि के तुरंत खुशी से स्वीकार कैरी दींदीनी।

¹⁷पर यु अपड़ा भितर दिल मा परमेश्वर का वचन तैं जौड़ा बट्टी पकड़ण नि दींदीनी एलै वचन कुछ ही दिनों कु रांदो यांका बाद जब ऊं पर क्लेश या बिपदा औंदि त तब उ तुरंत छोड़ी दींदिनि।

¹⁸कुछ जु झिबलांण मा बुतै गैनी उ यु छिनी जु परमेश्वर को वचन तैं सूंणि दींनि।

¹⁹पर धरती पर जीवन कि चिंता अर धन दौलत को धोखा ज्यां बट्टी उ प्रेम करदींनि अर कई चीजों तैं पाणै की चाह, परमेश्वर का वचन मा ए के दबै जांदी, अर ऊंका जीवन मा कुछ भि फैदा नि हूंद।

²⁰कुछ जु अच्छी जगह मा बुतै गैनी उ यु छिनी जु वचन तैं सूंणि के स्वीकार करदींनि अर फल लंदिनि कुई तीस गुणा डाला जन कुई साठ गुणा डाला जन अर कुई सौ गुणा डाला जन।

²¹यीशु ल ऊंमा बोलि, क्य दिवडा तैं इलै बलदिन कि ब्यांरा तौळा या खाटि का तौळा रखे जौं? या फिर ज्यां ल कि ब्यांरा पर रखे जौं इलै की सब लुखुं तैं वेको उज्यला फूंजी साको

²²इन ही जु कुछ छिपयूं च प्रगट हवे जौं अर हर गुप्त बात प्रगट हवे जौं

²³यीशु ऊंमा बोलि, जु कुई ईं बात तैं सूंणि सकदु जु मि बुल्ण छौं उ यु तैं समझ भि ल्यो।

²⁴फिर यीशु ल ऊंमा बोलि, सचेत रावा कि क्य सुंणदा? जै नाप से तुम नपदा छा वे ही नाप से तुम कु भि नपे जालो अर तुम तैं बिजां दिये जालो।

²⁵जु कुई भि या बात समझणै की इच्छा रखद कि मि क्य बुल्णु छों, पिता परमेश्वर वे तैं और जादा समझणै की समझ दयालो; पर जै मा थोड़ा भि नि च वेमा बट्टी उ भि लिये जालो जु वेमा छैं च।

²⁶फिर यीशु ल बोलि, परमेश्वर कु राज्य इन च जन कि एक बीज बुतण वलो पुंगड़ा मा बीज बूतो।

²⁷हर राती सेइ जौं अर हर दिन मा बिंज्यु रौ अर काम कैरी अर उ बीज इन जमौ अर बड़ो कि उन ही जंणदु कि उ कब बढ़दो।

²⁸जमींन अफी इन फल लौंदि कि पैली अंकुर तब बलड़ा अर तब बलडों मा ग्यूं का बीज अर वे बट्टी तैयार बीज।

²⁹पर जब फसल पक्की जंदींनि तब उ तुरंत दथड़ो लगौंदु किलैकि लवैइ कु बगत ऐ गै।

³⁰फिर यीशु ल बोलि, “हम परमेश्वर का राज्य कि तुलना इन कै कैर सकद्यां मि एक मिसाल दे के तुम तैं सुणौदु।

³¹परमेश्वर कु राज्य धरती पर सभि बीजों मा सबसे छुटा बीज का जन च जन रैई कु बीज कि जब धरती मा बुतै जांदु त धरती का सभि बाजों से छुटो हूंद।

³²पर जब बुतै गै त उगि के सब सागपात से भि बड़ो हवे जांदु अर वेका इन बड़ा फौंका निकली जंदींनि कि आसमान का चलखुडा भि वेका छैल मा घोल बणै के बसेरा कैरी सकदींनि।”

³³अर उ, ऊं तैं इन ही भौत सैरी मिसाल दे के ऊंकी समझ का अनुसार वचन सुंणौदु छो।

³⁴उ भीड़ तैं मिसाल मा ही शिक्षा दींदो छो अर बगैर मिसाल का परमेश्वर का राज्य का बारा मा कुछ नि बुल्द छो पर एकुंत मा अपड़ा चेलों तैं सब बातों कु मतलब बतौंदु छो।

³⁵वे दिन जब रुमुक हवे त यीशु ल ऊंमा बोलि, आवा हम गलील झील का दुसरा छाला पर जन्द्यां।

³⁶अर उ वीं भीड़ तैं पिछनै छोड़ी के चेला भि वीं नाव मा ए गैनी ज्यांमा यीशु बैठयूँ छो अर उ चलि गै छा, अर कुछ और लुखुं मा और भि नाव छै।

³⁷तब बड़ी आंधी का कारण नाव म अतरोळ-बतरोळ हवे अर बौछार इख तक लगिनि कि नाव पांणी ल भुरेण लगि गै छै अर नाव डुबण लगि गै छो।

³⁸अर यीशु अफ पिछनै कि तरपां गद्दी पर सियूं छो, तब ऊंल वे तैं बिजालि के वेमा बोलि “हे गुरु नाव डुबण वली च अर हम ल भि डुबी जांण क्य त्वे तैं कुछ भि चिंता नि च?”

³⁹तब यीशु उठि अर वेल अतरोळ-बतरोळ से उठयां लहरों तैं झिड़की, अर बोलि, शांत रौ थमि जा, अर अतरोळ-बतरोळ थमि गै अर समुद्र शांत हवे गै।

⁴⁰तब यीशु ल चेलों तैं पूछि तुम किलै डरणा छा? क्य तुम तैं अभि तक विश्वास नि च?

⁴¹अर उ भौत डौर गैनी अर आपस मा बुल्ण लगि गैनी यु कन्दरो आदिम च जु कि अतरोळ-बतरोळ भि अर लहर भि वेको आज्ञा तैं मणदींनि।