Read Garhwali मरकुस 5 Bible Online

मरकुस 5 - Garhwali bible

मरकुस 5

¹तब यीशु अर वेका चेला झील का छाला पर गिरासेनियों का लुखुं का क्षेत्र मा पौंछिंनी।

²अर जब यीशु नाव बट्टी उतरी त दुष्टात्मा से पीड़ित एक आदिम जु कब्रों बट्टी निकली के वेमा ऐ।

³उ कब्रों मा रौंदु छो लोग वे तैं संगळु ल भि नि बंधि सकदा छा।

⁴किलैकि उ कई बार बेड़ियों ल अर संगळु ल बंधे गै छो, पर वेल संगळु तैं तोड़ी दींनि अर संगुळों का टुकड़ा-टुकड़ा कैरी दींनि अर कुई वे तैं अपड़ा वश मा नि कैरी सकदु छो।

⁵उ सदनी रात-दिन कब्रों अर डांडों मा चिलांदु अर अफ तैं ढुंगो ल नुकसान पौंछै के घायल कैरी दींदो छो।

⁶उ यीशु तैं दूर ही बट्टी देखि के अटगी अर वे तैं खुट्टों मा पोड़ि के आराधना कैरी।

⁷हे यीशु सर्वशक्तिमान परमेश्वर का नौंना तेरु मि बट्टी क्य काम? मि त्वे तैं परमेश्वर की सौं दींदु कि तु मि तैं पिड़ा नि दीलि

⁸किलैकि यीशु ल वे तैं देखि की बोलि, हे दुष्टात्मा यु आदिम बट्टी निकली जा।

⁹वेल वेमा पूछि तेरु नौं क्य च? वेल यीशु मा बोलि, मेरू नौं सेना च किलैकि हम बिजां छा।

¹⁰अर दुष्टात्माओं ल यीशु मा भौत बिनती कैरी कि हम तैं यु प्रदेश बट्टी भैर नि भेज।

¹¹उख पौड़ पर सुंगरु कु एक बड़ो झुण्ड चरणु छो।

¹²अर दुष्टात्माओं ल यीशु मा बिनती कैरी कै बोलि, कि हम तैं ऊं सुंगरु मा भेज दे कि हम ऊंका भितर जांवा।

¹³अर वेल ऊं तैं आज्ञा दींनि अर दुष्टात्मा निकली के भैर ऐ गै अर सुंगरु मा बैठी गै अर उ झुण्ड जु कुई द्वी हजार का लगभग रै होलो उ डांडा पर बट्टी झपटी के झील मा पड़ि गै अर डुबि के मोरि गै।

¹⁴अर ऊंका चरवाहों ल भागि के शहर मा ईं बात तैं सुंणै अर जु कुछ हवे छो लोग वे तैं दिखणु कु ऐनी।

¹⁵अर लोग यीशु का संमणी ऐ के वे आदिम तैं जै पर भौत सी दुष्टात्मा समायी छै वे तैं अच्छा कपड़ा पैरयुं अर सुद बुद मा बैठय्युं देखि के डौर गैनी अर सोच म पोड़ी गैनी।

¹⁶अर दिखण वलो ल वेको जै पर बिजां दुष्टात्मा लगिं छै अर सुंगरु कु पूरो हाल जु हवे छो ऊं तैं सुणै।

¹⁷अर उ लोग यीशु बट्टी बिनती कैरी कै बुल्ण लगि गैनी कि हमारा सरहद बट्टी भैर चलि जा।

¹⁸अर जब यीशु नाव पर जांणु कु बैठण लगि गै त, तब उ जै पर पैली बिजां दुष्टात्मा लगिं छै उ वेमा बिनती कन लगि गै कि मि तैं अफ दगड़ी आंण दे।

¹⁹पर यीशु ल वे तैं अफ दगड़ी रौंणे की अनुमति नि दींनि अर वेमा बोलि अपड़ा घौर जै के अपड़ा लुखुं तैं बथौ कि त्वे पर दया कैरी के प्रभु ल त्वे कु कन बड़ा काम करिनी।

²⁰तब उ आदिम दिकापुलिस जांको मतलब च दस शहरों का संमणी कु क्षेत्र मा ईं बात कु प्रचार कन लगि गै कि यीशु ल मि कु कन बड़ा काम करिनी अर सब अचम्भो करदां छा।

²¹“जब यीशु फिर नाव बट्टी पली छाला गै, त एक बड़ी भीड़ वेका संमणी कठ्ठा हवे गै छै अर यीशु गलील झील का छाला पर ही खड़ो छो।”

²²अर याईर नौं को एक आदिम जु यहूदियों का मिलणा का भवन का सरदार मा बट्टी एक छो यीशु मा ऐ के वेका खुट्टों मा पौड़ि गै।

²³अर वेल यु बोलि, के भौत बिनती कैरी कि मेरी छुटी नौंनि मुरण वली च तु ऐ के वीं तैं छू, कि व खूब हवे के ज्यूंदी रौ, अर मोरू न।

²⁴तब उ वे दगड़ी गै अर बड़ी भीड़ वेका पिछनै हवे गै इख तक कि लोग वे पर फरकेंदा छा।

²⁵अर भीड़ मा एक जनन छै जीं तैं बारह बरस बट्टी ल्वे बंगणो कु रोग छो[1]।[2]

²⁶अर वीं ल भौत वैधों बट्टी इलाज करवै पर दुःख ही उठै अर अपड़ी सब सम्पति खर्च कैरी कै भि कुई फैदा नि पै पर और भि बिमार हवे गै छै।

²⁷किलैकि व बुल्दी छै जु मि प्रभु यीशु कु चौला को किनारा तैं भि छवे दयुलु त खूब हवे जौलु।

²⁸जब वीं ल यीशु कि कामों की चर्चा सूंणि त व भीड़ का पिछनै बट्टी ऐ अर वेका चोला तैं छवे दींनि, किलैकि व बुल्दी छै कि जु मि मसीह का चौला तैं छवि भि दयुलु त खूब हवे जौलु।

²⁹अर तुरंत वीं को ल्वे बंगण बंद हवे गै अर वीं ल अपड़ा देह मा जांणि लींनि कि मि वीं बिमारी से खूब हवे ग्यों।

³⁰यीशु भीड़ मा पिछनै घूमी अर पूछि मेरा चौला तैं कै ल छवे? किलैकि वेल वे ही बगत अफ मा जांणि लींनि कि मि मा बट्टी सामर्थ निकली।

³¹यीशु का चेलों ल वेमा बोलि, “तु दिखणी छै कि भीड़ त्वे पर गिरदि पड़दि अर तु बुल्णी छै कि कै ल मि तैं छवे?”

³²तब यीशु ल चौतरफी देखि की जांणि साको की कै ल मि तैं छवे।

³³तब व जनन यु जांणि गै कि मि ठिक हवे ग्यों अर मि पर कन भलै हवे व डरदि अर कंपदि वेका संमणी ऐ अर वेका खुट्टों मा पड़िके वे तैं प्रणाम कैरी अर सैरो हाल सच-सच बतै दींनि की मिल ही त्वे तैं छवै छो।

³⁴यीशु ल वीं मा बोलि, “हे नौंनि तेरु भरोसो छो की मि त्वे तैं खूब कैर सकदु, इलै तु पूरा ढंग से खूब हवे गै इलै शान्ति से चलि जा अर अपड़ी ईं बिमारी से बचिं रौ।”

³⁵जब यीशु वीं बट्टी बात कनु ही छो त यहूदियों का मिलणा का भवन का सरदार का घौर बट्टी लुखुं न ऐ के बोलि, कि तेरी नौंनि त मोरि गै अब गुरु तैं परेशान नि कर।

³⁶जु बात उ बुल्णा छा वीं बात तैं यीशु ल अणसूंणि कैरी कै यहूदियों का मिलणा का भवन का सरदार मा बोलि, डैर न भस मि पर भरोसो रख।

³⁷तब यीशु ल पतरस अर याकूब अर वेका भैय यूहन्ना तैं ही अफ दगड़ी औंण दींनि

³⁸अर यहूदियों का मिलणा का भवन का सरदार का घौर मा पौंछि के वेल लुखुं तैं भौत रूंण अर चिल्लांण देखि।

³⁹तब यीशु ल कमरा का भितर जै के वेमा बोलि, तुम किलै हल्ला मचौंणा अर रूंणा छा? नौंनि मोरि नि च पर सींणी च।

⁴⁰यु सूंणि के लोग वेको ठट्टा कन लगि गैनी पर वेल सभियूं तैं भैर जांणु कु बोलि, नौंनि का ब्वे-बुबा तैं अर अपड़ा तीन चेलों तैं भितर ले के गै जख नौंनि पुड़ीं छै।

⁴¹अर नौंनि कु हथ पकड़ी के वीं मा बोलि तलीता कूमी ज्यांकु मतलब यु च कि हे नौंनि मि त्वे मा बुल्णु छौं उठ।

⁴²अर व नौंनि तुरंत उठि के चलण फिरण लगि गै अर व बारह बरस कि छै अर ईं बात पर लोग भौत भैचक मा पड़ी गैनी।

⁴³फिर यीशु ल ऊं तैं चितै के बोलि, कि ईं बात तैं कुई नि जंणन पौ अर वीं का ब्वे-बाबा मा बोलि, कि वीं तैं कुछ खांण कु दिये जौं।