Read Garhwali लूका 11 Bible Online

लूका 11 - Garhwali bible

लूका 11

¹यीशु कीं जगह मा परमेश्वर बट्टी प्रार्थना कनु छो, अर जब वेल परमेश्वर बट्टी प्रार्थना कैरेली छै त वेका चेलों मा बट्टी एक चेला ल वेमा बोलि, हे प्रभु जन यूहन्ना ल अपड़ा चेलों तैं परमेश्वर बट्टी प्रार्थना कन सिखै उन ही तू हम तैं भि सिखै दे।

²वेल ऊंमा बोलि, जब तुम परमेश्वर बट्टी प्रार्थना कैरा त बोला, हे हमारा बुबा तेरु नौं सब लुखुं मा पवित्र मणै जौं अर तेरु राज्य औ।

³हमारी दिन भरै कि रुट्टि आज हम तैं दे।

⁴अर हमारा पापों तैं माफ कैर किलैकि हम भि अपड़ा हरेक अपराधी तैं माफ करदां अर हम तैं शैतान द्वारा अजमैश मा नि लौ।

⁵अर यीशु ल ऊंमा बोलि, “तुम मा बट्टी कु च” वेको एक दगड़िया हो, अर उ अधा राती मा बोलि, “हे दगड़िया, मि तैं तीन रुट्टि उधार दे।

⁶किलैकि मेरू एक दगड़िया सफर मि मेरा यख अयुं च वे तैं खिलाणु कु मि मा कुछ नि च।

⁷अर उ भितर बट्टी जवाब द्यो कि मि तैं दुःख नि दे अब त द्वार भि बंद छिन अर मेरा नौंना मेरा संमणी चारपै मा छिन, इलै मि उठि के त्वे तैं नि दे सकदु?

⁸मि तुम मा बुल्णु छौं जु वेको दगड़िया हूंण पर भि वे तैं उठि के नि द्यो, तब भि अपड़ी शर्म छोड़ी के मंगणा का वजह से उ उठि के वेकी जरूरतों का अनुसार वे तैं जरूर दयाला।

⁹तुम तैं जु चयणु च वे तैं परमेश्वर बट्टी माँगा अर उ तुम तैं दयालो, खुज्येला त पैला, खटखटैल्या त तुम कु खुलै जालो।

¹⁰किलैकि जु कुई मंगदु च वे तैं मिल्द अर खुज्योंद च उ पौंदु च अर जु खटखटौंदु च वेकु खुलै जालो।

¹¹तुम मा बट्टी कुई भि आदिम, अपड़ा नौंना तैं रुट्टि मांग त, वे तैं ढुंगो नि द्यों यां जन कुई भि आदिम, अपड़ा नौंना तैं माछा मंगण पर वे तैं गुरो नि दींद।”

¹²या अंडा मांगा त उ वे तैं बिच्छी नि दींद

¹³जब तुम बुरा हवे के अपड़ा नौंना तैं भलि चीज दींण जंणदा छा, त तुमारो स्वर्गीय बुबा भौत जादा बढ़ि के ऊं तैं पवित्र आत्मा दींणु कु तैयार च जु वे बट्टी मंगदो च?

¹⁴यीशु ल एक गूंगि दुष्टात्मा तैं निकाली जब दुष्टात्मा निकली गै त गूंगो बुल्ण लगि गै अर लुखुं ल अचम्भो कैरी।

¹⁵पर ऊंमा बट्टी कुछ लुखुं ल बोलि, “यु त दुष्टात्माओं कु सरदार शैतान की मदद ल दुष्टात्माओं तैं निकलदु च।”

¹⁶औरों ल वेकी अजमैश कनु कु वे बट्टी स्वर्ग कु एक चमत्कार कु चिन्ह मांगि।

¹⁷यीशु ल ऊंका मन की बात जांणि के ऊंमा बोलि, जु कै राज्य मा क्लेश हूंद त तब उ उजड़ी जांदु अर कै शहर य परिवार मा जैं मा क्लेश हूंद उ बणयुं नि रौंदु।

¹⁸अर जु शैतान अपड़ो ही विरोधी हवे के अफ मा फूट डालो त तब उ कनके बणयुं रै सकदु? किलैकि तुम मेरा बारा मा त बुल्दा छा की यु शैतान की मदद से दुष्टात्मा तैं निकलदु च।

¹⁹ठिक च जु मि शैतान कि मदद से दुष्टात्माओं तैं निकलदु छौं त तुमारी सन्तान कैकी मदद से निकलदी इलै उ ही तुमारो न्याय चुकाला।

²⁰पर जु मि परमेश्वर कि आत्मा की मदद से दुष्टात्माओं तैं निकलदु त फिर परमेश्वर कु राज्य तुमारा बीच मा ऐ गै।

²¹क्य कुई आदिम कै बलिष्ठ का घौर मा घुसि के वेकी सम्पति लूछि सकदु च, जब तक कि उ पैली वे बलिष्ठ तैं बांधि नि ल्यो।

²²पर जब वे बट्टी भि जादा कुई और बलिष्ट चड़ै कैरी कै वे तैं जीति लींदु त वेका उ हथियार जौं पर वेको भरोसो छो लूछि दींदु अर वेकी सम्पति लूटि के बांटि दींदु।

²³जु मि दगड़ी नीच उ मेरा विरोध मा च, अर जु मि दगड़ी नि बटोरदु उ छिलारदु च।

²⁴जब दुष्टात्मा कै मनिख बट्टी निकली जांदी त व सुखीं जगह मा विश्राम ढुंडदि फिरदी, अर आराम नि पांदी, तब व अपड़ा आप मा बुल्दी, मि जै मनिख बट्टी अयुं छो, ऊखी वापिस लौटि जौलु।

²⁵अर जब उ औंदु, वे आदिम का जीवन तैं वे घौर का जन पांद, जु झड़युं-सौंप्युं अर सज्युं पांदी।

²⁶तब दुष्टात्मा जै के अफ बट्टी सात बुरी दुष्टात्मा तैं अफ दगड़ी लौंद अर उ वेमा मनिख मा घुस कर वास करदी, वे मनिख की पिछली दशा पैली दशा से भि बुरी हवे जांद।

²⁷जब यीशु यूं बातें तैं बुल्णु ही छो, त भीड़ मा बट्टी कीं जनन ल ऊंची आवाज मा बोलि, “धन्य च उ जनन जैल त्वे तैं जन्म दे अर त्वे तैं दूध पीलै।”

²⁸वेल बोलि, हां पर धन्य छिन उ जु परमेश्वर का वचन तैं सुणदींनि अर मणदींनि।

²⁹जब भीड़ कट्ठा हूंदी जांणि छै त यीशु बुल्ण लगि गै कि, “यु बगत का बुरा लोग चमत्कार का चिन्ह ढुंडदिनि पर योना परमेश्वर का तरपां बट्टी बुल्ण वला का दगड़ा जु हवे वे चिन्ह तैं छोड़ी के कुई और चिन्ह ऊं तैं नि दिये जालो।

³⁰जन योना नीनवे का लुखुं कु चिन्ह ठैरी उन ही मि मनिख कु नौंनो भि ये युग का लुखुं कु चिन्ह ठैरुलो।

³¹दक्षिण देश की राणी न्याय का दिन यु बगत का लुखुं तैं भंगारी ठैरालि किलैकि व राजा सुलैमान का ज्ञान तैं सुनणु कु धरती का एक छोड़ बट्टी ऐ अर देखा इख उ च जु राजा सुलैमान से भि बड़ो च।[65]

³²नीनवे का लुखुं का न्याय का दिन यु बगत का लुखुं दगड़ी खड़ा हवे के ऊं तैं भंगारी ठैराला किलैकि ऊंल त योना कु प्रचार सूंणि के मन फिरै अर देखा इख उ च जु योना से भि बड़ो च।[66]

³³कुई दिवडा बालि के भांडा उन्द नि ढकन्डो अर न खाटि का तौला रखदु पर ब्यांरा पर रखदु इलै की भितर औंण जांणवला उज्यलो पौनु।

³⁴आंखा देह कु दिवडा का जन च इलै जु तेरा आंखा खूब छिनी त तेरी सैरी देह भि उज्यलो होली पर जब उ बुरी छिन त तेरु देह भि अंधेरो च।

³⁵इलै सचेत रौ कि जु उज्यलो त्वे मा च उ अंधेरो नि हवे जौ।

³⁶इलै जु तेरु सैरो देह उजलो हो अर वेकु कुई हिस्सा अंधेरो नि रौ त सभि इन उजलो होलो जन वे बगत हूंद जब दिवडा अपड़ी चमक से त्वे तैं उज्यलो दींदु।

³⁷जब मसीह यीशु ल अपड़ो उपदेश तैं खत्म कैरी येलि छों, त कै फरीसी ल वे बट्टी बिनती कैरी कि मेरा इख खांणु खा अर उ भितर जै के खांणु खांण कु बैठी।

³⁸फरीसियों तैं यु देखि के अचम्भो हवे कि उ खांणु खांण से पैली बगैर हथ धुयां अर अशुद्ध हथ रुट्टि खंदींनि।

³⁹फरीसियों हाय च तुम पर तुम इन भांडा छा जु भैर बट्टी त साफ पर तुमारा मन का भितर बट्टी अंधेर अर दुष्टता भुरीं च।

⁴⁰हे निर्बुद्धियों, जैल भैरो कु हिस्सा बणै, क्य वेल भितरो कु हिस्सा नि बणै?

⁴¹अर गरीबों तैं दान दे कै भितर मन बट्टी साफ हवे जावा अर तुम पूरी रीति बट्टी पवित्र हवे जावा।

⁴²पर हे फरीसियों हाय च तुम पर तुम पुदीना अर सूदाबो को अर सब किस्मै का साग-पातों को दसवां अंश दींदां पर न्याय तैं अर परमेश्वर का प्रेम तैं टालि दींदयां।[67]

⁴³हे फरीसियों हाय च तुम पर तुम यहूदियों का मिलणा का भवन मा मुख्य आसण बाजारों मा सम्मान का दगड़ी प्रणाम चदयां।

⁴⁴हाय च तुम पर किलैकि तुम छिपी कब्रों का समान छा जौं पर लोग चलदा छिन पर नि जणदींनि की कख जांणा छिनी।

⁴⁵तब एक मूसा की व्यवस्था तैं सिखांण वला ल वे तैं जवाब दींनि कि हे गुरु यूं बातों का बुल्ण से तु हमारी बुरै कनि छै।

⁴⁶ऊंल बोलि, हे मूसा की व्यवस्था तैं सिखांण वलो हाय च तुम पर भि तुम इन बोझ जौं तैं उठौण कठिन च मनिख्युं पर लादी दींदां पर तुम अफ ऊं बोझ तैं अपड़ी अंगुली भि नि सरकौंण चांदा।

⁴⁷तुम पर हाय च तुम ऊं परमेश्वर का तरपां बट्टी बुल्ण वलो कि कब्र बंणौदां छा जौं तैं तुमारा बाप-दादों ल मारि डाली छो।

⁴⁸इलै तुम अपड़ा पूर्वजों का कामों की गव्है दींदां छा, अर ऊं कामों बट्टी सहमत भि छा, किलैकि ऊंल ऊं तैं मार डाली अर तुम ऊंकी कब्रों तैं बंणौदा छा।

⁴⁹इलै परमेश्वर कि बुद्धि ल भि बोलि, कि मि ऊंमा परमेश्वर का तरपां बट्टी बुल्ण वलो अर प्रेरितों तैं भिजलु अर तुम ऊंमा बट्टी कुछ तैं मारि डलिल्या अर कथगु तैं दुःख दीला।

⁵⁰इलै की जथग परमेश्वर का तरपां बट्टी बुल्ण वलो को ल्वे दुनिया कि उत्पति बट्टी बुगै गै सभियूं कु लेखा ये युग का लुखुं बट्टी लिये जालो।

⁵¹हाबिल कि हत्या का ल्वे से ले के जकर्याह परमेश्वर का तरपां बट्टी बुल्ण वला कि हत्या तक जु बेदि अर यरूशलेम शहर का मन्दिर का बीच मा घात किये गैनी मि तुम मा सच बुल्णु छौं ऊंकु लेखा ये ही बगत का लुखुं बट्टी लिये जालो।[68]

⁵²हाय च तुम मूसा की व्यवस्था तैं सिखांण वलो पर, तुम लुखुं तैं स्वर्ग का राज्य मा प्रवेश कन से रुकदा छा, न त अफ तैं वे द्वार बट्टी भितर जंदा अर वां बट्टी भितर जांण वलो तैं भि भितर नि जांण दींदां।

⁵³जब उ उख बट्टी निकलनी त मूसा की व्यवस्था तैं सिखांण वलो अर फरीसी वेका भौत पिछनै पड़ि गैनी अर छिडण लगि गैनी कि उ भौत सी बातों कि चर्चा कैरा।

⁵⁴अर वेकी घात मा लगयां रैनी कि वेका गिच्चा कि कुई बात पकड़नु।