Read Garhwali लूका 17 Bible Online

लूका 17 - Garhwali bible

लूका 17

¹फिर वेल अपड़ा चेलों मा बोलि, यु बात पक्की च अजमैश मनिख्युं मा जरुर आली जु ऊंको पाप का कारण बंणलि पर हाय वे मनिख पर जैका कारण उ आली।

²जु कुई यूं छुटों मा बट्टी जु मि पर विश्वास करदींनि ऊं तैं उतेडो लगौ त वेको त यु भलो च कि उ अपड़ा गौळा मा जंदरा को पाट लटकाये जौं अर उ समुद्र मा डाले जौं।

³सावधान रावा की तु क्य कनि छैं जु तेरा विश्वासी भैय ल अपराध कैर त वे तैं डांट अर जु उ पछतौ त वे तैं माफ कैर।

⁴जु दिन भर मा उ सात बार भि अपराध अर सातों बार त्वे मा फिर ऐ के बोलु कै पछतांणु च त वे तैं माफ कैर।

⁵तब प्रेरितों ल प्रभु यीशु मा बोलि हमारो विश्वास तैं और मजबूत कैर

⁶मि तुम मा सच-सच बुल्णु छौं जु कुई यु डांडा कु बुललो तु उखड़ि जा अर समुद्र मा पोड़ि जा अर अपड़ा मन मा शंका नि कैर बल्कि भरोसो कैर कि जु बुल्णु छौं उ हवे जालो त वेको उन ही हवे जालो।

⁷जु तुमारा नौकर पुंगडा मा हौल लगै के या ढिबरों की देख रेख कैरी के घौर ऐ त क्य तुम बुल्या, तुरंत औ अर खांणु खांण बैठ?

⁸न बल्कि उ बुलालो कि “मेरू खांणु बणौ अर जब तक मि खौलु प्यूलु तब तक मेरी सेवा कनु कु तैयार हवे जा।”

⁹क्य उ वे नौकर को एहसान मानलु कि वेल उ ही काम करिनी ज्यां कि वे तैं आज्ञा दीं छै?

¹⁰वे रीति से जब तुम ल उ सब कुछ कैरी याली जु तुम तैं कनु कु बुलै गै छो त तुम तैं यु बुल्ण चयणु च, हम निकम्मा दास छा की जु हम तैं कन चयणु च उ ही करयूं च।

¹¹जब यीशु अर वेका चेला यरूशलेम शहर की तरपां जांण वला रस्ता पर जांणा छा सामरिया प्रान्त अर गलील जिला का सीमा मा हवे के जांणु छो।

¹²कै गौं मा जांदी बगत ऊं तैं दस कोढ़ी मिलिनि।[85]

¹³ऊंल दूर खड़ो हवे के धै लगै के बोलि, “हे यीशु हे स्वामि हम पर दया कैरा”

¹⁴यीशु ल ऊं तैं देखि के बोलि, “जावा अर अफ तैं यहूदी याजक तैं दिखावा की तुम खूब हवे गै छा, अर उ जांदु ही खूब हवे गैनी।[86]”

¹⁵तब ऊंमा बट्टी एक ल देखि कि मि खूब हवे गौं जोर से चिल्लै कै परमेश्वर कि बढ़ै कैरी के यीशु मा वापिस ऐ

¹⁶अर यीशु का खुट्टों मा पोड़ि के धन्यवाद कन लगि गै अर यु आदिम सामरी जाति कु छो।

¹⁷यां पर यीशु ल बोलि, “क्य दसों आदिम खूब नि हवे छा त फिर उ नौं कख गैनी?”

¹⁸क्य यु गैर यहूदी तैं छोड़ी के और कुई नि निकली जु परमेश्वर की बढ़ै करदो?

¹⁹तब यीशु ल वेकु बोलि, “उठि के चलि जा किलैकि तिल विश्वास कैरी इलै तु बचै गै।”

²⁰जब फरीसियों ल वेमा पूछि, कि परमेश्वर का राज्य ल कब आंण अर वेको क्य चिन्ह च त वेल ऊं तैं जवाब दे “परमेश्वर को राज्य दिख्योंदु नि च।”

²¹अर लोग इन नि बुलला “देखा इख च या उख च। किलैकि देखा परमेश्वर कु राज्य तुमारा बीच मा च।”

²²फिर वेल चेलों कु बोलि, “उ दिन आला जौं मा तुम मि मनिख का नौंनो का दिनों मा बट्टी एक दिन तैं दिखण चैल्या अर नि देखि सकिल्या।”

²³लोग तुम मा बुलला “देखा मसीह उख च! देखा इख च! पर तुम चलि जयां अर ऊंकु पीछा नि करयां।”

²⁴किलैकि जन बिजली आसमान मा पूरब बट्टी पश्चिम तक चमकदी उन ही मि मनिख कु नौंनो कु औंण भि होलो।

²⁵पर पैली जरूरी च कि भौत जादा दुख उठै, अर ईं पीढ़ी का लोग वे तैं तुच्छ ठैराला।

²⁶जन पूर्वज नूह का दिन मा छा उन ही मि मनिख कु नौंनो को औंण भि होलो।[87]

²⁷जै दिन तक कि नूह जहाज पर नि चैड़ि छो वे दिन तक लोग खांदा पींदा छा अर ऊंमा ब्यो-पग्नि हूंदी छा तब जल प्रलै ल ऐ के ऊं सभियूं तैं नाश कैरी दींनि।

²⁸अर उ जन हमारा पूर्वज लूत, जु सदोम शहर मा रौंदु छो कि लोग खांदा पींदा लेन देन करदां डाला लगांदा अर घौर बणांदा छा

²⁹पर जै दिन लूत सदोम बट्टी निकली वे दिन स्वर्ग बट्टी आग अर गंधक बरसि अर सब लोग जु शहर मा छा नाश कैरी दींनि।[88]

³⁰अर वे दिन भि यु जन होलो जब मि मनिख कु नौंनो को अचानक से दुबारा वापिस आलो।

³¹जु छत पर हूंनु उ अपड़ा घौर बट्टी कुछ समान लींणु कु मूड़ी घौर का भितर नि उतरुनु, अर जु पुंगड़ा मा हो उ अपड़ा कपड़ा लींणु कु घौर कु पिछनै नि लौटु।

³²हमारा पूर्वज लूत कि जनन तैं याद कैरा की वेकी जनन दगड़ी की हवे छो [89]

³³किलैकि जु कुई अपड़ो जीवन बचौण चौ उ वे तैं गवांलू पर जु कुई मेरा बाना अर शुभ सन्देश का बाना अपड़ा आत्मा तैं गवांलू उ अनन्त जीवन तैं पालो।

³⁴मि तुम मा बुल्णु छौं वीं राती द्वी मनिख एक खाटि मा होला ऊंमा बट्टी एक लिये जालो अर हैंको छुड़े जालो।

³⁵द्वी जनन जंदरु पिसंणि राली ऊंमा बट्टी एक लिये जालि अर हैंकी छुड़े जालि।

³⁶द्वी आदिम पुंगड़ा मा होला त एक लिये जालो अर हैंको छोड़े जालो।

³⁷यु सूंणि कै ऊंल वेमा पूछि, “हे प्रभु यु कख हूंण? वेल ऊंमा बोलि, सभि तैं पता चलि जालि की इन कख हूंणु जन कि सभि तैं पता च जख शव हूंदु, उखि गरुड़ कठ्ठा हवाला।”[90]