Read Garhwali लूका 2 Bible Online

लूका 2 - Garhwali bible

लूका 2

¹ऊं दिनों मा रोमी सम्राट औगुस्‍तुस कैसर ल अपड़ा सारा साम्राज्‍य की जनगणना की राजाज्ञा निकली, की सारा रोमी साम्राज्‍य का सभि लुखुं का नौं लिखै जौं।

²या पैली नौं लिखवाई वीं बगत हवे जब क्विरिनियुस सीरिया प्रान्त को राज्यपाल छो।

³अर सब लोग अपड़ा नौं लिखौंणु कु अपड़ा पूर्वजों का नगरों कु गैनी।

⁴अर यूसुफ भि इलै की उ राजा दाऊद का वंशज छो अर गलील जिला का नासरत नगर बट्टी यहूदिया प्रान्त मा राजा दाऊद का नगर बैतलहम शहर कु गै।

⁵कि अपड़ी गर्भवती मंगेतर मरियम का दगड़ी नौं लिखाणु कु गै।

⁶जब उ बैतलहम मा छा तब वीं का प्रसव का दिन पूरा हवेनि।

⁷अर वीं ल अपड़ा पैला नौंना तैं जन्म दींनि अर वे तैं कपड़ा मा लपेटी के चौंरि मा रखि किलैकि वेकु धर्मशाला मा जगह नि छै।

⁸अर वे देश मा कुछ बखरौल छा जु राती तपड़ मा रै की अपड़ा झुण्ड की रखवलि करदां छा।

⁹अर प्रभु को एक स्वर्गदूत ऊंका संमणी खड़ो हवे अर प्रभु को महिमा को उज्ज्वल ऊंका चौतरफी चमकी अर तब उ भौत डैरी गैनी।

¹⁰तब स्वर्गदूत ल ऊंमा बोलि डैरा न किलैकि देखा मि तुम तैं बड़ो आनन्द कु शुभ सन्देश प्रचार सुणौंणु छौं जु सब लुखुं कु होलो

¹¹कि आज बैतलहम शहर मा जु राजा दाऊद कु शहर च तुम कु एक उद्धारकर्ता जन्मीयूं च अर उ ही मसीह प्रभु च।

¹²अर ये चिन्ह से तुम तैं पता चलि जालो की उ नौंनो कु च कि तुम एक नौंना तैं कपड़ा मा लिपटयुं अर चौंरि मा पोड़य्युं पैल्या।

¹³तब एक-एक कैरी के वे स्वर्गदूत दगड़ी स्वर्गदूतों कु दल परमेश्वर की बड़ै करदी अर इन बुल्ण दिखेगे

¹⁴सबसे ऊंचो, “स्वर्ग मा परमेश्वर की बड़ै अर धरती मा ऊं मनिख्युं मा जौं बट्टी उ खुश च शान्ति हो।”

¹⁵जब स्वर्गदूत ऊंका संमणी बट्टी स्वर्ग कु चलि गैनी त गडरियों ल आपस मा बोलि, चला हम बैतलहम गाैं जै के यु शुभ संदेश प्रचार ज्वा हुईं च अर जै तैं प्रभु ल हम तैं बतै देखि।

¹⁶अर ऊंल तुरंत जै के मरियम अर यूसुफ तैं अर नौंना तैं पोड़य्युं देखि।

¹⁷यूं देखि के ऊंल व बात ज्वा यु नौंना का बारा मा ऊंमा बुलै छै प्रगट कैरी।

¹⁸अर उ सभि जौं ल उ सूंणि के जु बखरौल ल ऊंमा बोलि उ भैंचक्क मा पड़ि गैनी।

¹⁹पर मरियम यूं सब बातों तैं अपड़ा मन मा रखि के सुचणी रै।

²⁰अर बखरौल जन स्वर्गदूतों ल ऊंमा बोलि छो उन ही सब सूंणि के अर देखि के परमेश्वर की बड़ै कैरी कै वापिस चलि गैनी।

²¹नौंना यीशु का जन्म का बाद आठ दिन पूरा हवेनि अर वे नौंना को खतना कु बगत ऐ त वेको नौं यीशु रखे गै जु स्वर्गदूत ल वेका औंण से पैली बोलि छो।

²²अर जब मूसा द्वारा लिखीं परमेश्वर की व्यवस्था का अनुसार वेका शुद्ध हूंणा का दिन पूरा हवेनि त तब यूसुफ और मरियम यरूशलेम शहर मा ली गैनी कि वे तैं परमेश्वर का संमणी लौनु।

²³जन कि मूसा द्वारा लिखीं परमेश्वर की व्यवस्था मा लिख्युं च कि हर एक पहिलौठो प्रभु कु पवित्र ठैरुलो।

²⁴अर मूसा द्वारा लिखीं परमेश्वर की व्यवस्था का अनुसार कबूतर का द्वी बच्चा लै कर बलिदान कैरा।

²⁵वे बगत यरूशलेम शहर मा शमौन नौं को एक आदिम छो अर उ आदिम धर्मी अर भक्त छो अर इस्राएल का लुखुं तैं शान्ति कि बाट जुगल्णु छो अर पवित्र आत्मा वेका दगड़ी छो।

²⁶पवित्र आत्मा ल वे तैं बतै कि जब तक तु प्रभु का मसीह तैं दिखण से पैली नि मुरलि।

²⁷अर वे दिन पवित्र आत्मा का द्वारा वेकी अगुवाई हवे अर उ परमेश्वर बट्टी यरूशलेम शहर का मन्दिर मा ऐ अर जब यूसुफ अर मरियम वे नौंना यीशु तैं भितर लैंनि कि वेकु मूसा द्वारा लिखीं परमेश्वर की व्यवस्था कि रीति का अनुसार भेंट चढ़ौणु।

²⁸त वेल नौंना तैं यीशु की खुचल्या मा पकड़ी के परमेश्वर कु धन्यवाद कैरी कै बोलि,

²⁹“हे प्रभु अब तु मि तैं अपड़ा सेवक तैं अपड़ा वचन का अनुसार शान्ति से विदा कैरी दे।

³⁰मिल वे उद्धारकर्ता तैं देखेलि जै तैं तिल सभि लुखुं तैं बचांणु कु भेजि, कु च।

³¹जै तैं तिल सब देशों का लुखुं का संमणी तैयार कैरी।

³²उ अन्यजातियों पर परमेश्वर तैं प्रकट कन वलो उज्यला च अर इस्राएल का लुखुं का घराना कु प्रताप हूंनु।”

³³अर यीशु का ब्वे बुबा यूं बातों से वेका बारा मा शमौन ल बुलै के हकदक हवे गै छो।

³⁴तब शमौन ल ऊं तैं आशीष दे के वेकी ब्वे मरियम मा बोलि, “उ त इस्राएल का लुखुं का घराना मा भौत लुखुं का विनाश अर उद्धार अर उ परमेश्वर की तरपां से एक चिन्ह का रूप मा भि जै गै छो, इलै भौत लोग वेको विरोध करला जैका विरोध मा बात किये जाली।”

³⁵एक भयंकर दुःख, एक तलवार की ढंग वरन तेरा प्राण पर तलवार कि चोट पुड़ेली।

³⁶आशेर का गोत्र मा बट्टी हन्नाह नौं कि फ्नुएले की नौंनि एक परमेश्वर का तरपां बट्टी बुल्ण वली छै व भौत दानि छै अर ब्यो हूंणा का बाद सात बरस तक अपड़ा स्वामि दगड़ी रै सैकी।

³⁷व चौरासी बरसों बट्टी विधवा छै अर यरूशलेम शहर का मन्दिर तैं कभि नि छोड़िदि छै पर आराधना अर परमेश्वर बट्टी प्रार्थना कैरी कै रात दिन आराधना करदी छै।

³⁸अर व वे बगत पर उख ऐ के परमेश्वर कु धन्यवाद कन लगि गै अर ऊं सभियूं से जु यरूशलेम शहर का लुखुं तैं छुटकारा का मसीह तैं भिजणु कु परमेश्वर की जुगाल कन लगि गै।

³⁹अर जब यूसुफ अर मरियम मूसा द्वारा लिखीं परमेश्वर की व्यवस्था का अनुसार सब कुछ पूरो कैरेली छो त फिर गलील जिला का अपड़ा नासरत नगर कु चलि गैनी।

⁴⁰अर उ नौंनो बढ़दी अर मजबूत अर बुद्धि से परिपूण हूंणु रै अर परमेश्वर कि दया वे पर छै।

⁴¹यीशु का ब्वे-बुबा हर साल फसह कु त्यौहार मा यरूशलेम शहर जांदा छा।

⁴²जब उ बारह बरस कु हवे त तब उ वे तैं त्योहार कि रीति का अनुसार यरूशलेम शहर कु गैनी।

⁴³अर जब यीशु का ब्वे-बुबा ऊं दिनों तैं पूरा कैरी कि आंण लगि गैनी त फिर उ नौंनो यीशु यरूशलेम शहर मा ही रै गै अर यु वेका ब्वे-बुबा नि जंणदा छा।

⁴⁴उ इन समझिके कि उ और यात्रियों का दगड़ा मा होलो त तब उ एक दिन को पड़ाव पूरो कैरी कि निकली गैनी अर वे तैं अपड़ा कुटुम्बियों अर जांण पैछाण वलो का इख खुज्योंण लगि गैनी।

⁴⁵पर जब नि मिली त खुज्योंद-खुज्योंद यरूशलेम शहर कु फिर वापिस लौटि गैनी।

⁴⁶अर तीन दिन का बाद ऊंल वे तैं यरूशलेम शहर का मन्दिर का चौक मा उपदेशकों का बीच मा बैठयूं अर ऊंकी सुणद अर ऊं बट्टी सवाल करद पै।

⁴⁷अर जथग वेकी सुनणा छा उ सब वेकी समझ अर वेका उत्तरों से हकदक रै गैनी।

⁴⁸तब वेका ब्वे-बुबा वे तैं देखि के हकदक हवे गैनी अर वेकी ब्वे ल वेमा बोलि, “हे नौंना तिल हम दगड़ी इन किलै कैरी? देख तेरु बुबा अर मि परेशान हवे के त्वे तैं खुज्योंणा छा।”

⁴⁹यीशु ल ऊंमा बोलि, “तुम मि तैं किलै खुज्योंणा छा? क्य नि जंणदा कि मि तैं अपड़ा बुबा का भवन मा रांण जरूरी च।”

⁵⁰पर जु बात वेल ऊंमा बोलि, ऊं बातों कु मतलब ऊं नि समझी सकिनि।

⁵¹तब उ, ऊं दगड़ी नासरत नगर लौटि के ऐ गै अर ऊंका भस मा रै अर वेकी ब्वे ल यु सब बात अपड़ा मन मा रखिनि।

⁵²अर यीशु बुद्धि अर डील-डौल मा अर परमेश्वर अर मनिख्युं का कृपा मा बढ़दी गै।