Read Garhwali लूका 21 Bible Online

लूका 21 - Garhwali bible

लूका 21

¹फिर वेल नजर उठै के सेठ शौकरों तैं अपड़ा-अपड़ा पैसों तैं दान भंडार मा डल्द देखि।

²अर यीशु ल एक कंगाल विधवा तैं द्वी तांबा का सिक्का डल्द देखि, जुंकि कीमत भौत कम छै।

³त यीशु ल बोलि, “मि तुम मा सच बुल्णु छौं कि ई कंगाल विधवा ल सबसे जादा अर बड़ी के डाली।”

⁴किलैकि सभि लोग जु धनवान छा, अपड़ा धन कि बढ़ती मा बट्टी कम डाली पर वीं ल अपड़ी घटति मा बट्टी जु कुछ वीं मा जींणु कु छो, उ सब वीं ल डाली दींनि।

⁵जब कुछ लोग यरूशलेम शहर का मन्दिर का बारा मा बात कना छा कि उ कथग सुन्दर ढुंगों बट्टी अर भेंट कि चीजों ल सजायूं च

⁶यीशु ल ऊंकु बोलि, उ दिन आला जब यु सब कुछ जु तुम दिखणा छा ऊंमा बट्टी कै भि ढुंगा मा ढुंगो नि रौंण जु ढोळे नि जालो।

⁷ऊंल यीशु तैं पूछि, “हम तैं बतौ कि यूं बातों ल कब हूंण? अर जब यु बात पूरी हूंण वली हवेलि वेको क्य चिन्ह होलो?”

⁸यीशु ल ऊं तैं जवाब दींनि, “सचेत रावा कुई तुम तैं भरमै नि साको” भौत सा लोग मेरा नौं बट्टी ऐ के बुलला, “मि मसीह छो” अर बगत भि नजीक च, अर भौत तैं विश्वास बट्टी भरमै दयाला।[103]

⁹जब तुम लड़ै अर लड़ैयूं कि चर्चा सुणल्या त घबरैयां न किलैकि यूं बातों कु हूंण जरूरी च पर वे बगत तुरंत अंत नि होलो।

¹⁰किलैकि एक जाति हैंकी जाति पर अर एक राज्य हैंका राज्य पर राज्य कनु कु चड़ै करलो।[104]

¹¹अर जब जगह-जगह पर अकाल पोड़लो अर भ्यूंचोळ होला अर महामारी आली अर स्वर्ग मा भयंकर बात अर बड़ा-बड़ा चिन्ह प्रगट होला।

¹²पर यूं बातों से पैली उ तुम तैं मेरा नौं कि खातिर पकड़ला, अर सताला, अर अधिकारियों मा सौंपे जाला, अर जेल मा डलवाला अर यहूदियों का मिलणा का भवन मा राज्यपालों का अर राजाओं का संमणी तुम्हरी अजमैश करे जाली।

¹³पर यु तुम कु गव्है दींण कु मौका हो।

¹⁴इलै अपड़ा-अपड़ा मन मा ठाणि कै रख्यां, तुम फिकर नि करयां कि हम ल क्य बुल्ण।

¹⁵किलैकि मि तुम तैं इना बोल, अर बुद्धि दयुलु, कि तुमारा विरोधी सामना खंडन नि कैरी सकला।

¹⁶तुमारा ब्वे-बुबा अर भैय कुटुम्दारी वला अर दगड़िया भि तुम तैं पकड़वाला इख तक कि तुम मा बट्टी कथगों तैं मरवै भि दयाला।

¹⁷अर मेरा चेला हूंणा का खातिर सभि लुखुं ल तुम बट्टी दुश्मनी करला।

¹⁸पर तुमारा मुंड कु एक बाल भि बांको नि होलो।[105]

¹⁹पर तुम अपड़ा धीरज ल, अपड़ा आत्मा तैं बचै कै रखिल्या।

²⁰जब तुम यरूशलेम शहर तैं सैनिकों ल घिरयूं देखि ल्या त जांणि लियां कि वेको उजड़ण नजीक च।

²¹तब जु यहूदिया प्रान्त मा हो, उ डांडों मा भाजि जालो अर जु यरूशलेम शहर मा हो, उ भैर निकली जौ, अर जु गौं मा हो उ वे शहर मा नि जौं।

²²किलैकि यु बदला लींणु को इन दिन होला, जु पवित्र शास्त्र लिखीं सभि बात पूरी हवे जालि।[106]

²³ऊं दिनों मा जननों कु भौत भयानक बगत होलि, जु दुबस्ता अर जु बच्चों तैं दूध पिलांदि होलि, ऊंकु दुखों कु बगत होलि, किलैकि वे बगत देश मा भयानक संकट होलि, अर यूं लुखुं मा भौत मुसिबत ऐ जाली।

²⁴ऊंल तलवार कु निवलो हवे जांण अर सभि देशों का लुखुं मा गिरफ्तार हवे के पौंछैंये जाला अर जब तक अन्य-जातियों कु बगत पूरो नि होलो तब तक यरूशलेम शहर अन्यजाति ल रौंदे जालो।[107]

²⁵सूरज अर चांद, अर गैणों मा चिन्ह दिखेला अर धरती म देश-देश अर जाति-जाति का लुखुं कु संकट होलो किलैकि उ समुद्र का घमकण अर बौछट्यूं का स्यूंसाटन घबरै जाला।[108]

²⁶डैर का कारण अईं दुनिया पर आंण वली बातों कि जुगाल करद-करद लुखुं का ज्यू मा ज्यू नि रांण अर आसमान कि सैरी शक्ति अर चिन्ह हिलैये जाला।[109]

²⁷तब उ मि मनिख कु नौंनो तैं सामर्थ अर महिमा का दगड़ा बादलों पर औंण दिखला।[110]

²⁸जब यु बात हूंण लगेलि त सीधु हवे कै अपड़ो मुंड उब उठैयां किलैकि तुमारो छुटकारो नजीक च।

²⁹तब वेल ऊंमा एक मिसाल भि दींनि बेडु का डाला अर सभि डालो तैं देखा।

³⁰जनि ऊं पर कुटमणा निकलदींनि त तुम जांणि जणदां कि गर्मी कु मौसम आंण वलो ऐ गैनी।

³¹इन ही कै जब तुम यूं बातों हूंण दिखल्या त जांणि लियां कि परमेश्वर कु राज्य नजीक च।

³²मि तुम मा सच बुल्णु छौं जब तक यु सभि बात नि हवेलि तब तक ई पीड़ि कु अंत नि हूंण।

³³आसमान अर धरती टळि जालि पर मेरी बोलि बातों ल कभि भि नि टळण।

³⁴इलै सचेत रावा इन नि हो कि तुमारा मन खुमारि अर मतवला पन अर यु जीवन कि चिन्ता फिकर सुस्त हवे जौनु अर उ दिन तुम पर फंदा कि तरौं अचाणचक ऐ जौं।

³⁵किलैकि उ सैरी धरती का सभि रांण वलो पर इन कै ही आलो।[111]

³⁶इलै बिज्यां रावा अर हर बगत परमेश्वर बट्टी प्रार्थना कना रावा कि तुम यूं आंण वली बातों, घटनाओं मा बट्टी बचणु कु तागत पांदा, अर मि मनिख कु नौंनो का संमणी खड़ो हूंण लैख बंणि जैला।

³⁷उ दिन मा यरूशलेम शहर का मन्दिर मा उपदेश दींण रै अर राती कु भैर जैतून डाला का डांडा पर रौंदु छो।

³⁸अर सुबेर मा सभि लोग वेकी सुनांणु कु यरूशलेम शहर का मन्दिर मा वेमा आंदा छा।