Read Garhwali लूका 24 Bible Online

लूका 24 - Garhwali bible

लूका 24

¹यहूदियों का विश्राम का दिन जु परमेश्वर कु पवित्र दिन च सुबेर लै के जब उज्यलो हूंणु छो ऊं खुशबूदार तेल मोल लींनि अर यहूदियों की रीति का अनुसार ऐ के यीशु कि लांश पर मळी।

²अर जब उ उख फूंजी, तब ऊंल देखि कि कब्र का द्वार बट्टी भौत बड़ो ढुंगो जु पैली ही हटियूं छों।

³पर जब उ कब्र पर पौछिनी अर भितर जै कै देखि त प्रभु यीशु की लांश नि पैई।

⁴जब उ इन बात बट्टी भौचक्‍की हूंणा छा त देखा, द्वी आदिम सफेद कपड़ा पैरियां खड़ा छा।

⁵जब उ डौर गैनी अर धरती कि तरपां मुक झुकै कै खड़ी रैनी त ऊंल ऊंकु बोलि, “तुम ज्यूँदो तैं मुर्दों मा किलै खुज्योंण छा?”

⁶उ इख नि च, उ मुर्दों मा बट्टी ज्यूँदो हवे गै, याद कैरा जब उ तुम दगड़ी गलील जिला मा रौंणा का बगत, वेल तुम मा बोलि छो।

⁷जरूरी च, कि मि मनिख कु नौंनो पापी लुखुं का हथ मा पकड़वे जौं अर सूली पर चड़ैये जौं अर तिसरा दिन ज्यूँदो हवे जौं।

⁸तब यीशु की बात ऊं जननयों तैं याद ऐनी

⁹अर कब्र बट्टी लौटि कै ऊंल ग्यारहों अर हौरि सभियूं तैं यु बात बतै।

¹⁰जौंन बारह प्रेरितों तैं यु बात बतै उ मरियम जु मगदल गौं की छै अर यूहन्ना अर याकूब कि ब्वे मरियम अर ऊंका दगड़ा कि अर जनन भि छै।

¹¹पर ऊंकी बात ऊं तैं मिसाल सी लगणी छै अर ऊंल वीं पर विश्वास नि कैरी।

¹²तब पतरस उठि अर कब्र पर दौड़ि कै गै, अर झुकि कै भस कपड़ा पुड़यां दिखिनि, अर जु कुछ हवे छो, वीं बात पर भैचक हवे कै, अपड़ा घौर चलि गै।

¹³वे दिन यीशु का द्वी चेला इम्माउस नौं का एक गौं जांणा छा, जु यरूशलेम शहर बट्टी कुई ग्यारा कि.मि. की दूरी पर छो।

¹⁴उ यूं सभि बातों पर जु हवे छै, आपस मा बातचित करदी जांणा छा।

¹⁵अर जब उ आपस मा बातचित अर पूछताछ करदी जांणा छा, त यीशु खुद ही नजीक ऐ के वेका दगड़ा चलण लगि गै।

¹⁶पर परमेश्वर ल ऊं तैं वे पहचाण से रोकि रखि, कि उ ऊं तैं पच्छ्याणि नि सकिनि।

¹⁷यीशु ल ऊं तैं पूछि, “यु क्य बात च जौं तैं तुम चलदा-चलदा आपस मा कना छा उ उदास हवे कै खड़ा रैनी।”

¹⁸यु सूंणि कै, ऊंमा बट्टी क्लियोपस नौं का एक मनिख ल बोलि, “क्य तुम यरूशलेम शहर मा यखुली परदेशी छा जु नि पिछला कुछ दिनों मा इख क्य-क्य हवे”

¹⁹यीशु ल ऊं तैं पूछि, क्य बात? ऊंल ऊंकु बोलि, नासरी गौं कु यीशु का बारा मा जु परमेश्वर अर सभि लुखुं का नजीक काम अर वचन मा सामर्थी परमेश्वर का तरपां बट्टी बुल्ण वलो मा छा।

²⁰अर प्रधान याजक ल अर हमारा मुखियों वे तैं पकड़वे दींनि कि वे तैं मौत कि सजा दिये जौं अर सूली पर चढ़ै दींनि।

²¹पर हम तैं आस छै कि रोमियों बट्टी इस्राएल का लुखुं का घराना तैं छुटकारो दयालो यूं सभि बातों का अलावा ई बात तैं हुयां तीन दिन हवे गैनी।

²²अर अब हमारा झुण्ड मा बट्टी कई जननों हम तैं घंघतोल मा डालेल जु आज सुबेर मा कब्र पर गै छै।

²³अर जब वेकी लांश नि पै त इन बुल्दी ऐनी कि हम ल स्वर्गदूतों कु दर्शन पै जौंन बोलि, कि यीशु ज्यूँदो च।

²⁴तब हमारा दगड़ियों मा बट्टी कब्र पर गैनी अर जन जननों ल बोलि, छो उन ही पै पर ऊं तैं यीशु नि दिखै।

²⁵तब यीशु ल द्वी चेलों कु बोलि, “हे कम समझ वलो अर परमेश्वर का तरपां बट्टी बुल्ण वलो ल परमेश्वर का वचन मा लिख्युं च तुम लुखुं तैं वे पर विश्वास कन भौत कठिन लगदो ”

²⁶यु जरूरी छा कि मसीह यु दुख तैं उठै अर फिर अपड़ी बढ़ै मा प्रवेश कैर,

²⁷यीशु ल ऊं तैं पूरा परमेश्वर का वचन मा, मूसा की व्यवस्था बट्टी शुरू कैरी सभि परमेश्वर का तरपां बट्टी बुल्ण वलो का द्वारा अपड़ा बारा मा दे गै उ बातों तैं समझै।[123]

²⁸इथग मा उ सभि वे गौं का नजीक पौंछिनी जख उ जांणा छा अर ऊंका हो भौ इन लगण छ कि जन उ अगनैं बढ़ण चांणा होला।

²⁹पर ऊंल इन बोलि, कै ऊं तैं रोकि दींनि, “हमारा दगड़ा रावा किलैकि ब्यखुनि हवे गै अर दिन अब भौत ढलि गै तब उ ऊंका दगड़ा रौंणु कु भितर चलि गैनी।”

³⁰जब उ ऊंका दगड़ा खांणु-खांणु कु बैठिनि त ऊंल रुटि पकड़ी धन्यबाद दींनि, अर तोड़ी के ऊं तैं दींण लगि गैनी।

³¹तब ऊंका आंखा खुलि गैनी अर ऊंल उ पच्छ्याणि दींनि अर यीशु ऊंकी नजर मा बट्टी छिपी गै।

³²ऊंल आपस मा बोलि, “जब उ हमारा दगड़ा बटा मा बातचित कना छा, अर परमेश्वर का वचन कु मतलब समझांणा छा त क्य हमारा मन मा उत्तेजना पैदा हवे गै छै”

³³तब उ बगत उठि के यरूशलेम शहर लौटि गैनी, अर ऊं ग्यारहों चेलों अर ऊंका दगड़ियों कठा देखि।

³⁴ग्यारहों जु कठ्ठा हवे के बुल्णा छा, “प्रभु सच मा ज्यूँदो हवे गैनी अर शमौन पतरस तैं दिखै छिन।”

³⁵तब ऊंल बट्टा कि बात वे तैं बतै दींनि अर यु भि कि जब उ रुटि तुड़नों छो त वे तैं वेल पच्छ्याणि येलि।

³⁶उ यूं बातों तैं कना ही छा कि उ अफी ऊंका बीच मा ऐ के प्रगट हवे गै अर ऊंकु बोलि, “तुम तैं शान्ति मिलो।”

³⁷पर उ घबरै गैनी अर डौर गैनी अर सुचण लगि गैनी कि हम कै दुष्टात्मा तैं दिखणा छा।

³⁸यीशु ल ऊंकु बोलि, “घबराणा किलै छा? अर तुमारा मन मा सन्देह किलै कनि छै?”

³⁹मेरा हथ अर मेरा खुटा देखा कि मि उ ही छौं। मि तैं छू कै देखा किलैकि दुष्टात्मा कु हड़का अर मांस नि हूंद जन तुम मि मा दिखणा छा।

⁴⁰इन बोलि के, यीशु ऊं तैं अपड़ा हथ अर खुटा दिखैनी।

⁴¹जब आनन्द का कारण वे तैं विश्वास नि हूंणु छो की यीशु मुर्दों बट्टी ज्यूँदो हवे गै, अर आश्चर्य करदा छा, यीशु ल ऊं तैं पूछि, “क्य इख तुम मा कुछ खांणु च?”

⁴²ऊंल ऊं तैं भुरयां माछो का कतर दींनि।

⁴³यीशु ल, लै कि जबकि उ वे तैं दिखणी रै वेका संमणी खै।

⁴⁴फिर वेल ऊंकु बोलि, “यु मेरी उ बात छिन जु मिल जब मि तुमारा दगड़ा छो तुम मा बोलि छै कि जरूरी च कि जथग भि बात मूसा द्वारा लिखीं परमेश्वर की व्यवस्था मा अर परमेश्वर का तरपां बट्टी बुल्ण वलो अर भजनौं कि किताबों मा मेरा बारा मा लिखीं छिन यु सब सच साबित हूंनु।”

⁴⁵तब यीशु ल परमेश्वर का वचन तैं जनणु कु ऊंकी समझ ऊं तैं समझण मा मदद कैरी।

⁴⁶तब यीशु ल ऊंकु बोलि, “परमेश्वर का वचन मा इन लिख्युं च कि मसीह कु दुख उठांण अर तिसरा दिन मुर्दों मा बट्टी ज्यूँदो हवे जांण।[124]”

⁴⁷अर यरूशलेम शहर बट्टी लै कि “तुम सैरा जातियों मा पापों की माफी कु पश्याताप कनु कु सुसमाचार प्रचार, वेका नौं बट्टी किये जालो।”

⁴⁸तुम सभियूं बातों का गवाह छयां।

⁴⁹अर मि स्वयं तुमारा मथि पवित्र आत्मा तैं भेजलो ज्यांको सौं मेरा पिता परमेश्वर लै छै, इलै तुम तब तक शहर मा जग्वाल कन रयां, जब तक तुम तैं स्वर्ग बट्टी सामर्थ नि दिये जालो।

⁵⁰तब यीशु ऊं तैं बैतनिय्याह गौं का नजिक तक शहर बट्टी भैर गैनी अर अपड़ा हथ उठै कै ऊं तैं आशीष दींनि।

⁵¹अर आशीष दींद दौं उ ही ऊं बट्टी अलग हवे गै अर स्वर्ग मा उठै गै।[125]

⁵²तब उ वे तैं दण्डवत कैरी के बड़ो आनन्द से यरूशलेम शहर मा लौटि गै।

⁵³अर चेला लगातार यरूशलेम शहर का मन्दिर मा हाजिर हवे कै परमेश्वर की बढ़ै करदां छा।