Read Garhwali लूका 4 Bible Online

लूका 4 - Garhwali bible

लूका 4

¹फिर यीशु मसीह का यरदन गाड मा बपतिस्मा लींणा का बाद तब पवित्र आत्मा ल तुरंत वे तैं एकांत जंगल कि तरपां भेजि।

²अर जंगल मा चालिस दिन रात तक शैतान ल वेकी अजमैश कैरी अर दिन मा यीशु ल कुछ नि खै अर जब उ दिन पूरा हवे गैनी त तब वे तैं भूख लगि।

³अर शैतान ल यीशु मा बोलि, तु जु परमेश्वर का नौंनो छै त ये ढुंगा कु बोल कि रुट्टि बंणि जौं अर साबित कैर कि तू ऊं तैं खै साकि।

⁴यीशु ल वे तैं जवाब दींनि कि “परमेश्वर का वचन मा लिख्युं च मनिख भस रुट्टि से ही ज्यूँदो नि रालो।”[33]

⁵तब शैतान वे तैं एक भौत ऊंचा पौड़ पर ली गै अर सैरा जगत का राज्य अर ऊंको धन दौलत तैं दिखै।

⁶शैतान ल यीशु कु बोलि, “यु सब धन दौलत अर अधिकार मि तैं सौंप्युं च अर मि जै तैं चौं वे तैं ही दे दींदु।

⁷इलै जु तु मि तैं झुकि के प्रणाम कर आराधना कैरेली त मि यु सब कुछ त्वे तैं दे दयुलु।”

⁸यीशु ल वे तैं जवाब दींनि “परमेश्वर का वचन मा लिख्युं च कि तु परमेश्वर अपड़ा परमेश्वर तैं प्रणाम कैर अर भस वेकी आराधना कैर।[34]”

⁹तब शैतान यीशु तैं पवित्र यरूशलेम शहर का मन्दिर का ऊँचा गुमट पर खड़ो कैरी अर शैतान ल यीशु कु बोलि, “जु तु परमेश्वर कु नौंनो छै त अपड़ा आप तैं मूड़ी गिरै के साबित कैर त्वे तैं चोट नि लगली

¹⁰किलैकि परमेश्वर का वचन मा लिख्युं च, उ अपड़ा स्वर्गदूतों तैं आज्ञा दयालो अर उ त्वे तैं हथौं-हथ बचै दयाला कखि।

¹¹इन नि हो कि तेरु खुट्टों मा ढुंगो ल चोट लगो।”[35]

¹²यीशु ल वे तैं जवाब दींनि, “परमेश्वर का वचन मा इन लिख्युं च कि तु प्रभु अपड़ा परमेश्वर कि परख नि कैर।[36]

¹³जब शैतान ल यीशु कि अजमैश कैरेली छै त तब कुछ बगत कु वेका संमणी बट्टी चलि गै।

¹⁴फिर यीशु आत्मा कि सामर्थ मा हवे के गलील मा ऐ अर वेकी चर्चा अमणी-संमणी का सभि मुल्को मा फैली गै।

¹⁵अर यहूदियों का मिलणा का भवन मा जै के प्रचार करदी अर सब वेकी बढ़ै करदा छा।

¹⁶अर यीशु अपड़ा घौर नासरत नगर मा ऐ जख उ पले गै छो अर अपड़ी रीति का अनुसार यहूदियों का विश्राम का दिन जु परमेश्वर कु पवित्र दिन मा परमेश्वर बट्टी यहूदियों का मिलणा का भवन मा जै के परमेश्वर कु वचन पढ़णु कु खड़ो हवे गै।

¹⁷यशायाह परमेश्वर का तरपां बट्टी बुल्ण वला की किताब वे तैं दिये गै, अर वेल चाम्रपत्र खोलि के व जगह निकाली जख इन लिख्युं छो,

¹⁸परमेश्वर की आत्मा मि पर च इलै की वेल कंगालों तैं शुभ संदेश सुणौंणु कु मेरू अभिषेक कैरी अर मि तैं इलै भेजि कि कैदियों तैं छुटकारा कु अर अंधों तैं आंखा दींणु कु शुभ सन्देश प्रचार कैर अर दबयां लुखुं तैं छुणौं।[37]

¹⁹अर प्रभु का खुश रौंणो को साल कु प्रचार कैर।”

²⁰तब वेल चाम्रपत्र बंद कैरी के सेवक का हथ मा दे दींनि अर बैठी गे: अर यहूदियों का मिलणा का भवन मा सब लुखुं का आंखा वे पर लगयां छा।

²¹तब उ ऊंमा बुल्ण लगि गैनी तुमारा सुनण से “आज परमेश्वर का वचन कु यु लेख तुमारा संमणी पूरो हवे गै।”

²²अर सभियूं ल वेकी बढ़ै कैरी अर जु दया कि बात वेका गिच्चा बट्टी निकली छै वां बट्टी हकदक हवे के बुल्ण लगि गैनी “क्य यु यूसुफ को नौंनो नि च?[38]”

²³यीशु ल ऊंमा बोलि, “तुम मेरा बारा मा ईं मिसाल जरुर दीला कि हे वैद अफ तैं खूब कैर जु कुछ हम ल सूंणि कि कफरनहूम शहर मा क्य कियेगे उन ही इख अपड़ा मुल्क मा भि कैर।”

²⁴पर यीशु ल ऊंमा बोलि, “मि तुम मा सच बुल्णु छौं कुई भि परमेश्वर का तरपां बट्टी बुल्ण वलो को अपड़ा देश तैं छोड़ी के उंको सब जगह आदर हूंद।”

²⁵अर मि तुम मा सच बुल्णु छौं मेरी बात सूंणा उ सच छिनी की ऊख भौत विधवा छै कि परमेश्वर की तरपां बट्टी बुल्ण वलो एलिय्याह का दिनों मा जब साढ़े तीन बरसों तक स्वर्ग बंद रै अर बरखा नि हवे कि सैरा इस्राएल का लुखुं का घराना मा बड़ो अकाल पड़ि।[39]

²⁶पर एलिय्याह तैं इस्राएल मा कै भि विधवा का सीदोन शहर का संमणी सारपत का इलाका मा एक गैर-यहूदी विधवा मा भिजे।[40]

²⁷अर एलीशा परमेश्वर का तरपां बट्टी बुल्ण वला का बगत मा इस्राएल का लुखुं का घराना मा भौत कोढ़ी छा पर सीरिया देश का एक गैर-यहूदी नामान तैं छोड़ी के ऊंमा बट्टी कुई शुद्ध नि करे गै। [41]

²⁸यूं बातों तैं सुंणद ही जथग यहूदियों का मिलणा का भवन मा छा सब गुस्सा मा भरि गैनी।

²⁹अर उठि के यीशु तैं शहर बट्टी भैर निकाली अर जै डांडा मा ऊंको शहर बस्युं छो वेका डांडा मा ली गै कि यीशु तैं उख बट्टी मूड़ि गिरै कै मार द्या।

³⁰पर उ ऊंका बीच मा बट्टी निकली के चलि गै।

³¹फिर यीशु अर वेका शिष्य गलील का कफरनहूम शहर मा ऐनी, अर यीशु तुरंत यहूदियों का विश्राम का दिन जु परमेश्वर कु पवित्र दिन यहूदियों का मिलणा का भवन मा जै के उपदेश दींण लगि गै।

³²उ यीशु का वेका उपदेश से चकित हवेनि किलैकि वेको वचन अधिकार का दगड़ा मा छो।

³³यहूदियों का मिलणा का भवन मा एक आदिम छो, जै पर दुष्टात्मा लगिं छै।

³⁴वेल चिल्लै कै बोलि, “हे यीशु नासरी हम तैं त्वे बट्टी क्य काम? क्य तु हम तैं नाश कनु कु अयीं छै? मि त्वे तैं जंणदु छौं कि तु कु छै? तु परमेश्वर को पवित्र नौंनो छै जु परमेश्वर का तरपां बट्टी अईं छै।”

³⁵यीशु ल दुष्टात्मा तैं झिड़की के बोलि, “चुप रौ अर वेमा बट्टी दूर हो अर निकली जा।” तब दुष्टात्मा वे तैं बीच मा पटकी के बगैर कुई नुकसान पौंछयां वे बट्टी दूर हवे के भैर निकली गै।

³⁶ईं बात पर सभियूं तैं अचम्भो हवे अर उ आपस मा बुल्ण लगि गैनी “यु कन वचन च? यु त कुई नयो उपदेश च जु बड़ा सामर्थ का दगड़ी दुष्टात्मा तैं भि झिड़की दींणु च अर उ वेकी डांट सूंणि के मनिख्युं बट्टी भैर निकली जांद।”

³⁷अर वेको नौं तुरंत गलील जिला का अमणी-संमणी का प्रदेश मा हर जगह फैली गै।

³⁸उ यहूदियों का मिलणा का भवन मा बट्टी उठि के शमौन पतरस का घौर मा ऐनी अर शमौन पतरस कि सास जौर मा पड़ीं छै, अर ऊंल वीं कु यीशु बट्टी बिनती कैरी।

³⁹वेल वीं का संमणी खड़ो हवे के जौर तैं झिड़की अर वीं को जौर उतरी गै अर व तुरंत उठि के ऊं सभियूं कि सेवा पांणी कन लगि गै।

⁴⁰सूरज डुबण का बगत जौं-जौं का इख लोग बनि-बनि किस्मै कि बिमारी मा पुड़यां छा उ सब ऊं तैं वेका संमणी लैनि अर वेल एक-एक पर हथ रखि के ऊं तैं खूब कैरी।

⁴¹अर भौतों मा बट्टी दुष्टात्मा चिल्लांदि अर यु बोलि के निकली गै की, “तु परमेश्वर कु नौंनो छै” पर उ, ऊं तैं खिज्योंदा अर बुल्ण नि दींदु छो किलैकि उ जंणदी छै कि यु मसीह च।

⁴²जब दिन हवे त उ निकली के एक एकांत जंगल मा गै अर भीड़ कि भीड़ वे तैं खुज्योंदि-खुज्योंदि वेमा ऐ अर यीशु तैं रुकण लगि गैनी कि हमारा संमणी बट्टी नि जा।

⁴³यीशु ल चेलों मा बोलि, “मि तैं और-और शहरों मा भि परमेश्वर कु राज्य कु शुभ सन्देश प्रचार सुनौंण जरूरी च किलैकि मि इलै भिज्युं छौं।”

⁴⁴अर उ गलील जिला बट्टी हवे के यहूदिया प्रान्त मा यहूदियों का मिलणा का भवन मा जै के प्रचार करदी रै।