Read Garhwali लूका 9 Bible Online

लूका 9 - Garhwali bible

लूका 9

¹फिर यीशु ल बारह चेलों तैं अफ मा बुलै के ऊं तैं सब दुष्टात्मा अर बिमारियों तैं दूर कने सामर्थ अर अधिकार दींनि।

²अर बारह चेलों तैं परमेश्वर का राज्य कु प्रचार कनु कु अर बिमारों तैं खूब कनु कु भेजि।

³यीशु ल ऊं बट्टी बोलि, “बट्टा कु कुछ नि रख्यां न लाठो, न झोला, न रुट्टि, न रुप्या, अर न द्वी-द्वी कुर्ता।”

⁴अर जब तुम कै घौर मा जा उखि रावा अर उख बट्टी विदा ह्वा।

⁵जु कुई तुम तैं स्वीकार नि कैरो अर तुम्हरी नि सुणो त उख बट्टी निकली कै अपड़ा खुट्टों की धूल उखि झाड़ी दियां कि ऊं पर गव्है हो।

⁶अर उ निकली के गौं-गौं शुभ सन्देश प्रचार सुंणौदि अर हर कखि लुखुं तैं खूब करदी फिरदी रैनी।

⁷अर देश का चौथाई कु राजा हेरोदेस यु सब सूंणि के घबरै गै किलैकि कथगों ल बोलि, कि यूहन्ना मुर्दों मा बट्टी ज्यूँदो हवे गै।

⁸अर कथगों ल यु बोलि, “एलिय्याह दिखेगे और ल यु कि परमेश्वर का तरपां बट्टी बुल्ण वलो मा बट्टी कुई एक पुरणो च जु ज्यूँदो हवे गै।”

⁹पर राजा हेरोदेस ल बोलि, “यूहन्ना को मुंड मिल कटवै छो अब यु कु च जैका बारा मा इन बात सुनणु छो अर वेल वे तैं दिखणें इच्छा कैरी।”

¹⁰फिर बारह प्रेरितों ल वापिस लौटि के जु कुछ ऊंल कैरी अर सिखै छो सब यीशु तैं बतै अर वेल ऊं तैं अलग कैरी कै बैतसैदा नगर मा लीगि।

¹¹यु जांणि के भीड़ वेका पिछनैं चलण लगि गै अर उ खुशी से वे बट्टी मिली अर ऊं बट्टी परमेश्वर का राज्य कि बात कन लगि गे: अर जु खूब हूंण चांणा छा ऊं तैं खूब कैरी।

¹²जब शाम हवे गै त बारह चेला ल वेमा ऐ के बुल्ण लगि गैनी भीड़ तैं विदा कैर कि चारों तरपां का गौं अर बस्तियों मा जै के रौंणु कु जगह अर खांणु कु इंतजाम कैरो किलैकि हम इख एकांत जंगल म छा।

¹³यीशु ल ऊंकु बोलि, “तुम ही ऊं तैं खांणु कु द्या” ऊंल बोलि, हम मा पाँच रुट्टि अर द्वी माछों तैं छोड़ी के और कुछ नि च पर हाँ जु हम जै के यूं सब लुखुं कु खांणु मोल ल्यां त हवे सकदु च उ लोग पाँच हजार बैखुं का लगभग छा।

¹⁴यीशु ल अपड़ा चेलों मा बोलि, “ऊं तैं पचास-पचास कैरी के पांति मा बैठै द्या।”

¹⁵ऊंल इन ही कैरी अर सभियूं तैं बैठै दींनि।

¹⁶यीशु ल ऊं पाँच रुट्टियुं तैं अर द्वी माछों तैं अपड़ा हथ मा लींनि अर स्वर्ग जनै देखि के परमेश्वर कु धन्यवाद कैरी अर रुट्टि द्वी टुकड़ों मा तोड़ी-तोड़ी के चेलों तैं दींद गैनी कि उ लुखुं तैं परोसुनु।

¹⁷अर सभि खै के तृप्त हवे गैनी त चेलों ल बचयां टुकड़ों से बारह भुरयां ठुपरा भरिके उठैनि।[54]

¹⁸जब उ एकांत मा परमेश्वर बट्टी प्रार्थना कनु छो अर चेला वे दगड़ी छा त वेल ऊं बट्टी पूछि कि लोग मि कु क्य बुल्दींनि?

¹⁹ऊंल जवाब दींनि, यूहन्ना बपतिस्मा दींण वलो अर कुई-कुई एलिय्याह अर कुई यु कि पुरणा परमेश्वर का तरपां बट्टी बुल्ण वला मा बट्टी कुई ज्यूँदो हवे गै।

²⁰वेल ऊंमा पूछि, पर तुम मेरा बारा मा कि सुचदियां? पतरस ल जवाब दींनि, “परमेश्वर कु मसीह।”

²¹तब यीशु ल ऊं तैं चितै के बोलि, कि यु कै मा नि बुल्यां।

²²अर वेल बोलि, “मि मनिख कु नौंनो कु जरूरी च कि उ भौत दुःख उठौ अर लुखुं का दाना-सयाणों, प्रधान याजक अर मूसा की व्यवस्था तैं सिखांण वलो वे तैं तुच्छ जांणि के मारि दयूंनु अर उ तीन दिन का बाद फिर ज्यूँदो हवे जालो।”

²³वेल सभियूं बट्टी बोलि, “जु कुई मेरा पिछनैं आंण चौ उ अपड़ी इच्छाओं तैं छोड़ी के अर अपड़ो सूली उठै के मेरा पिछनैं हवे जौं।”

²⁴किलैकि जु कुई अपड़ो जीवन बचौण चौ उ वे तैं गवांलू पर जु कुई मेरा बाना अर शुभ सन्देश का बाना अपड़ा आत्मा तैं गवांलू उ अनन्त जीवन तैं पालो।

²⁵जु मनिख सैरा दुनिया तैं पै ल्यो अर अपड़ा प्राण अर आत्मा तैं ख्वे द्यो त वे तैं क्य फैदा होलो?

²⁶जु कुई मि अर मेरी बातों सै शर्मालो, मि मनिख कु नौंनो भि जब अपड़ी अर पिता कि अर पवित्र स्वर्गदूतों कि महिमा सहित आलो त तब मि भि ऊंको इन्कार कैरी दयुलु।

²⁷मि तुम मा सच बुल्णु छौं कि जु इख म खड़ा छिन ऊंमा बट्टी कुई-कुई इन छिन कि जब तक परमेश्वर का राज्य तैं सामर्थ का दगड़ा आंण नि दिखला तब तक ऊंल मुरण भि नि च।

²⁸यूं बातों का बाद कुई आठ दिन बाद यीशु ल पतरस, याकूब अर यूहन्ना तैं अपड़ा दगड़ा मा लींनि अर परमेश्वर बट्टी प्रार्थना कनु कु पौड़ पर गै।

²⁹जब उ परमेश्वर बट्टी प्रार्थना कनु छो त वेको चेहरा कु रूप बदलिगे अर इख तक की वेका कपड़ोंं कु भि एक अलग रूप छो उ चमकदार अर सफेद हवे गै छा।

³⁰अर देखा मूसा का दगड़ा एलिय्याह दिखै जु यीशु का दगड़ा बातचित कना छा।

³¹यु महिमा सहित दिखै अर वेका मरणे कि चर्चा कना छा जु यरूशलेम शहर मा हूंण वलो छो।

³²पतरस अर वेका दगड़िया निंद मा भुरयां छा अर जब ढंग ल चेत मा ऐनी त ऊंकी महिमा कु प्रकाश अर ऊं द्वी मनिख्युं तैं जु वे दगड़ी खड़ा छा देखि।

³³जब उ वेका संमणी बट्टी जांण गैनी त पतरस ल यीशु कु बोलि, “हे गुरु हमारो इख रांण अच्छो च हम इख तीन डेरा बणौला एक त्वे कु, एक मूसा कु, अर एक एलिय्याह कु।” उ जंणदु नि छो कि क्य बुल्णु च।

³⁴उ यु बुल्णु ही छो कि इथग मा एक बादल ल ऊं तैं घेरि कै ढकै दींनि अर जब उ वे बादल बट्टी घिरण लगि गैनी त डौर गैनी।

³⁵अर वे बादल बट्टी परमेश्वर की आवाज सूंणि, “यु मेरू प्रिय नौंनो च ये कि सूंणा।”[55]

³⁶यु वचन हूंदी ही यीशु यखुली पये गे: अर उ चुप रै अर जु कुछ देखि छो वांकि कुई भि बात ऊं दिनों मा कै मा नि बोलि।

³⁷अर दुसरा दिन जब उ पौड़ बट्टी उतरिनि त एक बड़ी भीड़ ऊं बट्टी मिलणु कु ऐ।

³⁸अर देखा भीड़ मा बट्टी एक आदिम ल चिल्लै कै बोलि, “हे गुरु मि त्वे बट्टी बिनती कनु छौं कि मेरा नौंना पर दया कैर किलैकि उ मेरू एक ही नौंनो च।”

³⁹अर देख एक दुष्टात्मा वे तैं पकड़दी च अर उ बिजां चिल्लांदु अर व वे तैं इन मरोड़ि दींद कि उ वेका गिच्चा बट्टी झाग निकलण लगि जांदु अर वे तैं कुचलिके बड़ी मुश्किल से छुड़द।

⁴⁰अर मिल तेरा चेलों बट्टी बिनती कैरी छै कि वे तैं निकाला पर उ नि निकाली सकिनि।

⁴¹यीशु ल ऊं तैं जवाब दे के बोलि, हे अविश्वासी लुखुं मि कब तक तुम दगड़ी रौलु अर तुमारी सौलु? अपड़ा नौंना तैं इख ले के औ।

⁴²उ औंणु ही छो कि दुष्टात्मा ल वे तैं पटकी के मरोड़ि पर यीशु ल दुष्टात्मा तैं झिड़की अर नौंना तैं खूब कैरी कै वेका पिता तैं सौंपी दींनि।

⁴³तब सब लोग परमेश्वर कि बड़ी सामर्थ से चकित हवेनि पर जब सब लोग ऊं सब कामों से जु यीशु ल कैरी छा अचम्भो कना छा त वेल अपड़ा चेलों मा बोलि।

⁴⁴यु बात तुमारा कंदुडू मा पोड़ि रौनु किलैकि “मि मनिख कु नौंनो” मनिख्युं का हथ से पकड़वे जौलु।

⁴⁵पर या बात चेलों की समझ मा नि ऐ, जु यीशु बुल्दो छो अर य वे बट्टी छिपी रै के उ वीं तैं नि जंणन पौनु अर उ ईं बातों का बारा मा वेमा पुछण से डरदा छा।

⁴⁶फिर ऊंमा यु बहस हूंण लगि गै कि हम मा बड़ो कु च?

⁴⁷पर यीशु ल ऊंका मन का विचार जांणि दींनि अर एक बच्चा तैं ऊंका नजीक मा खड़ो कैरी।

⁴⁸अर ऊं बट्टी बोलि, “जु कुई मेरा नौं से यु बच्चों तैं अपणांदु उ मि तैं अपणांदु।” उ मेरा भिजण वला तैं अपणांदु किलैकि जु तुम मा बट्टी सबसे छुटो से छुटो च उ ही बड़ो च।

⁴⁹तब यूहन्ना ल वेकु बोलि, “गुरु हम ल एक मनिख तैं तुमारा नौं की सामर्थ से दुष्टात्मा तैं निकलण देखि अर हम वेको मना कना रां किलैकि उ हम जन तेरु चेला नि च।”

⁵⁰यीशु ल बोलि, “वेकु मना नि कैरा किलैकि जु हमारो दुश्मन नि च उ हमारो दगड़िया ही च।”

⁵¹जब वेका मथि उठौण का दिन पूरा हूंण पर छा जु वेल यरूशलेम शहर जांणो कु विचार पक्को कैरी छो।

⁵²अर वेल अपड़ा अगनैं दूत भिजिनि उ सामरी जाति का गौं मा गैनी कि वेकु जगह तैयार कैरो।

⁵³पर ऊं लुखुं ल वे तैं औंण नि दींनि किलैकि उ यरूशलेम शहर कु जांणा छा।

⁵⁴यु देखि के वेका चेला याकूब अर यूहन्ना ल बोलि, “हे प्रभु क्य तु चाँदि छै कि हम आज्ञा द्यां कि स्वर्ग बट्टी आग गिरि के ऊं तैं भस्म कैरी द्यो।”

⁵⁵पर वेल पलटी के ऊं तैं झिड़की अर बोलि, तुम नि जंणदा कि तुम कन आत्मा का छा किलैकि मनिख कु नौंनो लुखुं का प्राण तैं नाश कनु कु न पर बचौंणु कु ऐ।

⁵⁶अर उ कै और गौं मा चलि गैनी।

⁵⁷जब उ बट्टा मा जांणु छो त कैल वेमा बोलि, जख-जख तु जैलि मि तेरा पिछनैं औलु।

⁵⁸यीशु ल वेमा बोलि, “स्यालुं का उडियार अर आसमान का चलखुडों का बसेरा हूंदींनि मि मनिख कु नौंनो कु रौंणु कु भि घौर नि च जख उ सै साको।”

⁵⁹वेल दुसरा कु बोलि, मेरा पिछनैं हवेलि वेल बोलि “हे प्रभु पैली मि जांणि दे कि अपड़ा बुबा तैं खडै द्यों”

⁶⁰यीशु ल वेमा बोलि, “जु लोग आत्मिक रीति बट्टी मुरयां छिन ऊं तैं अपड़ा मुर्दा खडयोण दे पर तु जै के परमेश्वर कि राज्य को शुभ संदेश कु प्रचार सुंणौ।”

⁶¹एक हैंका ल भि बोलि, हे प्रभु मि तेरा पिछनैं औलु पर पैली मि तैं जांण दे कि अपड़ा घौर का लुखुं से विदा ल्यो।[56]

⁶²यीशु ल वेमा बोलि, जु कुई अपड़ो हथ हौल पर रखि के पिछनैं दिखदो, उ परमेश्वर का राज्य का लैख नि च।