Read Garhwali यूहन्ना 1 Bible Online

यूहन्ना 1 - Garhwali bible

यूहन्ना 1

¹सैरा दुनिया की सृष्टि से पैली वचन छो, जै कु वचन बुलै गै छो, अर उ वचन परमेश्वर का दगड़ा मा छो अर उ वचन परमेश्वर छो।

²उ शब्द आदि मा परमेश्वर का दगड़ा मा छो।

³परमेश्वर ल सब कुछ वे बट्टी ही पैदा कैरी और जु सृजे गै छो वामा बट्टी कुई भि चीज वेका बगैर पैदा नि हवे।

⁴उ हमारा शारीरिक अर आत्मिक जीवन कु स्रोत च अर उ ही च जु सब लुखुं तैं प्रकाश दींद।

⁵उज्यलो अंधेरा मा चमकद अर अन्धकारा ल वे तैं नि बुझै साकी।

⁶परमेश्वर ल यूहन्ना नौं कु एक आदिम तैं भेजि।

⁷उ गव्है दींणु कु आई कि उज्यला की गव्है द्यो, कि सब लोग वेका द्वारा वीं उज्यला मा विश्वास कैरा।

⁸यूहन्ना अफ त उ उज्यला नि छो पर उ वे उज्यला का बारा मा गव्है दींणु कु ऐ छो।

⁹उ जु सच्चो उज्यलो च जु हर एक आदिम तैं उज्यलो दींद जगत मा औंण वलो छो।

¹⁰उ दुनिया मा छो अर दुनिया वेका द्वारा पैदा हवे अर जगत का लुखुं ल वे तैं नि पैछांणि।

¹¹उ अपड़ा लुखुं का संमणी ऐ अर वेका अपड़ा लुखुं ल वे तैं ठुकरै दींनि।

¹²पर जथगो ल वे तैं स्वीकार कैरी वेल ऊं तैं परमेश्वर कि सन्तान हूंणो कु अधिकार दींनि मतलब ऊं तैं जु वे पर विश्वास करदींनि।

¹³उ ल त ब्वे-बुबा या पूर्वजो बट्टी, मनिख की इच्छा बट्टी, न एक आदिम की सन्तान इच्छा बट्टी जु परमेश्वर बट्टी पैदा हवेनि।

¹⁴अर वचन देहधारी हवे अर दया अर सचै बट्टी पूरो हवे के हमारा बीच मा डेरो कैरी और वेकी महिमा इन छै जन बुबा (परमेश्वर) कि तरपां बट्टी अयां एकलौता नौंना की महिमा।[1]

¹⁵यूहन्ना ल वेका बारा मा गव्है दींनि और चिल्लै कै बोलि, “यु उ ही च जैकू मिल ब्यौरा कैरी छो कि जु मेरा बाद औणु च उ मि बट्टी बड़ी के च, किलैकि उ मि से पैली बट्टी छो।”

¹⁶दया पर दया बट्टी वेकी परिपूर्णता का दगड़ी हम सभियूं ल प्राप्त कैरी मतलब आशीष पर आशीष।

¹⁷मूसा का द्वारा लिखीं परमेश्वर की व्यवस्था दिये गै, पर परमेश्वर ल यीशु मसीह का द्वारा दया अर सचै दिखै।

¹⁸परमेश्वर तैं कैल कभि नि देखि, भस वेका एकलौता नौंना ल जु सच मा परमेश्वर च, अर बुबा का सबसे नजिक च, वेल परमेश्वर तैं हम तैं दिखै।

¹⁹यूहन्ना की गव्है या च कि जब यहूदियों ल यरूशलेम शहर बट्टी यहूदी याजक अर लेवियों तैं वेमा यु पुछणु कु भेजि, तु कु छै?

²⁰वेल बगैर दबाव बट्टी अर बगैर कै हिचकिचाहट के बोलि, “मि मसीह नि छौं।”

²¹तब ऊंल यीशु बट्टी पूछि, तू कु छै क्य तु एलिय्याह परमेश्वर का तरपां बट्टी बुल्ण वलो छै? वेल बोलि, मि नि छौं जैका बारा मा परमेश्वर ल वादा कैरी छो, त क्य तु परमेश्वर का तरपां बट्टी बुल्ण वलो छै? अर वेल जवाब दींनि, न।

²²तब ऊंल वे बट्टी पूछि, फिर तु कु छै? किलैकि हम अपड़ा भिजण वलो तैं जवाब द्यां तु अपड़ा बार मा क्य बुल्णी छै?

²³यीशु ल ऊंमा बोलि, मि जन यशायाह परमेश्वर का तरपां बट्टी बुल्ण वला बोलि, एकांत जंगल मा एक पुकारण वला कु शब्द छो कि तुम प्रभु कु रस्ता सैणो कैरा।

²⁴यु लोग फरीसियों का तरपां बट्टी भिजे गै छा।

²⁵ऊंल यूहन्ना बट्टी यु सवाल पूछि, कि तु न मसीह छै अर न एलिय्याह अर न उ परमेश्वर का तरपां बट्टी बुल्ण वलो छै त फिर बपतिस्मा किलै दींदी?

²⁶यूहन्ना ल ऊं तैं जवाब दींनि, मि त पांणी ल बपतिस्मा दींदु छों, पर तुमारा बीच मा एक मनिख खड़ो च जै तैं तुम नि जंणदा।

²⁷पर जु मेरा बाद आंण वलो च, जैका जुतों का तंणखा खुलणा का लैक भि मि नि छों।

²⁸या बात यरदन गाड का पार बैतनिय्याह नगर मा हवे जख यूहन्ना लुखुं तैं बपतिस्मा दींदो छो।

²⁹दुसरा दिन यूहन्ना ल यीशु तैं अपड़ी तरपां औंण देखि के बोलि, देखा यु परमेश्वर कु चिनखो[2] दुनिया का पापों तैं ले के जांद।[3]

³⁰यु उ ही च जैका बारा मा मिल बोलि छो, कि एक मनिख मेरा पिछनै औणु च जु मि बट्टी श्रेष्ठ च किलैकि उ मि बट्टी पैली छो।

³¹अर मि त वे तैं पैछणदो नि छो की उ मसीह च पर इस्राएल का लुखुं तैं यु बतौंणु कु की उ को च मि पांणी बट्टी बपतिस्मा दींदु छों।

³²अर यूहन्ना ल या गव्है दींनि कि मिल पवित्र आत्मा तैं कबूतर का रूप स्वर्ग बट्टी उतरद देखि जु वे पर ठैरी गै।

³³अर मि त वे तैं पैछणदु नि छो की उ मसीह च पर जैल मि तैं पांणी बट्टी बपतिस्मा दींणु कु भेजि वेल ही मि बट्टी बोलि, कि जै पर तू आत्मा तैं उतरद अर ठैरदी देखि उ ही पवित्र आत्मा बट्टी बपतिस्मा दींण वलो च।

³⁴अर मिल देखि अर मि तुम मा सच बुल्णु छो कि “यु परमेश्वर कु नौंनो च।”[4]

³⁵दुसरा दिन फिर यूहन्ना अर वेका द्वी चेला खड़ा हुयां छा।

³⁶अर यूहन्ना ल ऊं चेलों मा यीशु तैं जांण देखि के बोलि, देखा यु परमेश्वर कु चिनखो च।

³⁷तब यु द्वी चेला यु सूंणि के यीशु का पिछनै हवे गैनी।

³⁸यीशु ल फरिकि के ऊं तैं पिछनै औंण देखि के ऊं बट्टी बोलि, तुम कैकी खोज म छा? ऊंल यीशु मा पूछि, “हे रब्बी” मतलब हे गुरु तु कख रौंदि?

³⁹वेल ऊंकु बोलि, चला अर देखि ल्या दिन का बगत लगभग चार बजि गै छा जब उ वेका दगड़ी गै अर देखि की उ बुल्णु छो इलै उ बकि दिनों कु उखि रुकि गै।

⁴⁰ऊं द्वी मा से जु यूहन्ना कि बात सूंणि के यीशु का पिछनै हवे गै छा एक शमौन पतरस का भैय अन्द्रियास छो।

⁴¹वेल पैली अपड़ा सगा भैय शमौन पतरस बट्टी मिलिके वेमा बोलि, कि हम तैं ख्रिस्त मसीह मिली गै।[5]

⁴²अन्द्रियास शमौन पतरस यीशु का संमणी लैनि यीशु ल ऊं तैं देखि के बोलि, तु यूहन्ना कु नौंनो शमौन पतरस छै तु अब बट्टी कैफा मतलब पतरस कहलेली।

⁴³दुसरा दिन यीशु ल गलील जिला मा जांणु कु निर्णय कैरी अर फिलिप्पुस तैं मिली के बोलि, “मेरा पिछनै हवे जा।”

⁴⁴फिलिप्पुस त अन्द्रियास अर पतरस बैतसैदा नगर कु रौंण वलो छो।

⁴⁵फिलिप्पुस ल नतनएल तैं मिली के वेकु बोलि, “हम तैं उ मनिख मिल गै जैका बारा मा मूसा द्वारा लिखीं परमेश्वर की व्यवस्था मा अर परमेश्वर का तरपां बट्टी बुल्ण वलो ल लिख्युं छों नासरत नगर बट्टी यूसुफ का नौंनो यीशु छै।[6]

⁴⁶नतनएल ल वे बट्टी बोलि, क्य कुई भलि चीज भि नासरत नगर बट्टी निकली सकदी च? फिलिप्पुस ल वेकु बोलि चलि के देखि ले।

⁴⁷यीशु ल नतनएल तैं अपड़ी तरपां औंण देखि कै वेका बारा मा बोलि, देखा यु इस्राएल का लुखुं का घराना कु विश्वासयोग्य वंशज च जु पूरा ढंग से ईमानदार च।

⁴⁸नतनएल ल वेमा बोलि, तु मि तैं कख बट्टी जंणदी छै? यीशु ल वे तैं जवाब दींनि यां बट्टी पैली कि फिलिप्पुस ल त्वे तैं बुलै जब तु बेडु का डाला तौला छै तब मिल त्वे तैं देखि छो।

⁴⁹नतनएल ल वे तैं जवाब दींनि कि, हे गुरु तु परमेश्वर कु नौंनो छै तु इस्राएल का लुखुं का घराना को महाराजा छै।

⁵⁰यीशु ल वे तैं जवाब दे मिल जु त्वे मा बोलि, कि मिल त्वे तैं बेडु का डाला तौला देखि क्य तु इलै विश्वास कनी छै? तु यु से बड़ा-बड़ा काम तैं दिखली।[7]

⁵¹फिर वे बट्टी बोलि, मि तुम मा सच-सच बुल्णु छौं कि तुम स्वर्ग तैं खुल्यूं अर परमेश्वर का स्वर्गदूतों तैं मथि जांदा अर मि मनिख कु नौंनो का मथि उतरद दिखली।”[8]