Read Garhwali यूहन्ना 13 Bible Online

यूहन्ना 13 - Garhwali bible

यूहन्ना 13

¹फसह कु त्यौहार से पैली जब यीशु ल जांणेली छो कि वेको जगत छोड़ी के बुबा मा लौटि जांणु कु उ बगत ऐ गै त अपड़ा अनुयायियों बट्टी जु जगत मा छा प्रेम रखदो छो उ अब ऊं तैं अपड़ा प्रेम की पूरी हद तक प्रेम करदो छो।

²यीशु अर वेका चेला राती कु खांणु खांणा छा। शैतान ल पैली बट्टी ही यीशु तैं धोखा दींणु कु शमौन इस्करियोती का नौंना यहूदा इस्करियोती का मन मा डाली छो।

³यीशु यु जंणदु छो कि बुबा ल हर चीज पर अधिकार वे तैं दियुं च अर यु की उ परमेश्वर मा बट्टी अयुं च अर परमेश्वर मा जांणु च अर मि परमेश्वर मा बट्टी अयुं छों अर परमेश्वर मा जांणु छों।

⁴खांणा पर बट्टी उठि के यीशु ल अपड़ो चोला उतरी दींनि अर अँगोछा लैके अपड़ी कमर पर बंधि।

⁵तब भांडा पर पांणी भोरि के अपड़ा चेलों का खुट्टा धूंण अर जै अँगोछा ल एक दास का जन वेकी कमर पर बंधि छै वे बट्टी फुंजंण लगि गै।

⁶जब उ शमौन पतरस का संमणी ऐनी तब पतरस ल वेमा बोलि, “हे प्रभु, क्य तुम मेरा खुट्टा धूंणा छा?”

⁷यीशु ल वे तैं जवाब दींनि, “जु मि कनु छौं तु अभि यांको मतलब नि जंणदा पर यांको बाद समझली।”

⁸पतरस ल यीशु मा बोलि, “तुम मेरा खुट्टा कभि नि धूंण पैला” यु सूंणि के यीशु ल वेकु बोलि, जु मि तुमारा खुट्टा नि धूं त तुमारो मि दगड़ी कुई सम्बंध नि होलो।

⁹शमौन पतरस ल ऊंमा बोलि, “हे प्रभु त मेरा खुट्टा ही न बल्कि मेरा हथ अर मुंड भि ध्वे द्या।”

¹⁰यीशु ल वेमा बोलि, “एक आदिम जु नहे गै हो वे तैं भस अपड़ा खुट्टा तैं धुंणै की ही जरूरत च वेकी पूरो देह साफ च अर तुम सब शुद्ध छा, भस एक तैं छोड़ी के।”

¹¹उ अपड़ा पकड़वौंण वला तैं जंणदु छा इलै वेल इलै बोलि, अर तुम सब शुद्ध छा भस एक तैं छोड़ी के।

¹²जब यीशु ल वेका खुट्टा ध्वे दींनि अर अपड़ा भैरा का कपड़ा पैरी के फिर बैठी गै त उ बुल्ण लगि गै, “क्य तुम समझयां कि मिल तुमारा दगड़ी क्य कैरी?

¹³तुम मि कु गुरु अर प्रभु, बुल्दा अर जु तुम बुल्दा छा उ ठिक च किलैकि मि तुमारो गुरु अर प्रभु छों।

¹⁴जु मि तुमारो गुरु अर प्रभु हवे के तुमारा खुट्टा ध्वे, त तुम तैं भि इन कन चयणु च अपड़ा आप तैं नम्र कैरी के एक दुसरा का खुट्टा धूंण चयणु च।

¹⁵किलैकि मिल तुमारा संमणी एक मिसाल रखि कि जन मिल तुमारा दगड़ा मा कैरी तुम भि उन ही करयां।

¹⁶मि तुम मा सच-सच बुल्णु छों, प्रेरित अपड़ा गुरु से बड़ी के नि हुंदू अर न ही कुई भिज्युं अपड़ा भिजणवला बट्टी।[57]

¹⁷अब जबकि तुम यूं बातों तैं जंणदा छा, त तुम इन कैरी के धन्य हवे जावा।

¹⁸मि तुम सभियूं का बारा मा नि बुल्णु छौं जौं तैं मिल चुंणेलि ऊं तैं मि जंणदु छौं पर यु इलै हूंद कि परमेश्वर का वचन मा जु लिख्युं च उ सच हो जु मेरी रुट्टि खान्दो जैल मेरा दगड़ी खै वेल ही मि तैं धोखा द्ये।[58]

¹⁹अब मि वेका हूंण से पैली तुम तैं जतलै दींणु छौं कि जब यु हवे जौं त तुम विश्वास करयां कि मि उ ही छौं।[59]

²⁰मि तुम मा सच-सच बुल्णु छौं कि जु मेरी भिजणै कि बात तैं मणदींनि अर मि तैं स्वीकार करद उ मेरा भिजण वला तैं स्वीकार करदो।”

²¹या बात बुल्णा का बाद यीशु आत्मा मा व्याकुल हवे अर अपड़ा चेलों तैं बतै “मि तुम मा सच-सच बुल्णु छौं कि तुम मा बट्टी एक मि तैं पकड़वालो।”

²²चेला शंका मा पड़ि गैनी कि या बात कैका बारा मा बुल्णा छिनी अर उ एक हैंका जनै दिखण लगि गैनी।

²³ऊंका चेला मा बट्टी जै तैं यीशु भौत प्रेम करदां छा उ यीशु का बगल मा बैठयूं छो।

²⁴तब शमौन पतरस ल वेकी तरपां सनकै की पूछि “बतौ त, उ कैका बारा मा बुल्णु च?”

²⁵तब वेल यीशु कि तरपां झुकि के पूछि “हे प्रभु, उ को च?”

²⁶यीशु ल जवाब दींनि, जै तैं मि यु रुट्टि कु टुकड़ा तरी मा डुबै कै दयुलु उ ही च, अर वेल टुकड़ा तरी मा डुबै कै शमौन इस्करियोती का नौंना यहूदा इस्करियोती तैं दींनि।

²⁷जन ही यहूदा ल रुट्टि कु टुकड़ा खै यीशु ल वेकु बोलि, “तु जु कन चाणी छै, वे तैं तुरंत कैर, वे बगत शैतान वेमा समै गै।”

²⁸पर मेज पर बैठण वला अन्यों मा बट्टी कुई नि जंणदु छो की यीशु ल वेकु इन किलै बोलि।

²⁹यहूदा मा थैलि रांदि छै इलै कै कैल इन समझी यीशु वेकु बुल्णा छिनी जु कुछ हम तैं त्योहार कु चायेणु च उ मोल ली कै औ या इन कि गरीबों तैं कुछ दींद।

³⁰रुट्टि कु टुकड़ा खांण का बाद यहूदा तुरंत भैर चलि गै अर उ राती कु बगत छो।

³¹जब उ भैर चलि गै त यीशु ल बोलि, “अब मि मनिख कु नौंनो कि बड़ै हवे गै अर परमेश्वर महिमा मि पर हवे

³²अर परमेश्वर भि अपड़ा मा नौंना की बड़ै करलो अर तुरंत करलो।

³³बालकों मि और थोड़ा देर तुमारा दगड़ा मा छौं फिर तुम मि तैं ढुंड़िल्या अर जन मिल यहूदियों कु बोलि, कि जख मि जांणु छौं उख तुम नि ऐ सकद्यां अर उन ही अब मि तुम मा भि बुल्णु छौं।

³⁴मि तुम तैं एक नई आज्ञा दींणु छौं कि तुम एक दुसरा बट्टी प्रेम रखा जन मि तुम बट्टी प्रेम रखदु छों उन ही तुम भि एक दुसरा बट्टी प्रेम रखा।

³⁵जु तुम एक दुसरा बट्टी प्रेम करिल्या, जु हर कुई जांणि ल्यालो कि तुम मेरा चेला छा।”

³⁶शमौन पतरस ल ऊंमा बोलि, हे प्रभु तुम कख जांणा छा? यीशु ल जवाब दींनि “जख मि जांणु छौं उख तू अभि मेरा पिछनै नि ऐ सकदी पर यांका बाद मेरा पिछनै ऐलि।”

³⁷पतरस ल यीशु कु बोलि, “हे प्रभु मि अभि तुमारा पिछनै किलै नि ऐ सकदु? मि त त्वे कु मुरण कु भि तैयार छों।”

³⁸यीशु ल जवाब दींनि “क्य तु मि कु मुरलि, मि त्वे मा सच-सच बुल्णु छौं कि मैर का बंसण से पैली तु तीन बार बुलली की तु मि तैं नि जंणदी।”