Read Garhwali यूहन्ना 3 Bible Online

यूहन्ना 3 - Garhwali bible

यूहन्ना 3

¹फरीसियों मा बट्टी नीकुदेमुस नौं कु एक आदिम छो जु यहूदियों कु धार्मिक अगुवा छो उ एक फरीसी छो।

²वेल राती यीशु का संमणी ऐ के वेमा बोलि, हे गुरु हम जंणदा छा परमेश्वर ल त्वे तैं हम तैं सिखांण कु भिज्युं च किलैकि कुई भि यूं चमत्कार तैं जु तु दिखौंदि छै त जु परमेश्वर वे दगड़ी नि हो त नि दिखै सकदु।

³यीशु ल वे तैं जवाब द्ये, कि मि त्वे बट्टी सच-सच बुल्ण छौं जु कुई नया सिरा से नि जन्मो त परमेश्वर का राज्य कु अनुभव नि कैरी सकद।

⁴नीकुदेमुस ल वेमा बोलि, मनिख जब बुढया हवे गै त कनके जन्म ले सकद? निश्चित रूप बट्टी एक आदिम दुसरी बार पैदा हूंण कु अपड़ी ब्वे कि कोखी मा वापिस नि जै सकद?

⁵यीशु ल जवाब द्ये, कि मि त्वे बट्टी सच-सच बुल्ण छौं जब तक कुई मनिख पांणी अर पवित्र आत्मा बट्टी नि जन्मो त उ परमेश्वर का राज्य मा प्रवेश नि कैर सकद।

⁶मनिख भस मनिख जीवन तैं ही दुबरा पैदा किये सकदु च, इलै पवित्र आत्मा स्वर्ग बट्टी नयो जीवन दींदो।

⁷भैचक नि हो कि मिल त्वे बट्टी बोलि, त्वे तैं नया सिरा बट्टी पैदा हूंण जरूरी च।

⁸हवा जनै चाँदि उख चलदी च अर तु वेकी आवाज सुंणदि छै पर नि जंणदी कि व कख बट्टी औणि अर कनै कु जांणि च? जु कुई पवित्र आत्मा बट्टी चलदो च उ इन ही च।[10]

⁹नीकुदेमुस ल वे तैं जवाब दींनि, कि यु बात कनके हवे सकदींनि?

¹⁰यु सूंणि के यीशु ल वे तैं उत्तर दे, “तु इस्राएल का लुखुं का घराना मा एक महान शिक्षक छै त्वे तैं वास्तव मा यूं बातों तैं समझण चयणु च?

¹¹मि त्वे बट्टी सच-सच बुल्ण छौं, कि हम जु जंणदा छा उ ही बुल्दा छा, पर जै तैं हम ल देखि वेकी गव्है दींदां छा अर तुम हम जु बुल्दा छा वे पर विश्वास नि करदां।

¹²जब मिल तुम बट्टी धरती पर हूंण वली बातों तैं बोलि, अर तुम विश्वास नि कैरी त मि तुम बट्टी स्वर्ग की बातों तैं बोलु की स्वर्ग मा कि होलो त फिर कनके विश्वास करिल्या?

¹³कुई स्वर्ग पर नि गै पर भस मि मनिख कु नौंनो ही स्वर्ग बट्टी मुड़ी अयुं छों।[11]

¹⁴और जै ढंग से मूसा ल एकांत जंगल म पीतल कु गुरो तैं ऊँचा पर चड़ै वे ही ढंग से जरूरी च कि मि मनिख कु नौंनो भि ऊँचा पर चड़ै जौं।[12]

¹⁵इलै की जु कुई मि पर विश्वास कैरो उ अनन्त जीवन पालो।

¹⁶किलैकि परमेश्वर ल दुनिया का लुखुं बट्टी इन प्रेम रखि कि वेल अपड़ो एकलौतो नौंनो दे दींनि इलै की जु कुई मि पर विश्वास कैरो उ नष्ट नि हो पर अनन्त जीवन पौ।

¹⁷किलैकि परमेश्वर ल अपड़ा नौंना तैं दुनिया का लुखुं पर दंड दींणु कु नि भेजि, पर इलै भेजि कि दुनिया का लोग वेका द्वारा उद्धार पां।

¹⁸जु परमेश्वर का नौंना पर विश्वास करदो वे पर दंड की आज्ञा नि हूंदी पर जु वे पर विश्वास नि करदो उ अपराधी ठैरी चुकि गै इलै की वेल परमेश्वर का एकलौता नौंना का नौं पर विश्वास नि कैरी।[13]

¹⁹अर दंड कि आज्ञा कु कारण यु च कि उज्यला जगत मा ऐ, मनिख्युं ल अंधेरो तैं उज्यला बट्टी जादा अच्छो जांणि किलैकि ऊँका काम बुरा छा।

²⁰किलैकि जु कुई बुरै करदो उ उज्यला बट्टी बैर रखदु अर उज्यला मा नि औंदु कखी इन नि हो कि ऊंका कामों पर भंगार लगै जौं।

²¹पर जु सच पर चलदो, उ उज्यला मा औंदु च किलैकि वेका काम प्रगट हूंनु कि उ जु परमेश्वर चांदु च कि उ कैरो किये गै छा।”

²²यांका बाद यीशु अर वेका चेला यहूदिया प्रान्त मा ऐनी अर उ उख ऊं दगड़ी रै के बपतिस्मा दींण लगि गै।

²³अर यूहन्ना भि ऐनोन गौं मा जु सामरिया क्षेत्र सालेम नगर का संमणी च मा बपतिस्मा दींदु छो किलैकि उख भौत पांणी छो अर लोग ऐ के बपतिस्मा ल्यून्दा छा।

²⁴किलैकि यूहन्ना वे बगत तक जेलखना म नि डले गै छो।

²⁵उख यूहन्ना का चेलों कु कै यहूदियों का अपड़ा धार्मिक रीति का अनुसार हथ धुणौं कु रिवाज छो येका बारा मा झगड़ा हवे।

²⁶अर यूहन्ना का चेला यूहन्ना का संमणी ऐ के वेमा बुल्ण लगी गैनी, “हे गुरु जु मनिख यरदन गाड का पूर्व दिशा मा त्वे दगड़ी छो अर जै की तिल गव्है दे छै, देख, उ बपतिस्मा दींणु च अर सब लोग संमणी औंदा छिन।”

²⁷यूहन्ना ल जवाब दे जब तक मनिख तैं स्वर्ग बट्टी न दिये जौं तब तक उ कुछ नि पै सकद।

²⁸तुम तैं निश्चित रूप बट्टी याद च की मिल तुम तैं कन बतै छो, की मिल बोलि, मि मसीह नि छौं पर वेका अगनैं भिजे गै छौं।[14]

²⁹ब्योला ब्योली से ब्यो कैरी के वीं दगड़ी ही खड़ो हुंदू अर वे तैं सुंणदो च, ब्योला का शब्दो बट्टी भौत खुश हुंदू, अब मेरी या खुशी पूरी हवे गै अर मेरू मन आनन्द बट्टी भुरे गै।

³⁰उ अर अधिक महत्वपूर्ण हवे जौ अर मि कम महत्वपूर्ण हवे जौं।

³¹जु स्वर्ग बट्टी औंदु उ श्रेष्ट च जु धरती बट्टी औंणु उ धरती कु ही च अर धरती कि बात बुल्द जु स्वर्ग बट्टी औंणु उ सबसे बड़ी के च।[15]

³²जु कुछ वेल देखि अर सूंणि वेकी गव्है दींद अर भौत कम लोग वेकी गव्है तैं स्वीकार करदींनि।

³³पर जैल वेकी गव्है स्वीकार कैरेली वेल ईं बात पर मोहर लगै दींनि कि परमेश्वर सचो च।

³⁴किलैकि जै तैं परमेश्वर ल भेजि उ परमेश्वर कि बात बुल्द किलैकि यु ऊई च जै तैं परमेश्वर ल पवित्र आत्मा पूरा ढंग से दीयूं च।

³⁵पिता परमेश्वर नौंना से प्रेम रखदु अर वेल सब चीज वेका हथ मा दियीं छिन।

³⁶जु परमेश्वर का नौंना पर विश्वास करदो अनन्त जीवन वेको ही च पर जु नौंना कि नि मणदो वे तैं अनन्त जीवन नि मिलालो पर परमेश्वर कु दण्ड वे पर ही रालो।