Read Garhwali यूहन्ना 5 Bible Online

यूहन्ना 5 - Garhwali bible

यूहन्ना 5

¹यूं बातों का बाद यहूदियों कु एक त्योहार हवे अर यीशु यरूशलेम शहर मा गै।

²अब यरूशलेम शहर मा, ढिबरा-फाटक का संमणी एक कुण्ड छो, जु इब्रानी भाषा मा बैतसैदा बुलेंदु छो, यु पाँच छत वला ओसारा बट्टी घिरयूं छो।

³यूं मा बिजां बिमार जन कांणा, लूला, लंगड़ा, अर सुख्यां अंग वला पांणी का हिलणै कि उम्मीद मा पुड़यां रौंदा छा।

⁴किलैकि सै बगत पर परमेश्वर का स्वर्गदूत कुण्ड मा उतरी के पांणी तैं हिलौंदा छा पांणी हिलै जांण का बाद जु कुई भि कुण्ड मा पैली प्रवेश करदु छो उ खूब हवे जांद छो चै वेकी कुई भि बिमारी किलै नि हो।

⁵उख एक मनिख छो जु अड़तीस बरसों बट्टी बिमारी मा पुड़यूँ छो।

⁶यीशु ल वे तैं पुड़यूँ देखि के अर यु जांणि के कि उ भौत दिनों बट्टी ईं दशा म पुड़यूँ च वेल वेमा पूछि, क्य तु ठिक हूंण चाँदि छै?

⁷वे बिमार मनिख ल यीशु तैं जवाब दे, हे प्रभु मि दगड़ी कुई आदिम नीच, कि जब पांणी हिलये जांद मि कुण्ड मा प्रवेश कने की कोशिश त करदु छो पर कुई अर ही हमेशा पैली ही ऊख प्रवेश कैरी दींद।

⁸यीशु ल वे लकवा का रोगी कु बोलि, मि त्वे कु बुल्णु छौं उठ अपड़ी खाट उठै के चल फिर।”

⁹उ मनिख एकदम ठिक हवे के अर अपड़ी खाट उठै के सभियूं का संमणी बट्टी निकली के चलण फिरण लगि गै, जै दिन यु सब कुछ हवे वे दिन यहूदियों कु विश्राम कु दिन जु परमेश्वर को पवित्र दिन च छो।

¹⁰इलै यहूदी अधिकारियों ल वे बट्टी जु ठिक हवे छो बुल्ण लगि गैनी “आज त यहूदियों कु विश्राम कु दिन जु परमेश्वर को पवित्र दिन च मूसा की व्यवस्था का अनुसार त्वे तैं खाट उठै कै लिजांण ठिक नि च।”[22]

¹¹वेल ऊं तैं जवाब दींनि जैल मि तैं ठिक कैरी वेल मि बट्टी बोलि, अपड़ी खाट उठौ अर चल फिर।

¹²ऊंल वेमा पूछि, उ कु आदिम च जैल त्वे मा बोलि, खाट उठौ अर चल फिर?

¹³पर जु चंगा हवे गै छो उ नि जंणदु छो कि उ को च किलैकि यीशु भीड़ मा ओझल हवे गै छो।

¹⁴कुछ बगत का बाद उ यीशु तैं यरूशलेम शहर का मन्दिर का चौक मा मिली। यीशु ल वेमा बोलि, देख तु ठिक हवे गै दुबरा पाप नि कैरी इन नि हो कि यांसे कुई भारी विपदा त्वे पर ऐ जौ।

¹⁵वे मनिख न जै के यहूदियों का अगुवों मा बोलि दींनि कि जैल मि तैं ठिक कैरी उ यीशु च।

¹⁶यु कारण यहूदी अगुवा यीशु तैं सतौण लगि गैनी किलैकि उ इन-इन काम यहूदियों कु विश्राम कु दिन जु परमेश्वर को पवित्र दिन च करदु छो।

¹⁷यां पर यीशु ल वेमा बोलि, मेरू पिता परमेश्वर हमेशा काम करदो अर मि तैं भि काम कन चयणु च।

¹⁸किलैकि यीशु ल यु शब्द बोलि इलै यहूदियों का अगुवा ल अर भि जादा वे तैं मरणै की कोशिश कैरी कि उ भस यहूदियों कु विश्राम कु दिन जु परमेश्वर को पवित्र दिन च कि विधि तैं तुड़द, पर परमेश्वर तैं अपड़ो बुबा बोलि के अफ तैं परमेश्वर का तुल्या ठैरांदु च।

¹⁹यां पर यीशु ल ऊंमा बोलि, “मि तुम मा सच-सच बुल्णु छौं, नौंनो खुद कुछ नि कैर सकद भस उ जु पिता परमेश्वर तैं करद दिखद किलैकि जौं-जौं कामों तैं उ करद च ऊं तैं मि भि वीं रीति से करदु

²⁰किलैकि पिता परमेश्वर मि से प्रेम करदु अर जु-जु काम उ अफ करदो ऊं सब वे तैं दिखोंदु अर उ यांसे भि बड़ा काम वे तैं दिखालो इलै की तुम अचम्भो कैरा।

²¹किलैकि जन पिता परमेश्वर मुरयां लुखुं तैं ज्यूँदो करदु च उन ही नौंनो भि जै तैं चांदु ऊं तैं जिलौदु च।

²²इथग ही न पर पिता परमेश्वर कैकी जांच कैरी के न्याय नि करदो पर न्याय कनु कु सब काम नौंना तैं दियुं च।

²³पिता परमेश्वर का द्वारा नौंना कु न्याय कनु कु अधिकार दींण का परिणाम नौंना कु आदर च जु नौंना कु आदर नि करदो उ पिता परमेश्वर कु जैल वे तैं भेजि आदर नि करदो।

²⁴मि तुम मा सच-सच बुल्णु छौं जु मेरू वचन सूंणि के मेरा भिजण वला पर विश्वास करदो अनन्त जीवन वेकु च अर वे पर दण्ड नि दिये जालो पर उ अनन्तकाल की मौत बट्टी बची जालो अर पैली बट्टी ही वेल अनन्त जीवन मा प्रवेश कैरी येले।

²⁵मि तुम मा सच-सच बुल्णु छौं उ बगत औंणु च अर अब ही च ज्यांमा मुरयां लोग परमेश्वर का नौंना की आवाज सुणला अर जु सुणला उ हमेशा कु जीला।

²⁶किलैकि जैं रीति बट्टी पिता परमेश्वर अफ मा जीवन रखदु च वीं रीति बट्टी वेल मि तैं भि यु अधिकार दियुं च कि अपड़ा आप मा जीवन रखु

²⁷अर किलैकि मि मनिख कु नौंनो छों पिता परमेश्वर ल मि तैं सभि लुखुं पर न्याय कनु कु अधिकार दियुं च इलै की मि मनिख कु नौंनो छों।

²⁸यांसे अचम्भो नि कैरा किलैकि उ बगत औंदु च कि जथग उ सब लोग जु मुरयां अर कब्रों मा छिन, उ सब, मि मनिख कु नौंना की आवाज सूंणि के ज्यूँदो हवे के उठ खड़ा होला।

²⁹जौं ल अच्छी जिंदगी जीं च उ अनन्त जीवन पांणु कु ज्यून्दो होला, अर उ जु बुरै मा जीवन बितांदा छा उ भंगारी ठैरे जांण कु जी उठला।[23]

³⁰मि अपड़ा आप बट्टी कुछ नि कैरी सकदु मि लुखुं कु न्याय उन ही करदु जन पिता परमेश्वर मि तैं ऊंकु न्याय कनु कु बुल्दो अर मेरू न्याय सचो च किलैकि मि अपड़ी इच्छा न पर अपड़ा भिजण वला कि इच्छा चांदु छौं।

³¹जु मि अफी अपड़ी गव्है द्यो त मेरी गव्है सच नि च।

³²एक च जु मेरा पिता परमेश्वर च उ भि मेरा बारा मा गव्है दींदु च अर मि जंणदु छौं कि मेरी जु गव्है उ दींदु च व सच च।

³³तुम ल यूहन्ना बप्तिस्मा दींणवला का संमणी संदेश वलो भेजि अर वेल सचै कि गव्है द्ये।

³⁴पर मि अपड़ा बारा मा मनिख कि गव्है नि चांदु फिर भि मिल तुम तैं व गव्है का बारा मा बतयूं च जु यूहन्ना ल दे छैं कि तुम उद्धार पै साका।

³⁵यूहन्ना एक दिवडा का जन च जु जलद अर चमकदु छो अर तुम तैं कुछ देर तक वेका उज्यला मा मगन हूंण अच्छो लगि।

³⁶मि मा यूहन्ना की गव्है से श्रेष्ठ गव्है च उ काम जु पिता परमेश्वर ल मि तैं पूरो कनु कु दियुं च उ ही मेरा बारा मा गव्है दींदो च जु काम मि करदो छौं उ मेरा गव्है दींदो च कि पिता परमेश्वर ल मि तैं भेजि।

³⁷अर पिता जैल मि तैं भेजि वेल मेरी गव्है द्ये। तुम ल न कभि वेकी आवाज सूंणि अर न ही वे तैं अमणी-संमणी देखि

³⁸अर वेका शिक्षा तैं मन मा स्थिर नि रखदां किलैकि तुम मि पर विश्वास नि करदां जै तैं परमेश्वर ल भेजि।

³⁹तुम परमेश्वर का वचन मा ध्यान से पैढ़ी कै ढूँणदा छा किलैकि समझदा छा कि वेमा अनन्त जीवन तुम तैं मिल्द अर उ ही वचन च जु मेरी गव्है दींदु च

⁴⁰यु सब हूंण पर उ ही तुम अनन्त जीवन पांणु कु मि मा आंण नि चदयां।

⁴¹मि मनिख्युं की प्रशंसा की आशा नि करदु।

⁴²किलैकि मि तुम तैं जंणदु छौं कि तुम परमेश्वर बट्टी प्रेम नि करद्यां।

⁴³मि अपड़ा पिता परमेश्वर का अधिकार से अयुं छौं अर तुम मि तैं स्वीकार नि करदां इलै कुई और अपड़ा अधिकार ल औ त वे तैं स्वीकार कैरी लील्या।

⁴⁴तुम मि पर विश्वास नि कैर सकदा किलैकि तुम एक दुसरा बट्टी प्रशंसा चांदा छा अर तुम एकमात्र परमेश्वर बट्टी प्रशंसा पाणै कि कोशिश नि करदां?

⁴⁵इन नि समझा कि मि पिता का संमणी तुम पर भंगार लगौलु तुम पर भंगार लगौंण वलो त मूसा द्वारा लिखीं परमेश्वर की व्यवस्था च जै पर तिल अपड़ी आस रखि च तुम पर भंगार लगाला।

⁴⁶जु तुम मूसा पर विश्वास करद्यां, त मि पर भि विश्वास करद्यां, इलै की वेल मेरा बारा मा परमेश्वर का वचन का लेखों मा लिख्युं च।[24]

⁴⁷किलैकि तुम वेकी व्यवस्था पर विश्वास नि करद्यां त तुम जरुर यु पर भि विश्वास नि करिल्या की मि की बुल्णु छो?”