Read Garhwali यूहन्ना 6 Bible Online

यूहन्ना 6 - Garhwali bible

यूहन्ना 6

¹यूं बातों का बाद यीशु गलील जिला कि झील मतलब तिबरियास कि झील का छाला मा गै।

²अर एक बड़ी भीड़ ऊंका पिछनै हवे गै किलैकि जु चमत्कार यीशु बिमारों पर दिखांदु छों उ ऊं तैं दिखदा छा।

³तब यीशु डांडा पर चढ़ी के अपड़ा चेलों का दगड़ी उख बैठी गैनी।

⁵तब यीशु ल अपड़ा आंखा उठै के एक बड़ी भीड़ तैं अपड़ा संमणी औंण देखि त वेल फिलिप्पुस मा बोलि हम यूँका खांणु कु कख बट्टी रुट्टि मोल ल?

⁶ऊंल या बात वे तैं परखणु कु बोलि, किलैकि उ अफ जंणदा छा कि मिल क्य कन।

⁷फिलिप्पुस ल यीशु तैं जवाब दे, तीन रुट्टियुं की कीमत द्वी सौ दिन की मजदूरी का बराबर होली, यु भि यूं कु पूरी नि होलि, पर ऊंमा बट्टी हरेक तैं जर जरा मिली जौ।

⁸वेका चेलों मा बट्टी शमौन पतरस का भैय अन्द्रियास ल वेमा बोलि,

⁹इख एक नौंनो च जै मा जौं कि पाँच रुट्टि छिन अर द्वी माछा छिन पर इथग लुखुं कु उ क्य छिन?

¹⁰यीशु ल बोलि, लुखुं तैं बैठे द्या। वीं जगह म भौत घास छै तब लोग जौं मा पाँच हजार आदिम लगभग छा उ सभि बैठी गैनी।

¹¹तब यीशु ल रुट्टियुं तैं पकड़ी अर धन्यवाद कैरी के बैठण वलो तैं बांटि दींनि अर उन ही माछों मा बट्टी जथग उ चांदा छा बांटि दींनि।

¹²जब सभि खै के छक हवे गैनी त यीशु न अपड़ा चेलों म बोलि, बचयां टुकड़ों तैं बटोरी ल्या कि कुछ ढुलै नि जौं।

¹³अर ऊंल बटोरी अर जौं कि पाँच रुट्टियुं का टुकड़ों बट्टी जु खांण वलो मा बट्टी बचि गै छा वांका बारह ठुपरा भुरिनि।

¹⁴तब जु चमत्कार यीशु ल कैरी के दिखै वे तैं उ लोग देखि के बुल्ण लगि गैनी उ परमेश्वर का तरपां बट्टी बुल्ण वलो जु दुनिया मा औंण वलो छो पक्को यूई च।[25]

¹⁵यीशु यु जांणि के कि उ मि तैं राजा बनांणु कु पकड़ण चांणा छिन त डांडा पर यखुली चलि गै।

¹⁶जब रुमुक हवे त ऊंका चेला झील का छाला गैनी

¹⁷अर नाव पर चढ़ी के झील का छाला कफरनहूम शहर मा जांण बैठी गैनी। वे बगत अंधेरो हवे गै छो अर यीशु अभि तक ऊँका संमणी नि ऐ छा।

¹⁸आंधी का कारण झील मा बौछार औंण बैठी गै छै।

¹⁹जब उ पुंगड़ा-पुंगड़ा पाँच या छह किलोमीटर का लगभग निकली गैनी त ऊंल यीशु तैं झील मा चलदो अर नाव का संमणी औंदु देखि अर चेला घबरै गैनी।

²⁰पर यीशु ल ऊंमा बोलि, मि छौं डैरा न।

²¹अर चेला यीशु तैं नाव पर चड़ौंणु कु राजि हवे गैनी अर एकदम व नाव वीं जगह मा जै पौंछि जख उ तैं जांण छा।

²²दुसरा दिन वीं भीड़ ल जु झील का छाला पर खड़ी छै यु देखि कि इख एक तैं छोड़ी के और कुई नाव नि च अर यीशु अपड़ा चेलों का दगड़ी वीं नाव पर नि चढ़ी पर भस ऊंका ही चेला गै छा।

²³तब दुसरी नाव तिबिरियास शहर बट्टी वीं जगह का संमणी ऐनी जख ऊंल प्रभु तैं धन्यवाद कना का बाद रुट्टि खै छै।

²⁴इलै जब भीड़ ल देखि कि इख न यीशु छिन अर न ऊंका चेला त उ भि नावों पर चढ़ी के यीशु तैं ढुंडदि कफरनहूम शहर पौंछिनी।

²⁵झील का छाला जब उ यीशु तैं मिलिनि त ऊंल बोलि, हे गुरु तु इख कब ऐ?

²⁶यीशु ल ऊं तैं जवाब दे मि तुम मा सच-सच बुल्ण छौं तुम मि तैं इलै नि ढुंडणा छा कि तुम ल चमत्कार दिखिनि पर इलै कि तुम रुट्टि खै के छकि गै छा।

²⁷खांणु कु मेहनत नि कैरा पर वे खांणु कु जु अनन्त जीवन तक ठैरद मि मनिख कु नौंनो तुम तैं यु खांणु दयुलु किलैकि पिता परमेश्वर ल मि तैं इन कनु कु अधिकार दियुं च।

²⁸ऊंल यीशु तैं पूछि, परमेश्वर का कामों तैं कनु कु हम क्य करां?

²⁹यीशु ल ऊं तैं जवाब दींनि परमेश्वर चांदु च की तुम वे पर विश्वास कैरा जै तैं वेल भेजि, वे पर विश्वास कैरा

³⁰तब ऊंल यीशु तैं पूछि, तु कु वलो चमत्कार को चिन्ह दिखौंदी कि हम वे तैं देखि के त्वे पर विश्वास कैरा? तु कु वलो काम दिखौंदि?

³¹हमारा पूर्वजों ल एकांत जंगल मा मन्ना खै जन लिख्युं च, मूसा ल ऊं तैं खांणु कु स्वर्ग बट्टी रुट्टि दींनि [26]

³²यीशु ल ऊंमा बोलि मि तुम मा सच-सच बुल्ण छौं कि तुम तैं व रुट्टि स्वर्ग बट्टी मूसा ल नि द्ये पर मेरू पिता परमेश्वर तुम तैं सच्ची रुट्टि स्वर्ग बट्टी दींदु च।

³³किलैकि परमेश्वर की रुट्टि उ ही च जु स्वर्ग बट्टी उतरी के दुनिया का लुखुं तैं जीवन दींद।

³⁴तब ऊंल यीशु मा बोलि, हे प्रभु ईं रुट्टि हम तैं सदनी दींणु रौ।

³⁵यीशु ल ऊंमा बोलि, अनन्त जीवन दींण वली रुट्टि मि छों जु मि मा औंणु च उ कभि भि भुखी नि होलो अर जु मि पर विश्वास करदो च उ कभि तिसलो नि होलो।

³⁶पर मिल तुम मा बोलि, कि भलै ही तुम मि तैं दिखदा छा पर तुम मि पर विश्वास नि करदां।

³⁷जु कुछ पिता परमेश्वर मि तैं दींद उ सब मि मा आलो अर जु कुई मि मा आलो वे तैं मि कभि नि निकललु।

³⁸किलैकि मि अपड़ी मनसा न पर अपड़ा भिजण वला कि मनसा पूरी कनु कु स्वर्ग बट्टी उतरयूँ छौं

³⁹अर मेरा भिजण वला कि मनसा या च कि जु कुछ वेल मि तैं दे वां बट्टी मि कुछ नि हरचौं पर वे तैं आखरी दिन फिर ज्यूँदो उठालो।

⁴⁰किलैकि मेरा पिता परमेश्वर कि मनसा याचा कि जु कुई मि पर विश्वास करदो उ अनन्त जीवन पौ अर मि वे तैं अंत का दिन मा फिर ज्यूँदो उठौलु।

⁴¹इलै यहूदियों का अगुवा यीशु पर कुड़कुड़ाण लगि गैनी किलैकि ऊंल बोलि छो ज्वा रुट्टि स्वर्ग बट्टी उतरी व मि छौं।

⁴²अर ऊंल बोलि क्य यु यूसुफ कु नौंनो यीशु नि च जैका ब्वे-बुबा तैं हम जंणदा छा? त उ कनके बुल्णु च कि मि स्वर्ग बट्टी उतरयूँ छौं?

⁴³यीशु ल ऊं तैं जवाब दींनि कि आपस मा नि कुड़कुड़ावा।

⁴⁴कुई मि मा नि ऐ सकद जब तक कि पिता जैल मि तैं भेजि वे तैं खींचि नि ल्यो अर मि वे तैं अंत का दिन मा ज्यूँदो उठै दयुलु।

⁴⁵परमेश्वर का तरपां बट्टी बुल्ण वलो का लेखों मा यु लिख्युं च कि उ सब परमेश्वर का तरपां बट्टी सिखयां होला। जु कैल पिता परमेश्वर बट्टी सूंणि अर सीखी उ मि मा आंणु च।[27]

⁴⁶कैल पिता परमेश्वर तैं नि देखि मि यखुली छों जु परमेश्वर कि तरपां बट्टी अयुं छों जैल वे तैं देखि

⁴⁷मि तुम मा सच-सच बुल्ण छौं कि जु कुई मि पर विश्वास करदो अनन्त जीवन वेको ही च।

⁴⁸अनन्त जीवन दींण वली रुट्टि मि छों।

⁴⁹तुमारा बाप दादों ल एकांत जंगल मा मन्ना खै अर मोरि गैनी।

⁵⁰य व रुट्टि च ज्वा स्वर्ग बट्टी उतरदी इलै की मनिख वामा बट्टी खौ अर नि मोरू।

⁵¹जीवन कि रुट्टि ज्वा स्वर्ग बट्टी उतरी मि छौं। जु कुई ईं रुट्टि मा बट्टी खौ त हमेशा ज्यूँदो रालो अर ज्वा रुट्टि मि दुनिया का जीवन कु दयुलु उ मेरी देह च।

⁵²ईं बात पर यहूदियों ल आपस मा बोलि के झगड़ा कन बैठी गैनी कि यु आदिम कनके हम तैं अपड़ो देह खांणु कु दे सकद?

⁵³यीशु ल ऊंमा बोलि, मि तुम मा सच-सच बुल्ण छौं कि जब तक मि मनिख कु नौंनो कु देह नि खांदो, अर मेरू ल्वे नि प्यूंदों, तुम मा जीवन नि च।

⁵⁴जु मेरी देह खांदो अर मेरू ल्वे प्यूंदों च अनन्त जीवन वेको च अर मि वे तैं न्याय का दिन ज्यूँदो कैरी दयुलु।

⁵⁵किलैकि मेरी देह सच मा खाणे कि चीज च अर मेरू ल्वे सच मा पीणैं कि चीज च।

⁵⁶जु मेरी देह खांदु अर मेरू ल्वे पींदु उ मि मा मजबूत बणयूँ रौंदु च अर मि वेमा बणयूँ रौंदु।

⁵⁷मेरा पिता परमेश्वर जैल मि तैं भेजि उ जीवन दींद जन वेल मि तैं जीवन दये वे जन मि भि वे आदिम तैं जीवन दयुलु जु मेरी देह तैं खांदु।

⁵⁸ज्वा रुट्टि स्वर्ग बट्टी उतरी च, पूर्वजों ल खै, अर मोरि गैनी, पर जु कुई ईं रुट्टि तैं खालो उ सदनी ज्यूँदो रालो।

⁵⁹यूं बातों तैं यीशु ल कफरनहूम शहर का एक यहूदियों का मिलणा का भवन मा उपदेश दींणा का बगत मा बुलिनि।

⁶⁰यीशु का चेलों मा बट्टी भौतों ल यु सूंणि के बोलि यु त कठिन शिक्षा च ईं तैं कु मांणी सकद?

⁶¹यीशु ल अपड़ा मन मा यु जांणि के कि मेरा चेला आपस मा ईं बात पर कुड़कुड़ाणा छिन ऊं बट्टी पूछि क्य यु तुम तैं मि पर विश्वास कन से रुकदो च?

⁶²जु तुम मि मनिख कु नौंना तैं जख उ पैली छो उख मथि जांण देखि ल्या त क्य होलो?[28]

⁶³परमेश्वर की आत्मा जु जीवन दींण वली च देह बट्टी कुछ फैदा नीच जु बात मिल तुम बट्टी बुलीं छिनी उ आत्मा च, अर जीवन भि दींद।

⁶⁴अर तुम मा कुछ इन छिन जु मि पर विश्वास नि करदींनि किलैकि यीशु पैली बट्टी जंणदु छो कि जु विश्वास नि करदींनि ऊं कु छिनी अर कु मि तैं पकड़वालो।

⁶⁵अर यीशु ल बोलि, इलै मिल तुम मा बोलि छो कि जब तक कै तैं पिता परमेश्वर कि तरपां बट्टी यु वरदान नि दिये जौं तब तक उ मि मा नि ऐ सकदु।

⁶⁶ईं बात पर यीशु का चेलों मा बट्टी भौत सी उल्टा फिरी गैनी अर वांका बाद ऊं दगड़ी नि गैनी।

⁶⁷तब यीशु ल ऊं बारहों बट्टी बोलि क्य तुम भि जांण चांणा छा?

⁶⁸शमौन पतरस ल यीशु तैं जवाब दे कि हे प्रभु हम कै मा जां? अनन्त जीवन त त्वे मा ही च

⁶⁹अर हम ल विश्वास कैरी अर जांणि भि ग्यां कि तु एक पवित्र जन छै जै तैं पिता परमेश्वर ल भेजि।

⁷⁰यीशु ल ऊं तैं जवाब दींनि क्य मिल तुम बारहों तैं नि चुणि? तब भि तुम मा बट्टी एक आदिम शैतान का वश मा च।

⁷¹यु वेल शमौन इस्करियोती का नौंना यहूदा इस्करियोती का बारा मा बोलि, जबकि उ बारहों शिष्यों मा बट्टी एक छो उ यीशु का दगड़ी विश्वासघात कन वलो छो।