Read Garhwali यूहन्ना 7 Bible Online

यूहन्ना 7 - Garhwali bible

यूहन्ना 7

¹यूं बातों का बाद यीशु गलील जिला मा घुमणा रैनी किलैकि यहूदियों का अगुवों ल ऊं तैं मरणै की कोशिश कना छा इलै यीशु यहूदिया प्रान्त मा घुमण नि चांणा छा।

²यहूदियों कु झोपड़ियों का डेरा कु त्यौहार आंण वलो छो।[29]

³इलै यीशु का भयों ल ऊंमा बोलि, इख बट्टी यहूदिया प्रान्त कु जा कि जौं कामों तैं तु करली ऊं तैं तेरु चेला भि दिखा।

⁴इलै उ चांदा छा की लोग तुमारा बारा मा जांणा, त त्वे तैं खुला तोर पर सब का संमणी कामों तैं कन चयणु च, जु तु यु काम करदो छै, त अफ तैं जगत मा प्रगट कैर।

⁵किलैकि यीशु का भैय भि वे पर विश्वास नि करदा छा।

⁶तब यीशु ल ऊंमा बोलि, मेरू बगत अभि तक नि ए, पर तुम कु कभि बगत ठिक च।

⁷दुनिया का लोग तुम बट्टी बैर नि कैरी सकदींनि पर उ मि बट्टी बैर करदींनि किलैकि मि वेका विरोध मा ईं गव्है दींदु छौं कि वेका काम बुरा छिन।

⁸तुम त्योहार मा जावा पर मि अभि यु त्योहार मा नि जांणु किलैकि अभि तक मेरू बगत पूरो नि हवे।

⁹यीशु उ बट्टी यूं बातों तैं बोलि के गलील जिला मा ही रै गै।

¹⁰पर जब यीशु का भैय त्योहार मा चलि गैनी, तब उ अफ भि प्रगट मा नि, पर बगैर कै तैं पता चल्यां गुप्त त्योहार मा चलि गै।

¹¹यहूदियों का त्योहार मा यीशु तैं यु बोलि के खुज्योंण बैठी गैनी कि उ कख च?

¹²अर लुखुं का बीच यीशु का बारा मा चुप चुपिके भौत सी बात हवे गैनी : कुछ बुल्दा छा उ भलो मनिख च “अर कुछ बुल्दा छा न उ लुखुं तैं भरमांदु च”

¹³यहूदियों का अगुवों का डौर का बाना कुई आदिम यीशु का बारा मा खुलि के नि बुल्दा छा।

¹⁴जब त्योहार का अधा दिन बीति गैनी त यीशु यरूशलेम शहर का मन्दिर मा जै के उपदेश दींण बैठी गै।

¹⁵तब यहूदियों ल चकित हवे के बोलि, यु तैं बगैर पैढ़ी कै परमेश्वर का वचन कु ज्ञान कख बट्टी मिली?

¹⁶यीशु ल ऊं तैं जवाब दींनि मेरू उपदेश मेरू अपड़ा नि च पर यु परमेश्वर का तरपां बट्टी च जैल मि तैं भेजि।

¹⁷इलै कुई वेकी इच्छा पर चलण चांदो उ जांणि ल्यो की मेरी शिक्षा परमेश्वर की तरपां बट्टी औंद या मेरा अपड़ा अधिकार बट्टी न, या मेरा अपड़ी तरपां बट्टी नि बुल्द।

¹⁸जु अपड़ी तरपां बट्टी कुछ बोलु उ अपड़ी ही बड़ै चांद पर जु अपड़ा भिजण वला कि बड़ै चांद उ ही ईमानदार च अर वेमा बेमानी नि च।

¹⁹क्य परमेश्वर का तरपां बट्टी बुल्ण वला मूसा ल व्यवस्था अफ दे? तब भि तुम मा बट्टी कुई मूसा द्वारा लिखीं परमेश्वर की व्यवस्था पर नि चलदो। तुम किलै मि तैं मरण चांणा छा?

²⁰लुखुं ल जवाब दे त्वे मा दुष्टात्मा च। कु त्वे तैं मरण चांणु च?

²¹यीशु ल ऊं तैं जवाब दींनि यहूदियों का विश्राम का दिन जु परमेश्वर कु पवित्र दिन च मि एक चमत्कार कैरी अर तुम सब भैंचक्क छा।

²²इलै मूसा ल तुम तैं खतना कि आज्ञा दीं च इन नि च कि व मूसा कि तरपां बट्टी च पर बापदादों बट्टी चलदी औंणि च अर तुम यहूदियों का विश्राम का दिन जु परमेश्वर कु पवित्र दिन च मनिख्युं कु खतना करदां छा।[30]

²³जब यहूदियों का विश्राम का दिन जु परमेश्वर कु पवित्र दिन च मनिख्युं को खतना करे जांदु किलैकि मूसा द्वारा लिखीं परमेश्वर की व्यवस्था कि आज्ञा टले नि जौं अर तुम मि पर किलै गुस्सा कना छा कि यहूदियों का विश्राम का दिन जु परमेश्वर कु पवित्र दिन च येल एक मनिख तैं पूरा ढंग से ठिक कैरी।

²⁴मुक देखि के न्याय नि करयां पर सचै देखि के न्याय कैरा।[31]

²⁵तब कथग ही यरूशलेम शहर का रौंण वला बुल्ण लगि गैनी क्य यु हमारो अगुवा नि च जै तैं मरणै कि कोशिश किये जांणि च?

²⁶पर देखा उ त सभियूं का संमणी बात करदु अर कुई वेकु कुछ नि बुल्द क्य सम्भव च की ऊं सच-सच जांणेली छो कि यु ही मसीह च?

²⁷यु तैं त हम जंणदा छा कि यु कखौ च। पर मसीह जब आलो त कुई नि जंणुलो कि उ कखौ च।

²⁸तब यीशु ल यरूशलेम शहर का मन्दिर मा उपदेश दींण बगत धै लगै के बोलि, तुम जंणदा छा अर यु भि जंणदा छा कि मि कखौ छौं। मि त अफ बट्टी नि अयुं पर मेरा भिजण वलो विश्वासयोग्य च वे तैं तुम नि जंणदा।

²⁹पर मि परमेश्वर तैं जंणदु छौं किलैकि मि वेकी तरपां बट्टी छौं अर वेल मि तैं भेजि।

³⁰यां पर अगुवों ल वे तैं पकड़ण चै तब भि कैल भि वे तैं गिरफ्तार नि कैरी साकी किलैकि वेको मुरण कु ठिक बगत अभि नि ऐ छो।

³¹तब भि भीड़ मा बट्टी भौत सी लुखुं ल वे पर विश्वास कैरी अर बुल्ण लगी गैनी कि मसीह जब आलो त क्य यांसे जादा चमत्कार दिखालो जु येल दिखेनि?

³²फरीसियों ल लुखुं तैं यीशु का बारा मा ईं बात तैं सुरुक-सुरुक करद सूंणि अर प्रधान याजक अर फरीसियों ल यीशु तैं पकड़णु कु मन्दिर का रखवला भिजिनि।

³³ईं बात पर यीशु ल बोलि मि जरा देर तक और तुम दगड़ी छौं तब भिजण वला मा लौटि जौलु।

³⁴तुम मि तैं ढुंडिलया पर नि पैल्या अर जख मि छौं उख तुम नि ऐ सकदां।

³⁵यहूदियों का अगुवों ल आपस मा, “बोलि यु कख जालो कि हम यु तैं नि पौला? क्य उ, ऊं यहूदी लुखुं का बारा मा बुल्दो छो अर क्य अन्यजाति छा जु इस्राएल भैर बिखरी के रौंदा छा अर यूनानी छा क्य उ तैं भि उपदेश दयालो?

³⁶वेको क्य मतलब च की तुम मि तैं ढुंडिलया, पर नि पैल्या अर जख मि छौं उख तुम नि ऐ सकदां?”

³⁷त्योहार का आखिर दिन जु मुख्य दिन छो यीशु खड़ो हवे गै अर धै लगै के बोलि, जु कुई तिसलो च त मि मा औ अर प्यो।[32]

³⁸जु मि पर विश्वास करलो जन परमेश्वर का वचन लिख्युं च, वेका हृदय मा बट्टी जीवन का पांणी की गाड जु जीवन दींद निकलली।

³⁹यीशु ल यु वचन पवित्र आत्मा का बारा मा बोलि, जै तैं विश्वास कन वला पांण वला छा किलैकि पवित्र आत्मा अभि तक नि उतरी छो, परमेश्वर ल अब तक यीशु की बड़ै तैं प्रगट नि कैरी छो।

⁴⁰तब भीड़ मा बट्टी कै कैल यूं बातों तैं सूंणि के बोलि, “सचमुच यु उ परमेश्वर का तरपां बट्टी बुल्ण वलो च जैकी हम जग्वाल कना छा।”[33]

⁴¹दुसरा लुखुं ल बोलि, कि यु मसीह च। पर कै कैल बोलि, किलै? क्य मसीह गलील जिला बट्टी आलो?

⁴²परमेश्वर का वचन मा लिख्युं च कि मसीह राजा दाऊद का वंश बट्टी अर बैतलहम गौं बट्टी आलो जख राजा दाऊद रौंदु छो।[34]

⁴³अर यीशु का कारण लुखुं का बीच मा फूट पोड़ि गै।

⁴⁴ऊंमा बट्टी कथग वे तैं पकड़ण चांदा छा जु अगुवा छा, तब भि कैल वे तैं गिरफ्तार नि कैरी।

⁴⁵तब सिपै प्रधान याजक अर फरीसियों का संमणी ऐ, अर ऊंल ऊंमा बोलि, तुम वे तैं किलै नि ल्या?

⁴⁶सिपैयूं ल जवाब दींनि कै मनिख ल कभि इन बात नि बोलि?

⁴⁷तब फरीसियों ल ऊंकु बोलि, “क्य तुम भि भड़कै त नि ग्यां।

⁴⁸क्य शासक या फरीसियों मा बट्टी कैल भि वे पर विश्वास कैरी?

⁴⁹पर यु लोग जु मूसा द्वारा लिखीं परमेश्वर की व्यवस्था नि जणदींनि परमेश्वर का द्वारा श्रापित छिन।”

⁵⁰नीकुदेमुस ल, जु पैली यीशु का संमणी ऐ छो अर ऊंमा बट्टी एक छो वेल बोलि,

⁵¹क्य हमारी व्यवस्था कै मनिख तैं तब तक भंगारी ठैरांदी जब तक कि पैली वे तैं सुणै नि जौ कि उ क्य करद।

⁵²ऊंल वे तैं जवाब दींनि, “क्य तू भि गलील जिला कु छै? परमेश्वर का वचन मा ढूँढ़ अर तू जंणिली कि गलील बट्टी कुई परमेश्वर का तरपां बट्टी बुल्ण वलो प्रगट नि हवे सकदु।”

⁵³तब सभि अपड़ा-अपड़ा घौर कु चली गैनी।