Read Garhwali यूहन्ना 8 Bible Online

यूहन्ना 8 - Garhwali bible

यूहन्ना 8

¹यीशु अपड़ा चेलों का दगड़ा मा जैतून डाला का डांडा[35] का पौड़ पर गै।

²अर हैंकि सुबेर उ यरूशलेम शहर का मन्दिर का चौक मा वापिस ऐ अर भौत सैरा लोग वेका संमणी ऐनी अर उ बैठी गै अर ऊं तैं शिक्षा दींण लगि गै।

³जब उ बुल्णु ही छों त धार्मिक व्यवस्था तैं सिखांण वला अर फरीसियों ल एक व्यभिचार मा पकड़ी जनन तैं ले के ऐनी अर वीं तैं भीड़ का संमणी खड़ी कैर दींनि

⁴“तब ऊंल यीशु बट्टी बोलि, गुरु जी या जनन व्यभिचार कन मा पकड़े गै।

⁵मूसा द्वारा लिखीं परमेश्वर की व्यवस्था मा जु कुई आदिम अर जनन इन काम करदु ऊं पर ढुंग्यो मारि कै मरणै की आज्ञा दीं च ऊंल यीशु बट्टी बोलि, तु ईं जनन का बारा मा कि बुल्दी? कि क्य कन चयणु च?”[36]

⁶ऊंल यीशु तैं परखणु कु या बात बोलि, कि यीशु पर भंगार लगांणु कु कुई बात मिलो, पर यीशु भस झुकि गै अर अंगुली ल धरती पर लिखण लगि गै।

⁷जब उ यीशु बट्टी पुछदी रैनी त यीशु ल सीधा खड़ो हवे के ऊंमा बोलि तुम मा बट्टी जैल कभि पाप नि कैरी हो उ पैली वीं पर ढुंगो मारा।[37]

⁸अर यीशु फिर झुकि कै धरती पर लिखण बैठी गैनी।

⁹पर उ यु सूंणि के बड़ों से ले के छुट्टों तक एक-एक कैरी कै यु जंणदा की उ सभि पापी छिन निकली गैनी, अर भस यीशु अर जनन ऊखी रै गै।

¹⁰यीशु ल सीधा खड़ो हवे के वीं मा बोलि, हे नारी उ कख गैनी? क्य कैल त्वे पर दंड की आज्ञा नि दींनि?

¹¹वीं ल बोलि नि दींनि। यीशु ल बोलि, मि भि त्वे पर दंड कि आज्ञा नि दींदु अब घौर चलि जा अर अगनैं कु पाप मा जीवन नि बितै।

¹²तब यीशु ल फिर लुखुं मा बोलि, “दुनिया कु उज्यला मि छौं जु मेरा पिछनै हवे जालो उ अंधेरा मा नि चललो पर उ उज्यला तैं पालो जु अनन्त जीवन दींद।” [38]

¹³फरीसियों ल वेमा बोलि, किलैकि तु भस अपड़ी ही प्रशंसा करदु छै।

¹⁴यीशु ल ऊं तैं जवाब दे भले ही मि अपड़ी गव्है अफी दींदु पर फिर भि मेरी गव्है ठिक च किलैकि मि जंणदु छौं कि मि कख बट्टी ऐ छौं अर कख जांणु छो पर तुम नि जंणदा की मि कख बट्टी औंदु छों या कख कु जांणु छों।

¹⁵तुम मनिख्युं का अनुसार जांच के न्याय नि करदु।

¹⁶अर जु मि जांच के न्याय भि कैरू त मेरू न्याय सच्चो च किलैकि मि अफी न पर मि पिता परमेश्वर का दगड़ी छों जैल मि तैं भेजि।

¹⁷अर मूसा द्वारा लिखीं परमेश्वर की व्यवस्था मा ही लिख्युं च, कि द्वी जनों कि गव्है मिलिके ठिक हूंदी

¹⁸एकता मि अफी अपड़ी गव्है दींदु अर हैंको पिता परमेश्वर मेरी गव्है दींदु जैल मि तैं भेजि।[39]

¹⁹ऊंल यीशु मा पूछि, तुमारो पिता परमेश्वर कख च? यीशु ल जवाब दे न तुम मि तैं जंणदा अर न मेरा पिता परमेश्वर तैं, जु मि तैं जंणदा त मेरा पिता परमेश्वर तैं भि जंणदा।

²⁰यु बातों तैं वेल यरूशलेम शहर का मन्दिर का चौक मा उपदेश दींण का भंडार घौर मा बोलि, अर कैन वे तैं नि पकड़ी किलैकि ऊंकु दुःख उठांण अर मुरण का बगत अभि तक नि ऐ छो।

²¹यीशु ल फिर ऊंकु बोलि, “मि त जांणु छौं अर तुम मि तैं खुजैला अर तुम अपड़ा पाप माफ हुयां बगैर ही मोरि जैला जख मि जांणु छौं उख तुम नि ऐ सकदयां।”

²²ईं बात पर यहूदियों का अगुवों ल बोलि, क्य उ अपड़ा आप तैं मारि दयाला जु बुल्ण च कि जख मि जांणु छौं उख तुम नि ऐ सकदां?

²³यीशु ल ऊंमा बोलि, तुम यख ईं दुनिया मा पैदा हुयां छा पर मि स्वर्ग बट्टी अयुं छों तुम दुनिया का छा मि दुनिया कु नि छों।

²⁴इलै मिल तुम मा बोलि, कि तुम अपड़ा पापों का माफ हुयां बगैर ही मोरि जैला जु तुम मि पर विश्वास नि करिल्या कि मि वींई छौं, जु आंण वलो छों, जु मि बुल्दो छों, उ मि छों, त तुम अपड़ा पापों का कारण मोरि जैला अर तुमारा पाप माफ नि किये जाला।

²⁵तब ऊंल यीशु तैं पूछि, तू कु छै जब मिल तुम तैं उपदेश दींणो कु शुरू कैरी तब बट्टी मि बुल्दो छों कि, मि उ ही छों।

²⁶तुमारा बारा मा मि तैं भौत कुछ बुल्ण अर तुमारो न्याय कनु कु भौत कुछ बुल्णु कु च पर मेरू भिजण वलो सच्चो च अर जु मि ऊंमा बट्टी सूंणि च उ ही दुनिया का लुखुं बट्टी बुल्द छौं।

²⁷उ अब तक यु नि समझी कि उ हम बट्टी पिता परमेश्वर का बारा मा बुल्ण च।

²⁸तब यीशु ल बोलि, जब तुम, मि मनिख का नौंना तैं ऊँचा पर चड़ैल्या तब जणिल्या कि मि ऊई छौं अर उ जणिल्या की मेरी शिक्षा परमेश्वर की तरपां बट्टी औंद या मेरा अपड़ा अधिकार बट्टी या मि अपड़ा तरपां बट्टी नि बुल्द पर जन मेरू बुबा ल मि तैं सिखै उन ही यूं बातों तैं बुल्द छों।

²⁹मेरू भिजण वलो मि दगड़ी च वेल मि तैं इखुली नि छोड़ी किलैकि मि सदनी ऊं कामों तैं करदु जौं बट्टी उ खुश हूंद।

³⁰भौत सा लुखुं ल यीशु की बातों तैं बुल्णा सूंणि के वे पर विश्वास कैरी।

³¹तब यीशु ल ऊं यहूदियों बट्टी जौंन ऊं पर विश्वास कैरी छो बोलि, जु तुम मेरा वचन मा बणयां रैल्या त सच्ची मा मेरा चेला ठैरिल्या।

³²तुम सच तैं जणिल्या अर सच तुम तैं स्वतंत्र करुलो।

³³ऊंल यीशु तैं जवाब दींनि, कि हम त अब्राहम का वंशज बट्टी छा अर कभि कैका गुलाम नि हुयां। त फिर तु किलै बुल्णी छै कि तुम स्वतंत्र हवे जैला?

³⁴यीशु ल ऊं तैं जवाब दींनि, मि तुम मा सच-सच बुल्णु छौं कि जु कुई पाप करदो उ पाप का वश मा च।

³⁵गुलाम सदनी घौर मा नि रौंदु, पर नौंनो सदनी रौंदु च।[40]

³⁶जु मि परमेश्वर कु नौंनो तुम तैं स्वतंत्र करदु छों त, तुम सच्ची मा स्वतंत्र हवे जैला।

³⁷मि जंणदु छौं कि तुम अब्राहम का वंशज छा तब भि मेरी शिक्षा तैं स्वीकार नि करदां इलै तुम मि तैं मरण चांदा छा।

³⁸मि ऊं चीजों तैं बतौंणु छों जै तैं मिल देखि जब मि अपड़ा पिता परमेश्वर का दगड़ी छों अर तुम ऊं नि करदां जु तुम ल बुबा बट्टी सूंणि च।

³⁹ऊंल यीशु तैं जवाब दींनि, हमारा पूर्वज अब्राहम छो। यीशु ल ऊंमा बोलि, जु तुम अब्राहम को वंशज हूंद, त अब्राहम का जन उ काम तुम भि करदां।

⁴⁰पर अब तुम मि तैं मरण चांदा छा किलैकि मिल तुम तैं उ सच बतायूं च जु मिल परमेश्वर बट्टी सूंणि इन त अब्राहम ल नि कैरी छो।

⁴¹तुम अपड़ा बुबा जन काम करदां ऊंल यीशु मा बोलि, हम व्यभिचार बट्टी नि छा हमारो भस एक ही बुबा च अर उ परमेश्वर च।

⁴²यीशु ल ऊंमा बोलि, कि जु परमेश्वर तुमारो बुबा हूंदो त तुम मि बट्टी प्रेम रखदा किलैकि मि परमेश्वर कि तरपां बट्टी अयुं छौं, मि अफी नि अयुं छों पर वेल मि तैं भेजि।

⁴³मेरी बात तुम इलै नि मणदा, की तुम मेरा संदेश स्वीकार कन मा इंकार करदां छा।

⁴⁴तुम अपड़ा बुबा शैतान बट्टी छा अर अपड़ा बुबा कि मनसा तैं पूरी कन चांदा छा उ त पैली बट्टी हत्यारो च अर उ सत्य पर टिक्यूँ नि रै सकद किलैकि वे मा सत्य ही नि च जब उ झूठ बुल्द त अपड़ा स्वभाव या बरतौ का अनुसार ही से बुल्द किलैकि उ झूठ को बुबा च।[41]

⁴⁵मि सच बुल्णु छों इलै तुम मि पर विश्वास नि करदां।

⁴⁶तुम मा बट्टी कु मि तैं पापी साबित कैर सकदो? जु मि सच बुल्दो त तुम मेरू विश्वास नि करिद्यां?

⁴⁷जु कुई भि परमेश्वर बट्टी सम्बंध रखदु उ परमेश्वर कि बातों तैं सुणदु च अर तुम इलै नि सुणदां कि तुम परमेश्वर बट्टी जुड़यां नि छा।

⁴⁸यु सूंणि के यहूदियों ल वेमा बोलि, हम यु कन मा ठिक छा कि तु एक सामरी जाति कु छै अर त्वे मा एक दुष्टात्मा च?

⁴⁹यीशु ल जवाब दींनि, मि पर दुष्टात्मा नि च पर मि अपड़ा पिता परमेश्वर कु आदर करदु अर तुम मेरू निरादर करदां।

⁵⁰मि अपड़ो सम्मान नि चांदो इलै एक च जु चांदो च की मि तैं सम्मानित किये जौं अर उ ऊई च जु न्याय करद।

⁵¹मि तुम मा सच-सच बुल्ण छौं कि जु कुई मनिख मेरा वचन कु पालन करलो, त उ अनन्तकाल तक कभि नि मुरल्या।

⁵²यहूदियों का अगुवों ल वेमा बोलि, अब हम ल जांणयाली कि त्वे मा दुष्टात्मा च अब्राहम मोरि गै अर परमेश्वर का तरपां बट्टी बुल्ण वला भि मोरि गैनी अर तु बुल्णी छै जु कुई मेरा वचन कु पालन करलो त उ अनन्तकाल तक नि मरिल्या।

⁵³हमारो पूर्वज अब्राहम त मोरि गै। क्य तु वे बट्टी बड़ो छै? अर परमेश्वर का तरपां बट्टी बुल्ण वला भि मोरि गैनी। तु अफ तैं क्य समझदी छै?

⁵⁴यीशु ल जवाब दींनि, जु मि अफी अपड़ो सम्मान करूं त जु मि तैं सम्मान दींद उ मेरू पिता परमेश्वर च अर तुम बुल्दा कि उ तुमारो परमेश्वर च।

⁵⁵तुम ल त वे तैं नि जांणि पर मि वे तैं जंणदु छौं। अर जु बुल्द कि मि वे तैं नि जंणदु, त मि तुमारा सम्मान झूठो ठैरुलु पर मि वे तैं जंणदु अर वेका आज्ञा मंणदु छौं।

⁵⁶तुमारा पूर्वज अब्राहम मेरू दिन दिखणा कि मनसा से भौत खुश छो अर वेल देखि अर खुशी मणै।

⁵⁷यहूदियों ल यीशु मा बोलि, अभि तक तु पचास बरसों कु भि नि छै फिर भि तिल अब्राहम तैं देखि?

⁵⁸यीशु ल ऊंमा बोलि, मि तुम मा सच-सच बुल्ण छौं कि मि अब्राहम का पैदा हूंण से पैली बट्टी छौं।

⁵⁹तब ऊंल यीशु तैं मरणु कु ढुंगा उठैनि पर यीशु छिपी कै यरूशलेम शहर का मन्दिर बट्टी निकली गै।