Read Garhwali प्रेरितों के काम 10 Bible Online

प्रेरितों के काम 10 - Garhwali bible

प्रेरितों के काम 10

¹कैसरिया नगर मा कुरनेलियुस नौं को एक आदिम छो, उ रोमी पलटन को सुबदार छो।

²उ अर वेको परिवार धर्मी अर पिता परमेश्वर को भक्त छो, येका अलावा उ यहूदी गरीब आदिमों तैं दान दींदो छो अर हर बगत प्रार्थना मा लग्युं रौंदो छो।

³वेल एक दिन दोपहरा मा लगभग तीन बजी दर्शन मा साफ रूप बट्टी देखि कि पिता परमेश्वर को एक स्वर्गदूत ल वेमा ऐ के बोलि, “कुरनेलियुस!”

⁴कुरनेलियुस ल स्वर्गदूत तैं ध्यान से देखि अर डौरी के बोलि, “हे प्रभु, क्य बात च?” स्वर्गदूत ल बोलि, “पिता परमेश्वर ल तेरी प्रार्थना सूंणेली, अर दान दींण से उ खुश च।

⁵इलै तू याफा नगर मा आदिम भेजि के शमौन जै तैं पतरस भि बुल्दींनि, वे तैं बुलै ले।

⁶व चमड़ा का काम कन वला शमौन का घौर मा मेहमान च, जैको घौर समुद्र का छाला म च।”

⁷येका बाद व स्वर्गदूत उख बट्टी चलि गै, अर कुरनेलियुस ल द्वी सेवकों जु वेका दगड़ी रौंदा छा, अर वेकी लगातार सेवा का कनु कु जु भक्त सिपै छो तैं बुलै,

⁸अर ऊं तैं सब बात बतै कै याफा नगर पतरस तैं लींणु कु भेजि।

⁹दुसरा दिन तीन आदिमों तैं जौं तैं कुरनेलियुस को भिज्युं छो, उ दोपहरा मा उख पौंछि। तब वे बगत पतरस घौर का छत पर पिता परमेश्वर बट्टी प्रार्थना कन लगि गै।

¹⁰वेका बाद वे तैं भूख लगि अर उ कुछ खांण चांदो छो, पर जब खांणु पक्कांणा छा, वे बगत उ बेसुद हवे गै।

¹¹वेल देखि कि, स्वर्ग खुली गै; अर एक बड़ी चदरा जन चीज जु कूणो बट्टी लटकी धरती पर उतरदी देखि।

¹²जै मा धरती का उ चार खुट्टों का रिंगणवला जानवर अर आसमान का चलखुडा, जौका बारा मा मूसा की व्यवस्था मा लिख्युं च की उ अशुद्ध अर अपवित्र च अर जु यूं यहूदियों तैं खांण से मना करयूं च।

¹³तब पतरस ल य आवाज सूंणि, “हे पतरस, उठ अर यूं चीजों तैं मारि के खा।”

¹⁴पर पतरस ल बोलि, “प्रभु, मि इन नि कैरी सकदु, किलैकि मिल कभी अपवित्र अर अशुद्ध चीजों तैं नि खै।”

¹⁵फिर वेल दुसरी बार य आवाज सूंणि, “जै तैं पिता परमेश्वर ल शुद्ध कैरेले, तू वे तैं अशुद्ध नि बोल।”

¹⁶तीन बार इन ही हवे, वेका बाद तुरंत व चदरो स्वर्ग मा उठै गै।

¹⁷जब पतरस यु दर्शन का बारा मा सुचणु छो कि यांको मतलब क्य होलो, तब कुरनेलियुस का भिज्यां आदिम शमौन का घौर को पता लगै के द्वार का समणी खड़ा हवे के पुछण लगि गै।

¹⁸“शमौन, जै तैं पतरस बुल्दींनि, क्य उ इख मेहमान च?”

¹⁹पतरस वे दर्शन का बारा मा सुचणु छो, कि पवित्र आत्मा ल पतरस बट्टी बोलि, “देख, तीन आदिम त्वे तैं खुजांणा छिनी।

²⁰भले ही उ अन्यजाति बट्टी च, उठि के मूड़ी जा, अर बगैर सुचयां वे दगड़ी चलि जा; मिल ही भेजि।”

²¹तब पतरस ल मूड़ी जै के वे बट्टी बोलि, “देख, जैका बारा मा तुम पुछणा छा, उ मि छों, तुम लुखुं को आंणो को क्य कारण च?”

²²तब ऊंल बोलि, “कुरनेलियुस सुबदार, जु धर्मी च अर पिता परमेश्वर बट्टी डरदु च, अर जै की पूरा यहूदी जाति का लोग इज्जत करदींनि, वे तैं एक पवित्र स्वर्गदूत ल यु हुकुम दींनि कि उ तुम तैं अपड़ा घौर बुलै के वचन सुंणौ।”

²³यु सूंणि के पतरस ल ऊं तैं भितर बुलै, अर ऊंको खातिरदारी कैरी। अर हैंका दिन पतरस ऊंका दगड़ी गै, अर याफा नगर का कुछ विश्वासी भैय वे दगड़ी गैनी।

²⁴तिसरा दिन ऊं कैसरिया नगर मा पौंछि जख कुरनेलियुस अपड़ा पूरा परिवार अर दगड़ियों का दगड़ी ऊंको इन्तजार कनु छो।

²⁵जब पतरस भितर जांण वलो ही छो, तब कुरनेलियुस ल पतरस का दगड़ी मुलाकात कैरी, अर वेका खुट्टों मा पोड़ि के प्रणाम कैरी के आराधना कैरी।

²⁶पर पतरस ल वे तैं उठै के बोलि, “मेरी आराधना नि कैर, मि भि त एक आदिम छो।”

²⁷तब पतरस कुरनेलियुस दगड़ी बात-चीत कनु कु भितर गै, अर उख भौत लुखुं तैं जमा देखि।

²⁸अर बुल्ण लगि गै, “तुम जंणदा छा कि यहूदियों कु कुई अन्य-जाति का दगड़ी रिश्ता रखण या ऊंका घौर मा जांण मना च यूं हम यहूदी लुखुं का कानून का खिलाफ च, पर पिता परमेश्वर ल मि तैं बतै कि मि कै आदिम तैं अशुद्ध नि बोलु।

²⁹इलै जब तुम ल मि तैं बुलै, तब मि बेझिझक औं; अब बतौ, तुम ल मि तैं इख किलै बुलै?”

³⁰तब कुरनेलियुस ल बोलि, “आज बट्टी चार दिन पैली यु ही बगत, जब मि अपड़ा घौर मा दोपहरा मा तीन बजी प्रार्थना कनु छो, तब एक चमकिला कपड़ा पैरयूं आदिम मेरा संमणी ऐ”

³¹अर वेल मि बट्टी बोलि, “हे कुरनेलियुस पिता परमेश्वर ल तेरी प्रार्थना सूंणि येले अर तेरु दान दींण से पिता परमेश्वर खुश च।

³²इलै कै तैं याफा नगर भेजि के शमौन जै तैं पतरस भि बुल्दींनि, वे तैं इख बुलै ले; उ समुद्र का छाला चमड़ा को काम कन वला शमौन का घौर मा मेहमान च जब उ आलो, त त्वे तैं पिता परमेश्वर की तरपां बट्टी एक सन्देश बतालो।”

³³“तब मिल त्वे तैं इख बुलै अर अपड़ा इख ऐ के बड़ी कृपा कैरी; अब हम सभि इख पिता परमेश्वर का संमणी छा कि जु बात वेल तुम तैं बतै, हम सभि भि वेका बारा मा जांण सका।”

³⁴तब पतरस ल बोलि, “अब मेरी समझ मा ऐ गै कि पिता परमेश्वर कै दगड़ी भि भेद-भाव नि करद।

³⁵पर हर अन्य-जाति जु पिता परमेश्वर बट्टी डरदु च अर धार्मिकता को काम करदो, पिता परमेश्वर ऊं तैं स्वीकार करद।

³⁶तुम तैं यु सन्देश पता च, जु पिता परमेश्वर ल हम कु मतलब इस्राएलियों तैं दीं च; वेल शान्ति का बारा मा शुभ सन्देश प्रचार सुणै जु लुखुं तैं यीशु मसीह पर विश्वास कना का द्वारा मिल सकदी च; उ सभि लुखुं कु प्रभु च।

³⁷तुम तैं वे वचन का बारा मा पता च, जु यूहन्ना का बपतिस्मा का प्रचार का बाद गलील प्रदेश बट्टी शुरू हवे के सैरा यहूदिया प्रान्त मा फैली गै।

³⁸पिता परमेश्वर ल यीशु जु नासरत नगर को छो पवित्र आत्मा अर सामर्थ बट्टी अभिषिक्त कैरी अर उ हर जगह भलै करद अर उ सभियूं तैं जु शैतान का द्वारा परेशान छा, ऊं तैं खूब करदो छो, किलैकि पिता परमेश्वर वे दगड़ी छो।

³⁹अर हम प्रेरित लुखुं तैं ऊं सभि कामों का बारा मा बतौंदयां, जु हम ल यीशु तैं यहूदिया अर यरूशलेम शहर मा करदी देखि छा, अर यहूदी अगुवों ल यीशु तैं सूली पर चढै कै मारि दींनि।

⁴⁰पर पिता परमेश्वर ल वे तैं तिसरा दिन मुर्दों मा बट्टी ज्यूँदो कैरी के सभि लुखुं तैं दिखै।

⁴¹सब मनिख्युं ल वे तैं नि देखि पर हम प्रेरितों ल गवाहों का रूप मा जु तैं पिता परमेश्वर ल पैली चुणि लियेले छो। अर मुर्दों मा बट्टी ज्यून्दा हूंणा का बाद हम ल वे दगड़ी खै-पये।

⁴²अर हम तैं यु हुकुम भि द्ये, कि हम लोग वेका बारा मा बतां अर वेकी गव्है दया कि पिता परमेश्वर ल वे तैं ज्यून्दों अर मुर्दों को न्यायी ठैरे।

⁴³वेका बारा मा सभि पिता परमेश्वर का तरपां बट्टी बुल्ण वलो ल गव्है दीं च कि जु लोग वेमा विश्वास रखदींनि, ऊं तैं, ऊंका द्वारा पापों कि माफी मिललि।”

⁴⁴जब पतरस बुल्णु छो, तब पवित्र आत्मा सभि सुनण वलो पर ऐ गै।

⁴⁵जु यहूदी विश्वासी जूंको खतना हुयुं छो पतरस का दगड़ी अयुं छा, व सभि यु देखि के दंग होला कि पवित्र आत्मा को भांडो अन्यजातियों तैं भि मिली।

⁴⁶किलैकि यहूदी विश्वासियों ल ऊं तैं अलग-अलग भाषा मा बुल्ण अर पिता परमेश्वर कि आराधना कन सूंणि। तब पतरस ल बोलि,

⁴⁷“क्य कुई यु लुखुं तैं पांणी बट्टी बपतिस्मा लींण से रोक सकद जूं तैं हम जन पवित्र आत्मा मिल्युं च?”

⁴⁸यांका बाद पतरस ल ऊं तैं जु लोग कुरनेलियुस का घौर मा कठ्ठा छा। पांणी ल अर मसीह यीशु का नौं मा बपतिस्मा लींणु कु बोलि। अर ऊंल पतरस बट्टी बिनती कैरी कि उ थोड़ा दिनों तक उ दगड़ी रौ, अर ऊंल इन ही कैरी।