Read Garhwali प्रेरितों के काम 11 Bible Online

प्रेरितों के काम 11 - Garhwali bible

प्रेरितों के काम 11

¹फिर प्रेरितों ल अर विश्वासी भयों ल जु यहूदिया प्रान्त मा छा, ऊंल सूंणि कि अन्यजातियों ल पिता परमेश्वर का वचन तैं मनणु लगि गैनी।

²अर जब पतरस ऊंमा यरूशलेम शहर मा ऐ, त यहूदी विश्वासी लोग जु को खतना हुयुं छो वे पर भंगार लगांण लगि गैनी,

³कि “तिल अन्यजातियों का घौर मा जै के खांणु किलै खै?”

⁴तब पतरस ल ऊं तैं शुरू बट्टी जु बात हवे छै सब पूरा ढंग से ऊं तैं सुणैनी।

⁵“वेल बोलि जब मि याफा का नगर मा पिता परमेश्वर बट्टी प्रार्थना कनु छो, वे बगत मिल बेसुद हवे के देखि कि एक बड़ा चदरा का समान कुई चीज चारों तरपां बट्टी लटकी स्वर्ग बट्टी मूड़ी उतरी अर व ठिक मेरा संमणी ऐ।

⁶अर जब मिल वे तैं ध्यान से देखि, वेमा धरती का सभि किस्म का पालतू, जंगली जानवर अर सब रिंगण वला गुरो, जीव-जन्तु अर आसमान का चलखुडा दिखिनि।

⁷अर फिर मिल या आवाज सूंणि, ‘हे पतरस, उठ अर यूं तैं मारि के खा’

⁸पर मिल बोलि, ‘प्रभु, मिल कभी अपवित्र अर अशुद्ध चीजों तैं नि खै’

⁹तब दुसरी बार स्वर्ग बट्टी या आवाज ऐ, ‘जै तैं पिता परमेश्वर ल शुद्ध कैरेले, तू वे तैं अशुद्ध नि बोल’

¹⁰तीन बार इन ही हवे, वेका बाद सभि स्वर्ग मा खिंचे गै।

¹¹वे ही बगत कैसरिया नगर बट्टी एक आदिम जै को नौं कुरनेलियुस छो वेल एक आदिम तैं मि मा भेजि, तीन आदिम वे घौर का संमणी जख हम रुकयां छा पौंछि गैनी अर खड़ा हवे गैनी।

¹²तब पवित्र आत्मा ल मि बट्टी बोलि, ‘बेझिझक हवे के यूं दगड़ी जा’ फिर यु छह विश्वासी भैय भि मि दगड़ी एनि, अर हम वे आदिम का घौर का भितर अयां।

¹³तब वेल हम तैं बतै, कि वेल एक स्वर्गदूत तैं अपड़ा घौर मा देखि, जैल ऊंमा बोलि, ‘तू कै तैं याफा नगर भेजि के शमौन जु पतरस कहलांद बुलौ।

¹⁴उ त्वे तैं इन बात बतालो, जै बट्टी पिता परमेश्वर त्वे तैं अर तेरु पूरा परिवार तैं बचालो’

¹⁵जब मिल वे तैं यीशु का बारा मा बतै, तब पवित्र आत्मा ऊं पर ऐ, जन पैली हम पर ऐ।

¹⁶तब मि तैं उ वचन याद ऐ जु यीशु ल हम बट्टी बोलि छो, कि यूहन्ना ल त पांणी ल बपतिस्मा दींनि, पर कुछ दिनों का बाद पिता परमेश्वर तुम दगड़ी रौंण कु पवित्र आत्मा तैं भिजलो।

¹⁷इलै पिता परमेश्वर ल ऊं तैं यु वरदान दींनि, जु हम तैं प्रभु यीशु मसीह मा विश्वास कन से मिली; त मि कु छों जु पिता परमेश्वर का खिलाफ जौं? जब पिता परमेश्वर ल ऊं दगड़ी कुई भेदभाव नि कैरी, तब मि भि किलै कैरू?”

¹⁸यु सूंणि के उ शांत हवे गै; अर ऊंल यु बोलि के पिता परमेश्वर की महिमा कैरी, “पिता परमेश्वर ल अन्यजातियों तैं यु वरदान दियूं च कि उ भि पापों तैं छोड़ी द्या अर अनन्त जीवन पै साका।”

¹⁹स्तिफनुस की हत्या का बाद, कई विश्वासियों ल यरूशलेम शहर तैं छोड़ी दींनि, अर उ घुमदी-घुमदी फीनीके प्रदेश, साइप्रस द्वीप अर सीरिया प्रदेश का अन्ताकिया शहर मा पौछिनी; पर यहूदी लुखुं तैं छोड़ी के कै और तैं पिता परमेश्वर का वचन नि सुणदा छा।

²⁰पर ऊंमा बट्टी थोड़ा ही विश्वासी साइप्रस द्वीप का रौंण वला अर कुरेनी शहर का रौंण वला छा, जब उ अन्ताकिया शहर मा छा यूनानी भाषा बुल्ण वला तैं प्रभु यीशु को शुभ सन्देश प्रचार कन लगि गैनी।

²¹अर प्रभु को सामर्थ ऊं पर छो, अर भौत स अन्यजाति लुखुं ल ऊं की खबर पर विश्वास कैरी अर प्रभु यीशु तैं स्वीकार कैरी।

²²जब ऊंका बारा मा यरूशलेम शहर का विश्वासियों की मण्डलि ल सूंणि, तब ऊंल बरनबास तैं अन्ताकिया शहर मा भेजि।

²³बरनबास ल उख पौंछि के, उख लुखुं पर पिता परमेश्वर की दया देखि के खुश हवे गै, अर ऊं सभियूं तैं उपदेश द्ये कि तुम पूरा मन से पिता परमेश्वर पर विश्वास कनु कु मजबूत रावा।

²⁴बरनबास एक अच्छो आदिम अर विश्वास अर पवित्र आत्मा बट्टी भुरयां आदिम छो, वे तैं देखि के भौत लोग पिता परमेश्वर मा विश्वास कैरी के वेमा ऐ मिलिनि।

²⁵तब बरनबास अन्ताकिया शहर छोड़ी के शाऊल तैं ढुँढ़णु कु तरसुस शहर कु चलि गै।

²⁶अर जब उ वे तैं उख मिलिनि त वे तैं अफ दगड़ी अन्ताकिया शहर ले एनि। अर इन हवे कि शाऊल अर बरनबास अन्ताकिया शहर मा एक साल तक प्रभु यीशु का बारा मा मण्डलि का लुखुं तैं सिखाैंदी रैनी। तब पैली बार अन्ताकिया शहर मा चेला “मसीही” कहलै गैनी।

²⁷वे बगत कुछ विश्वासी जु पिता परमेश्वर का संदेश दींणवला छा यरूशलेम शहर बट्टी अन्ताकिया शहर मा एनि।

²⁸ऊंमा बट्टी एक पिता परमेश्वर का तरपां बट्टी बुल्ण वलो आदिम जै को नौं अगबुस छो, उ खड़ो हवे अर पवित्र आत्मा की सामर्थ बट्टी ऊं तैं बतै कि पूरी दुनिया मा अकाल पुडण वलो च; अर सच मा यु अकाल सम्राट क्लौदियुस का बगत मा पोड़ी।

²⁹तब विश्वासी चेलों ल फैसला कैरी, कि यहूदिया प्रान्त मा रौंण वला विश्वासी भैय-बैंणों तैं मदद कनु कु अपड़ी-अपड़ी कमै का अनुसार उ पैसा जमा कैरी के भिजुला।

³⁰ऊंल इन कैरी; अर बरनबास अर शाऊल का हथ अर विश्वासियों का पुरणा अगुवों का हथ दान भेजि।