Read Garhwali प्रेरितों के काम 17 Bible Online

प्रेरितों के काम 17 - Garhwali bible

प्रेरितों के काम 17

¹फिर पौलुस अर सिलास अम्फिपुलिस, अपुल्लोनिया शहरों बट्टी हवे के थिस्सलुनीके शहर मा ऐनी, जख यहूदियों का मिलणा को भवन छो।

²अर पौलुस अपड़ी रीति का अनुसार यहूदियों का मिलणा का भवन मा गै अर तीन यहूदियों को विश्रामदिन तक परमेश्वर का वचन बट्टी ऊं दगड़ी बातचित कैरी।

³वेल परमेश्वर का वचन बट्टी पूरा ढंग से साबित कैरी के बतै, कि मसीह तैं दुख उठांण अर मुरण अर मुर्दों मा बट्टी ज्यूँदो हूंण जरूरी छो अर यु यीशु जैका बारा मा मि तुम तैं सुणांदु छों मसीह च।

⁴कुछ यहूदियों ल, अर परमेश्वर कु डौर मनणवला भौत सैरा अन्यजाति (यूनानियों) लुखुं अर भक्त मुख्य जननियों ल जु बात सूंणि छै वे पर विश्वास कैरी, अर पौलुस अर सिलास का दगड़ी मिली गैनी।

⁵पर कुछ यहूदियों ल खार खै के बजार बट्टी भौत दुष्ट लुखुं तैं अफ दगड़ी लैनी अर भीड़ लगै के शहर मा झगड़ा कन लगि गैनी, अर ऊंल यासोन का घौर पर हमला कैरी के पौलुस अर सिलास तैं लुखुं का संमणी लांण चै।

⁶पर ऊं तैं नि पै कै, त यासोन अर कुछ विश्वासी भयों तैं शहर का अधिकारी का संमणी खींचि के लैनी। अर ऊंल चिलै के बोलि, “यु लोग जौं ल हरेक जगह परेशानी फैलै दींनि इख भि अयां छिनी,

⁷अर यासोन ल ऊं तैं अपड़ा घौर मा खातिरदारी कैरी यु सभि का सभि इन बुल्दींनि कि यीशु राजा च अर रोमी कैसर की आज्ञा कु विरोध करदींनि।”

⁸ऊंल लुखुं तैं अर नगर का अधिकारियों तैं इन सुणै के घबरै दींनि।

⁹इलै ही ऊंल यासोन अर बकि लुखुं बट्टी डांड ले के ऊं तैं छोड़ी दींनि।

¹⁰विश्वासी भयों ल झट रत्म रात पौलुस अर सिलास तैं बिरीया नगर भेजि दींनि, अर उ उख पौंछि के यहूदियों का मिलणा का भवन मा गैनी।

¹¹यु लोग त थिस्सलुनीके शहर का यहूदियों बट्टी भि सिखणु कु जादा इच्छुक छिनी। अर ऊंल बड़ी इच्छा से वचन स्वीकार कैरी अर हर दिन परमेश्वर का वचन मा खुजै के जांच कन रैनी कि जु बात पौलुस ल सिखैनी इन ही छिन की न।

¹²इलै ऊंमा बट्टी भौतों ल, अर मुख्य यूनानी जननों मा बट्टी अर आदिमों मा बट्टी भि भौतों ल विश्वास कैरी।

¹³पर जब थिस्सलुनीके शहर का यहूदी जांणि गैनी की पौलुस बिरीया नगर मा भि परमेश्वर को वचन सुनांणु च त उख भि ऐ के लुखुं तैं गुस्सा हूंणु कु उकसाणा रैनी।

¹⁴तब विश्वासी भयों ल झट पौलुस तैं विदा कैरी के समुद्र का छाला पर चलि जा; पर सिलास अर तीमुथियुस बिरीया शहर मा ही रै गैनी।

¹⁵कुछ आदिम पौलुस का दगड़ी एथेंस शहर तक गैनी, पर पौलुस की ईं आज्ञा का दगड़ी उ बिरीया चलि गैनी की सिलास अर तीमुथियुस जल्दी ही वे म भेजि दिये जाला।

¹⁶जब पौलुस एथेंस शहर मा ऊंकी जग्वाल कनु छो, त शहर मा मूर्तियों कि भरमार देखि कै पौलुस को मन भौत उदास हवे।

¹⁷इलै पौलुस यहूदियों का मिलणा का भवन मा यहूदियों अर परमेश्वर कु भय मनणवला अन्यजाति भक्तों बट्टी अर चौक (बजार) मा जु आंण-जांणवला लोग वे बट्टी मिल्दा छा। अर ऊं बट्टी हर दिन वाद-विवाद कनु रांदो छो।

¹⁸तब उ शिक्षक जु इपिकूरि या स्तोईकी कैरी कै जंणै जांदा छा ऊंमा बट्टी कुछ वे दगड़ी बात कन लगि गैनी, अर कुछ ल बोलि, “यु बकवास कन वलो क्य बुल्ण चांणु च?” पर दूसरों ल बोलि, “उ विदेशी देबता को प्रचारक लगणु च” किलैकि उ यीशु को ज्यून्दा हूंणो को शुभ सन्देश प्रचार सुनांणु छो।

¹⁹तब उ पौलुस तैं अरियुपगुस नौं को एक महासभा का संमणी लैनी अर पूछि कि हम जांणि सकदां कि या नई शिक्षा जु तु सुणौंणी छै क्य च?

²⁰किलैकि तू जु अनोखी बात हम तैं सुणौंणी छै, इलै हम जनण चांणा छा कि यूंको मतलब क्य च?

²¹इलै की अब एथेंस वासी अर परदेशी जु उख रांदा छा नयी-नयी बात बुल्ण अर सुनण छोड़ी के दुसरा कै काम मा बगत नि बितांदा छा।

²²तब पौलुस ल अरियुपगुस की महासभा का बीच खड़ो हवे के बोलि, “हे एथेंस का लुखुं मि देखुणु छौं कि तुम हर बात मा देबतों तैं भौत मनणवला छा।”

²³किलैकि मि चलदी फिरदी तुम्हरी पुजणैं की चिज्यों तैं दिखणुं छो, त एक इन वेदी भि देखि ज्यां पर लिख्युं छो, अजांण परमेश्वर कु। इलै जै तैं तुम बगैर जणयां आराधना करदा मि तुम तैं वे परमेश्वर कु समाचार सुनांणु छौं।

²⁴“यूं उ ही पिता परमेश्वर च जैल दुनिया अर वेकी सब चीजों तैं बणै उ आसमान अर धरती कु स्वामी हवे के हथ का बणैयां मन्दिरों मा नि रांदो।

²⁵न कैं चीजों का द्वारा वे तैं मनिख की मदद की जरूरत च, किलैकि उ अफ ही सभियूं तैं जीवन अर सांस अर सभि कुछ दींद।

²⁶वेल एक ही मूल मनिख बट्टी ही सभि जातियों का सैरी धरती पर रौंणु कु बणै; अर ऊंका ठैरयां बगत अर निवास की सीमा इलै ही तय कैरी।

²⁷परमेश्वर ल इन इलै कैरी कि लोग पिता परमेश्वर तैं खुज्यां, अर आस का द्वारा वे तक पौंछि साका, फिर भि, ऊं हम मा बट्टी कै बट्टी भि दूर नि च।

²⁸जन कि कै को लिख्युं च, उ हम दगड़ी च इलै कि हम ज्यूंदा रै के चलदी फिरदी कि हमारो अस्तित्व बणयूँ रों तुम्हरा कवियों ल भि बोलि, हम वेका वंशज छा”

²⁹इलै परमेश्वर की संतान हवे के हम तैं यु समझण ठिक नि च, कि परमेश्वर को रूप सोना या रूपा या ढुंगा का समान च, जु मनिख्युं का हथ ल अर सोच ल बणयां छिनी।

³⁰पैली बगत मा परमेश्वर ल लुखुं का कामों पर ध्यान नि दींनि किलैकि लोग वे तैं नि जंणदा छा, पर अब सभि लुखुं तैं मन फिराव कि आज्ञा दींद।

³¹किलैकि वेको एक दिन ठैरयूं च, जयां मा उ वे मनिख का द्वारा धर्म ल दुनिया को न्याय का द्वारा जांच करुलो, जु वेल ठैरयूं च अर वे तैं मुर्दों मा बट्टी ज्यूँदो कैरी के, ईं बात को प्रमाण सभि लुखुं तैं दींनि।

³²मुर्दों कि ज्यून्दा हूंणै कि बात सूंणि के कुछ लुखुं ल ठट्टा कैरी अर कुछ ल बोलि, “यूं बातों तैं हम त्वे बट्टी फिर कभि सुणला।”

³³ईं बात पर पौलुस ऊंका बीच मा बट्टी चलि गै।

³⁴पर कुछ लोग वे दगड़ी मिली गैनी, अर प्रभु पर विश्वास कैरी; जौं मा बट्टी दियुनुसियुस जु अरियुपगुस का सदस्य छा, अर दमरिस नौं की एक जनन छै अर वीं का दगड़ी और भि कुछ लोग छा।