Read Garhwali प्रेरितों के काम 2 Bible Online

प्रेरितों के काम 2 - Garhwali bible

प्रेरितों के काम 2

¹यहूदियों का पिन्तेकुस्त का त्यौहार का दिन, त सभि चेला एक जगह मा कट्ठा हुयां छा।[8]

²अर अचानक स्वर्ग बट्टी बड़ा औडल-पौडल जन स्वींस्याट की सी आवाज हवे अर वीं आवाज ल सैरो घौर जख उ कट्ठा हुयां छा गूंजी गै।

³तब ऊँका समणी इन ज्वाला प्रकट हवे जैको आकार जीभ का जन छो, जु अलग हवे के ऊंमा बट्टी हरेक आदिम पर ए के ठैरदी गै।

⁴उ सभि पवित्र आत्मा से भुरे गैनी अर पवित्र आत्मा ल ऊं तैं योग्यता दींनि वेका अनुसार उ बनि-बनि भाषा बुल्ण लगि गैनी।

⁵वे बगत आसमान का मूड़ी रौंण वला हर अन्य-जाति को जु पिता परमेश्वर का भय मनणवला कई यहूदी छा जु कि दुनिया का हरेक देश बट्टी त्यौहार मनांण कु अयां छा अर यरूशलेम शहर मा रौंणा छा।

⁶जब आवाज हवे त भौत बड़ी भीड़ लगि गै अर लोग हकदक रै गैनी किलैकि हरेक अपड़ी-अपड़ी भाषा मा शिष्यों तैं बुल्द सुणै द्ये।

⁷उ लोग बड़ा हकदक हवे के बुल्ण लगि गैनी “देखा यु जु बुल्णा छिनी क्य यु सभि लोग गलील मा रौंण वला नि छिन?

⁸त यु क्य हूंणु च, जु हम मा बट्टी हरेक यूं तैं अपड़ी-अपड़ी मातृभाषा मा बात करद सुनणु च?

⁹हम मा बट्टी कुछ लोग पारथी क्षेत्र बट्टी छिनी कुछ मादी, एलामी अर मेसोपोटामिया, यहूदिया प्रान्त, कप्प्दूकिया, पुन्तुस, एशिया,

¹⁰अर पंफूलिया प्रदेश, फ्रूगिया प्रदेश अर मिस्र देश कुरेन शहर का नजीक लीबिया देश का कुछ हिस्सा, यूं सभि देशों का यहूदियों ल अर रौंण वला अर रोम शहर मा दिखण वला अन्यजाति,

¹¹जौनु यहूदी धर्म अपणैयले छो क्रेते अर अरब मुल्क का निवासी हम सभि अपड़ी-अपड़ी भाषा मा यूं बट्टी पिता परमेश्वर का बड़ा चमत्कार का कामों की चर्चा सुंणदां।”

¹²अर उ सभि समझी नि सकिनि हकदक हवे के एक हैंका बट्टी बुल्ण लगि गैनी कि “यु क्य हूंणु च”

¹³पर हौरु ल ऊं की मजाक बणै के बोलि, “यु त दाखमधु का नशा मा छिन।”

¹⁴पर तब पतरस ऊं ग्यारह प्रेरितों दगड़ी खड़ो हवे अर ऊंची आवाज मा ऊंकु बुल्ण लगि गै, “हे यहूदी भयों अर हे यरूशलेम शहर वासियों तुम मेरी बातों तैं सूंणा।

¹⁵तुम मा बट्टी कुछ लोग इन सुचणा छिनी कि हम लोग नशा मा छा पर हम नि छा किलैकि अभि त सुबेर का नौं बजि च।”

¹⁶जु हम दगड़ी हवे छो यु वे बात की पूर्ति च जु योएल परमेश्वर का तरपां बट्टी बुल्ण वला का द्वारा पिता परमेश्वर का वचन मा बुलै गै छो

¹⁷परमेश्वर इन बुल्दो कि “आखिर दिनों मा इन होलो कि मि अपड़ी आत्मा सभि मनिख्युं तैं दयुलु तुम्हरा नौंना अर तुम्हरी नौंनि परमेश्वर की तरपां बट्टी बुलला अर तुम्हरा जवान दर्शन दिखला अर तुम्हरा दाना सयाणा मनिख सुपन्या दिखला

¹⁸ऊं दिनों मा, मि अपड़ा दास, अर दासियों तैं अपड़ा आत्मा दयुलु अर ऊं परमेश्वर का तरपां बट्टी बुलला।

¹⁹मि मथि आसमान मा सैरी शक्ति अर मुड़ी धरती पर चिन्ह दिखौलु यानि ल्वे, आग, अर धुंआ का बादल।

²⁰प्रभु कु दिन औंण से पैली सूरज अंधेरो हवे जालो अर जून ल्वे का जन हवे जालो। ऊं दिन महान अर तेजस्वी दिन होलो

²¹अर जु कुई प्रभु को नौं ल्यालु उ बचै जालो।”[9]

²²“हे इस्राएलियों यु बातों तैं कि नासरत वासी यीशु एक मनिख छो जु परमेश्वर की तरपां बट्टी हूंणु का प्रमाण ऊं सामर्थ का कामों अर चमत्कार का काम अर चिन्हों बट्टी प्रगट च, जु परमेश्वर ल तुमारा बीच वेका द्वारा कैरी के दिखै जै तैं तुम अफ ही जंणदा छा।

²³यु ही यीशु पिता परमेश्वर की ठैरैईं मनसा का अनुसार अर परमेश्वर का हूंण वला पूर्व ज्ञान का अनुसार पकड़वये गै छो अर तुम ल अधर्मियों का हथों ल वे तैं सूली पर चढ़ै कै मरवै दींनि।

²⁴पर वे तैं पिता परमेश्वर ल मृत्यु का बन्धनों बट्टी छुड़ै के ज्यूँदो कैरी किलैकि मृत्यु वे तैं अपड़ा वश मा रखु यु हवे ही नि सकदो छो।[10]

²⁵किलैकि राजा दाऊद यीशु बारा मा इन बुल्द, ‘मि प्रभु तैं हमेशा अपड़ा संमणी दिख्दी रयूं किलैकि उ मेरी दैंणी तरपां च मि ऊं लुखुं से नि डरदु जु मि तैं नुकसान पौंछांण चंदींनि।

²⁶मि आनन्द से भुरे ग्यों अर बुल्दो छों, अर मेरू शहर भि आस मा बणयुं रालो।

²⁷किलैकि तू मि तैं मुर्दों मा नि रौंण दीलि अर अपड़ा पवित्र जन तैं अधोलोक मा सड़ण भि नि दीलि।

²⁸तिल मि तैं जीवन को बट्टो बतै अर तू मि तैं अपड़ी उपस्थिति मा रौंण से आनन्द बट्टी भोरि दीलि’[11]

²⁹हे विश्वासी भयों, मि तुम मा कुलपिता राजा दाऊद का बारा मा तुम बट्टी साहस का दगड़ी बोल सकदु छों कि उ त मोरि गै अर दफनाये भि गै अर वेकी कब्र आज तक भि हमारा इख मौजूद च।

³⁰पर उ त परमेश्वर का तरपां बट्टी बुल्ण वलो छो अर जंणदु छो कि पिता परमेश्वर ल सौं खै छै कि मि तेरु कुल बट्टी एक आदिम तैं तेरु सिहासन पर बैठौलु।[12]

³¹यु जांणि के भविष्य मा पिता परमेश्वर क्य कन जांणु च, राजा दाऊद ल यीशु मसीह का मुरदों मा बट्टी ज्यून्दा हूंणै की बात कैरी वेल बोलि, कि यीशु तैं न त अधोलोक मा छोड़ी जालो अर न पिता परमेश्वर वेकी देह तैं सड़ण दयालो।[13]

³²परमेश्वर ल यु यीशु ज्यूँदो कैरी जैका हम सभि गवाह छा।

³³यु ही यीशु तैं परमेश्वर ल अपड़ी दैणी तरपां सबसे ऊंची जगह बैठै अर पिता ल जन वे बट्टी करार कैरी छै वे तैं पवित्र आत्मा दे अर वेल उ ही पवित्र आत्मा हम तैं दींनि जन कि आज तुम जु दिखणा अर सुचणा छा।

³⁴किलैकि राजा दाऊद त स्वर्ग पर नि चैड़ि उ अफी बुल्णु च कि ‘प्रभु परमेश्वर ल मेरा प्रभु बट्टी बोलि कि मेरा दैंणि तरपां बैठ

³⁵जब तक मि तेरु बैरियों तैं तेरु खुट्टों की चौकी का समान बणै द्यों’

³⁶इलै इस्राएलियों जांणि ल्या कि पिता परमेश्वर ल यु ही यीशु तैं जै तैं तुम ल सूली पर चड़ै प्रभु और मसीह द्वी वे ठैरे।”

³⁷जब ऊंल इन सूंणि त ऊंका मन बहुत दुखी गैनी अर उ पतरस तैं अर और प्रेरितों तैं पुछण लगि गैनी कि “हे विश्वासी भयों, अब इन बता कि हम ल क्य कन?”

³⁸पतरस ल ऊंकु बोलि “तुम मा बट्टी हरेक मन फिरावा अर अपड़ा पापों की माफी कु यीशु मसीह का नौं से बपतिस्मा ल्यावा ज्यां बट्टी तुम पवित्र आत्मा को दान पैल्या।

³⁹किलैकि य करार तुम कु अर तुम्हरी सन्तान कु अर ऊं सब दूर-दूर तक रौंण वला लुखुं कु भि च ऊं सभियूं कु जौं तैं हमारो परमेश्वर अफ मा बुलांदु।”[14]

⁴⁰पतरस ल भौत सैरी बातों से भि गव्है दे-दे के यु बात बार-बार बोलि के उ बट्टी बिनती कैरी, कि अफ तैं ई टेढ़ी जाति बट्टी बचावा।[15]

⁴¹जु कुछ पतरस ल बोलि, जौनु भि वेका संदेश पर विश्वास कैरी ऊंल बपतिस्मा लये अर वे ही दिन करीब तीन हजार लोग ऊं दगड़ी मिली गैनी।

⁴²उ प्रेरितों बट्टी वचन की शिक्षा पांण मा अर संगति रखण मा उ प्रभु भोज मा सहभागी हूंदा छा अर विश्वासी एक दगड़ी अपड़ो खांणु खांदा छा अर पिता परमेश्वर बट्टी प्रार्थना कन मा लौलीन रौंदा छा।

⁴³यरूशलेम शहर मा सभि लुखुं पर डौर अर हैरानी छै गै, अर भौत सा चमत्कार का काम और चिन्ह प्रेरितों का द्वारा प्रगट हूंदा छा।

⁴⁴अर सब विश्वासी लोग एक जगह मा कठ्ठा हूंदा छा अर ऊं की सभि चीज-बस्ति साझा मा छै।

⁴⁵उ अपड़ी सम्पति अर चिज्युं बिकै-बिकै के जन जै तैं जरूरत हूंदी छै उन ही सभियूं मा बांटि दींद छा।

⁴⁶उ हरेक दिन एक मन हवे के पिता परमेश्वर बट्टी यरूशलेम शहर का मन्दिर मा कट्ठा हूंद छा अर घौर-घौर मा प्रभु भोज लींदा छा अर सच्चा मन दगड़ी रै के खांणु खांदा छा।

⁴⁷अर पिता परमेश्वर की बढ़ै करदां छा अर सभि लोग ऊं बट्टी खुश छा अर प्रभु बचै जांणवला लुखुं तैं हरेक दिन मण्डलि मा मिलौंदु छो।