Read Garhwali प्रेरितों के काम 24 Bible Online

प्रेरितों के काम 24 - Garhwali bible

प्रेरितों के काम 24

¹पाँच दिन का बाद हनन्याह महायाजक कुछ दाना-सयाणों अर तिरतुल्लुस नौं का एक वकील तैं अफ दगड़ी ले के कैसरिया नगर ऐ; ऊंल राज्यपाल का संमणी पौलुस पर भंगार लगै।

²जब पौलुस बुलै गै तब तिरतुल्लुस वे पर भंगार लगै के बुल्ण लगि गै, “हे सामर्थी फेलिक्स, तेरु द्वारा हम तैं बड़ी कुशल हुंद; अर तेरु प्रबंध बट्टी ईं जाति की कथग बुरै सुधरदी जांणि छिनी।

³सबसे बड़ो राज्यपाल फेलिक्स तैं हम हरेक जगह अर हरेक प्रकार बट्टी धन्य मणदयां।

⁴पर इलै की मि तेरु जादा बगत नि लींण चांणु छों, मि त्वे बट्टी बिनती करदु, कि कृपा कैरी के हमारी एक-द्वी बात तैं सूंणि ले।

⁵हम ल यु आदिम तैं घपरौल, अर दुनिया भर का सभि यहूदियों मा झगड़ा करदो-फिरदो, अर नासरी कुपंथ को मुखिया च।

⁶वेल यरूशलेम शहर का मन्दिर तैं भि अशुद्ध कन चै (पर हम ल यु पकड़ी दींनि। अर हम वे तैं अपड़ी व्यवस्था का अनुसार दण्ड दियुं हूंदो;

⁷पर सिपै का झुंडों का सेनापति लूसियास ल ऐ के वे तैं जोर जबरदस्ती ल हमारा हथों बट्टी लूछि लींनि,

⁸अर यु पर भंगार लगांण वलो तैं तेरु संमणी औंणो को आज्ञा दींनि। तु खुद ही वे तैं जांच के जांणि लीली अर त्वे तैं ऊं सभि बातों का बारा मा पता चलि जालो जीं बात मा हम वे पर भंगार लगांणा छा”)

⁹यहूदियों ल भि वेकी तरफदरी कैरी के बोलि, “यु बात इन ही छिनी।”

¹⁰जब राज्यपाल ल पौलुस तैं बुल्णु कु हथ ल सनकै त वेल जवाब दींनि; “मि जंणदु छौं कि तू भौत सालों बट्टी यु देश का लुखुं को न्यायी कनी छै, इलै मि खुशी से अपड़ा जवाब दींणु छौं।”

¹¹तू अफी जांणि सकदी छै, की जब बट्टी मि यरूशलेम शहर मा आराधना कनु कु मंदिर मा औं, मि तैं अभि बारह दिन बट्टी जादा नि हवीनि।

¹²ऊंल मि तैं न यरूशलेम शहर का मन्दिर मा, न यहूदियों का मिलणा का भवन मा, न नगर मा कैका विवाद करदा या भीड़ तैं उकसांणु पै।

¹³अर न त उ ऊं बातों तैं, ज्यांका बारा मा उ मि पर भंगार लगांणा छिन, तेरु संमणी ऊं तैं सच साबित कैरी सकदींनि।

¹⁴मि तेरु संमणी यु अंगीकार करदु, कि मि प्रभु का रस्ता कु शिष्य हवे के अपड़ा पूर्वजों का पिता परमेश्वर की आराधना करदु, जै तैं यु झूठा यहूदी अगुवों को दल बुल्दींनि, अर जु बात मूसा द्वारा लिखीं परमेश्वर की व्यवस्था मा छै अर परमेश्वर का तरपां बट्टी बुल्ण वलो कि किताबों मा लिखीं छिनी, ऊं सभियूं पर मि विश्वास करदु।

¹⁵अर परमेश्वर पर आस रखदु जैं आस उ खुद भि रखदींनि, कि धर्मियों अर अधर्मियों द्वीयूँ को परमेश्वर मुर्दों तैं ज्यून्दो कैरी दयालो।[78]

¹⁶इलै मि खुद भि कोशिश कनु छौं, कि परमेश्वर अर लुखुं कि तरपां बट्टी मेरू मन हमेशा निर्दोष रौ।

¹⁷“भौत सालों का बाद मि अपड़ा गरीब लुखुं कु भेंट पौछोलु, अर पिता परमेश्वर तैं बलिदान चढ़ांणु कु यरूशलेम शहर मा अयुं छो।

¹⁸मि शुद्ध हूंणा की रीति का बलिदान का बाद यरूशलेम शहर का मन्दिर मा छो, यहूदियों ल मि तैं उख देखि; अर उख न कुई भीड़ छै अर न गड़बड़ी,

¹⁹पर उख एशिया प्रदेश का कुछ यहूदी लोग छा। जु ऊं तैं लगदो कि मिल कुछ गलत करयूं च, किलैकि ऊंल देखि की मंदिर मा क्य हवे छो, त मि पर भंगार लगांणु कु ऊं तैं इख तेरु संमणी हूंण चयणु छो।

²⁰या यु लोग अफी बतौ कि जब मि महासभा का संमणी खड़ो हुयुं छो त यूं ल मि पर क्य भंगार पै,

²¹इलै एकमात्र भंगार जु उ मेरा खिलाफ लगै सकदा छिनी, उ यु च जब मिल कचहरी मा पुकारी के बोलि छो, किलैकि मि विश्वास करदु छों कि परमेश्वर ऊं लुखुं तैं जु मुरयां छिनी ज्यून्दो करलो इलै मेरू मुकदमा हूंणु च”

²²फेलिक्स राज्यपाल जु प्रभु का रस्ता का बारा मा ठिक ढंग से जंणदु छो, इलै वेल इन बोलि के या बात खत्म कैरी दींनि कि, “जब सेनापति लूसियास आलो, त मि तुम्हरा मुकदमा की जांच कैरी के न्याय करुलु।”

²³अर वेल सुबदार तैं आज्ञा दींनि कि, पौलुस तैं कुछ छूट मा रखि के रखवली करयां, पर वेका दगड़ियों मा बट्टी कै तैं भि वेकी सेवा कन से नि रुकयां।

²⁴कुछ ही दिन का बाद फेलिक्स राज्यपाल अपड़ी घरवलि द्रुसिल्‍ला तैं अफ दगड़ी लै के ऐ अर व यहूदी छै अर उ पौलुस तैं मिलणु कु ऐ छा। ऊंल पौलुस तैं बुलै के वे विश्वास का बारा मा जु मसीह यीशु पर च, वे बट्टी सूंणि।

²⁵पर जब पौलुस धार्मिकता अर सयंम अर औंण वला जांच के न्याय की विचार कनु छो, तब फेलिक्स ल डैरी के जवाब दींनि, “इलै अभि त तु जै सकदी छै पर मौका मिललो त मि त्वे तैं फिर बुलौलु।”

²⁶जबकि फेलिक्स ऊं बातों का बारा मा डरदु छो जु पौलुस ल बोलि छै, फिर भि उ अक्सर वे तैं बुल्दो छो अर वे दगड़ी बात करदो छो किलैकि उ आस करदो छो अर सुचद छो कि पौलुस जेलखना बट्टी भैर निकलण कु वे तैं कुछ रूपया दयालो।

²⁷इन ही कै जब द्वी साल बीति गैनी त फेलिक्स का जगह पुरकियुस फेस्तुस राज्यपाल बंणि गै, अर फेलिक्स यहूदियों तैं खुश कनै की इच्छा ल पौलुस तैं बंधि ही छोड़ी गै।