Read Garhwali प्रेरितों के काम 28 Bible Online

प्रेरितों के काम 28 - Garhwali bible

प्रेरितों के काम 28

¹जब हम सभि बचि के छाला पौंछयां तब हम तैं मालुम हवे कि यु टापू को नौं माल्टा च।

²उख लुखुं ल हम पर बड़ी कृपा कैरी, बरखा लगिं छै अर जडो लगणु छो इलै ऊंल आग जगै के हमारो प्रेम का दगड़ी स्वागत कैरी।

³जब पौलुस ल लखड़ा कट्ठा कैरी के आग मा रखिनि तब हाल लगण से एक गुरो निकली अर उ पौलुस का हथ पर लिपटी गै।

⁴जब उख लुखुं ल वेका हथ पर गुरो (जानवर) लिपटयुं देखि त ऊंल एक हैंका बट्टी बोलि, “जरूर यु आदिम खूनि च हलांकि यु समुद्र बट्टी बचि के ऐ गै पर हमारी न्याय की देवी बट्टी नि बचि सकद।”

⁵पर पौलुस ल उ गुरो (जानवर) आग मा फेंकी दींनि अर वे तैं कुछ भि नुक्सान नि हवे।

⁶पर लुखुं ल सोचि, कि उ उसै जालो या झट पोड़ि के मोरि जालो पर काफी अबेर तक इन्तेजार कना बाद भि जब ऊंल देखि कि वे तैं कुछ नि हवे त ऊंल अपड़ा विचार बदली के बोलि, “जरूर यु कुई देबता च।”

⁷वीं जगह का नजदीक वे टापू का नजदीक पर प्रधान शासक पुबलियुस कि जमींन छै, वेल अपड़ा घौर लिजै के तीन दिन तक हमारी प्रेम का दगड़ी खूब इज्जत खातिर कैरी।

⁸अब इन हवे कि पुबलियुस को बुबा जौर ल अर करासी ल बिमार पुड़यूँ छो। पौलुस ल कमरा का भितर जै के पिता परमेश्वर बट्टी प्रार्थना कैरी अर वे पर अपड़ा हथ रखि के उ खूब कैरी दींनि।

⁹जब लुखुं तैं या बात मालुम हवे त वे टापू का और बकि बिमार लोग भि पौलुस मा ऐनी अर उ सभि खूब करे गैनी।

¹⁰ऊंल हमारी खूब इज्जत खातिर कैरी अर तीन मैना बाद जब हम जांणु कु तैयार छा त उख बट्टी जहाज मा बैठी ग्यां त जु कुछ हम तैं चयणु छो उ ऊंल जहाज मा रखि दींनि।

¹¹तीन मैना बाद हम ल सिकन्दरिया का जहाज पर यात्रा शुरू कैरी, यु पांणी कु जहाज ठण्ड का कारण यु टापू पर ठहरयूं छो, यु पांणी का जहाज का अगनैं वला भाग पर एक जोड़ी यूनानी देबतों की आकृति गढी छै, “दियुसकूरी” बंणि छै।

¹²अर हम सुरकूसा शहर मा पौंछयां उख हम उख तीन दिन तक रैयां।

¹³उख बट्टी हम जहाज का द्वारा यात्रा कैरी के रेगियुम शहर मा अयां, अर एक दिन बाद दक्षिण बट्टी बथौं ऐ तब दुसरा दिन हम पुतियुली शहर मा ऐ ग्यां।

¹⁴उख हम तैं मसीह विश्वासी भैय मिलिनि अर ऊंल हम तैं निमंत्रण दींनि कि सात दिन तक हमारा इख रावा अर वेका बाद, हम ल धरती मार्ग का रस्ता रोम शहर की तरपां अपड़ी यात्रा शुरू कैरी।

¹⁵तब रोम शहर का मसीह विश्वासी भैय हमारा औंणै कि खबर सूंणि के अप्पियुस का चौक तक अर तीन धर्मशाला वली जगह तक हम तैं मिलुणु कु ऐनी। ऊं तैं देखि के पौलुस ल पिता परमेश्वर तैं धन्यवाद दींनि अर हिम्मत बंधि।

¹⁶जब हम रोम शहर मा ऐ ग्यां तब पौलुस तैं इखुली रौंणो को आज्ञा दिये गै अर एक सिपै वेकी देखभाल कनु कु रखे गै।

¹⁷तीन दिन का बाद पौलुस ल यहूदियों का बड़ा सम्मानित लोग कट्ठा करिनी अर जब उ कट्ठा हवीनि तब पौलुस ल ऊंकु बोलि “मेरा विश्वासी भयों मिल हमारा लुखुं या पुरखों की रीति-रिवाजों का खिलाफ कुछ नि कैरी फिर भि यरूशलेम शहर बट्टी कैदी बणै के मि रोमी सरकार का हथों मा सौंपे ग्यों।

¹⁸रोमी राज्यपालों ल मि तैं जांच मा परखु अर मि तैं छुड़ण चै किलैकि मरौंण लैख मि पर कुई भंगार नि छो।

¹⁹पर जब यहूदी अगुवा यांका विरोध मा बुल्ण लगी गैनी, त मि तैं कैसर की दुहाई दींण पोड़ी; इलै न कि मि तैं अपड़ा लुखुं पर कुई भंगार लगांण छो।

²⁰यु कारण ही मिल तुम बुल्यां कि तुम दगड़ी मुलाकात कैरी के अर तुम दगड़ी बातचित कैरी साको किलैकि यीशु इस्राएलियों की आस च, जै कारण मि यूं संगलों ल बंधयूं छौं।”

²¹ऊंल वेको बोलि, “न हम तैं तेरु बारा मा यहूदिया प्रान्त का लुखुं बट्टी चिट्टी मिलिनि, अर न विश्वासी भयों ल ऐ के तेरु बारा मा कुछ बतै, अर न कुछ बुरो बोलि।

²²पर हम तेरु विचार सुणन चांणा छा किलैकि हम जंणदा छा कि हरेक जगह यु झुण्ड का खिलाफ लोग बात कना छिनी।”

²³अर तब ऊंल पौलुस तैं मिलुणु कु एक दिन तय कैरी। अर वे दिन भौत सैरा लोग वेमा ऐनी जख कि उ रौंदु छो। पौलुस सुबेर बट्टी शाम बगत तक पिता परमेश्वर का राज्य कि गव्है दींणु छो अर मूसा द्वारा लिखीं परमेश्वर की व्यवस्था अर परमेश्वर का तरपां बट्टी बुल्ण वलो कि किताबियों मा बट्टी यीशु का बारा मा विश्वास दिलांणै की कोशिश कनु छो।

²⁴तब कुछ लुखुं ल पौलुस की बातों पर विश्वास कैरी पर कुछ लुखुं ल विश्वास नि कैरी।

²⁵उ आपस मा एकमत नि हवीनि अर विदा हूंण लगि गैनी पौलुस का बुल्णा का बाद, कि पवित्र आत्मा ल परमेश्वर का तरपां बट्टी बुल्ण वला यशायाह का द्वारा तुम्हरा बाप-दादाओं बट्टी ठिक ही बोलि,

²⁶कि तु जै के यूं लुखुं बट्टी बोलि दे, “कि सुनांणु कु त सूंणि ल्या पर नि समझिल्या देखुणु कु त दिखल्या पर नि जणिल्या ”

²⁷किलैकि यूं लुखुं का दिल निठुर हवे गैनी अर यूंका कन्दूड़ बुझै गैनी यूं ल अपड़ा आंखा बूजेनी कखि इन नि हो कि उ आँखों ल दिखुनु अर कन्दूड़ो ल सुनांणु दिल मा समझी जौनु अर अपड़ा मन फिरौनु अर मि ऊं तैं खूब कैरी द्यों।[83]

²⁸इलै, मि चांदु छो तुम यु जणिल्यो कि पिता परमेश्वर को उद्धार को यु शुभ संदेश अन्यजाति का लुखुं मा भिजे गै अर उ सुणला।[84]

²⁹जब वेल इन बोलि, त यहूदी आपस मा बहस करदी-करदी उख बट्टी चलि गैनी।[85]

³⁰पौलुस पूरा द्वी साल तक अपड़ा किराया का घौर मा रै अर जु वेमा औंदा छा उ ऊं सभियूं को स्वागत करदो छो।

³¹अर उ बगैर कैं रुकावट का निडर हवे के पिता परमेश्वर को राज्य को प्रचार करदो छो अर प्रभु यीशु मसीह का बारा मा शिक्षा दींदु छो।