Read Garhwali प्रेरितों के काम 5 Bible Online

प्रेरितों के काम 5 - Garhwali bible

प्रेरितों के काम 5

¹हनन्याह नौं का एक आदिम अर वेकी घरवलि सफीरा ल अपड़ी सम्पति कु एक भाग बेचि।

²हनन्याह ल वेका दाम मा बट्टी कुछ आप कु रख छोड़ी अर ईं बात तैं वेकी जनन भि जंणदी छै अर एक हिस्सा लैके ऊं प्रेरितों तैं दे दींनि।

³पर पतरस ल बोलि, “हे हनन्याह किलै शैतान तैं तिल मौका द्ये कि उ तेरु दिल मा पवित्र आत्मा बट्टी झूठ बुल्णों को विचार डालो। किलै तिल वेकी बात सूंणि अर तिल अपड़ी बिकीं भूमि को एक भाग अफ कु रखि द्ये”

⁴क्य बिकै जांण का बाद उ भूमि तेरी नि छै? अर जब बिकी गै त वेको दाम क्य तेरु वश मा नि छो? तेरु मन मा इन बुरा कामों कु विचार किलै ऐ? तिल मनिख्युं मा न बल्कि परमेश्वर बट्टी झूठ बोलि।

⁵यूं बातों तैं सुंणदा ही हनन्याह भूमि मा भुयां लमडी, अर वेकी मौत हवे गै अर सब सुनण वलो पर बड़ो डौर छै गै।

⁶फिर कुछ जवानों ल ऐ के वेकी लांश तैं कपड़ा मा लपेटी के अर भैर लिजै के खडै दींनि।

⁷लगभग तीन घंटा बाद वेकी घरवलि जु कुछ हवे छो नि जांणि के भितर ऐ।

⁸तब पतरस ल वीं मा बोलि, “क्य तुम द्वीयूँ ल भूमि तैं इथग मा ही बेचि छो” वीं ल बोलि “हाँ इथग मा ही बेचि।”

⁹पतरस ल वीं मा बोलि, “या क्य बात च कि तुम दुयूं ल प्रभु कि आत्मा कि अजमैश कु एक मनसा कैरी? देख तेरु आदिम का दफनौंण वला द्वार पर ही खड़ा छिन अर अब उ त्वे तैं भि भैर ली जाला।”

¹⁰तब व तुरंत भूमि पर लमडी गै, उ मोरि गै अर जवानों ल भितर ऐ कि वे तैं मुर्युं पै अर भैर लिजै के वीं का आदिम का संमणी दफनै दींनि।

¹¹अर सैरी मण्डलि जु यरूशलेम शहर मा छै, यूं बातों का सब सुनण वलो पर भौत डौर छै।

¹²प्रेरितों का द्वारा भौत चिन्ह अर चमत्कार का काम लुखुं का बीच मा दिखै जांदा छा अर मसीह का विश्वासी सब एक चित हवे कै राजा सुलैमान का चौका मा कट्ठा हूंद छा।

¹³जौं ल अब तक यीशु पर विश्वास नि कैरी छो कै तैं यु साहस नि हूंद छो कि ऊं दगड़ी मिली जौंन तब भि लोग ऊं की बड़ै करदां छा।

¹⁴प्रभु मा विश्वास कन वला की गिनती बढ़दी गै।

¹⁵प्रेरित जु कुछ कना छा वेका ऊं कामों तैं देख लोग बिमारों तैं बट्टा मा लै-लै के खाट पर लिटै दींद छा कि जब पतरस औ, त वेकी छाया ऊंमा बट्टी कै पर पड़ी जौं।

¹⁶अर यरूशलेम शहर का अमणी-संमणी का शहरों बट्टी भि भौत लोग बिमारों तैं अर दुष्टात्माओं का सतायां छा ऊं तैं लै-लै के, प्रेरितों का संमणी कट्ठा हुंदा छा, अर उ सब खूब हुंदा जांदा छा।

¹⁷तब महायाजक अर वेका सब जु सदूकियों का झुण्ड का छा, उ प्रेरितों बट्टी जलन कन लगि गैनी।

¹⁸अर महायाजक अर सदूकियों ल प्रेरितों तैं गिरफ्तार कैरी कै जेलखना मा बंद कैरी दींनि।

¹⁹पर राती प्रभु का एक स्वर्गदूत ल जेलखना का द्वार खोलि के ऊं तैं भैर लै के ऊंमा बोलि

²⁰“जावा यरूशलेम शहर का मन्दिर मा खड़ा लुखुं तैं यु नया अनन्त जीवन का बारा मा बतावा।”

²¹प्रेरित बड़ी सुबेर मा उठि के यरूशलेम शहर का मन्दिर मा गै जन ऊं तैं स्वर्गदूत ल बतै छो अर शिक्षा दींण शुरू कैरी। फिर जब महायाजक अर वेका दगड़िया उख पौछिनी त ऊंल यहूदी झुण्ड अर इस्राएल का दाना सयाणों की पूरी महासभा बुलै अर जेलखना कु रैबार भेजि कि ऊं प्रेरितों तैं इख लौनु।

²²पर मन्दिर का रखवलों ल उख पौंछि कै ऊं तैं जेलखना मा नि पै अर लौटि के बतै

²³“हम ल जेलखना बड़ी चौकसी ल बंद करयूं देखि अर पैैरादारों तैं भैर फाटक पर खड़ो होंयुं देखि पर जब जेलखना तैं खोलि त भितर कुई नि छो।”

²⁴जब यरूशलेम शहर का मन्दिर का रखवलों का सरदार अर प्रधान याजक ल या बात सूंणि त ऊं चेलों का बारा मा भौत चिंता मा पड़ी गैनी कि यांको क्य परिणाम होलो

²⁵इथग मा कैन ऐ के ऊं तैं बतै “देखा जौं तैं तुम ल जेलखना मा बंद कैरी छो उ यरूशलेम शहर का मन्दिर मा खड़ा हवे के लुखुं तैं उपदेश दींण छिन।”

²⁶जब ऊंल यु सूंणि, तब मन्दिर का रखवलों का सरदार का दगड़ी मन्दिर मा गैनी, अधिकारियों का दगड़ी जै कै, प्रेरितों तैं महासभा का संमणी लै ऐनी, पर जोर जबरदस्ती ल न उ लुखुं बट्टी डरदा छा कि लोग ढुंग्यो मार-मारि के ऊं की हत्या कैरी दयाला।

²⁷ऊंल प्रेरितों तैं फिर लै के महासभा का संमणी खड़ो कैरी दींनि तब महायाजक ल ऊंमा पूछि,

²⁸“क्य हम ल तुम तैं चितै के आज्ञा नि दे छै कि यीशु का नौं से उपदेश नि दियां? तब भि देखा तुम ल सैरा यरूशलेम शहर तैं अपड़ा उपदेश से भोरियाली अर तुम यु मनिख कि ल्वे कु भंगार जबरदस्ती हम पर लगौंण चांणा छा।”

²⁹तब पतरस अर बकि प्रेरितों ल जवाब दींनि “मनिख्युं कि आज्ञा से बढ़ि के परमेश्वर कि आज्ञा को पालन कन हमारो फर्ज च।

³⁰हमारा पूर्वजों का पिता परमेश्वर ल यीशु तैं मुर्दों मा बट्टी ज्यूँदो कैरी द्ये जै तैं तुम ल सूली पर लटकै के मारि डाली छो।

³¹वे तैं ही पिता परमेश्वर ल प्रभु अर उद्धारकर्ता का रूप मा अपड़ा दैंणा हथ का तरपां सर्वश्रेष्ठ जगह मा ऊंचो कैरी कि उ इस्राएलियों तैं अपड़ा बुरी सोच विचार अर बट्टों बट्टी पिता परमेश्वर की तरपां मुड़ा अर वेका द्वारा अपड़ा पापों की माफी पां।

³²हम यूं बातों का गवाह छा अर उन ही पवित्र आत्मा भि जु परमेश्वर ल ऊं तैं दियुं च जु वेकी आज्ञा मणदींनि।”

³³जब महासभा का सदस्यों ल यु सूंणि त उ भौत गुस्सा हवे गैनी, अर प्रेरितों तैं मरण चांदा छा।

³⁴पर गमलीएल नौं को एक फरीसी अर मूसा की व्यवस्था तैं सिखांण वलो अर सब लुखुं मा जंणयूं-मंणयूं छो वेल महासभा मा खड़ो हवे के चेलों तैं जरा देरो कु भैर लिजांणै आज्ञा दे दींनि।

³⁵तब वेल महासभा का सदस्यों मा बोलि, “हे इस्राएलियों तुम यूं मनिख्युं का दगड़ा मा जु कुछ भि कना छा सोचि समझी के करयां।

³⁶किलैकि यूं दिनों से पैली थियूदास यु बोलि के प्रगट हवे, लुखुं तैं बतै की उ एक महान आदिम च अर लगभग चार सौ लोग वे दगड़ी हवे गैनी पर उ मरै गै अर जथग लोग वे तैं मंणदा छा सब तितर-बितर हवीनि अर हरचि गैनी।

³⁷वांका बाद जनगणना का दिनों मा गलील वासी यहूदा ऐ, अर कुछ लुखुं तैं अपड़ी अर कैरी द्ये उ भि मरै गै, अर जथग लोग वे तैं मनणवला छा उ भि तितर-बितर हवे गैनी।

³⁸इलै मि अब तुम मा बुल्णु छौं इंदरा लुखुं बट्टी दूर रावा अर यूं बट्टी कुछ भि काम नि रखा किलैकि जु यु योजना या काम मनिख्युं कि तरपां बट्टी होलो त मिट जालो

³⁹पर जु परमेश्वर कि तरपां बट्टी च त तुम ऊं तैं कभि नि मिटै सकिल्या। कखि इन नि हो कि तुम परमेश्वर दगड़ी भि लड़णा वला ठैरा।”

⁴⁰तब ऊंल वेकी बात मांणी अर प्रेरितों तैं बुलै के पिटवै अर ऊं यु आज्ञा दे कि उ अब बट्टी यीशु का नौं मा कुछ नि बोलि अर फिर ऊं तैं मुक्त कैरी द्ये।

⁴¹प्रेरित ईं बात से खुश हवे के महासभा का संमणी बट्टी चलि गैनी की उ यीशु की खातिर निरादर हूंण का लैक त ठैरयां।

⁴²यांका बाद हरेक दिन, यरूशलेम शहर का मन्दिर मा अर घौर-घौर मा, प्रेरित हर बगत सिखांण अर शुभ सन्देश प्रचार करदा छा कि यीशु ही मसीह च।