Read Garhwali रोमियों 1 Bible Online

रोमियों 1 - Garhwali bible

रोमियों 1

¹या चिट्ठी पौलुस कि तरपां बट्टी जु यीशु मसीह को सेवक च, अर जु परमेश्वर कि तरपां बट्टी प्रेरित हूंणु कु चुणै गै, अर परमेश्वर कु शुभ सन्देश प्रचार कनु कु भिजै गै।

²पिता परमेश्वर ल यु शुभ संदेश की सौं भौत पैली बट्टी परमेश्वर का वचन मा परमेश्वर का तरपां बट्टी बुल्ण वलो का द्वारा कैरी छै,

³यु शुभ सन्देश वेका नौंना, हमारा प्रभु यीशु मसीह का बारा मा च वेको जन्म राजा दाऊद का वंशज का परिवार मा हवे छो।

⁴अर पवित्र आत्मा का भाव बट्टी मुरयां मा बट्टी ज्यून्दा हूंण का कारण सामर्थ का दगड़ी पिता परमेश्वर कु नौंनो ठैरी, उ यीशु मसीह हमारो प्रभु च।

⁵मसीह का द्वारा मि पौलुस तैं दया अर प्रेरिताई परमेश्वर का द्वारा दिये गै कि मसीह यीशु का नौं का कारण सब अन्य-जाति का लोग मसीह का बारा मा शुभ संदेश पर विश्वास कैरी कै अर वेकी आज्ञाओं कु पालन कैरा,

⁶तुम जु रोम शहर मा रौंदयां तुम भि यूं लुखुं मा शामिल छा जौं तैं यीशु मसीह का ही हूंणु कु बुलै छा।

⁷या चिट्ठी रोम शहर मा रौंण वला ऊं सभियूं का नौं च जु परमेश्वर का प्रिय छिनी, अर पवित्र लोग हूंणु कु बुलै गैनी हमारा पिता परमेश्वर अर प्रभु यीशु मसीह कि तरपां बट्टी तुम तैं कृपा अर शान्ति मिलदी रौ।

⁸पैली मि तुम सभियूं कु यीशु मसीह का द्वारा अपड़ा पिता परमेश्वर कु धन्यवाद करदु छों, किलैकि यीशु मसीह मा तुमारा विश्वास कि चर्चा सैरी दुनिया मा हूंणी च।

⁹पिता परमेश्वर जैकी सेवा मि अपड़ा पूरा मन बट्टी कनु छों वेका नौंना यीशु मसीह का शुभ सन्देश कु प्रचार लुखुं मा कनु छौं, उ मेरू गवाह च कि मि अपड़ी प्रार्थनाओं मा तुम तैं हमेशा याद कनु रौंदु।

¹⁰अर रोज अपड़ी प्रार्थनाओं मा बिनती करदु, कि परमेश्वर की मनसा बट्टी कुई न कुई ढंग मि तैं अंत मा तुमारा नजीक औंणु कु मौका मिलो।

¹¹किलैकि मि तुम बट्टी मिलणै कि इच्छा करदु, कि मि पिता परमेश्वर की कृपा बट्टी तुम तैं कुछ आत्मिक वरदान दयूं ज्यां बट्टी तुम मजबूत हवे जावा,

¹²मेरू बुल्णों कु मतलब यु च कि जब मि तुम मा औं, तब तुम अर मि दगड़ा मा एक-दुसरा का विश्वास का द्वारा प्रोत्साहित हों।

¹³अर हे मेरा विश्वासी भयों, मि चांदु कि तुम जणिल्या कि मि बार-बार तुम मा औंण चै, कि जन मिल अन्यजातियों का बीच मा मसीह कु शिष्य बणैंनि, उन ही के तुम मा भि बणौं, पर अब तक यांमा रुकावट ही हवे।

¹⁴मेरी जिम्मेदारी सभि लुखुं तैं शुभ संदेश सुनांणै कि च, चै उ यूनानी अन्यजाति भाषा जनण वला हो या नि जनण वला हो अर चै समझदार हो या न समझ हो।

¹⁵इलै मि तुम तैं जु रोम शहर मा रौंदयां, शुभ सन्देश प्रचार कनु कु भरसक तैयार छों।

¹⁶किलैकि मि तैं मसीह का बारा मा शुभ सन्देश पर पूरो भरोसो च, शुभ संदेश बट्टी ही पिता परमेश्वर ल शुरुआत मा यहूदी लुखुं कु उद्धार कैरी अर फिर यूनानी अन्यजाति अर अब सभि लुखुं कु उद्धार करदो अर य ही पिता परमेश्वर की सामर्थ च।

¹⁷किलैकि शुभ संदेश मा पिता परमेश्वर यु प्रगट करद कि उ लुखुं तैं पूरा ढंग से विश्वास कना का द्वारा धर्मी घोषित कना का योग्य च, जन की परमेश्वर का वचन मा लिख्युं च, “विश्वास बट्टी धर्मी जन ज्यून्दो रालो।”

¹⁸पिता परमेश्वर कु गुस्सा त ऊं लुखुं कि सभि प्रकार कि परमेश्वर-रहित अर अधर्मी काम जु लोग करदा छिनी ऊं पर स्वर्ग बट्टी प्रगट हूंद, लोग वे बुरै का द्वारा जु उ करदींनि, दूसरों तैं पिता परमेश्वर का बारा मा सचै जनणु कु रुकदा छिनी।

¹⁹इलै कि यु सभि मनिख जातियों कु प्रगट च कि पिता परमेश्वर कन च, किलैकि परमेश्वर ल खुद ऊं पर वे तैं प्रगट कैरी।

²⁰किलैकि परमेश्वर कि अनन्त सामर्थ अर गुणों तैं नि देखै जै सकद। बल्कि यूं बातों तैं पिता परमेश्वर ल दुनिया की रचना बट्टी शुरू कैरी सभि चीजों का द्वारा दर्शयूं च। इलै ऊं लुखुं का संमणी कुई बहाना नि हवे कि उ परमेश्वर तैं नि जणदींनि।

²¹ये कारण कि पिता परमेश्वर तैं जनण पर भि ऊंल वे तैं परमेश्वर का रूप मा सम्मान नि दे, अर धन्यवाद नि कैरी, बल्कि बेकार विचार कन लगि गैनी, इख तक कि उ उन नि सुचदा जन ऊं तैं सुचण चयणु च, उ सै रीति बट्टी नि सुचदींनि।

²²उ अपड़ा आप तैं समझदार जतै कै मूर्ख बंणि गैनी।

²³अर हमेशा ज्यूँदो रौंण वला पिता परमेश्वर कि महिमा का उ लोग जु हमेशा ज्यूंदा नि रै सकण वला मनिख, अर चलखुडोंं, अर चौपायों, अर रिंगण वला जानवरों कि मूर्तियों का समानता मा बदली गैनी।

²⁴ये कारण पिता परमेश्वर ल ऊं तैं ऊंका मन कि अभिलाषाओं का अनुसार यौन अशुद्धता कु छोड़ी येले, कि उ आपस मा बुरा कामों मा अपड़ा देह कु अनादर कैरा।

²⁵उ परमेश्वर का बारा मा सचै पर विश्वास कन छोड़ी दींदिनि, अर उ वे तैं स्वीकार करदींनि जु झूठ च, ऊंल परमेश्वर का बजाय सृष्टि की आराधना अर सेवा कैरी; परमेश्वर जु सभि चीजों कु सृष्टिकर्ता च वेकी महिमा हमेशा हूंदी रौ। आमीन।

²⁶इलै परमेश्वर ऊं तैं घृणित वासनाओं तैं कनु कु छोड़ी दींनि इख तक कि ऊंका जननों ल आदिमों तैं चांण बंद कैरी येले अर यांका अलावा उ अन्य जननियों तैं चांण लगी गैनी।

²⁷ऊं ही आदिम भि जननों का दगड़ा मा स्वभाविक बरतौ छोड़ी कै आपस मा कामातुर हवे के जलण लगि गैनी, अर आदिमों ल आदिमों का दगड़ा मा कुकर्म कैरी कै अपड़ा मथि अपड़ी ही गलतियों कि सजा तैं लौदींनि।

²⁸किलैकि ऊंल पिता परमेश्वर का ज्ञान तैं बणयूं रखण ठिक नि समझी, त परमेश्वर ल भि उ सभि अनुचित काम कनु कु ऊं तैं ऊंका निकम्मा मन का वश मा छोड़ी येले।

²⁹उ सभि किस्मै कि अधर्म, अर दुष्टता, लोभ, अर बैरभाव बट्टी भूरै गैनी; अर डाह, अर हत्या, अर झगड़ा, अर छल, अर जलन बट्टी भूरै गैनी, अर चुगलखोरि,

³⁰गपशप कन वला, निंदा कन वला, परमेश्वर बट्टी घृणा कन वला, हिंसक, बड़ा मौनया, डींगमार, बुरी-बुरी बात बनांण वला, ब्वे-बुबा कि आज्ञा कु उल्लंघन कन वला,

³¹निर्बुद्धि, विश्वासघाती, प्रेम अर दया का बगैर छिनी अर निर्दयी हवे गैनी।

³²उ त परमेश्वर की यूं विधि तैं जंणदा छिनी कि इन-इन काम कन वला मौत का दण्ड का हकदार छिनी, अर फिर भि इन काम करदींनि अर कन वलो बट्टी खुश भि हूंदींनि।