Read Garhwali रोमियों 12 Bible Online

रोमियों 12 - Garhwali bible

रोमियों 12

¹इलै हे विश्वासी भयों, मि तुम बट्टी परमेश्वर कि दया याद दिलै के बिनती कनु छौं, कि अपड़ा जीवन तैं ज्यूँदो, अर पवित्र, अर पिता परमेश्वर तैं अच्छो लगण वलो बलिदान कैरी के चढ़ावा; अर यु ही पिता परमेश्वर की आराधना, सेवा कनु को सै ढंग च।

²अर ईं दुनिया का लुखुं का जन नि बंणा; पर अपड़ा सुचणा का ढंग तैं पिता परमेश्वर कु बदली द्या, ज्यां बट्टी तुम परमेश्वर की भलि, अर लुभौण, अर सिद्ध मनसा तैं मालुम करदी रावा।

³किलैकि मि वीं दया का कारण जु परमेश्वर बट्टी मि तैं मिल्युं च, तुम मा बट्टी हरेक कु बुल्णु छौं, कि जन समझण चयणु च, वे बट्टी बढ़ि के कुई भि अपड़ा आप तैं नि समझो; पर जन पिता परमेश्वर ल हरेक तैं परिमाण का अनुसार जथग विश्वास दियुं च उथग ही बांटि, उन ही अच्छी बुद्धि का दगड़ी अपड़ा आप तैं समझा।

⁴किलैकि जन हमारी देह मा भौत सी अंग छिनी, अर सभि अंगों कु एक ही जन काम नि च;

⁵वे जन ही, हम भि जु मसीह मा विश्वासी छा, हम सभि मसीह का देह का अंग छा, अर हम सभि एक-दुसरा बट्टी जुड़यां छा।

⁶अर जबकि वीं दया का अनुसार ज्वा परमेश्वर ल हम तैं दीं च, हम तैं अलग-अलग वरदान मिल्यां छिनी, त जै तैं भविष्यवाणी कनु कु वरदान मिल्युं च, वे तैं ऊं बातों तैं बुल्ण चयणु च जै पर उ विश्वास करदो च की परमेश्वर ल वे तैं बतयूं च।

⁷जु तैं दूसरों की मदद कनु को वरदान मिल्युं हो, त मदद कन मा लग्युं रो, जु कुई सिखांण वलो हो, त सिखौंण मा ही लग्यूं रौ;

⁸जु प्रोत्साहित कनु कु उपदेशक हो, उ उपदेश दींण मा लग्यूं रौ; जु दूसरों की जरूरतों तैं पूरो कनु कु वरदान हों, त उदारता ल द्ये; या जु अगुवाई कनु कु वरदान हो, त वे तैं पूरा ढंग बट्टी कैरा अर जु दया कैरो, उ खुश हवे के कैरो।

⁹दूसरों बट्टी प्रेम कनु कु दिखावा नि कैरा; बुरै बट्टी घृणा कैरा; भलै कन मा लगयां रावा।

¹⁰परिवार का जन एक दुसरा बट्टी प्रेम कैरा; एक दुसरा कु आदर कन मा बढ़दी रावा।

¹¹भौत परिश्रम कैरा अर आलसी नि बणा पूरा उत्साह का दगड़ी पिता परमेश्वर की सेवा करदी रावा।

¹²हम मा जु आस च वे कारण खुशी मनावा; क्लेश मा धीरज रखा; अर प्रार्थना करदी रावा।

¹³पवित्र लुखुं तैं जु कुछ जरूरी हो, वेमा ऊंकी मदद कैरा; मेहमानदरी कन मा लगयां रावा।

¹⁴अपड़ा सतौंण वलो तैं आशीष द्यावा; आशीष द्यावा पर श्राप नि द्यावा।

¹⁵खुशी मनांण वलो का दगड़ा मा खुशी मणांवा अर रूंण वलो का दगड़ा मा रौवे ल्यावा।

¹⁶एक दुसरा कु उथग ही ध्यान रखा जथग अपड़ो रखद्यां; घमण्ड नि कैरा पर सीधा लुखुं का दगड़ा मा संगति रखा; अर अपड़ी नजर मा बुद्धिमान नि हो।

¹⁷बुरै का बदला मा कै दगड़ी बुरै नि कैरा; जु बात सभि लुखुं कु भलि च, ऊंकी चिंता कैरा।

¹⁸जख तक हवे साको, तुम पूरी कोशिश ल सभि मनिख्युं का दगड़ी मेल-मिलाप रखा।

¹⁹हे प्रियों बदला नि लियां; पर परमेश्वर तैं अपड़ो बदला लींण द्या, किलैकि परमेश्वर का वचन मा लिख्युं च, “बदला लींण मेरू काम च, प्रभु बुल्द मि ही बदला दयुलु।”

²⁰पर जन परमेश्वर का वचन मा लिख्युं च, “जु तेरु बैरी भूखो हो त वे तैं खांणु खिलौ, जु तिसलो हो, त वे तैं पांणी पिलौ; किलैकि इन कै तु वे तैं लज्जित कैरी दीलि।”

²¹बुरै तैं अपड़ा मथि जीत हासिल नि कन द्या, पर भलै बट्टी बुरै तैं जीत ल्यावा।